Ka̱chíñuna nu̱ú Jehová ni xi̱kuma̱ní ña̱ʼa nu̱úna

Ku̱a̱ʼání na̱ yiví xóʼvi̱ xa̱ʼa̱ ña̱ ku̱a̱andaní ya̱ʼvi ña̱ʼa, ta nda̱a̱ na̱ testigo Jehová xóʼvi̱ xa̱ʼa̱ ña̱yóʼo. Soo nu̱úka ña̱ kundi̱ʼi̱-inina xa̱ʼa̱ tu̱ndóʼo ña̱ yáʼana nu̱ú ndáa-inina Jehová saáchi miíra káchira: “Nda̱a̱ ni iin yichi̱ va̱ása sandákoi̱ yóʼó” (Hebreos 13:5). Ña̱kán kúsi̱í-inina xíʼin ña̱ʼa ña̱ kúúmiína. Xíʼin ña̱yóʼo kúnda̱a̱-iniyó ña̱ ndiʼi tiempo kéʼé Jehová ña̱ káʼa̱nra. Ta ke̱ʼéra ña̱yóʼo xa̱ʼa̱ na̱ ndóo ñuu Filipinas nu̱ú kúma̱ní ku̱a̱ʼání ña̱ʼa nu̱ú na̱ yiví. Ku̱i̱ya̱ 1970 nda̱a̱ 1980 na̱ ñuu Filipinas ni̱ya̱ʼana nu̱ú tu̱ndóʼo ña̱ yo̱ʼvi̱ní.

Iin ñá hermana ñá naní Vickya ni̱ka̱ʼa̱nñá: “Sava yichi̱ xi̱xakui̱ xa̱ʼa̱ ña̱ kǒo ña̱ kuxui̱, ña̱ xi̱kuumií kuitíndi̱ xi̱kuu arroz, ñi̱i̱ xíʼin ti̱kui̱í”. Iin ta̱ hermano ta̱ naní Florencio i̱xayo̱ʼvi̱níña xíʼinra ni̱ʼíra iin chiñu xa̱ʼa̱ ña̱kán ni̱ka̱ʼa̱nra: “U̱ni̱ kuití ti̱ko̱to̱i̱ xíʼin u̱ni̱ kuití xatii̱ ni̱xi̱yo, ta ña̱yóʼo xi̱xiniñúʼi̱ tá xi̱xaʼi̱n reunión xíʼin asamblea”. ¿Ndáa ki̱ʼva chi̱ndeétáʼan Jehová xíʼin na̱ hermano yóʼo? ¿Ndáaña chi̱ndeétáʼan xíʼinna ña̱ kǒo nísandákoona ña̱ kachíñuna nu̱ú Jehová? ¿Ndáaña kivi sakúaʼayó xíʼin ña̱ ke̱ʼéna?

Xi̱ndaa-inina Jehová

Na̱ testigo Jehová na̱ ndóo ñuu Filipinas ndáa-inina Jehová ta kǒo níxi̱ka-inina tá ni̱ya̱ʼana nu̱ú tu̱ndóʼo chi xi̱ndaa-inina ña̱ chíndeétáʼan Jehová xíʼinna (Hebreos 13:6). Na̱ hermano yóʼo nda̱kanda̱ní-inina tá xi̱tona ndáa ki̱ʼva chi̱ndeétáʼan Jehová xíʼinna. Iin ñá hermana ñá naní Cecille ni̱ka̱ʼa̱nñá: “Ku̱mí xi̱kuundi̱ veʼendi̱, ta iin ki̱vi̱ i̱xava̱ʼandi̱ arroz kuxundi̱ soo ña̱yóʼo kúú ndiʼi ña̱ xi̱kuumiíndi̱, saá ni̱ka̱ʼa̱nndi̱ xíʼin Jehová ña̱ ná taxira ndaʼa̱ndi̱ mií ña̱ xíniñúʼundi̱ ki̱vi̱ saá, nani ndóokandi̱ xíxindi̱, ki̱xi iin ta̱ hermano veʼendi̱ ta níʼira 5 kilo arroz ki̱xaa̱ra, ni̱kusi̱íní-inindi̱ ta nda̱a̱ xa̱kundi̱ xa̱ʼa̱ ndiʼi ña̱ va̱ʼa ta̱xi Jehová ndaʼa̱ndi̱. Ku̱a̱ʼání yichi̱ ni̱ya̱ʼandi̱ nu̱ú táʼan ña̱yóʼo”.

Na̱ ñuu Ndióxi̱ va̱ʼaní xi̱keʼéna ña̱ va̱xi nu̱ú Biblia (Proverbios 2:6, 7). Ná ka̱ʼa̱nyó xa̱ʼa̱ ña̱ ndo̱ʼo iin ñá hermana kúa̱anñá ñá naní Arcelita, ñáyóʼo sa̱kán nda̱kuchiñá tá kǒo xu̱ʼúnñá níxi̱yo ña̱kán ni̱ka̱ʼa̱nñá xíʼin Jehová xa̱ʼa̱ ndiʼi ña̱ xi̱ndiʼi̱-iniñá. Tándi̱ʼi nda̱kaʼánñá xa̱ʼa̱ ña̱ káʼa̱n Proverbios 10:4: “Na̱ xúxán kǒo ña̱ kúúmiína soo na̱ kama íyo ña̱ʼa nu̱úna”. Xa̱ʼa̱ ña̱ kúni̱ñá keʼéñá ña̱ káʼa̱n texto yóʼo, chi̱ʼiñá ña̱ʼa kuxuñá. Ñáyóʼo káchiñá: “Jehová xi̱ndaaníra yi̱ʼi̱ saáchi va̱ʼaní ka̱na ña̱ chi̱ʼii̱, ta ni̱xi̱yo xu̱ʼún ña̱ xi̱niñúʼi̱”.

Va̱ása nísandákoona ña̱ ku̱ʼu̱nna reunión

Na̱ hermano yóʼo kǒo ku̱a̱ʼá xu̱ʼúnna níxi̱yo ña̱ satána ñuʼú nu̱ú ixava̱ʼana salón ña̱ Reino, soo nisaá na̱yóʼo ndiʼi tiempo xi̱xa̱ʼa̱nna reunión ta xi̱chikaa̱na ndee̱ xíʼin táʼanna (Hebreos 10:24, 25). Kǒo níndakoona ku̱ʼu̱nna reunión. Tá kúú iin ñá hermana ñá naní Deborah ni̱ka̱ʼa̱nñá: “Miíi̱ xíʼin iin ñá precursora i̱xava̱ʼandi̱ iin veʼe loʼo nu̱ú xi̱ndakutáʼanndi̱, ta ki̱ʼva i̱ñundi̱ xi̱ndataka. Xi̱niñúʼundi̱ ñu̱ú ña̱ va̱ʼa ndakasindi̱ xi̱ní veʼe, ta saátu xi̱niñúʼundi̱ña ña̱ va̱ʼa ndakasindi̱ kandíka veʼe. Ta xíʼin yitu̱n i̱xava̱ʼandi̱ tayi̱ válí nu̱ú koondi̱”.

Veʼe na̱ hermano xi̱ndakutáʼanna ña̱ va̱ʼa koo reunión. Iin ñá hermana ñá naní Virginia káchiñá: “Xi̱niñúʼundi̱ ku̱ʼu̱ xíʼin bambú ña̱ i̱xava̱ʼandi̱ veʼendi̱, soo ndiʼi ki̱vi̱ sábado xi̱tavándi̱ ña̱ʼa ini veʼendi̱ ña̱ va̱ʼa koo reunión ki̱vi̱ domingo”. Ta ta̱ hermano ta̱ naní Noel káchira: “Inka veʼe nu̱ú xi̱ndatakandi̱ xi̱xiʼinña tá xi̱kuun sa̱vi̱, xa̱ʼa̱ ña̱kán xi̱kanditandi̱ cubeta ña̱ va̱ʼa ke̱e ti̱kui̱í, soo va̱ása níxi̱kiʼinndi̱ kuenta xíʼin ña̱yóʼo chi ña̱ xi̱ndayáʼvika nu̱úndi̱ xi̱kuu ña̱ ndasakáʼnundi̱ Jehová”.

Xi̱kusi̱íkaví-inina tá xi̱natúʼunna xíʼin na̱ yiví xa̱ʼa̱ Jehová

Ni kǒo ku̱a̱ʼá ña̱ʼa níxi̱kuumií na̱ hermano soo nisaá chi̱kaa̱nína ndee̱ ña̱ kachíñuna nu̱ú Jehová. Ñá Lindina, ñá ni̱xi̱yo iin isla ña̱ xi̱naní Negros káchiñá: “Ku̱a̱ʼání xi̱kuundi̱ veʼendi̱ ta iinlá yivái̱ kúú ta̱ xi̱kachíñu xa̱ʼa̱ ña̱kán kǒo níxi̱kuumiíndi̱ xu̱ʼún ña̱ ku̱ʼu̱nndi̱ xíʼin carro. Ta ña̱ va̱ʼa ku̱ʼu̱nndi̱ natúʼunndi̱ xíʼin na̱ yiví xa̱ʼa̱ Jehová xi̱xika xáʼándi̱, soo liviní xi̱xiyo ndiʼi ña̱yóʼo chi xi̱xaʼa̱n ndiʼindi̱ ta saátu xi̱kunda̱a̱-inindi̱ ña̱ ndiʼi ña̱ xi̱keʼéndi̱ xi̱sakúsi̱íña-ini Jehová”.

Iin ña̱ i̱xayo̱ʼvi̱ní xíʼinndi̱ xi̱kuu ña̱ ku̱ʼu̱nndi̱ natúʼunndi̱ xíʼin na̱ yiví xa̱ʼa̱ Ndióxi̱ nda̱a̱ xi̱kí ña̱ íyo xíka, saáchi xi̱xaʼa̱n xáʼándi̱ chi kǒo carro níxi̱yo ña̱ ku̱ʼu̱nndi̱. Ñá Esther ñá íyo isla ña̱ Luzón káchiñá: “Sava yichi̱ 6 nda̱a̱ 12 xi̱kuundi̱ ta ya̱chi̱ní xi̱keendi̱ veʼendi̱ ña̱ ku̱ʼu̱nndi̱ saáchi xíkaní ndóo na̱ yiví na̱ xi̱xa̱ʼa̱nndi̱ xi̱xitondi̱. Ña̱kán xi̱niʼindi̱ ña̱ʼa ña̱ kuxundi̱, ta tá xa̱a̱ hora ña̱ kuxundi̱ xi̱ndatakandi̱ xa̱ʼa̱ iin yitu̱n. Sava na̱ hermano kǒo ña̱ʼa níxi̱yo nu̱úna ña̱ kuxuna, xa̱ʼa̱ ña̱kán xi̱ka̱ʼa̱nndi̱ xíʼinna ‘kǒo kundi̱ʼi̱-inindó, íyo ña̱ʼa kuxu ndiʼivayó’”.

Ku̱a̱ʼání ña̱ va̱ʼa ta̱xi Jehová ndaʼa̱ na̱ hermano yóʼo. Tá kúú tá ku̱i̱ya̱ 1970, chí Filipinas ni̱xi̱yo 54,789 na̱ publicador. Ta ku̱i̱ya̱ 1989, xa̱a̱ ku̱a̱ʼání ni̱xa̱a̱na ndu̱una saáchi 102,487 publicador xi̱kuuna. Ta tá ku̱i̱ya̱ 2023 ki̱ʼva 253,876 xi̱kuu na̱ testigo Jehová ñuu Filipinas.

“Ni ndáʼviní ni̱xi̱yondi̱ soo xi̱kuʼvi̱-inindi̱ xi̱xinindi̱ Jehová”

Ni kǒo ku̱a̱ʼá ña̱ʼa níxi̱kuumií na̱ hermano, soo chi̱kaanína ndee̱ ña̱ kachíñuna nu̱ú Jehová. Iin ta̱ hermano ta naní Antonio ni̱ka̱ʼa̱nra: “Ni ndáʼviní ni̱xi̱yondi̱ soo xi̱kuʼvi̱-inindi̱ xi̱xinindi̱ Jehová”. Ta ñá hermana Fe Abad ni̱ka̱ʼa̱nñá: “Tá ni̱ya̱ʼa̱nndi̱ nu̱ú tu̱ndóʼo ta kǒo xu̱ʼúnndi̱ níxi̱yo, miíi̱ xíʼin yiíi̱ chi̱kaa̱ndi̱ ndee̱ kachíñundi̱ nu̱ú Jehová ta si̱íní ni̱xi̱yondi̱ ni loʼo ña̱ʼa xi̱kuumiíndi̱. Xa̱ʼa̱ ña̱yóʼo nda̱a̱ na̱ se̱ʼendi̱ sa̱kúaʼana kundaa-inina Jehová”.

Ñá Lucila ñá íyo isla ña̱ Samar káchiñá: “Ni kúúyó na̱ nda̱ʼví soo kiviva kachíñuyó nu̱ú Jehová, tá káchíñuyó nu̱ú Jehová si̱íní íyoyó. Tá kúú yi̱ʼi̱ kúsi̱íní-inii̱ xi̱toi̱ na̱ sa̱náʼi̱ xa̱ʼa̱ Biblia saáchi ni̱xa̱a̱na ndu̱una precursor nda̱a̱ táki̱ʼva íyo yi̱ʼi̱”.

Kúnda̱a̱-iniyó ña̱ ndiʼiyó ya̱ʼa nu̱ú tu̱ndóʼo chí nu̱únínu. Ná kotoyó ndáaña sákuaʼayó xíʼin ña̱ ni̱ka̱ʼa̱n iin ta̱ anciano ta̱ naní Rodolfo, ta̱yóʼo ka̱chira: “Ku̱i̱ya̱ 1970 iinsaá nda̱a̱ ku̱i̱ya̱ 1980 ni̱ya̱ʼi̱ nu̱ú tu̱ndóʼo, soo Jehová chi̱ndeétáʼanníra xíʼi̱n xa̱ʼa̱ ña̱ kúni̱níra xínira yi̱ʼi̱. Ni loʼo xu̱ʼún xu̱kuumiíi̱ soo kǒo ña̱ʼa ní ixama̱ní nu̱úi̱, va̱ʼaní xi̱ndaa Jehová yi̱ʼi̱ ta kúsi̱íní-inii̱ ña̱ káchíñui̱ nu̱úra vitin, ta ndátui̱ koi̱ ñuyǐví xa̱á chi kán ku̱a̱ʼáníka ña̱ʼa taxi Jehová ndaʼi̱” (1 Timoteo 6:19).