Ña̱ kivi chindeétáʼan xíʼin ná ñaʼá ná íxandi̱va̱ʼana xíʼin

Saá kíxáʼa ña̱ artículo ña̱ va̱xi nu̱ú jw.org ña̱ naní “Ña̱ káʼa̱n Biblia xa̱ʼa̱: ná ñaʼá ná xóʼvi̱”, ña̱yóʼo kivi sanuúnña nu̱ú PDF tándi̱ʼi kivi ixaa imprimiúnña tasaá sandátaʼnuña. Iin ñá hermana ñá naní Stacy ñá ñuu Estados Unidos káchiñá: “Ta̱vái̱ ku̱a̱ʼá copia tutu yóʼo, tasaá ni̱xa̱ʼi̱n xíʼin inka ñá hermana ta ni̱xa̱ʼa̱nndi̱ sa̱ndákoondi̱ña iin veʼe nu̱ú ndákiʼinna ná ñaʼá ná íxandi̱va̱ʼana xíʼin”.

Iin ñaʼá ñá káchíñu veʼe kán ndu̱kúñá ku̱a̱ʼá copia ña̱ va̱ʼa xaxañá ña̱yóʼo ndaʼa̱ ná ñaʼá ná íyo kán. Sa̱ndákooná 40 ña̱yóʼo xíʼin 30 tarjeta ña̱ contacto ña̱ jw.org ndaʼa̱ñá, ta tá ni̱xa̱ʼa̱nná inka yichi̱ ñá kíʼin kuenta xíʼin veʼe kán ni̱ka̱ʼa̱nñá ña̱ kúni̱ñá ña̱ ná kunda̱a̱-ini ná ñaʼá ná íyo kán ndáa ki̱ʼva káʼvi na̱ testigo Jehová xíʼin na̱ yiví.

Tá ni̱xa̱ʼa̱n ñá Stacy xíʼin inka u̱vi̱ ná hermana inka veʼe nu̱ú kíʼinna kuenta xíʼin ná ñaʼá ná íxandi̱va̱ʼana xíʼin, viíníva nda̱kiʼinnaná ta ta̱xina u̱ʼu̱n tutu yóʼo ndaʼa̱na tasaá ndukúná ku̱a̱ʼákaña. Iin ñá káchíñu kán ni̱ka̱ʼa̱nñá ña̱yóʼo: “Folleto yóʼo kivi chindeétáʼanña xíʼin ku̱a̱ʼání ná ñaʼá ná íyo yóʼo. Xíniñúʼundi̱ ku̱a̱ʼání tutu yóʼo”. Iinka yichi̱ tá ni̱xa̱ʼa̱n ná hermana yóʼo, sava ná ñaʼá ná íyo kán nda̱kutáʼanná ña̱ va̱ʼa kunda̱a̱-inina ndáa ki̱ʼva káʼvina xíʼin na̱ yiví. Ta u̱vi̱ náyóʼo ni̱ka̱ʼa̱nná ña̱ kúni̱ná ku̱ʼu̱nná reunión mií semana kán.

Ñá Stacy káchiñá: “Nda̱kanda̱ní-inindi̱ xa̱ʼa̱ ña̱ va̱ʼaní nda̱kiʼinna tutu yóʼo. I̱xaa imprimindi̱ña ta sa̱ndátaʼnundi̱ña nda̱a̱ táki̱ʼva íyo iin folleto. Ña̱yóʼo va̱ʼaní chíndeétáʼanña xíʼindi̱ ña̱ natúʼunndi̱ xa̱ʼa̱ Reino Ndióxi̱ xíʼin ná ñaʼá ná íxandi̱va̱ʼana xíʼin. Nda̱kanda̱ní-inindi̱ xa̱ʼa̱ ña̱ va̱ʼaní xi̱niso̱ʼona. Kúsi̱íní-inindi̱ xa̱ʼa̱ ndáa ki̱ʼva taxi Jehová bendición ndaʼa̱ndi̱ ña̱ ndukúndi̱ inka ki̱ʼva ña̱ natúʼunndi̱ xa̱ʼa̱ tu̱ʼun va̱ʼa”.