Koto miíún nda̱a̱ táki̱ʼva xíto Jehová miíún

1. ¿Nda̱chun ndáyáʼviní kunda̱a̱-iniyó ndáa ki̱ʼva xíto Jehová miíyó?

KU̱A̱ʼÁNÍ na̱ ndásakáʼnu Ndióxi̱ íxayo̱ʼvi̱ña xíʼinna kunda̱a̱-inina ña̱ ndáyáʼvina nu̱úra. Kúnda̱a̱-inina ña̱ kúʼvi̱va-ini Jehová xínira na̱ ñuura, soo túvina ña̱ kǒo kúʼvi̱-inira xínira miína (Sal. 149:4). Ta xa̱ʼa̱ ña̱yóʼo ndákavaní-inina. Ndáyáʼviní kunda̱a̱-iniyó ndáa ki̱ʼva xíto Jehová miíyó. ¿Nda̱chun? Saáchi tá kúnda̱a̱-iniyó ña̱ kúni̱ra xínira miíyó, yatinka íyoyó xíʼinra ta kúni̱yó kooyó migora. Tasaá ndakanixi̱níyó ña̱ ndáyáʼviyó nu̱úra ta chindeétáʼanña xíʼinyó ña̱ kusi̱íka-iniyó ndasakáʼnuyóra (Sal. 32:11).

2. ¿Ndáaña xi̱ndakanixi̱ní sava na̱ xi̱ndasakáʼnu Ndióxi̱ tiempo xi̱naʼá, ta nda̱chun?

² Tá íxayo̱ʼvi̱ña xíʼún ña̱ kunda̱a̱-iniún ña̱ ndáyáʼviníún nu̱ú Ndióxi̱, su̱ví iinlá miíún ndóʼó saá. Saátu xi̱ndoʼo sava na̱ xi̱ndasakáʼnu Ndióxi̱ tiempo xi̱naʼá. Saá ndo̱ʼo ta̱ Mefibóset xi̱ndakanixi̱níra ña̱ kǒo ndáyáʼvira ta ni̱ka̱ʼa̱nra ña̱yóʼo: “Yi̱ʼi̱ iin tina tí ni̱xi̱ʼi̱va kúi̱”. ¿Á xa̱ʼa̱ ña̱ kǒo níkivi kakara kúú ña̱ ni̱ka̱ʼa̱nra saá? ¿Á sana xi̱kukaʼan nu̱úra xa̱ʼa̱ ña̱ kǒo níxiniso̱ʼoka xi̱íra ta̱ Saúl ña̱ xi̱kaʼa̱n Jehová xíʼinra? Ni nda̱a̱ ndáaka ña̱ xi̱ndakanixi̱ní ta̱ Mefibóset ña̱ kǒo ndáyáʼvira su̱ví ña̱ nda̱a̱ kúúña. Soo nu̱ú ta̱ rey David xi̱ndayáʼviníva ta̱ Mefibóset ta ni̱ka̱ʼa̱nra ña̱ kundaarara ta ndiʼi tiempo kuxura xíʼinra (2 Sam. 9:3-10). Ná ndakanixi̱níyó ña̱ ni̱ka̱ʼa̱n ta̱ apóstol Pedro xíʼin ta̱ Jesús: “Kǒo kuyatiún nu̱úi̱ táta, saáchi iin ta̱a ta̱ ku̱a̱chiva kúi̱”. Xi̱kunda̱a̱-inira ña̱ xi̱kuura ta̱ ku̱a̱chi, ña̱kán xi̱ ixayo̱ʼvi̱ña xíʼinra kutáʼanra xíʼin ta̱ Jesús ta saátu ña̱ koora discípulora. Soo xi̱ndaava-ini ta̱ Jesús ña̱ va̱ʼaní natúʼun ta̱ Pedro xa̱ʼa̱ tu̱ʼun va̱ʼa ni xi̱kuura ta̱ ku̱a̱chi (Luc. 5:8-11). Nu̱ú artículo yóʼo ndakuiinyó pregunta ña̱ va̱xi yóʼo: ¿Nda̱chun íxayo̱ʼvi̱ña xíʼin sava na̱ ndásakáʼnu Ndióxi̱ ña̱ kandíxana ña̱ kúni̱ Jehová xínirana? ¿Ndáa ki̱ʼva xíto Jehová miíyó? Ta, ¿ndáaña chindeétáʼan xíʼinyó ña̱ kotoyó miíyó nda̱a̱ táki̱ʼva xíto Jehová miíyó?

¿NDA̱CHUN NDÁKANIXI̱NÍ SAVANA ÑA̱ KǑO NDÁYÁʼVINA?

3. ¿Ndáaña kivi kundoʼoyó xíʼin ña̱ kéʼé na̱ ñuyǐví yóʼo? (Koto na̱ʼná).

³ ¿Nda̱chun kivi ndakanixi̱níyó ña̱ kǒo nda̱a̱ ni iinna kúni̱ xíni miíyó á ña̱ kǒo ndáyáʼviyó? Ná ka̱ʼa̱nyó xa̱ʼa̱ u̱ni̱ ña̱ʼa. Ña̱ nu̱ú, na̱ ñuyǐví yóʼo kéʼéna ña̱ʼa ña̱ sándakava-ini inkana. Tá kúú, sava na̱ káchíñu xíʼún kǒo táxina tíxa̱ʼvi xa̱ʼa̱ ña̱ kéʼéna xa̱ʼa̱na á va̱ása nda̱kú íyo inina ta ndi̱va̱ʼaní-inina, va̱ása ndáyáʼviún nu̱úna ta nda̱a̱ káʼa̱nna ña̱ vatá xa̱ʼún. Na̱ ñuyǐví yóʼo káʼa̱nna ña̱ xíniñúʼu ka̱ʼa̱n va̱ʼana xa̱ʼún ña̱ va̱ʼa kundayáʼviún nu̱úna ta saátu ndákanixi̱nína tá kǒo ku̱a̱ʼá xu̱ʼún kúúmiíún ña̱ satáún ña̱ʼa ña̱ yaʼvi, va̱ása ndáyáʼviún. Ku̱a̱ʼání na̱ yiví na̱ sándáa ña̱ʼa nu̱ú ña̱ redes sociales ni̱nuní kúnina ta kúta̱aní-inina (2 Tim. 3:1-5). Na̱ʼná xíʼin video ña̱ sándáana náʼa̱ña ña̱ ku̱a̱ʼání na̱ migona íyo ta si̱íníka íyona nu̱ú miíún.

4. ¿Ndáa inka ña̱ kivi kundoʼoyó tá ndákanixi̱níyó ña̱ kǒo ndáyáʼviyó? (Koto na̱ʼná).

⁴ Ña̱ u̱vi̱, kivi ndakanixi̱níyó ña̱ loʼoní ndáyáʼviyó nu̱ú Jehová xa̱ʼa̱ ña̱ ke̱ʼéyó tá ya̱chi̱ á xa̱ʼa̱ ña̱ kéʼéyó vitin. Sana na̱ yiváún va̱ása nína̱ʼa̱na ña̱ kúni̱na xínina yóʼó. Á sana nu̱ú xa̱ʼnún xi̱kaʼa̱nna xíʼún ña̱ kǒo ña̱ʼa kuchiñún keʼún tá ná kuchéún. Sana xa̱ʼa̱ ña̱ kúúmiíún kue̱ʼe̱ á ndákava-iniún, ña̱yóʼo sásiña nu̱ún ña̱ kǒo kivi keʼún ku̱a̱ʼá chiñu nu̱ú Jehová. Sana xa̱a̱ ku̱a̱ʼání ku̱i̱ya̱ ka̱chíñún nu̱ú Jehová ta kǒo kivika keʼún chiñu nu̱úra nda̱a̱ táki̱ʼva xi̱keʼún tá ya̱chi̱ (Sal. 71:9). Tá ndóʼún ña̱yóʼo kivi ndakanixi̱níún ña̱ kǒo ndáyáʼviún nu̱ú Jehová.

5. ¿Ndáaña kivi kundoʼoyó xa̱ʼa̱ ña̱ kúúyó na̱ yiví ku̱a̱chi? (Koto na̱ʼná).

⁵ Ña̱ u̱ni̱, xa̱ʼa̱ ña̱ kúúyó na̱ yiví ku̱a̱chi kivi ndakanixi̱níyó ña̱ kǒo ndáyáʼvi ña̱ kéʼéyó nu̱ú Jehová. Nu̱ú Biblia káʼa̱nña xíʼinyó ña̱ xíniñúʼu kuniso̱ʼoyó ta keʼéyó ndiʼi ña̱ káʼa̱n Ndióxi̱ (1 Ped. 1:15, 16). Soo kiviva keʼéyó ndiʼi ña̱ káʼa̱nra xíʼinyó. Tá kéʼéyó ña̱ va̱ása va̱ʼa, níma̱yó kivi ka̱ʼa̱nña xíʼinyó ña̱ kǒo kúni̱ Jehová xínira miíyó ta kǒo kúchiñuyó keʼéyó ña̱ káʼa̱nra. Saátu kivi ndakava-iniyó á ndi̱ʼiní-iniyó xa̱ʼa̱ ku̱a̱chi ña̱ ni̱ki̱ʼviyó tá ya̱chi̱ ta xa̱a̱ i̱xakáʼnu-ini Jehová xa̱ʼa̱yó (2 Cor. 2:7). Xi̱kunda̱a̱va-ini ta̱ apóstol Pablo ña̱ xi̱kuʼvi̱ní-ini Jehová xi̱xinirara, soo xi̱ndakava-inira xa̱ʼa̱ ña̱ va̱ása va̱ʼa ña̱ xi̱keʼéra ta nda̱a̱ ni̱ka̱ʼa̱nra ña̱yóʼo: “Ndáʼvinívai̱” (Rom. 7:21-24).

6. ¿Ndáaña kivi kundoʼoyó ni kǒo ña̱ va̱ása va̱ʼa kéʼéyó, ta nda̱chun?

⁶ Xa̱ʼa̱ ña̱ kúúyó na̱ yiví ku̱a̱chi kivi ndakava-iniyó ni kǒo ña̱ va̱ása va̱ʼa kéʼéyó. Iin ñá hermana ña̱ ndíkaa̱ Betel ni̱ka̱ʼa̱nñá ña̱yóʼo: “Tá xíniso̱ʼi̱ káʼa̱nna ‘Chikaa̱ ndee̱ ña̱ kachíñukaún nu̱ú Jehová’, túvii̱ ña̱ loʼoní ña̱ kéʼíi̱ nu̱úra. Ta xíniñúʼu chikaa̱kai̱ ndee̱ ña̱ keʼíi̱ ku̱a̱ʼáka chiñu nu̱ú Jehová, chi kǒo kíndo̱o-inii̱ xíʼin ña̱ xa̱a̱ kéʼíi̱ nu̱úra”. Ki̱ʼva saá kivi kundoʼoyó chi kivi ndakanixi̱níyó ña̱ loʼoní chiñu kéʼéyó nu̱ú Jehová (1 Juan 3:19, 20).

¿NDÁA KI̱ʼVA XÍTO JEHOVÁ MIÍÚN?

7. ¿Nda̱chun ndáyáʼviyó nu̱ú Jehová?

⁷ Síín xíto Jehová ña̱ʼa nu̱ú miíyó (Is. 55:9). Tá saá, ¿ndáaña xíto Jehová miíún ña̱kán ndáyáʼviún nu̱úra? Miíyó na̱ yiví kúú na̱ ndáyáʼviní i̱xava̱ʼa Jehová nu̱ú ñuʼú yóʼo. Ni ndáyáʼvika na̱ ángel nu̱úyó, i̱xava̱ʼa Ndióxi̱ miíyó nda̱a̱ táki̱ʼva náʼa̱ miíra, ña̱yóʼo kúni̱ kachiña ña̱ kivi kuumiíyó ña̱ va̱ʼa ña̱ kúúmiíra (Heb. 2:6, 7; Gén. 1:27). Kúúkavayó na̱ yiví ku̱a̱chi soo, ¿á kúni̱ kachiña ña̱ kǒo ndáyáʼviyó nu̱ú Jehová? Va̱ásaví. Xa̱a̱ ku̱a̱ʼání tiempo ni̱ya̱ʼa ta̱xira se̱ʼera ni̱xi̱ʼi̱ xa̱ʼa̱yó ña̱ va̱ʼa kooyó migora (Rom. 5:8). Tá kúma̱níka sakúaʼún xa̱ʼa̱ra, xa̱a̱ xi̱tovara ña̱ kivi keʼún ta chi̱ndeétáʼanra xíʼún ña̱ va̱ʼa ku̱yatiún nu̱úra (Jer. 31:3).

8. ¿Ndáa ki̱ʼva xíto Jehová na̱ xa̱a̱ nda̱taxi mií ndaʼa̱ra? (Isaías 43:1, 4, 10, 13).

⁸ Xa̱ʼa̱ ña̱ nda̱taxiún miíún ndaʼa̱ Jehová ta xa̱a̱ nda̱kuchiún, ndáyáʼviníún nu̱úra chi nda̱kú íyo iniún xíʼinra (kaʼvi Isaías 43:1, 4, 10, 13). Ta̱yóʼo káʼa̱nra xíʼún: “Kuenta yi̱ʼi̱ kúún”. Ña̱yóʼo kúni̱ kachiña ña̱ miíra nda̱kaxin yóʼó ña̱ kundika̱ún ti̱xin ñuura ta kǒo nda̱a̱ ni iinna kivi sakúxíka miíún nu̱úra (Juan 10:28, 29). Ndáaní-inira miíún ta ka̱nara yóʼó ña̱ koún testigora ña̱ va̱ʼa ndakiʼún tu̱ʼunra. Kúsi̱íní-inira tá káʼa̱nyó ña̱ nda̱a̱ xa̱ʼa̱ra ta náʼa̱yó ña̱ vatá kúú ña̱ ni̱ka̱ʼa̱n ta̱ Ndi̱va̱ʼa xa̱ʼa̱ra (Prov. 27:11). Xa̱ʼa̱ ña̱ ni̱xa̱ún kúún testigora, káʼa̱nra ña̱yóʼo xíʼún: “Ndáyáʼviníún nu̱úi̱, i̱xato̱ʼíi̱ yóʼó ta kúʼvi̱ní-inii̱ xínii̱ yóʼó”. Kúni̱ní Jehová xínira miíyó chí kúúyó se̱ʼera ta ndáyáʼviníyó nu̱úra.

9. ¿Ndáaña kéʼé Jehová tá kíʼviyó ku̱a̱chi nu̱úra?

⁹ Tá ndákava-iniún xa̱ʼa̱ ku̱a̱chi ña̱ ni̱ki̱ʼviún, ndakaʼán chi Jehová kǒo ndákaʼánkavíra xa̱ʼa̱ ña̱yóʼo (Sal. 103:12-14). Xítora ña̱ nda̱ndikó-iniún ta i̱xakáʼnuva-inira xa̱ʼún (1 Juan 1:7, 9). Ndakaʼán ña̱ ndo̱ʼo na̱ cristiano na̱ ñuu Corinto, xa̱ʼa̱ ña̱ nda̱ndikó-inina xa̱ʼa̱ ku̱a̱chi ndee̱ ña̱ ni̱ki̱ʼvina, i̱xakáʼnuva-ini Jehová xa̱ʼa̱na (1 Cor. 6:9-11). Ña̱kán va̱ʼa xi̱ndasakáʼnunara saáchi xi̱kunda̱a̱-inina ña̱ xi̱kuni̱ra xi̱xinirana. Saátu kivi keʼé miíún.

10. ¿Nda̱chun va̱ʼa kúnda̱a̱-iniyó ña̱ ndáyáʼviníyó nu̱ú Jehová ni kúúmiíyó chiñu á va̱ása kúúmiíyóña ti̱xin ñuura?

¹⁰ Tá ki̱ndaana chiñu ndaʼún ti̱xin ñuu Ndióxi̱ á va̱ása táxina chiñu ndaʼún, ¿á kúni̱ kachi ña̱yóʼo ña̱ va̱ása ndáyáʼviún nu̱úra? Va̱ásaví. Kivi ndakanixi̱níyó ña̱ kǒo ndáyáʼviyó nu̱ú Ndióxi̱, soo ña̱ ndáyáʼvika kúú ña̱ ndákanixi̱níra. Biblia káʼa̱nña xa̱ʼa̱ ku̱a̱ʼání na̱ xi̱ndasakáʼnu Ndióxi̱ tiempo xi̱naʼá ña̱ xi̱ndayáʼvinína nu̱úra, ta su̱ví xa̱ʼa̱ chiñu ña̱ xi̱keʼéna nu̱úra xi̱kuuña chi xa̱ʼa̱ ña̱ xi̱kandíxanína miíra xi̱kuuña (1 Rey. 19:18). Ña̱kán, tá ndákanixi̱níún ña̱ va̱ása ndáyáʼviún nu̱ú Jehová, nda̱ka̱tu̱ʼun ña̱yóʼo miíún: “¿Á chíka̱i̱ ndee̱ ña̱ kundiku̱i̱n yichi̱ ta̱ Jesús?”. Tá saá kéʼún, kúún kuenta ta̱ Cristo (Tito 2:11-14). Ni kúúmiíún chiñu á kǒoña kúúmiíún ti̱xin ñuu Ndióxi̱ ndáyáʼvinívaún.

¿NDÁAÑA CHINDEÉTÁʼAN XÍʼÚN KOTOÚN MIIÚN TÁKI̱ʼVA XÍTO JEHOVÁ MIÍÚN?

11. ¿Ndáaña chindeétáʼan xíʼinyó ña̱ kandíxayó ña̱ ndáyáʼviníyó nu̱ú Jehová? (2 Corintios 10:4, 5).

¹¹ Tá káʼa̱nna ña̱ kǒo kúni̱ Jehová xínira yóʼó ndakaʼán chi ña̱ vatá kúú ña̱yóʼo. Jehová, kúú “Ndióxi̱ ta̱ káʼa̱n ña̱ nda̱a̱”, ta ku̱a̱ʼání ña̱ʼa ña̱ kéʼéra náʼa̱ña ña̱ kúni̱ra xínira yóʼó (Sal. 31:5). Kivi ndakanixi̱níún ña̱ kǒo ndáyáʼviún nu̱úra, soo Jehová ta̱xira tu̱ʼunra ndaʼún ña̱ va̱ʼa nasamaún ña̱ ndákanixi̱níún (kaʼvi 2 Corintios 10:4, 5). Ndakanixi̱ní xa̱ʼa̱ ña̱yóʼo. Tá sa̱kúaʼún xa̱ʼa̱ ña̱ nda̱a̱ xíʼin ndiʼika ña̱ va̱xi nu̱ú Biblia, ku̱ndaa̱-iniún ña̱ íyo ki̱vi̱ Ndióxi̱, na̱ ni̱xi̱ʼi̱ va̱ása ndákaʼánkana xa̱ʼa̱ ni iin ña̱ʼa ta na̱ yiví kivi xa̱a̱na kutakuna nu̱ú ñuʼú yóʼo ndiʼi tiempo. Ña̱ va̱ʼa ni̱xa̱ún ka̱ndíxaún ña̱yóʼo, xi̱niñúʼu sandákoún sava ña̱ xi̱kandíxaún tá ya̱chi̱ chi ki̱ʼún kuenta ña̱ vatá kúúña. Nu̱ú artículo yóʼo xi̱toyó sava texto ña̱ chíndeétáʼan xíʼinyó kunda̱a̱-iniyó ña̱ ndáyáʼviní iin tá iinyó nu̱ú Jehová. Tá káʼa̱nna xíʼinyó ña̱ kǒo ndáyáʼviyó nu̱ú Jehová ña̱ vatá kúúña. Kǒo kuniso̱ʼún ña̱yóʼo. Chi ña̱yóʼo chindeétáʼanña xíʼún ña̱ kunda̱a̱-iniún ña̱ ndáyáʼviníún nu̱ú Jehová.

12. ¿Ndáa ki̱ʼva kuniñúʼuyó Biblia nda̱a̱ táki̱ʼva xíniñúʼuyó espejo? (Santiago 1:22-25).

¹² Kuniñúʼu tu̱ʼun Ndióxi̱ nda̱a̱ táki̱ʼva xíniñúʼún espejo. Káʼviyó Biblia chi kúni̱yó kunda̱a̱ va̱ʼa iniyó xa̱ʼa̱ Jehová, ta iin ña̱ sákuaʼayó kúú ña̱ kíʼinyó kuenta ndáaña kúú ña̱ xítora ña̱ va̱ʼa kundayáʼviyó nu̱úra (kaʼvi Santiago 1:22-25). Nu̱ú Biblia kúnda̱a̱-iniyó xa̱ʼa̱ na̱ ta̱a xíʼin ná ñaʼá na̱ xi̱kuʼvi̱ní-ini Jehová xi̱xinira ni xi̱kuuna na̱ yivá ku̱a̱chi, saáchi na̱yóʼo xi̱kuʼvi̱-inina xi̱xininara ta nda̱kú ni̱xi̱yo inina xíʼinra. Tá xa̱a̱ kaʼviún Biblia ka̱ʼa̱n xíʼin Jehová ná chindeétáʼanra xíʼún ña̱ kunda̱a̱-iniún ndáa ki̱ʼva xítora miíún ta koto á kúúmiíún ña̱ va̱ʼa táʼan ña̱ xi̱kuumií na̱ xi̱ndasakáʼnu miíra tiempo xi̱naʼá. Tá xa̱a̱ káʼviún, nda̱ka̱tu̱ʼun ña̱yóʼo miíún: “¿Á náʼi̱ ña̱ chíka̱i̱ ndee̱ ña̱ nda̱kú koo inii̱ xíʼinra nda̱a̱ táki̱ʼva xi̱keʼé na̱kán?”. Tá xíniñúʼuyó Biblia nda̱a̱ táki̱ʼva xíniñúʼuyó espejo saá kunda̱a̱-iniyó ña̱ ndáyáʼviníyó nu̱ú Jehová ta ná kǒo nandósóyó ña̱yóʼo (Mal. 3:16; Sant. 1:12).

13. ¿Ndáaña kivi keʼún ña̱ va̱ʼa kunda̱a̱-iniún ña̱ ndáyáʼviníún nu̱ú Jehová?

¹³ Kaʼyi texto xíʼin sava tu̱ʼun ña̱ chindeétáʼan xíʼún ña̱ ndakaʼún ña̱ ndáyáʼviníún nu̱ú Jehová. Tá xa̱a̱ káʼviún Biblia ndukú sava versículo xíʼin experiencia ña̱ káʼa̱n xa̱ʼa̱ ña̱yóʼo. Saátu nda̱ka̱tu̱ʼun sava na̱ hermano ndáaña chi̱ndeétáʼan xíʼinna ña̱ ka̱ndíxana ña̱ kúni̱ Jehová xínirana. Kaʼyi ndiʼi ña̱ sákuaʼún, tasaá kivi kaʼviún ña̱yóʼo tá xa̱a̱ ndákava-iniún. Tá kúú tá ndákanixi̱níún ña̱ kǒo xíniñúʼuví kuʼvi̱-ini Ndióxi̱ kunira yóʼó, tá saá ndóʼún kivi nandukún ña̱ káʼa̱n xa̱ʼa̱ ña̱ kúʼvi̱-ini Ndióxi̱ xínira miíyó. Saá kunda̱a̱-iniún ña̱ kúʼvi̱níva-ini Ndióxi̱ xínira miíyó ni kǒo xíniñúʼuví keʼéra saá (Juan 1:16; 1 Juan 4:10).a

14. ¿Ndáa ki̱ʼva kundaún miíún nu̱ú na̱ sándakava-iniún? (Koto na̱ʼná).

¹⁴ Kǒo kitáʼún xíʼin na̱ sándakava-iniún. Tá kíʼún kuenta ña̱ íyo na̱ sándakava-iniún loʼo tiempo kitáʼún xíʼinna. Tá kǒo kívi kuxíkáún nu̱úna, ndakaʼán chi ña̱ káʼa̱nna á ña̱ kéʼéna va̱ása kítáʼanña xíʼin ña̱ ndákanixi̱ní Jehová xa̱ʼún. Á sana ña̱ sándakava-iniún kúú ña̱ kǒo kúúmiíún táʼan ña̱ kúúmií na̱ ñuyǐví yóʼo. Ñuyǐví ta̱ Ndi̱va̱ʼa yóʼo chíkaa̱na-ini na̱ yiví ña̱ satána ku̱a̱ʼání ña̱ʼa ni kǒo xíniñúʼunaña á ni kǒo xu̱ʼúnna ña̱ satánaña. Tá ná kuniso̱ʼún ña̱ káʼa̱n Jehová xíʼún kǒo keʼún nda̱a̱ táki̱ʼva kéʼé na̱yóʼo (Luc. 12:15). Tá ña̱ sándakava-iniún kúú ña̱ xítoún nu̱ú redes sociales, va̱ʼaka loʼo tiempo kuniñúʼún ña̱yóʼo á kǒo kuniñúʼukaúnña (1 Tim. 6:8).

15. Tá kǒo kivi keʼún ku̱a̱ʼá chiñu nu̱ú Jehová, ¿ndáaña kivi keʼún? (Koto na̱ʼná).

¹⁵ Ndakanixi̱ní ña̱ kivi keʼún nu̱ú Jehová. Sana kúúmiíún kue̱ʼe̱, á kíʼún kuenta xíʼin na̱ veʼún á íyo inkaka ña̱ kivi kasi nu̱ún ta xa̱ʼa̱ ña̱yóʼo kǒo kivi keʼún ku̱a̱ʼáka chiñu nu̱ú Ndióxi̱ nda̱a̱ táki̱ʼva kúni̱ún. Á sana xi̱ndika̱ún Betel ta vitin kǒokaún ndíkaa̱. Nu̱úka ña̱ ndakanixi̱níún xa̱ʼa̱ ña̱ kǒo kívi keʼún chikaa̱ ndee̱ ña̱ keʼún ña̱ kivi keʼún. Tá kúú kivi kuniñúʼún ña̱ sa̱kúaʼún Betel ña̱ va̱ʼa chika̱ún ndee̱ xíʼin congregación nu̱ú ndíka̱ún. Nda̱a̱ táki̱ʼva íyo ku̱ñuyó ndiʼivaña ndáyáʼvi, ni nda̱a̱ ndáaka lugar nu̱ú ndíka̱ún á chiñu ña̱ kéʼún nu̱ú Ndióxi̱ ndáyáʼvinívaún nu̱úra (Rom. 12:4, 5).

16. ¿Ndáaña kivi keʼún tá ndákava-iniún? (Romanos 12:2; koto na̱ʼná).

¹⁶ Ndakanixi̱ní nda̱a̱ táki̱ʼva ndákanixi̱ní Jehová. Va̱ása kúnda̱a̱-iniyó xa̱ʼa̱ ndiʼi ña̱ kúni̱ Jehová keʼéra chí nu̱únínu ta saátu kǒo kivi kunda̱a̱ káxi-iniyó ndáa xa̱ʼa̱ kúú ña̱ kúʼvi̱-ini Jehová xínira miíyó (1 Cor. 13:12). Ña̱kán kǒo ndakava-iniún tá kíxáʼa ndákanixi̱níún ña̱ kǒo ndáyáʼviún. Ndiʼiyó xíniñúʼu chikaa̱ ndee̱ ña̱ nasamayó ña̱ ndákanixi̱níyó ta ndakanixi̱níyó nda̱a̱ táki̱ʼva ndákanixi̱ní Jehová (kaʼvi Romanos 12:2). Xíniñúʼu chikaa̱yó ndee̱ ña̱ keʼéyó ña̱yóʼo nda̱a̱ ná va̱ása kuumiíkayó ku̱a̱chi. Nani kíxaa̱ ki̱vi̱ yóʼo ná chikaa̱yó ndee̱ ndakanixi̱níyó nda̱a̱ táki̱ʼva ndákanixi̱ní Jehová xa̱ʼa̱yó.

17. ¿Nda̱chun va̱ʼa kúnda̱a̱-iniún ña̱ ndáyáʼviún nu̱ú Jehová?

¹⁷ Chikaa̱ ndee̱ ña̱ ndakanixi̱níún ña̱ ndáyáʼvinívaún nu̱ú Jehová (1 Tim. 6:12). Ndakaʼán chi ki̱ʼva ña̱ xítora yóʼó kúú ña̱ ndáyáʼvika. Ta nu̱ú Biblia va̱xi ña̱ chindeétáʼan xíʼún ña̱ kandíxaún ña̱ ndáyáʼvinívaún nu̱úra ta kúni̱ra ña̱ ndiʼi tiempo ná koún migora. Kandíxa ña̱ káʼa̱nra xíʼún nu̱ú tu̱ʼunra (Rom. 3:4). Kúʼvi̱ní-ini Jehová xínira yóʼó.