Pregunta ña̱ kéʼé na̱ káʼvi tutu yóʼo

¿Ama ka̱ʼa̱n na̱ yiví “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”?

Nu̱ú Tutu Ña̱ Nátúʼun xíʼinyó ña̱ sa̱kán ka̱na káʼa̱nñaa ña̱ si̱lóʼo kúma̱ní ña̱ chikaa̱ Jehová níma̱ na̱ “10 ndiki̱” (na̱yóʼo kúú ndiʼi na̱ chíñu) “ña̱ keʼéna ña̱ ndákanixi̱níra” ña̱ taxina ndee̱ ña̱ kúúmiína ndaʼa̱ “tí kití yukú tí color kúáʼa ña̱ yéʼe̱ní” (na̱yóʼo kúú na̱ Naciones Unidas). Tí kití yóʼo saátu káʼa̱nna xíʼinrí ña̱ kúúrí “na̱ʼná kití yukú” (Apoc. 13:14, 15; 17:3, 16, 17). Ta tá ná ya̱ʼa loʼo tiempo, na̱ “10 ndiki̱” xíʼin kití yukú xíʼin ndee̱ ña̱ ndakiʼinna sandíʼi-xa̱ʼa̱na ndiʼi veʼe-ñuʼú vatá. Tá ná ka̱ʼa̱n na̱ chíñu, “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”,b ¿á ka̱ʼa̱nna ña̱yóʼo tá kúma̱níka á tá xa̱a̱ ndi̱ʼi-xa̱ʼa̱ veʼe-ñu̱ʼu vatá? (1 Tes. 5:3).

Va̱ása kúnda̱a̱ káxi iniyó ama kúú ña̱ ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”. Saáchi tá ná kunda̱a̱-iniyó ama kuu ndiʼi ña̱yóʼo sana va̱ása ndiʼiví tiempo koo tu̱ʼvayó ta saátu ña̱ kundito va̱ʼa nu̱úyó, nda̱a̱ táki̱ʼva ni̱ka̱ʼa̱n ta̱ Jesús xíʼin na̱ xi̱ndiku̱n sa̱tára (Mat. 24:42; 25:13; 26:41). Vitin ná ka̱ʼa̱nyó xa̱ʼa̱ ña̱ ni̱ka̱ʼa̱n ta̱ apóstol Pablo ña̱ ka̱ʼyira nu̱ú carta ña̱ tesalonicenses.

Ta̱ Pablo ka̱ʼyira ña̱yóʼo: “Tá ná kixáʼana ka̱ʼa̱nna ‘Vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó’ iin kama kixaa̱ ña̱ ndiʼi-xa̱ʼa̱na” (1 Tes. 5:2, 3). Tutu ña̱ tává na̱ ñuu Ndióxi̱ ku̱a̱ʼá yichi̱ xi̱kaʼa̱nña xa̱ʼa̱ tu̱ʼun ña̱ ni̱ka̱ʼa̱n ta̱ Pablo, ña̱ tá kuma̱níka kixaa̱ ña̱ gran tribulación saá kúú ña̱ ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”, saá kúú ña̱ kixáʼana sandíʼi-xa̱ʼa̱na Babilonia ña̱ káʼnu (na̱yóʼo kúú na̱ veʼe-ñuʼú vatá na̱ íyo iníísaá nu̱ú ñuʼú). Ta̱ saátu xi̱kaʼa̱nña xa̱ʼa̱ ña̱yóʼo ña̱ kúúña iin señal ña̱ xa̱a̱ ku̱nu̱mí kixáʼa ña̱ gran tribulación.

Soo ña̱ na̱ndukú va̱ʼana xa̱ʼa̱ ña̱yóʼo, íyo inka ki̱ʼva ña̱ kivi kunda̱a̱-iniyó xíʼinña. Tá ná ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” sana ña̱yóʼo kivi ka̱ʼa̱nnaña tá xa̱a̱ ndi̱ʼi sa̱ndíʼi-xa̱ʼa̱na ndiʼi veʼe-ñu̱ʼu vatá. ¿Nda̱chun káʼa̱nyó ña̱yóʼo? Ná ka̱ʼa̱nyó xa̱ʼa̱ sava pregunta.

¿Ndáa ki̱ʼva chíndeétáʼan veʼe-ñu̱ʼu vatá xíʼin guerra? Ñaʼá “ñá kísi̱ xíʼin ku̱a̱ʼání ta̱a”, ña̱ kúú Babilonia ña̱ káʼnu, Biblia ka̱ʼa̱nña xa̱ʼa̱ ña̱yóʼo, ña̱ kúúmiíña ku̱a̱chi xa̱ʼa̱ ña̱ ni̱xi̱ta̱ ni̱i̱ “ndiʼi na̱ xa̱ʼnína nu̱ú ñuʼú” (Apoc. 17:1, 5; 18:24). Xa̱a̱ ku̱a̱ʼání tiempo ñaʼá ñá kísi̱ xíʼin ku̱a̱ʼání ta̱a sákakuñá ku̱a̱chi, xa̱ʼa̱ ña̱kán íyoní guerra ta ku̱a̱ʼání na̱ yiví xíʼi̱ íxaañá. Ña̱kán va̱ása chíndeétáʼanvíñá xíʼin na̱ yiví ña̱ kundoo va̱ʼana chi ku̱a̱chikava sákakuñá. Tá saá, tá ná ndiʼi-xa̱ʼa̱ Babilonia ña̱ káʼnu, ¿á saá kúú ña̱ ka̱ʼa̱n na̱ chíñu “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”? Sanava, soo kǒo kúnda̱a̱ káxi-iniyó xa̱ʼa̱ ña̱yóʼo.

¿Ndáaña kuu tá ná ndiʼi ka̱ʼa̱n na̱ chíñu “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”? Ta̱ Pablo ka̱ʼyira: “Iin kama kixaa̱ ña̱ ndiʼi-xa̱ʼa̱na” (1 Tes. 5:3). Tá kúma̱níka sandíʼi-xa̱ʼa̱na na̱ veʼe-ñu̱ʼu vatá ta ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” sana xíniñúʼu ya̱ʼa loʼo tiempo saáví ndiʼi-xa̱ʼa̱ na̱ chíñu soo tá siʼna veʼe-ñu̱ʼu vatá ná sandíʼi-xa̱ʼa̱na ta tándi̱ʼi ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” saá kúú ña̱ iin kama kixaa̱ ña̱ ndiʼi-xa̱ʼa̱ na̱ chíñu.

¿Ndáaña keʼé na̱ ñuu Ndióxi̱? Ta̱ Pablo ni̱ka̱ʼa̱nra: “Ndóʼó na̱ ñaniyó, va̱ása íyondó nu̱ú naá, ña̱ iin kama kuití kixaa̱ ki̱vi̱ kán nu̱úndó nda̱a̱ táki̱ʼva ndóʼo na̱ kui̱ʼná” (1 Tes. 5:4). Ná ndakanixi̱níyó ña̱yóʼo, tá siʼna veʼe-nu̱ʼu vatá ná sandiʼi-xa̱ʼa̱na ta tá ndi̱ʼi ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”, saá kúú ña̱ kunda̱a̱-ini na̱ ñuu Ndióxi̱ ña̱ xa̱a̱ ku̱nu̱mí kixaa̱ ña̱ ndiʼi-xa̱ʼa̱ na̱ chíñu. Nu̱ú na̱ chíñu na̱ ka̱ʼa̱n ña̱ “va̱ʼaní ndóo ndiʼiyó ta kǒoka ña̱ sándi̱ʼi̱-iniyó”, ña̱ ndiʼi-xa̱ʼa̱na kixaa̱ña nda̱a̱ táki̱ʼva kíxaa̱ iin na̱ kui̱ʼná, iin kama kuití kuu ña̱yóʼo.

¿Ndáaña ndátuyó kuu? Si̱lóʼo tiempo kúma̱ní ta na̱ “10 ndiki̱” xíʼin tí kití yukú sandíʼi-xa̱ʼa̱na ndiʼi veʼe-ñu̱ʼu vatá (xíʼin ndee̱ ña̱ ndakiʼinna). Saá kúú ña̱ kixáʼa ña̱ gran tribulación. Saátu kúnda̱a̱-iniyó ña̱ kixaa̱ iin tiempo ña̱ ka̱ʼa̱n na̱ chíñu “va̱ʼaní ndóo ndiʼiyó ta kǒoka ña̱ sándi̱ʼi̱-iniyó”. ¿Ama ka̱ʼa̱nna ña̱yóʼo? Ni̱ka̱ʼa̱nyó xa̱ʼa̱ u̱vi̱ ki̱ʼva ña̱ kivi kuuña. Ña̱ nu̱ú: kivi ka̱ʼa̱nna ña̱yóʼo tá kuma̱níka sandíʼi-xa̱ʼa̱na veʼe-ñu̱ʼu vatá. Ña̱ u̱vi̱: sana kivi ka̱ʼa̱nna ña̱yóʼo tá xa̱a̱ ná sandíʼi-xa̱ʼa̱na ndiʼi veʼe-ñu̱ʼu vatá. Ña̱ va̱ʼa kunda̱a̱-iniyó xíniñúʼu kundatuyó ndáaña kuu. Ku̱a̱ʼání profecía ña̱ va̱xi nu̱ú Biblia kúnda̱a̱-iniyó xíʼinña tá xa̱a̱ xínuña á tá xa̱a̱ ndi̱ʼi̱ ku̱uña (chitáʼanña xíʼin Juan 12:16).

Su̱ví ña̱ ndáyáʼvi kúú ña̱ kunda̱a̱-iniyó ama kúú ña̱ ka̱ʼa̱nna ña̱ “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” chi ña̱ nda̱kú koo iniyó xíʼin Jehová kúú ña̱ ndáyáʼvika. Ña̱kán “va̱ʼaka ná kunditoyó ta ná koo káxi iniyó”, nda̱a̱ ndáaka ña̱ ná kuu, ndiʼi tiempo ná koo tu̱ʼvayó (1 Tes. 5:6).