Sanáʼa̱ndó na̱ va̱lí se̱ʼendó ña̱ taxina tíxa̱ʼvi

Ku̱a̱ʼání na̱ xíni̱va̱ʼa káʼa̱nna ña̱ si̱íníka íyo na̱ yiví na̱ táxi tíxa̱ʼvi, kǒo ku̱a̱ʼá kue̱ʼe̱ kúúmiína, xíni̱na ndáaña keʼéna tá kúúmiína tu̱ndóʼo ta va̱ʼaníka kítáʼanna xíʼin inkana. Ta̱ káʼvi va̱ʼa xa̱ʼa̱ ña̱yóʼo, ta̱ naní Robert Emmons káʼa̱nra ña̱ tá táxiyó tíxa̱ʼvi ña̱yóʼo chindeétáʼan xíʼinyó ña̱ va̱ása kukúini̱-iniyó kuniyó inkana, va̱ása sa̱a̱-iniyó kuniyóna, va̱ása kuni̱yó kuumiíyó ku̱a̱ʼání ña̱ʼa ta va̱ása sa̱a̱níyó.a

Tá táxi na̱ va̱lí tíxa̱ʼvi, ¿ndáa ki̱ʼva chíndeétáʼanña xíʼinna? Ku̱mí ku̱i̱ya̱ ke̱ʼéna iin estudio xíʼin 700 na̱ va̱lí ta ki̱ʼinna kuenta ña̱ na̱ va̱lí na̱ táxi tíxa̱ʼvi va̱ása sándaʼvina tá kéʼéna exámen ti̱xin escuela, va̱ása xíniñúʼuna droga ni va̱ása xíʼinína ndixi ta va̱ʼaní íyo ña̱ kéʼéna.

• Tá ndákanixi̱nína ña̱ xíniñúʼu taxina ña̱ʼa ndaʼa̱na kǒo táxina tíxa̱ʼvi. Tá táxina iin regalo ndaʼa̱ na̱ va̱lí va̱ása táxina tíxa̱ʼvi saáchi ndákanixi̱nína ña̱ xíniñúʼu taxina ndiʼi ña̱ʼa ña̱ kúni̱na ndaʼa̱na.

  Ku̱a̱ʼánína kéʼé ña̱yóʼo tiempo vitin. Iin ñá íyo se̱ʼe ñá naní Katherine káchiñá: “Na̱ ñuyǐví kúni̱na ná ndakanixi̱níyó ña̱ xíniñúʼu taxina ndiʼi ña̱ kúni̱yó ndaʼa̱yó. Tá kúú nu̱ú tele á nu̱ú internet xítoyó ña̱ʼa ña̱ kúni̱na ná kuumiíyó ta káʼa̱nna ña̱ siʼna miíyó xíniñúʼu kuumií ña̱yóʼo”.

• Kiviva sakúaʼa na̱ va̱lí ña̱ taxina tíxa̱ʼvi. Iin ñá íyo se̱ʼe ñá naní Kaye káchiñá: “Kiviva sanáʼa̱yó na̱ va̱lí; ña̱kán tá sánáʼa̱yóna tá válíkana kivi keʼéna ña̱yóʼo. Nda̱a̱ táki̱ʼva kátunyó iin planta sa̱tá iin yitu̱n ña̱ va̱ʼa kuaʼnu nda̱kúnú saá xíniñúʼu sanáʼa̱yó na̱ va̱lí se̱ʼeyó”.

¿Ndáa ki̱ʼva sanáʼa̱ndó se̱ʼendó ña̱ taxina tíxa̱ʼvi?

• Sanáʼa̱ndóna ndáaña ka̱ʼa̱nna. Nda̱a̱ na̱ válíní kivi sakúaʼa taxi tíxa̱ʼvi tá táxina iin regalo ndaʼa̱na á tá va̱ʼa íyo inina xíʼinna. Tasaá tá ná kuaʼnuna taxina tíxa̱ʼvi ndaʼa̱ inkana xa̱ʼa̱ ña̱ táxina ndaʼa̱na.

  

  Texto ña̱ káxiní káʼa̱n: “Taxindó tíxa̱ʼvi” (Colosenses 3:15).

  “Se̱ʼeñánindi̱ kúúmiíra u̱ni̱ ku̱i̱ya̱ ta ndiʼi tiempo táxira tíxa̱ʼvi ta xíʼin ña̱ to̱ʼó ndúkúra iin ña̱ʼa, saáchi saá sa̱náʼa̱ na̱ yivárara. Xíʼin ña̱ kéʼéna sánáʼa̱nara ndáa ki̱ʼva taxira tíxa̱ʼvi” (ta̱ Jeffrey).

• Sanáʼa̱ndóna ndáaña keʼéna. Tá ná taxina iin ña̱ʼa ndaʼa̱ se̱ʼendó kivi chindeétáʼanndó xíʼinna ña̱ kaʼyina nu̱ú iin tutu ña̱ táxina tíxa̱ʼvi xa̱ʼa̱ ña̱ ta̱xina ndaʼa̱na. Saátu kivi ka̱ʼa̱nndó xíʼinna ná chindeétáʼanna xíʼinndó keʼéna sava chiñu ña̱ íyo ti̱xin veʼendó. Ña̱yóʼo chindeétáʼanña xíʼinna ña̱ chindayáʼvina ndiʼi chiñu ña̱ kéʼéndó ti̱xin veʼendó.

  

  Texto ña̱ káxiní káʼa̱n: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hechos 20:35).

  “U̱vi̱ kúú na̱ va̱lí se̱ʼendi̱ na̱ kúa̱an. Na̱yóʼo chíndeétáʼanna xíʼinndi̱ tá kéʼéndi̱ ña̱ kuxundi̱ ta saátu tá kéʼéndi̱ inkaka chiñu ti̱xin veʼendi̱. Saá sákuaʼana chindayáʼvina ndiʼi ña̱ kéʼéndi̱ xa̱ʼa̱na ta táxina tíxa̱ʼvi xa̱ʼa̱ ña̱yóʼo” (ñá Beverly).

• Sanáʼa̱ndóna ña̱ vitá koo inina. Nda̱a̱ táki̱ʼva xíniñúʼu iin plata ñuʼú ña̱ va̱ʼa kuaʼnunú, saátu miíyó xíniñúʼu vitá koo iniyó ña̱ va̱ʼa taxiyó tíxa̱ʼvi. Na̱ vitá-ini kúnda̱a̱-inina ña̱ va̱ása kívi keʼéna ndiʼi ña̱ʼa, ta xa̱ʼa̱ ña̱yóʼo táxina tíxa̱ʼvi tá chíndeétáʼan inkana xíʼinna.

  

  Texto ña̱ káxiní káʼa̱n: “Vitá koo inindó, ta ndakanixi̱níndó ña̱ ndáyáʼvika inkana nu̱úndó, ndakundeéndó kundi̱ʼi̱-inindó xa̱ʼa̱ inkana ta va̱ása kundi̱ʼi̱-inindó xa̱ʼa̱ mií kuitíndó” (Filipenses 2:3, 4).

  “Sava yichi̱ tá xíxindi̱ xíʼin na̱ va̱lí se̱ʼendi̱, sísikíndi̱ ta káʼa̱nndi̱ xíʼinna ndáa ki̱ʼva taxina tíxa̱ʼvi. Iin tá iinndi̱ káʼa̱nndi̱ nda̱chun táxindi̱ tíxa̱ʼvi. Ña̱yóʼo chíndeétáʼanña xíʼinndi̱ ña̱ kusi̱í-inindi̱ nu̱úka ña̱ ndakava-inindi̱ á ña̱ kundi̱ʼi-inindi̱ xa̱ʼa̱ iinlá miíndi̱” (ñá Tamara).

Ña̱ kivi keʼún: Miíún xíniñúʼu chinúu yichi̱ nu̱úna. Tá táxiún tíxa̱ʼvi ndaʼa̱na ta saátu ndaʼa̱ inkana, kamaka sakúaʼa na̱ va̱lí se̱ʼún ña̱ taxina tíxa̱ʼvi.