Ná ixato̱ʼóyó Ndióxi̱ nda̱a̱ táki̱ʼva ke̱ʼé ta̱ Abdías

Ta̱ Abdías kúú ta̱ xi̱kiʼin kuenta xíʼin veʼe ta̱ rey Acab. Ta̱ rey yóʼo ta̱xira ña̱ ná ndasakáʼnu na̱ yiví ndióxi̱ Baal iníí saá ñuu, soo nani tá loʼoví ta̱ Abdías sa̱kúaʼara ña̱ xi̱xini ñúʼu ixato̱ʼóra Jehová (1 Rey. 18:1-13). Tá ni̱ka̱ʼa̱n ñá reina Jezabel ña̱ ná kaʼnína ndiʼi na̱ profeta Jehová, ta̱ Abdías xi̱kunda̱a̱-inira ña̱ xi̱xiniñúʼu ndakú koo inira ña̱ va̱ʼa kǒo taxira keʼéñá ña̱yóʼo. Ña̱ chise̱ʼéna iin kuití profeta iin ña̱ i̱yoní ni̱xi̱yo ña̱yóʼo, chi nda̱a̱ kivi kaʼnína miína. Soo ta̱ Abdías chi̱se̱ʼéra 100 na̱ profeta ta taxira ña̱ kuxuna ni xi̱ndikaa̱ so̱ko ñuu kán. Xa̱ʼa̱ ña̱ ni̱xi̱yo ku̱a̱ʼání na̱ profeta vatá na̱ xi̱kachíñu nu̱ú ta̱ rey xíʼin ñá reina kán, sana i̱xayo̱ʼvi̱nívaña xíʼin ta̱ Abdías ña̱ va̱ʼa kǒo kunina ña̱ keʼéra ña̱yóʼo (1 Rey. 18:19).

¿Ndáaña sákuaʼayó xíʼin ña̱ ke̱ʼé ta̱ Abdías? Ni xi̱yiʼvíníra xi̱xinira ta̱ Acab, soo ña̱ xi̱ndayáʼvika nu̱úra kúú ña̱ ixato̱ʼóra Ndióxi̱. Ña̱yóʼo chi̱ndeétáʼanña xíʼinra ña̱ kundaara na̱ ñanira ni xi̱kunda̱a̱-inira ña̱ kivi kuvira. Saátu xíniñúʼu ixato̱ʼóyó Ndióxi̱ tá ñuu nu̱ú íyoyó va̱ása táxi na̱ chiñu ña̱ natúʼunyó xa̱ʼa̱ra, ña̱yóʼo chindeétáʼanña xíʼinyó ña̱ chindeétáʼanyó xíʼin na̱ hermano na̱ yáʼa nu̱ú tu̱ndóʼo ña̱ yo̱ʼvi̱.