Ná kandíxayó ña̱ chindeétáʼan Jehová xíʼinyó

1. ¿Ndáa ki̱ʼva chíndeétáʼan na̱ migoyó xíʼinyó?

VA̱ʼANÍ ndáa-iniyó na̱ yiví na̱ xíni̱yó. Tá yáʼayó nu̱ú iin tu̱ndóʼo káʼa̱nyó xíʼin na̱ migoyó na̱ ndáa-iniyó ña̱ ná chindeétáʼanna xíʼinyó ta taxina consejo ndaʼa̱yó (Ecl. 4:9, 10).

2, 3. a) ¿Ndáa ki̱ʼva chíndeétáʼan Salmo 115 xíʼinyó ta nda̱chun? b) ¿Ndáa pregunta ndakuiinyó nu̱ú artículo yóʼo?

² Jehová kúú migoyó ta iinlá ta̱yóʼo ndáa-iniyó. Ni nda̱a̱ ndáaka ña̱ ná ya̱ʼayó nu̱ú ná ka̱ʼa̱nyó xíʼin Jehová ña̱ ná chindeétáʼanra xíʼinyó ta kuniʼira yichi̱ nu̱úyó. Nu̱ú Salmo 115 u̱ni̱ yichi̱ káʼa̱nña xíʼin na̱ ndásakáʼnu Ndióxi̱ ña̱ ná kundaa-ininara. ¿Nda̱chun? Saáchi ta̱yóʼo kúú ta̱ chindeétáʼan xíʼinyó ta kundaara miíyó (Sal. 115:9-11). Miíyó kúú na̱ xíniñúʼu ka̱ʼa̱n xíʼinra ña̱ ná chindeétáʼanra xíʼinyó, soo xíniñúʼu taxiyó ña̱ chindeétáʼanra xíʼinyó.

³ Nu̱ú artículo yóʼo ka̱ʼa̱nyó xa̱ʼa̱ u̱ni̱ pregunta yóʼo: Ña̱ nu̱ú, ¿ama kúú ña̱ xíniñúʼu kundaa-iniyó Jehová? Ña̱ u̱vi̱, ¿ndáa ki̱ʼva chíndeétáʼan Jehová xíʼin na̱ ndáa-ini miíra? Ta ña̱ u̱ni̱, ¿ndáa ki̱ʼva na̱ʼa̱yó ña̱ ndáa-iniyó Jehová ña̱ chindeétáʼanra xíʼinyó tá yáʼayó nu̱ú tu̱ndóʼo?

¿AMA KÚÚ ÑA̱ XÍNIÑÚʼU KUNDAA-INIYÓ JEHOVÁ?

4. ¿Ama kúú ña̱ xíniñúʼuníkayó ña̱ chindeétáʼan Jehová xíʼinyó?

⁴ Xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼinyó tá yáʼayó nu̱ú tu̱ndóʼo ña̱ ndeéní. Sana kǒo kunda̱a̱-iniyó ndáa ki̱ʼva chindeétáʼan Jehová xíʼinyó, soo tá xa̱a̱ chíndeétáʼanra xíʼinyó tá xa̱a̱ yáʼayó nu̱ú tu̱ndóʼo ña̱ yo̱ʼvi̱ va̱ʼaníka xáa̱yó kándíxayóra (Efes. 3:20). Ná ka̱ʼa̱nyó xa̱ʼa̱ iin ejemplo.

5, 6. ¿Ndáaña sákuaʼún xíʼin ña̱ ndo̱ʼo ta̱ Jairo?

⁵ Tiempo tá ni̱xi̱yo ta̱ Jesús, ni̱xi̱yo iin ta̱a ta̱ xi̱naní Jairo ta xi̱kuura presidente ña̱ sinagoga. Ta̱yóʼo ni̱ya̱ʼara nu̱ú iin tu̱ndóʼo ña̱ yo̱ʼvi̱ní, ndeéní ki̱ʼin kue̱ʼe̱ ñá loʼo se̱ʼera ñá xi̱kuumií 12 ku̱i̱ya̱ ta si̱lóʼo kuviñá. Sana xi̱niso̱ʼo ta̱ Jairo ña̱ xi̱kaʼa̱nna xa̱ʼa̱ ta̱ Jesús ña̱ kúúmiíra ndee̱ Ndióxi̱ ña̱ va̱ʼa keʼéra milagro, xa̱ʼa̱ ña̱kán ni̱xa̱ʼa̱nra na̱ndukúra ta̱ Jesús ña̱ va̱ʼa sandáʼara ñá loʼo se̱ʼera (Mar. 5:21-23). Ni̱xa̱ʼa̱nva ta̱ Jesús xíʼinra veʼera, soo nani ku̱a̱ʼa̱nna chí yichi̱ nda̱kutáʼanna xíʼin iin ñaʼá ñá ndeéní ndóʼo ta ti̱inñá ti̱ko̱to̱ra ña̱ va̱ʼa ndaʼañá. Ku̱ndáʼvi-ini ta̱ Jesús xi̱nirañá ta̱ ni̱ka̱ʼa̱nra xíʼinñá: “Kǒo kundi̱ʼi̱ka-iniún, xa̱a̱ ku̱a̱ʼa̱nva kue̱ʼe̱ ña̱ kúúmiíún” (Mar. 5:24-34). Tasaá ki̱xaa̱ na̱ migo ta̱ Jairo ta ni̱ka̱ʼa̱nna xíʼinra ña̱ xa̱a̱ ni̱xi̱ʼi̱va ñá loʼo se̱ʼera, saátu ni̱ka̱ʼa̱nna xíʼinra: “¿Nda̱chun sándi̱ʼi̱kavíún ta̱ Maestro?”. Sana nda̱kanixi̱ní ta̱ Jairo ña̱ kǒokaví ña̱ kivi keʼé ta̱ Jesús xa̱ʼa̱ ñá loʼo se̱ʼera, soo ta̱ Jesús ni̱ka̱ʼa̱nra xíʼinra: “Va̱ása yi̱ʼvíún, kandíxa Ndióxi̱” (Mar. 5:35, 36).

⁶ Tá ni̱xa̱a̱ ta̱ Jesús veʼe ta̱ Jairo sa̱ndátakura ñá loʼo, tá xi̱ni na̱ yivá ñá loʼo ña̱ ku̱u “nda̱kanda̱ní-inina ta ndeéní ni̱kusi̱í-inina” (Mar. 5:38-42). Ndiʼi tiempo tá xi̱xito ta̱ Jairo ñá loʼo se̱ʼera, xi̱ndakaʼánra xa̱ʼa̱ milagro ña̱ ke̱ʼé Jehová xíʼin ta̱ Jesús xa̱ʼa̱na. Ña̱yóʼo chi̱ndeétáʼan xíʼinna ña̱ va̱ʼaníka ni̱xa̱a̱na ka̱ndíxana Jehová.

¿NDÁA KI̱ʼVA CHÍNDEÉTÁʼAN JEHOVÁ XÍʼIN NA̱ NDÁA-INI MIÍRA?

7. ¿Nda̱chun kivi kandíxayó ña̱ chindeétáʼanva Jehová xíʼinyó? (Jeremías 17:7, 8).

⁷ Kúʼvi̱ní-ini Jehová xínira iin tá iin na̱ ndásakáʼnu miíra ta ndáarana (Sal. 115:12-15). Jehová káʼa̱nra xíʼinyó ña̱ chindeétáʼanra xíʼinyó tá yáʼayó nu̱ú tu̱ndóʼo ña̱ yo̱ʼvi̱ní (kaʼvi Jeremías 17:7, 8). Ná kotoyó sava ña̱ ndo̱ʼo na̱ xi̱ndasakáʼnu Ndióxi̱ tiempo xi̱naʼá xíʼin na̱ íyo tiempo vitin, ña̱ náʼa̱ ña̱ kiviva chindeétáʼan Jehová xíʼinyó ni nda̱a̱ ndáaka ña̱ yáʼayó nu̱ú.

8. Tá ke̱e ta̱ Abrahán xíʼin ñá Sara ñuu Ur, ¿ndáa ki̱ʼva xi̱ndaa Jehová na̱yóʼo? (Koto na̱ʼná).

⁸ Ná kotoyó ña̱ ndo̱ʼo ta̱ Abrahán xíʼin ñá Sara. Na̱yóʼo ku̱a̱ʼá yichi̱ ni̱ya̱ʼana nu̱ú ña̱ i̱yo ta xi̱niñúʼuna ña̱ kundaa Jehová miína, tá kúú sa̱ndákoona ñuu Ur nu̱ú va̱ʼaní ni̱xi̱yona ta ni̱xa̱ʼa̱nna ni̱xi̱yona veʼe válí inka lugar nu̱ú ni̱xi̱yo na̱ yiví na̱ kǒo níxi̱ndasakáʼnu Jehová, soo ndiʼi tiempo xi̱ndaa Jehová miína (Gén. 15:1). Tiempo tá ni̱xi̱yo so̱ko ta̱ Abrahán xíʼin ñá Sara ndakiʼinna ku̱a̱ʼa̱nna ñuu Egipto. Xa̱ʼa̱ ña̱ liviní xi̱naʼa̱ ñá Sara, ta̱ faraón ku̱tóorañá ta nda̱kiʼinrañá ku̱a̱ʼa̱nñá xíʼinra veʼera chi xi̱kunira tindaʼa̱ra xíʼinñá (Gén. 12:10-15). Va̱ása nísandákoo ndaʼa̱ Jehová na̱yóʼo chi nda̱kú ni̱xi̱yo inina xíʼinra, xa̱ʼa̱ ña̱kán kǒo nítaxi Jehová tindaʼa̱ ta̱ faraón xíʼin ñá Sara (Gén. 12:16-20).

9. ¿Ndáa ki̱ʼva chi̱ndeétáʼan Jehová xíʼin iin familia na̱ ni̱ya̱ʼa nu̱ú iin tu̱ndóʼo ña̱ ndeéní? (Koto nota).

⁹ Ná kotoyó ndáa ki̱ʼva chíndeétáʼan Jehová xíʼinyó tiempo vitin ña̱ nda̱kú koo iniyó tá yáʼayó nu̱ú tu̱ndóʼo ña̱ yo̱ʼvi̱ní. Chí país ña̱ Georgia íyo iin ta̱ hermano ta̱ naní Vladímir tá xi̱kuumiíra 15 ku̱i̱ya̱, na̱ yiví na̱ xáʼa̱n inka veʼe-ñu̱ʼu xa̱ʼmina veʼera. Na̱ veʼe ta̱ Vladímir nda̱kavaní-inina tá xa̱ʼmina veʼena soo táxinína tíxa̱ʼvi ndaʼa̱ Ndióxi̱ xa̱ʼa̱ ña̱ ni̱ka̱kuna. Ni yo̱ʼvi̱ní tu̱ndóʼo ni̱ya̱ʼana va̱ása nísandákoona ña̱ kachíñuna nu̱ú Jehová. Ta̱ Vladímir káʼa̱nra: “Ni iinndi̱ kǒo nísandákoondi̱ ña̱ koondi̱ precursor”. Jehová xi̱niñúʼura na̱ congregación ña̱ va̱ʼa chi̱ndeétáʼanna xíʼin na̱ veʼe ta̱ Vladímir.a

¿NDÁA KI̱ʼVA NA̱ʼA̱YÓ ÑA̱ NDÁA-INIYÓ ÑA̱ CHINDEÉTÁʼAN JEHOVÁ XÍʼINYÓ?

10. ¿Ndáaña kivi ixayo̱ʼvi̱ xíʼin na̱ íyo se̱ʼe ña̱ kundaa-inina Jehová?

¹⁰ Tá ndákanixi̱níyó xa̱ʼa̱ ña̱ keʼéyó chí nu̱únínu. Jehová káʼa̱nra xíʼin na̱ íyo se̱ʼe ná kundaana se̱ʼena (2 Cor. 12:14; 1 Tim. 5:8). Saátu chindeétáʼanna xíʼinna ña̱ vií koo ña̱ ndaka̱xinna keʼéna. Xa̱ʼa̱ ña̱ yaʼviní ña̱ʼa tiempo vitin, na̱ íyo se̱ʼe xíniñúʼu nda̱ka̱tu̱ʼúnna miína á chikaa̱na ndee̱ xíʼin se̱ʼena ña̱ kachíñuna ndiʼi tiempo nu̱ú Jehová á ña̱ ndukúna iin chiñu ña̱ va̱ʼa nu̱ú ku̱a̱ʼá xu̱ʼún chaʼvinana. Sava ñuu kúúmiína costumbre ña̱ taxi na̱ va̱lí se̱ʼena xu̱ʼún ndaʼa̱na tá xa̱a̱ kúchéena, iin ña̱ va̱ʼava kúú ña̱ ndíʼi̱-ini na̱ íyo se̱ʼe xa̱ʼa̱ na̱ va̱lí se̱ʼena xíʼin xa̱ʼa̱ miína. Soo, ¿ndáa ki̱ʼva na̱ʼa̱na ña̱ ndáa-inina Jehová ña̱ chindeétáʼanra xíʼinna?

11. ¿Ndáa ki̱ʼva ni̱na̱ʼa̱ ta̱ Isaac xíʼin ñá Rebeca ña̱ ni̱ndi̱ʼi-inina xa̱ʼa̱ se̱ʼena ña̱ va̱ʼa kǒo kuxíkára nu̱ú Ndióxi̱? (Koto na̱ʼná).

¹¹ Ná kotoyó ña̱ ndo̱ʼo ta̱ Isaac xíʼin ñá Rebeca. Na̱yóʼo ni̱ka̱ʼa̱nna xíʼin se̱ʼena ta̱ Jacob ña̱ ná ku̱ʼu̱nra iin lugar ña̱ xíkaní kíndo̱o ña̱ va̱ʼa ndani̱ʼíra iin ñá ndásakáʼnu Ndióxi̱ ña̱ va̱ʼa tindaʼa̱ñá xíʼinra (Gén. 28:1-3, 7). Xíʼin ña̱ ke̱ʼéna yóʼo ni̱na̱ʼa̱na ña̱ xi̱kandíxana Ndióxi̱ ta xi̱ndi̱ʼi̱-inina xa̱ʼa̱ se̱ʼena ña̱ ná kǒo kuxíkára nu̱ú Ndióxi̱. Saátu kúú tiempo vitin, tá siʼna chiñu Ndióxi̱ ndíʼi̱-ini na̱ íyo se̱ʼe xa̱ʼa̱, saátu xa̱a̱ na̱ va̱lí se̱ʼena keʼéna, siʼna chiñu Ndióxi̱ kundi̱ʼi̱-inina xa̱ʼa̱ (Mat. 6:33).

12. ¿Ama kúú ña̱ kivi ixayo̱ʼvi̱ña xíʼinyó kundatuyó ña̱ chindeétáʼan Jehová xíʼinyó?

¹² Tá yáʼayó nu̱ú tu̱ndóʼo ña̱ yo̱ʼvi̱ ná kundatuyó ña̱ chindeétáʼan Jehová xíʼinyó. Tá xa̱a̱ ku̱a̱ʼání tiempo ndóʼoyó iin tu̱ndóʼo kivi ndakanixi̱níyó nda̱chun kúáchi̱níra ña̱ chindeétáʼanra xíʼinyó. Ná kachiyó ña̱ ke̱ʼéna iin ña̱ va̱ása va̱ʼa xíʼinyó, xíni̱vayó ña̱ mií Jehová kúú ta̱ ndasavií ku̱a̱chi yóʼo, soo sana ixayo̱ʼvi̱vaña xíʼinyó kundatuyó nda̱a̱ ná keʼéra ña̱yóʼo (Sal. 33:20). Ná kotoyó ña̱ ku̱u tiempo xi̱naʼá.

13. ¿Ndáaña sákuaʼayó xíʼin ña̱ ku̱u tá ni̱xi̱ʼi̱ ta̱ rey Ocozías? (Miqueas 7:7).

¹³ Tá ni̱xi̱ʼi̱ ta̱ rey Ocozías, siʼíra ñá Atalía xa̱ʼníñá ndiʼi na̱ veʼeñá na̱ kivi ndakiʼin chiñu ña̱ koona rey. Saáchi miíñá xi̱kuni̱ kaʼndachíñu (2 Crón. 22:10-12). I̱ñu̱ ku̱i̱ya̱ xa̱ʼndachíñuñá ta ku̱a̱ʼání ndióxi̱ vatá xi̱ndasakáʼnuna, saátu ku̱a̱ʼání ña̱ kini xi̱keʼéna tá xi̱xaʼndachíñuñá (2 Crón. 24:7). Sana ku̱a̱ʼání na̱ israelita nda̱kanixi̱nína ña̱ sa̱ndákoo ndaʼa̱ Jehová miína, soo xi̱kiʼinva Jehová kuenta xíʼin ndiʼi ña̱ xi̱keʼé ñá Atalía. Xi̱xini̱va Jehová ña̱ chi̱se̱ʼé ta̱ su̱tu̱ káʼnu Jehoiadá xíʼin ñá síʼira ta̱ loʼo Jehoás ta̱ xa̱a̱ koo rey. Iin kama xa̱ʼnína ñá Atalía ta ni̱xa̱a̱ ta̱ loʼo Jehoás ndu̱ura rey (2 Crón. 23:1-3, 8-15). ¿Ndáaña sákuaʼayó xíʼin ña̱ ku̱u yóʼo? Tá ná kundatuyó ña̱ chindeétáʼan Jehová xíʼinyó saá na̱ʼa̱yó ña̱ kándíxayóra ta viíní ndátiinra ku̱a̱chi (kaʼvi Miqueas 7:7).

14. ¿Ndáaña sákuaʼayó xíʼin ña̱ ndo̱ʼo ta̱ Serguéi xíʼin ñá María?

¹⁴ Ta̱ Serguéi xíʼin ñá María, na̱ ñuu Rusia kúúna, na̱yóʼo ni̱na̱ʼa̱na ña̱ xi̱kandíxana Jehová saáchi u̱ʼu̱n ku̱i̱ya̱ chi̱kaa̱na ta̱ hermano yóʼo veʼeka̱a xa̱ʼa̱ ña̱ kándíxara Ndióxi̱. ¿Ndáaña chi̱ndeétáʼan xíʼinna tá va̱ása inkáchi níxi̱yokana? Ñá María káchiñá: “Xa̱a̱ 20 ku̱i̱ya̱ ku̱a̱ʼa̱n ti̱ndaʼa̱ndi̱, ta tá ndo̱ʼondi̱ ña̱yóʼo, ndo̱ʼondi̱ nda̱a̱ táki̱ʼva ndóʼo saa válí tá xáʼndana ndi̱xi̱nrí. Soo Jehová va̱ása nísandákoondaʼa̱ra miíndi̱. Jehová xi̱niñúʼura na̱ hermano ña̱ va̱ʼa kundaara miíi̱ ta va̱ʼaní ni̱na̱ʼa̱ra ña̱ kúʼvi̱-inira xínira miíndi̱, mií tiempo ña̱ xíniñúʼi̱ ña̱ chindeétáʼanna xíʼi̱n va̱ʼaní ki̱ʼinna kuenta xíʼi̱n”. ¿Ndáaña chi̱ndeétáʼan xíʼin ta̱ Serguéi? Ña̱yóʼo xi̱kuu oración. Veʼeka̱a xi̱kaʼa̱nna xa̱ʼa̱ra ña̱ xi̱ndasakáʼnura Ndióxi̱. Xíʼin ña̱ ndo̱ʼo na̱yóʼo kíʼinyó kuenta ña̱ chindeétáʼanva Jehová xíʼinyó ña̱ ya̱ʼayó nu̱ú tu̱ndóʼo (Col. 1:11).

15. ¿Ama kúú ña̱ kivi kixáʼayó ndakava-iniyó?

¹⁵ Tá yáʼayó nu̱ú tu̱ndóʼo ña̱ yo̱ʼvi̱ní ña̱ túviyó ña̱ kǒo kuchiñuyó xíʼin. Sana xa̱a̱ ku̱a̱ʼá tiempo kúúmiíyó iin kue̱ʼe̱, á xa̱a̱ ku̱chéeyó ta túviyó ña̱ va̱ása kívika keʼéyó ku̱a̱ʼáka ña̱ʼa. Tá ndóʼoyó ña̱yóʼo sana kixáʼayó ndakava-iniyó ta yi̱ʼvíyó. Tá saá ndóʼún, ¿ndáa ki̱ʼva na̱ʼún ña̱ ndáa-iniún Jehová?

16. ¿Ndáaña sákuaʼayó xíʼin ña̱ ke̱ʼé ta̱ David tá ni̱xi̱yo loʼora? (Salmo 37:5).

¹⁶ Ná ka̱ʼa̱nyó xa̱ʼa̱ ta̱ David tá ka̱nitáʼanra xíʼin ta̱ Goliat. Ta̱ filisteo yóʼo xi̱kuta̱aní-inira ta xi̱kaʼa̱nra ña̱ kǒo nda̱a̱ ni iinna kuchiñu kanitáʼan xíʼinra, ta xi̱kusi̱kindaara na̱ soldado na̱ ñuu Israel (1 Sam. 17:10). Soo ta̱ David xi̱ndaaní-inira Jehová ña̱ chindeétáʼanra xíʼinra. Ña̱kán tá ku̱yatinra nu̱ú ta̱ Goliat ña̱ kanitáʼanra xíʼinra, va̱ása níkáʼa̱nra xíʼinra: “Xa̱i̱ kanitáʼi̱n xíʼún xíʼin honda ta saátu xíʼin yu̱u̱”, chi ña̱ ni̱ka̱ʼa̱nra xíʼinra kúú ña̱yóʼo: “Xa̱i̱ kanitáʼi̱n xíʼún xa̱ʼa̱ ki̱vi̱ Jehová ta̱ xáʼndachíñu nu̱ú na̱ ángel” (1 Sam. 17:37, 45). Ndióxi̱ chi̱ndeétáʼanra xíʼin ta̱ David, saáchi iin kuití yu̱u̱ xi̱niñúʼura ña̱ xa̱ʼníra ta̱ Goliat. Kivi kundoʼoyó nda̱a̱ táki̱ʼva ndo̱ʼo ta̱ David, sana ya̱ʼayó nu̱ú tu̱ndóʼo ña̱ ndeéní ña̱ túviyó ña̱ kǒo kuchiñuyó xíʼin. Tá kéʼéyó nda̱saa ña̱ kivi keʼé kuitíyó ta ndáa-iniyó Jehová, sana xa̱a̱yó keʼéyó ña̱ʼa ña̱ va̱ása níndakanixi̱níyó xa̱a̱yó keʼéyó (kaʼvi Salmo 37:5;b Filip. 4:13). Ta̱ chíndeétáʼan xíʼinyó kúú Jehová ta̱ i̱xava̱ʼa ndiví xíʼi ñuʼú yóʼo (Sal. 115:15).

17. ¿Ndáaña sákuaʼayó xíʼin ña̱ ndóʼo ñá Paula?

¹⁷ Ñá Paula iin ñá hermana ñá ñuu Canadá kúúñá, yáʼaka 25 ku̱i̱ya̱ ni̱xi̱yo yii̱ñá superintendente ña̱ circuito. Tá ka̱kuñá, chí sa̱táñá xi̱ndikaa̱ iin kue̱ʼe̱ ta xi̱ ixayo̱ʼvi̱ña xíʼinñá ña̱ ka̱ndañá. Ñáyóʼo va̱ʼaní xi̱natúʼunñá xíʼin na̱ yiví xa̱ʼa̱ Ndióxi̱. Ñáyóʼo káchiña: “Ku̱a̱ʼá ki̱ʼva nátúʼi̱n xíʼin na̱ yiví, tá kúú xíʼin teléfono ta saátu tá ndákutáʼi̱n xíʼin na̱ yiví káʼi̱n xíʼinna xa̱ʼa̱ Ndióxi̱”. Ta káʼa̱nkañá: “Kéʼíi̱ ndasaa ña̱ kivi keʼíi̱ ta ndáa-inii̱ ña̱ chindeétáʼan Jehová xíʼi̱n” (Sal. 143:8).

18, 19. ¿Ndáaña sákuaʼayó xíʼin ña̱ ke̱ʼé ta̱ Simeón? (Koto na̱ʼná).

¹⁸ Tá va̱ása xínu ña̱ kúni̱yó. Tá ndáa-iniyó Jehová ña̱yóʼo chindeétáʼan xíʼinyó ña̱ keʼéyó ndasaa ña̱ kivi kuití keʼéyó. Tá kúú, ndiʼiyó kúni̱ ña̱ ná kixaa̱ ki̱vi̱ ña̱ sandíʼi-xa̱ʼa̱ Jehová ndiʼi ña̱ saxóʼvi̱ miíyó (Apoc. 21:4). Xa̱ʼa̱ ña̱ xa̱a̱ ku̱a̱ʼa̱n kúchéeyó, sana ndakanixi̱níyó á kuniyó kixaa̱ ki̱vi̱ kán. Tá saá ndóʼoyó ná keʼéyó nda̱a̱ táki̱ʼva ke̱ʼé ta̱ Simeón.

¹⁹ Ta̱ Simeón ni̱xi̱yora ñuu Jerusalén, ku̱a̱ʼání ku̱i̱ya̱ ka̱chíñura nu̱ú Jehová ta nda̱kúní ni̱xi̱yo inira xíʼinra. Jehová xi̱niñúʼura espíritu santora ña̱ va̱ʼa ni̱ka̱ʼa̱nra xíʼin ta̱ Simeón ña̱ kunivara ta̱ Mesías tá si̱lóʼo kúma̱ní kuvira. Sana xi̱kuni̱níra kunira ta̱ Mesías (Luc. 2:25, 26). Tá xi̱nira ta̱ loʼo Jesús sana nda̱kanixi̱níra ña̱ va̱ása kunira kuaʼnu ta̱yóʼo ta xa̱a̱ra nduura ta̱ Mesías. ¿Ndáaña ke̱ʼéra? ¿Á nda̱kanixi̱níra xa̱ʼa̱ ña̱ʼa ña̱ va̱ása kivi kunira? Va̱ásaví. Chi ña̱ nda̱kanixi̱níra xa̱ʼa̱ kúú ña̱ xi̱nira ña̱ ni̱xi̱nu sava ña̱ profecía, ta ña̱yóʼo chi̱ndeétáʼan xíʼinra ña̱ kusi̱í-inira ta kǒo ña̱ sándi̱ʼi̱-inira (Is. 49:6; Luc. 2:27-32). Saátu kivi kundoʼo miíyó tá xítoyó ña̱ xa̱a̱ xínu sava profecía, ña̱yóʼo chindeétáʼanña xíʼinyó ña̱ chikaa̱yó ndee̱ kachíñuyó nu̱ú Jehová nani ndátuyó xi̱nu ña̱ ni̱ka̱ʼa̱nra (2 Ped. 1:19).

NÁ CHIKAA̱YÓ NDEE̱ ÑA̱ KUNDAAKA-INIYÓ JEHOVÁ

20. ¿Ndáa ki̱ʼva chíndeétáʼan relato ña̱ va̱xi nu̱ú Biblia xíʼinyó ña̱ kundaaka-iniyó Jehová? (Koto recuadro ña̱ naní “Kaʼvi Biblia ña̱ va̱ʼa kundaaka-iniún Jehová”).

²⁰ Jehová ndiʼi tiempo chíndeétáʼanra xíʼin na̱ ndáa-ini miíra (Sal. 28:7). ¿Ndáaña kivi keʼéyó ña̱ va̱ʼa kiʼinyó kuenta ña̱ chíndeétáʼanra xíʼinyó? Tá kúú, tá xa̱a̱ káʼviyó Biblia, ná ndakanixi̱níyó ndáa ki̱ʼva chi̱ndeétáʼanra xíʼin na̱ xi̱ndasakáʼnu miíra tiempo xi̱naʼá. Ta saátu ná kotoyó ndáa ki̱ʼva chíndeétáʼanra xíʼinyó tá yáʼayó nu̱ú tu̱ndóʼo táʼan ña̱ ni̱ya̱ʼa na̱kán nu̱ú, tasaá kunda̱a̱-iniyó ña̱ ndiʼi tiempo chíndeétáʼanra xíʼinyó. Tá saá ná keʼéyó, ña̱yóʼo chindeétáʼan xíʼinyó ña̱ kunda̱a̱-iniyó ña̱ va̱ása íyo mitúʼunyó, ta saátu ña̱ kuchiñuyó ya̱ʼayó nu̱ú tu̱ndóʼo. Ña̱kán ná kandíxayó texto ña̱ ku̱i̱ya̱ vitin 2027: “Kundaa-inindó Jehová” (Sal.115:11).