Ñunú á yi̱ʼva̱ ña̱ xi̱tiinna ti̱a̱ká tiempo xi̱naʼá

Sana ndákaʼún sava na̱ xi̱ndiku̱n ta̱ Jesús ti̱a̱ká xi̱tiinna (Mar. 1:16-20). Sava na̱ ta̱a yóʼo xi̱xiniñúʼuna ñunú tá xi̱tiinna ti̱a̱ká chí mar ña̱ Galilea.

¿Ndáa ki̱ʼva xi̱keʼéna ña̱yóʼo? Ñunú yóʼo xi̱kukunaña xíʼin yi̱ʼva̱ ña̱ lino. Tá ti̱a̱ká válí xi̱tiinna, ñunú yóʼo válí xi̱kuu ya̱vi̱ña. Soo tá ti̱a̱ká náʼnu xi̱tiinna, náʼnu xi̱kuu ya̱vi̱ña. Chí yuʼú ñunú yóʼo xi̱kuumiíña plomo á yu̱u̱ ña̱ va̱ʼa ki̱ʼviña ini ti̱kui̱í. Ta ñunú ña̱ náʼnu va̱ʼa ña̱ xi̱sitana, iin táʼví yuʼúña xi̱kuumiíña plomo ta inka táʼví yuʼúña xi̱kuumiíña madera á corcho ña̱ va̱ʼa kǒo ku̱ʼu̱nña nda̱a̱ ti̱xin ti̱ku̱ií.

Ñunú yóʼo yaʼviní xi̱xikónaña tiempo saá ña̱kán xi̱kiʼinnína kuenta xíʼinña. Sava yichi̱ xi̱taʼndaña xíʼin yu̱u̱ a xa̱ʼa̱ ña̱ ve̱ení ti̱a̱ká xi̱tiinna (Luc. 5:6). Biblia káʼa̱nña iin yichi̱ ta̱ Santiago xíʼin ta̱ Juan ndíkaa̱na “ndáka̱ʼmánaa ñunúna” xíʼin yi̱ʼva̱ ña̱ lino (Mat. 4:21). Tá xi̱sandíʼina xi̱tiinna ti̱a̱ká xi̱xiniñúʼu ndaka̱ʼmána ñunúna ta saátu xi̱ndakatanaña. Iin yichi̱ ta̱ Lucas ni̱ka̱ʼa̱nra na̱ xi̱tiin ti̱a̱ká xi̱ndakatana ñunúna (Luc. 5:2). Ta saátu xi̱sandáyaanaña ña̱ va̱ʼa kǒo ta̱ʼyi̱ña (Ezeq. 47:10).

Ta̱ Jesús ni̱ka̱ʼa̱nra ña̱yóʼo xíʼin na̱ xi̱tiin ti̱a̱ká: “Kundiku̱nndó yi̱ʼi̱, ta sanáʼi̱ ndóʼó ña̱ nandukúndó na̱ yiví nda̱a̱ táki̱ʼva nándukúndó ti̱a̱ká”.