PREGUNTA ÑA̱ KÉʼÉ NA̱ KÁʼVI TUTU YÓʼO

¿Ndáaña kúú u̱vi̱ trato ña̱ káʼa̱n Gálatas 4:24 xa̱ʼa̱?

Tá ni̱ka̱ʼa̱n ta̱ Pablo xa̱ʼa̱ ki̱ʼva ña̱ xi̱kitáʼan ta̱ Abrahán xíʼin ñá Sara xíʼin ñá Agar, ni̱ka̱ʼa̱nra ña̱yóʼo: “Ndiʼi ña̱yóʼo íyo ña̱ kúni̱ kachiña, chi u̱vi̱ saá ná ñaʼá yóʼo ndákiʼinná nu̱ú u̱vi̱ trato” (Gál. 4:22-24). Tá ya̱chi̱ xi̱kunda̱a̱-iniyó trato yóʼo xi̱kaʼa̱nña xa̱ʼa̱ trato ña̱ ley xíʼin xa̱ʼa̱ trato xa̱á. Xa̱ʼa̱ ña̱ na̱ndukú va̱ʼana xa̱ʼa̱ ña̱yóʼo, xíniñúʼu nasa̱ma ki̱ʼva ña̱ kúnda̱a̱-iniyó xíʼinña. Ta̱ Pablo ni̱ka̱ʼa̱nra xa̱ʼa̱ trato ña̱ ley xíʼin trato ña̱ ke̱ʼé Jehová xíʼin ta̱ Abrahán ta su̱ví xa̱ʼa̱ trato xa̱á.a Ná ka̱ʼa̱nkayó xa̱ʼa̱ ña̱yóʼo.

Ta̱ Pablo ni̱ka̱ʼa̱nra xa̱ʼa̱ trato ña̱ káʼa̱n xa̱ʼa̱ ley ña̱ ke̱ʼéna chí yuku̱ Sinaí tá ku̱i̱ya̱ 1513 t.x., ta ña̱yóʼo ni̱xi̱yoña nda̱a̱ táki̱ʼva ni̱xi̱yo ñá Agar (Gál. 4:25; Éx. 19:5, 6). Ña̱kán ñá Agar nda̱naʼa̱ñá trato ña̱ ley. Xa̱ʼa̱ ña̱ kǒo kívi kundiku̱n nda̱a̱ ni iin na̱ yiví ña̱ káʼa̱n ley, ña̱yóʼo xi̱sandákaʼánña na̱ judío ña̱ xi̱kuuna na̱ yiví ku̱a̱chi. Ta trato yóʼo saátu chi̱ndeétáʼanña xíʼin na̱ ñuu Israel ña̱ ndakunina ta̱ Mesías, saáchi iinlá ta̱yóʼo kúú ta̱ kivi sáxi̱nu ña̱ káʼa̱n ley. Xa̱ʼa̱ ña̱ xa̱ʼnína ta̱ Mesías ta̱ kǒo ku̱a̱chi níxi̱kuumií, miíyó na̱ yiví kivi sa̱ñáyó ndaʼa̱ ku̱a̱chi xíʼin ña̱ xíʼi̱yó (Gál. 3:19, 24, 25). Tá sa̱xínu ta̱ Jesús ña̱ xi̱kuni̱ Ndióxi̱, va̱ása níxiniñúʼuka kundiku̱n na̱ yiví ley yóʼo (Rom. 10:4).

Ta̱ Pablo xa̱a̱ síín ni̱ka̱ʼa̱nra xa̱ʼa̱ ñá Agar ta saátu xa̱ʼa̱ ñá Sara, ñáyóʼo ka̱ku se̱ʼeñá ta xi̱kuuñá iin ñaʼá libre “ña̱ va̱ʼa xi̱nu trato ña̱ ki̱ndoo Ndióxi̱” (Gál. 4:23). Trato yóʼo kúú ña̱ ke̱ʼé Jehová xíʼin ta̱ Abrahán (Gál. 3:29; 4:28, 30). Jehová ni̱ka̱ʼa̱nra xa̱ʼa̱ trato yóʼo tá ni̱ka̱ʼa̱nra xíʼin ta̱ Abrahán: “Ndiʼi na̱ yiví na̱ íyo nu̱ú ñuʼú ndakiʼinna bendición xa̱ʼa̱ na̱ se̱ʼún, saáchi yóʼó, xi̱niso̱ʼún ña̱ ni̱ka̱ʼi̱n” (Gén. 22:18).

Trato ña̱ ke̱ʼé Ndióxi̱ xíʼin ta̱ Abrahán káʼa̱nkaña xa̱ʼa̱ ña̱ ni̱ka̱ʼa̱n Jehová chí jardín ña̱ Edén (Gén. 3:15). Yóʼo ni̱ka̱ʼa̱nra “na̱ se̱ʼe” ñá ñaʼá kixina ti̱xin veʼe ta̱ Abrahán. Ta̱ Pablo ni̱ka̱ʼa̱nkara ña̱ iin na̱ ndáyáʼvika kixi ti̱xin veʼe ñá ñaʼá yóʼo kúú ta̱ Jesucristo. Ta saátu na̱ 144,000, na̱ kúú “kuenta ta̱ Cristo” kúúna se̱ʼe ñá ñaʼá yóʼo ta kaʼndachíñuna xíʼin ta̱ Cristo ti̱xin Reinora (Gál. 3:16, 29; Apoc. 14:1-3). Xa̱ʼa̱ ña̱ ni̱ka̱ʼa̱n Ndióxi̱ xíʼin ta̱ Abrahán, na̱ xíniso̱ʼo ña̱ káʼa̱n ta̱ Jesús ku̱a̱ʼání bendición ndakiʼinna.

¿Nda̱chun ni̱ka̱ʼa̱n ta̱ Pablo xa̱ʼa̱ ña̱yóʼo? Ña̱ va̱ʼa na̱ʼa̱ra nu̱ú na̱ judío tá kúni̱kana kundiku̱nna ley ña̱ ta̱xi Ndióxi̱ ndaʼa̱ ta̱ Moisés, xa̱a̱na koona nda̱a̱ táki̱ʼva íyo na̱ káchíñu ndáʼvi nda̱a̱ táki̱ʼva ke̱ʼé ñá Agar. Soo tá ná kandíxana ta̱ Jesucristo ta̱ ki̱xi ti̱xin veʼe ta̱ Abrahán kivi xa̱a̱na koona na̱ yiví libre nda̱a̱ táki̱ʼva ni̱xi̱yo ñá Sara. ¿Nda̱chun xa̱a̱na koona na̱ yiví libre? Saáchi sa̱ñána ndaʼa̱ ku̱a̱chi xíʼin ña̱ xíʼi̱na (Juan 8:32-34). Soo tá va̱ása níkandíxana ta̱ Jesús, ya̱ʼandosóna ña̱ ni̱ka̱ʼa̱n Ndióxi̱ xa̱ʼa̱ trato ña̱ ley, ña̱ kuniʼi yichi̱ nu̱úna ña̱ kunda̱a̱-inina xa̱ʼa̱ ta̱ Cristo.

Ti̱xin congregación ña̱ ni̱xi̱yo chí Galacia, ni̱xi̱yo ku̱a̱ʼá na̱ cristiano na̱ va̱ása níxi̱kuu judío ta nda̱a̱ ni iin yichi̱ kǒo níxindiku̱nna ley yóʼo. Sava na̱ judío xi̱ ixandúxana xíʼin na̱ kǒo níxi̱kuu judío ña̱ ná kundiku̱nna ley ña̱ ta̱xi Jehová ndaʼa̱ ta̱ Moisés tá kúú, ña̱ kaʼndana nu̱ú yi̱i̱na. Soo nu̱ú carta ña̱ ka̱ʼyi ta̱ Pablo ni̱ka̱ʼa̱nra xíʼinna ña̱ kǒo xíniñúʼukaví kundiku̱nna ley yóʼo chi xa̱a̱ ndu̱una na̱ yiví libre xa̱ʼa̱ ña̱ kándíxana ta̱ Cristo (Gál. 5:1, 10-14).