¿Á kivi chindeétáʼan Biblia xíʼin na̱ xíniñúʼu droga ña̱ sandákoonaña?

Ndiʼi ku̱i̱ya̱ ku̱a̱ʼání na̱ yiví xíʼi̱ xa̱ʼa̱ ña̱ xíniñúʼuna droga á ña̱ xíʼina inkaka táʼan ña̱yóʼo. Tá xi̱ndikaa̱ kue̱ʼe̱ COVID-19 ku̱a̱ʼáka na̱ yiví xi̱niñúʼu droga. Xa̱a̱ ku̱a̱ʼání na̱ yiví sándakoona ña̱ xíniñúʼuna droga xa̱ʼa̱ ña̱ ndíku̱nna consejo ña̱ va̱xi nu̱ú Biblia. ¿Á íxayo̱ʼvi̱ña xíʼún ña̱ sándakoún ña̱ kuniñúʼún droga? Tá saá ndóʼún kivi chindeétáʼan consejo ña̱ va̱xi yóʼo xíʼún.a

Nu̱ú artículo yóʼo kotoyó ña̱ va̱xi yóʼo:

Tá íxayo̱ʼvi̱ña xíʼi̱n ña̱ sandákoi̱ droga, ¿nda̱chun xíniñúʼi̱ consejo ña̱ va̱xi nu̱ú Biblia?

Na̱ káʼvi va̱ʼa ku̱ndaa̱-inina na̱ yiví na̱ xíniñúʼuní droga, kúú na̱ yiví na̱ kúni mitúʼun, na̱ ndíʼi̱ní-ini xíʼin na̱ kúúmií kue̱ʼe̱ ña̱ nani depresión. Biblia kivi chindeétáʼanña xíʼún xa̱ʼa̱ ndiʼi ña̱ ndóʼún ña̱ va̱ʼa sandákoún droga saátu chindeétáʼanña xíʼún ña̱ xa̱ún vií kutáʼún xíʼin Ndióxi̱ (Salmo 25:14). Biblia kivi chindeétáʼanña xíʼún ña̱ sandákoún droga ni túviún ña̱ va̱ása kuchiñún sandákoúnña (Marcos 11:22-24).

Ku̱mí consejo ña̱ va̱xi nu̱ú Biblia ña̱ kivi chindeétáʼan xíʼún ña̱ sandákoún droga

1. Sákuaʼa xa̱ʼa̱ Jehováb (Juan 17:3). Ta̱yóʼo kúú ta̱ ke̱ʼé ndiʼi ña̱ʼa ta kúúmiíra ndee̱. Kúʼvi̱ní-inira xínira yóʼó, kúni̱ra koora migoún ta kúni̱ra kuniñúʼura ndee̱ra ña̱ chindeétáʼanra xíʼún (Isaías 40:29-31; Santiago 4:8). Tá ná taxiún ña̱ chindeétáʼanra xíʼún taxira ña̱ va̱ʼa ndaʼún chí nu̱únínu (Jeremías 29:11; Juan 3:16).
2. Ka̱ʼa̱n xíʼin Jehová ná chindeétáʼanra xíʼún. Ka̱ʼa̱n xíʼinra ná chindeétáʼanra xíʼún ña̱ sandákoún droga tasaá xa̱ún koún iin na̱ yiví limpio nu̱úra ta kusi̱í-inira xíʼún (Romanos 12:1). Taxira espíritu santora ndaʼún ña̱ va̱ʼa kundeé-iniún (2 Corintios 4:7; Lucas 11:13). Ña̱yóʼo chindeétáʼanña xíʼún ña̱ sandákoún droga ta saá xa̱ún nasamaún ña̱ kéʼún ta sakúsi̱íún-ini Ndióxi̱ (Colosenses 3:9, 10).
3. Ndakanixi̱ní nda̱a̱ táki̱ʼva ndákanixi̱ní Ndióxi̱ (Isaías 55:9). Ndióxi̱ chindeétáʼanra xíʼún ña̱ ndasaa xa̱ún ña̱ ndákanixi̱níún, ña̱yóʼo chindeétáʼanña xíʼún ña̱ sandákoún droga (Efesios 4:23). Ña̱ ndákanixi̱ní Ndióxi̱ va̱xiña nu̱ú Biblia ña̱kán ndáyáʼviní kaʼviyóña ndiʼi ki̱vi̱ (Salmo 1:1-3). Ku̱a̱ʼánína chíndeétáʼan inkana xíʼinna ña̱ kunda̱a̱-inina xa̱ʼa̱ ña̱ va̱xi nu̱ú Biblia (Hechos 8:30, 31). Na̱ Testigo Jehová sánáʼa̱na na̱ yiví xa̱ʼa̱ Biblia, saátu káʼa̱nndi̱ xíʼún ña̱ ná ku̱ʼún reunión nu̱ú sákuaʼandi̱ xa̱ʼa̱ Biblia tasaá sákuaʼún ndáa ki̱ʼva keʼún ña̱ káʼa̱nña.
4. Kitáʼan xíʼin na̱ yiví na̱ kivi chindeétáʼan xíʼún. Tá íyo iin ña̱ íxayo̱ʼvi̱ xíʼún ndakaʼán chi na̱ kúú migoún kivi chindeétáʼan xíʼún á va̱ása (Proverbios 13:20). Tá kítáʼanyó xíʼin na̱ yiví na̱ ndásakáʼnu Ndióxi̱ saá ndaniʼiyó na̱ koo migoyó. Ndióxi̱ kúni̱ra ña̱ ná kuumiíyó migo táʼan na̱yóʼo chi kivi chindeétáʼanna xíʼinyó (Salmo 119:63; Romanos 1:12). Saátu vií ndaka̱xiún ndáaña xítoún, ña̱ kéʼún xíʼin yaa ña̱ xíniso̱ʼún chi ña̱yóʼo kivi chindeétáʼanña xíʼún á va̱ása. Ña̱kán kiʼin kuenta xíʼin ña̱ʼa ña̱ kivi sákuxíka yóʼo nu̱ú Ndióxi̱ (Salmo 101:3; Amós 5:14)

Versículo ña̱ va̱xi nu̱ú Biblia ña̱ kivi chindeétáʼan xíʼún ña̱ sándakoún droga

Salmo 27:10: “Ni ná sandákoo yivái̱ xíʼin siʼíi̱ yi̱ʼi̱, kundaava Jehová yi̱ʼi̱”.

“Xa̱ʼa̱ ña̱ va̱ása níxinii̱ ndáata kúú yivái̱ nda̱kavaní-inii̱. Soo tá ku̱ndaa̱-inii̱ xa̱ʼa̱ Jehová ki̱ʼin kuenta ña̱ ndixa kúni̱ra xínira yi̱ʼi̱ tasaá ku̱chiñui̱ sa̱ndákoi̱ ña̱ va̱ása va̱ʼa xi̱keʼíi̱” (Ta̱ Wilby, ta̱ ñuu Haití).

Salmo 50:15: “Kanandó yi̱ʼi̱ tá ndíʼi̱ní-inindó; sakǎkui̱ ndóʼó”.

“Versículo yóʼo va̱ʼaní chi̱ndeétáʼanña xíʼi̱n ni sava yi̱chi̱ xi̱ndíkói̱ xi̱xiniñúʼíi̱ droga. Jehová va̱ʼaníva chi̱ndeétáʼanra xíʼi̱n” (Ta̱ Serhiy, ta̱ ñuu Ucrania).

Proverbios 3:5, 6: “Xíʼin ndiʼi níma̱ún kundaa-iniún Jehová ta va̱ása kundaa-iniún ña̱ ndákanixi̱ní miíún. Ni nda̱a̱ ndáaka ña̱ kéʼún, kiʼin kuenta xíʼin ña̱ ndákanixi̱níra, ta taxira ña̱ vií ná kana ndiʼi ña̱ kéʼún”.

“Versículo yóʼo chi̱ndeétáʼanña xíʼi̱n ña̱ kundaa-inii̱ Jehová ta su̱víka ña̱ kundaa-inii̱ miíi̱. Xa̱ʼa̱ ña̱ chi̱ndeétáʼanra xíʼi̱n na̱samai̱ ki̱ʼva ña̱ xi̱keʼíi̱” (Ta̱ Michele, ta̱ ñuu Italia).

Isaías 41:10: “Va̱ása yi̱ʼvíún chi íyoi̱ xíʼún. Va̱ása kundi̱ʼi-iniún chi yi̱ʼi̱ kúú Ndióxi̱ún. Yi̱ʼi̱ taxi ndee̱ ndaʼún. Yi̱ʼi̱ chindeétáʼan xíʼún. Xíʼin ndaʼa̱ kúaʼi̱ ña̱ kéʼíi̱ ña̱ nda̱kú tii̱n yóʼó”.

“Tá kǒoka droga ní xi̱xiniñúʼíi̱ ndeéní xi̱sandíʼi̱ña-inii̱. Soo versículo yóʼo chi̱ndeétáʼanña xíʼi̱n ña̱ kunda̱a̱-inii̱ ña̱ chindeétáʼanva Ndióxi̱ xíʼi̱n ña̱ kǒo ndi̱ʼiní-inii̱, tasaá kúú ña̱ ke̱ʼévara” (Ta̱ Andy, ta̱ ñuu Sudáfrica).

1 Corintios 15:33: “Va̱ása taxindó ña̱ sándaʼvi inkana ndóʼó, chi tá kítáʼanndó xíʼin na̱ yiví na̱ kéʼé ña̱ va̱ása va̱ʼa, nandósóndó keʼéndó ña̱ va̱ʼa”.

“Na̱ xi̱kitáʼan xíʼi̱n sa̱náʼa̱na yi̱ʼi̱ ña̱ kuniñúʼi̱ droga, tasaá ki̱xáʼíi̱ xíniñúʼi̱ ña̱yóʼo. Ña̱ va̱ʼa sa̱ndákoi̱ droga yóʼo va̱ása níxi̱kitáʼankai̱ xíʼin na̱ xi̱kuu migoi̱ na̱ xi̱xiniñúʼu ña̱yóʼo, ta ki̱xáʼíi̱ kítáʼi̱n xíʼin na̱ yiví na̱ xi̱keʼé ña̱ va̱ʼa chi na̱kán va̱ása ní xi̱xiniñúʼuna droga” (Ta̱ Isaac, ta̱ ñuu Kenia).

2 Corintios 7:1: “Ná kǒo ixayaku̱a̱yó ku̱ñuyó ni ña̱ ndákanixi̱níyó”.

“Texto yóʼo chi̱ndeétáʼanña xíʼi̱n ña̱ sa̱ndákoi̱ ña̱ xi̱ ixayaku̱a̱ ku̱ñui̱ saáchi xa̱a̱ ki̱xáʼa sándiʼi-xa̱ʼa̱ña miíi̱” (Ñá Rosa ñá ñuu Colombia).

Filipenses 4:13: “Kúúmiíi̱ ndee̱ ña̱ keʼíi̱ nda̱a̱ ndáaka ña̱ʼa chi íyo ta̱ táxi ndee̱ ndaʼíi̱ ña̱ keʼíi̱ña”.

“Xi̱kunda̱a̱-inii̱ ña̱ kǒo kuchiñu miíi̱ sandákoi̱ droga. Ña̱kán ni̱ka̱ʼi̱n xíʼin Ndióxi̱ ña̱ ná chindeétáʼanra xíʼi̱n. Ta miíra ta̱xi ndee̱ ndaʼi̱” (Ñá Patrizia ñá ñuu Italia).

Ña̱ ndo̱ʼo inkana: Biblia chi̱ndeétáʼan xíʼinna ña̱ sa̱ndákoona droga

Ta̱ Joseph Ehrenbogen ku̱a̱ʼání ña̱ va̱ása va̱ʼa ndo̱ʼora ta ki̱xáʼara xíʼira ku̱a̱ʼání ndixi ta xi̱xiniñúʼura cigarro, marihuana xíʼin heroína. Ku̱a̱ʼá yichi̱ xi̱kuni̱ra kuvira xa̱ʼa̱ ña̱ xi̱xiniñúʼura ña̱yóʼo. Soo ña̱ ka̱ʼvira nu̱ú Biblia chi̱ndeétáʼanña xíʼinra ña̱ na̱samara ña̱ xi̱keʼéra. Kaʼvi ña̱ káʼa̱n xa̱ʼa̱ ta̱yóʼo nu̱ú artículo ña̱ naní “Aprendí a respetar a las mujeres y a respetar mi vida”.

Ta̱ Dimitri Kórshunov ku̱a̱ʼá yichi̱ xi̱kuni̱ra sandákoora ndixi. Ña̱ va̱ʼa kunda̱a̱-iniún ndáaña chi̱ndeétáʼan xíʼinra koto video ña̱ naní “Ni̱xa̱i̱ xi̱kundasíi̱ ña̱ xi̱keʼíi̱”.

¿Á káʼa̱n Biblia ña̱ kǒo xíniñúʼu koʼona ta̱tán ña̱ va̱ʼa sandákoona droga?

Va̱ásaví. Biblia káʼa̱nña: “Na̱ íyo va̱ʼa kǒo xíniñúʼuna iin doctor, chi na̱ ndeéndóʼova kúú na̱ xíniñúʼu iin doctor” (Mateo 9:12). Ña̱ Instituto Nacional ña̱ káʼa̱n xa̱ʼa̱ Abuso de Drogas ña̱ íyo chí Estados Unidos saátu káʼa̱nña ña̱yóʼo: “Na̱ xíniñúʼuní droga nda̱a̱ táki̱ʼva íyo na̱ kúúmií kue̱ʼe̱ saá íyona. Ta ña̱ va̱ʼa sandákoona ña̱yóʼo, xíniñúʼu chikaa̱nína ndee̱ ta saátu ña̱ chindeétáʼan inkana xíʼinna”. Ndióxi̱ kúú ta̱ kúúmiíníka ndee̱ xa̱ʼa̱ ña̱kán kivi chindeétáʼanra xíʼinyó. Ni ku̱a̱ʼánína sa̱kúaʼana xa̱ʼa̱ Biblia ta sa̱ndákoona droga, ta saátu xi̱niñúʼuna ña̱ chi̱ndeétáʼan na̱ doctor xíʼinna.c Tá kúú ta̱ Allen ta̱ ndo̱ʼo ña̱yóʼo káʼa̱nra ña̱yóʼo: “Tá xi̱kuni̱i̱ sandákoi̱ ndixi, xi̱kuni̱níi̱ koʼi̱rá ta xi̱ndoʼoní-inii̱. Xi̱kunda̱a̱-inii̱ ni xi̱chindeétáʼanva ña̱ va̱xi nu̱ú Biblia xíʼi̱n saátu xi̱xiniñúʼíi̱ ña̱ chindeétáʼan na̱ doctor xíʼi̱n”.

¿Á káʼa̱n Biblia ña̱ va̱ása xíniñúʼu kuniñúʼuna sava droga ña̱ va̱ʼa ndaʼana?

Va̱ásaví. Biblia káʼa̱nña ña̱ kivi kuniñúʼuyó ndixi tá kúúmiíyó iin kue̱ʼe̱, á ña̱ va̱ʼa chindeétáʼanra xíʼin iin na̱ yiví na̱ kúni̱ kuvi ña̱ va̱ʼa kundeé inina xa̱ʼa̱ ña̱ xóʼvi̱na (Proverbios 31:6; 1 Timoteo 5:23). Soo xíniñúʼu kiʼinyó kuenta tá xíniñúʼuyó ndixi á ta̱tán xa̱ʼa̱ ña̱ kúúmiíyó iin kue̱ʼe̱, saáchi sana kuni̱yó kuniñúʼuníyóña. Ña̱kán ndáyáʼviní kiʼinyó kuenta ndáaña kivi kundoʼoyó tá xíniñúʼuníyó ña̱yóʼo ni tá káʼa̱n na̱ doctor xíʼinyó ña̱ kuniñúʼuyó ta̱tán ña̱ va̱ʼa kǒo xo̱ʼvi̱yó (Proverbios 22:3).

a Nu̱ú artículo yóʼo va̱xi consejo ña̱ va̱xi nu̱ú Biblia ña̱ kivi chindeétáʼan xíʼin na̱ xíniñúʼuní droga, ta saátu consejo yóʼo kivi chindeétáʼanña xíʼin na̱ xíʼiní ndixi, na̱ xíniñúʼu cigarro, na̱ ku̱a̱ʼání xíxi, na̱ kutóoní kusíki, na̱ xíto pornografía xíʼin na̱ xíniñúʼuní internet.

b Jehová kúú ki̱vi̱ Ndióxi̱ (Salmo 83:18). Koto artículo ña̱ naní “¿Ndáata kúú Jehová?”.

c Íyo ku̱a̱ʼání hospital, clínica xíʼin inka na̱ chíndeétáʼan xíʼin na̱ xíniñúʼuní droga. Iin tá iin na̱ yiví ndaka̱xinna ndáa ki̱ʼva chindeétáʼanna xíʼinna (Proverbios 14:15).