Inkáchi ná kutáʼan ndiʼiyó

TA̱ APÓSTOL Pablo ni̱ka̱ʼa̱nra xíʼin na̱ Cristiano na̱ ñuu Éfeso ña̱yóʼo: “Kundeé-inindó xíʼin táʼanndó xa̱ʼa̱ ña̱ kúʼvi̱-inindó xínitáʼanndó; chika̱a̱níndó ndee̱ ña̱ inkáchi kutáʼan ndiʼindó” (Efes. 4:2, 3).

Ta̱ Pablo ni̱ka̱ʼa̱nra ña̱ espíritu santo kúú ña̱ chíndeétáʼan xíʼinyó ña̱ vií kutáʼanyó ta ña̱yóʼo kúú ndee̱ Ndióxi̱. Saátu ni̱ka̱ʼa̱nra ña̱ ná chika̱a̱yó ndee̱ ña̱ viíní kutáʼanyó. ¿Ndáana xíniñúʼu keʼé ña̱yóʼo? Iin tá iin na̱ cristiano xíniñúʼu chika̱a̱na ndee̱ ña̱ vií kutáʼanna.

Ndakanixi̱ní ña̱ sa̱níʼi̱na iin carro xa̱á miíún. ¿Ndáana xíniñúʼu kiʼin kuenta xíʼin túyóʼo? Kúnda̱a̱-iniyó ña̱ miíún kúú na̱ xíniñúʼu kiʼin kuenta xíʼin túyóʼo. Ña̱kán tá kǒo níkiʼún kuenta xíʼin túyóʼo ta ni̱ti̱vínú, va̱ása kivi chika̱ún ku̱a̱chi na̱ sa̱níʼi̱ túyóʼo miíún.

Ki̱ʼva saá xíniñúʼu keʼéyó ña̱ vií kutáʼanyó xíʼin na̱ hermano chi iin regalo ña̱ ta̱xi Jehová ndaʼa̱yó kúúña. Soo iin tá iinyó xíniñúʼu chika̱a̱ ndee̱ ña̱ keʼéyó ña̱yóʼo. Ña̱kán tá va̱ása vií kítáʼanyó xíʼin iin ta̱ hermano á iin ñá hermana, ná nda̱ka̱tu̱ʼunyó ña̱yóʼo miíyó: “¿Á chíkai̱ ndee̱ ña̱ vií kutáʼi̱n xíʼin na̱ hermano ta ndasaviíi̱ ku̱a̱chi ña̱ kúúmiíi̱ xíʼinna?”.

CHIKA̱A̱NÍNDÓ NDEE̱ ÑA̱ INKÁCHI KUTÁʼAN NDIʼINDÓ

Nda̱a̱ táki̱ʼva xa̱a̱ ku̱ndaa̱-iniyó, ta̱ Pablo ni̱ka̱ʼa̱nra ña̱ sava yichi̱ xíniñúʼu chika̱a̱níyó ndee̱ ña̱ va̱ʼa vií kutáʼan ndiʼiyó xíʼin na̱ hermano. Tá iin na̱ hermano ke̱ʼéna ña̱ va̱ása va̱ʼa xíʼinyó, xíniñúʼu chikaa̱níyó ndee̱ ña̱ keʼéyó ña̱yóʼo saáchi kúni̱yó vií kutáʼanyó xíʼinna. Soo, ¿á xa̱a̱ ndi̱ku̱n xíniñúʼu ku̱ʼu̱nyó nu̱ú na̱ ke̱ʼé ña̱ va̱ása va̱ʼa xíʼinyó ña̱ va̱ʼa ndasaviíyó ku̱a̱chi? Va̱ásaví. Ná nda̱ka̱tu̱ʼunyó ña̱yóʼo miíyó: “Tá ndeéní ndíʼi-inii̱ xa̱ʼa̱ ña̱ ku̱u, ¿á chindeétáʼan ña̱yóʼo xíʼi̱n ña̱ viíka kutáʼi̱n xíʼinna á ku̱a̱chikava kuaʼnu?”. Sava yichi̱ xíniñúʼu nandósó-iniyó xa̱ʼa̱ ña̱ ku̱u á koo káʼnu-iniyó xa̱ʼa̱na (Prov. 19:11; Mar. 11:25).

Ña̱ xítoyó nu̱ú na̱ʼná: Iin ta̱ hermano íxakáʼnu-inira xa̱ʼa̱ inkara. 1. Níndichira ta inka ta̱ hermano ndáʼyi̱ra nu̱úra. 2. Ndákanixi̱níra xa̱ʼa̱ ña̱ ke̱ʼé inka ta̱ hermano xíʼinra. 3. Káʼvira Biblia ta ndákanixi̱níra xa̱ʼa̱ña. — “Tá ndeéní ndíʼi̱-inii̱ xa̱ʼa̱ ña̱ ku̱u, ¿á chindeétáʼan ña̱yóʼo xíʼi̱n ña̱ viíka kutáʼi̱n xíʼinna á ku̱a̱chikava kuaʼnu?”.

Ta̱ Pablo ta̱xira consejo yóʼo: “Kundeé-inindó xíʼin táʼanndó xa̱ʼa̱ ña̱ kúʼvi̱-inindó xínitáʼanndó” (Efes. 4:2). Tu̱ʼun yóʼo kivi kachiña “nda̱a̱ ndáaka ki̱ʼva íyo na̱ yiví kán, vií ná kutáʼanyó xíʼinna” (Comentario para exégesis y traducción. Carta a los Efesios, Mariano Ávila Arteaga). Saátu ná ndakaʼányó na̱ yiví ku̱a̱chi kúútu na̱ hermanoyó nda̱a̱ táki̱ʼva íyo miíyó. Ndiʼivayó chíkaa̱ ndee̱ ña̱ vií keʼéyó ndiʼi ña̱ʼa (Efes. 4:23, 24). Soo ndiʼiyó va̱ása kivi vií keʼéyó ndiʼiví ña̱ʼa (Rom. 3:23). Ña̱ kúnda̱a̱-iniyó xa̱ʼa̱ ña̱yóʼo va̱ása ixayo̱ʼvi̱víña xíʼinyó ña̱ vií kutáʼanyó xíʼin inkana, ña̱ ixakáʼnu-iniyó xa̱ʼa̱na ta saá xa̱a̱yó vií kutáʼanyó.

Tá ndásaviíyó ku̱a̱chi xíʼin na̱ hermano, ña̱yóʼo chíndeétáʼanña xíʼinyó ña̱ vií kutáʼanyó xíʼin ndiʼina. Tu̱ʼun griego ña̱ “viíní kutáʼanyó” ña̱ va̱xi nu̱ú Efesios 4:3 saátu kúni̱ kachiña “tu̱chu” ña̱ va̱xi nu̱ú Colosenses 2:19. Tu̱chu yóʼo kúú ña̱ sákutáʼan leke. Ta ki̱ʼva saá íyo ña̱ vií kítáʼanyó xíʼin na̱ hermano ta kúʼvi̱-iniyó xíniyóna, ña̱yóʼo chíndeétáʼan xíʼinyó ña̱ vií kutáʼanyó ni nda̱a̱ ndáaka tu̱ndóʼo kúúmiíyó xíʼinna.

Ña̱kán tá iin na̱ hermano sásáa̱na miíyó á ke̱ʼéna iin ña̱ va̱ása va̱ʼa xíʼinyó, ná chikaa̱yó ndee̱ ña̱ kundáʼvi-iniyó kuniyóna ta su̱víka ña̱ ka̱ʼa̱nyó ña̱ va̱ása va̱ʼa xa̱ʼa̱na (Col. 3:12). Xa̱ʼa̱ ña̱ kúúyó na̱ yiví ku̱a̱chi, saátu kéʼé miíyó sava yichi̱ ña̱ sásáa̱yó inkana. Ña̱ ndakuniyó ña̱yóʼo chindeétáʼanña xíʼinyó ña̱ vií xa̱a̱yó kutáʼanyó xíʼin ndiʼina.