¿Á ndáyáʼvi ña̱ nda̱a̱?

Ku̱a̱ʼání na̱ yiví kǒo kúnda̱a̱-inina ndáaña kúú ña̱ nda̱a̱ ta ndáaña kúú ña̱ vatá. ¿Á saá ndóʼo miíún? Ku̱a̱ʼánína kéʼéna ña̱ʼa xa̱ʼa̱ ña̱ kúsi̱í-inina á xa̱ʼa̱ ña̱ ndákanixi̱nína, va̱ása kéʼénaña xa̱ʼa̱ ña̱ nda̱a̱ á xa̱ʼa̱ ña̱ ndixa kúú. Ta ku̱a̱ʼání na̱ yiví kéʼéna ña̱yóʼo ta va̱ása kándíxana ña̱ íyo ña̱ nda̱a̱.

Ña̱yóʼo xa̱a̱ saá kéʼénaña nda̱a̱ tá tiempo xi̱naʼáví. Xa̱a̱ íyo 2,000 ku̱i̱ya̱ ni̱nda̱ka̱tu̱ʼun ta̱ Poncio Pilato ta̱ Jesús ña̱yóʼo: “¿Ndáaña kúú ña̱ nda̱a̱?” (Juan 18:38). Ña̱ ni̱nda̱ka̱tu̱ʼunra ta̱ Jesús ndáyáʼviníña ni va̱ása níxi̱ndatura ña̱ ná ndakuiin ta̱ Jesús. Biblia káʼa̱nña xa̱ʼa̱ ña̱yóʼo ta sana ndakanda̱-iniún tá ná kunda̱a̱-iniún xa̱ʼa̱ ña̱yóʼo saáchi ñuyǐví ña̱ ndóoyó yóʼo íyoní ña̱ vatá.

¿Á íyo ña̱ nda̱a̱?

Íyovaña. Biblia káʼa̱nña xa̱ʼa̱ tu̱ʼun ña̱ nda̱a̱ ta xíniñúʼuña ña̱yóʼo ña̱ ka̱ʼa̱nña xa̱ʼa̱ ña̱ʼa ña̱ xa̱a̱ ku̱u á xa̱ʼa̱ ña̱ kéʼéna ña̱ va̱ʼa. Saátu káʼa̱nña, Jehováa kúú ta̱ káʼa̱n ña̱ nda̱a̱. Xa̱ʼa̱ ña̱kán káʼa̱nña xa̱ʼa̱ra ña̱ kúúra “Ndióxi̱ ta̱ káʼa̱n ña̱ nda̱a̱” (Salmo 31:5). Saátu káʼa̱nña ña̱ nda̱a̱ xa̱ʼa̱ Ndióxi̱ ta chítáʼanña ña̱yóʼo xíʼin ñuʼú ña̱ sándayeʼe̱ ta níʼiña yichi̱ nu̱úyó ti̱xin ñuyǐví yóʼo (Salmo 43:3; Juan 17:17).

¿Ndáa ki̱ʼva ndani̱ʼíi̱ ña̱ nda̱a̱?

Ndióxi̱ kúni̱ra ña̱ ná nandukú va̱ʼayó ña̱ va̱xi nu̱ú Biblia ta ndakani vií xi̱níyó xa̱ʼa̱ña ta su̱ví kuití kandíxayóña xa̱ʼa̱ ña̱ káʼa̱nna xíʼinyó (Romanos 12:1). Xa̱ʼa̱ ña̱ kúni̱ra ña̱ kunda̱a̱ va̱ʼa iniyó xa̱ʼa̱ra ta ku̱ʼvi̱-iniyó kuniyóra, kúni̱ra ña̱ ná kunda̱a̱ va̱ʼa iniyó ña̱ sákuaʼayó nu̱ú Biblia ña̱ nda̱a̱ kúúña (Mateo 22:37, 38; Hechos 17:11).

¿Ndáana kúú na̱ siʼna ni̱ka̱ʼa̱n ña̱ vatá?

Biblia káʼa̱nña ta̱ sáa̱-ini xíni Ndióxi̱ kúú ta̱ ni̱ka̱ʼa̱n ña̱ vatá: Ta̱yóʼo kúú ta̱ Ndi̱va̱ʼa. Xa̱ʼa̱ ña̱kán Biblia káʼa̱nña xa̱ʼa̱ra ña̱ kúúra “yivá na̱ káʼa̱n ña̱ vatá” (Juan 8:44). Ta̱yóʼo ni̱ka̱ʼa̱nra xíʼin ta Adán ta saátu xíʼin ñá Eva ña̱ vatá xa̱ʼa̱ Ndióxi̱ (Génesis 3:1-6, 13, 17-19; 5:5). Ta nani saá ta̱ Ndi̱va̱ʼa kǒo kúni̱ra ña̱ ná kunda̱a̱-ini na̱ yiví xa̱ʼa̱ Ndióxi̱ ta káʼa̱nra ña̱ vatá xa̱ʼa̱ra (Apocalipsis 12:9).

¿Nda̱chun káʼa̱n na̱ yiví ña̱ vatá?

Biblia káʼa̱nña, tiempo ña̱ ndóoyó vitin ki̱vi̱ nu̱ú ndíʼi kúúña. Tiempo vitin ta̱ Ndi̱va̱ʼa sándaʼvira ku̱a̱ʼání na̱ yiví ta na̱ yiví sándaʼvina inkana ña̱ va̱ʼa tavána ña̱ʼa ndaʼa̱na (2 Timoteo 3:1, 13). Ta ti̱xin ku̱a̱ʼání veʼe-ñu̱ʼu káʼa̱nna ña̱ vatá. Biblia ni̱ka̱ʼa̱nña ndáa ki̱ʼva koo na̱ yiví tiempo vitin: “Ndukúna na̱ sánáʼa̱ ña̱ kúni̱ miína kuniso̱ʼona. Va̱ása kuniso̱ʼokana ña̱ nda̱a̱” (2 Timoteo 4:3, 4).

¿Nda̱chun ndáyáʼviní ña̱ nda̱a̱?

Tá káʼa̱nyó ña̱ nda̱a̱ kándíxa inkana miíyó. Tá kǒo káʼa̱nyó ña̱ nda̱a̱, na̱ kítáʼan xíʼinyó kǒo kandíxana miíyó ta na̱ yiví va̱ása vií kítáʼanna. Biblia sánáʼa̱ña, Ndióxi̱ kúni̱ra ña̱ religión ña̱ kúúmiíyó nina ña̱ nda̱a̱ ná sanáʼa̱ña. Ña̱yóʼo káchiña: “Na̱ [ndásakáʼnu Ndióxi̱] xíniñúʼu ndasakáʼnunara nda̱a̱ táki̱ʼva náʼa̱ ña̱ espíritu santo yichi̱ nu̱úna ta saátu nda̱a̱ táki̱ʼva íyo ña̱ nda̱a̱ ña̱ sa̱kuaʼana xa̱ʼa̱ra” (Juan 4:24). Ña̱ kunda̱a̱-iniún xa̱ʼa̱ ña̱ nda̱a̱ chindeétáʼanña xíʼún ña̱ kunda̱a̱-iniún ña̱ vatá kúú ña̱ sánáʼa̱ ku̱a̱ʼání veʼe-ñu̱ʼu vatá. Koto serie ña̱ va̱xi nu̱ú artículo ña̱ naní “Ña̱ vatá ña̱ sákuxíka miíyó nu̱ú Ndióxi̱”.

¿Nda̱chun kúni̱ Ndióxi̱ ña̱ ná kunda̱a̱-inii̱ xa̱ʼa̱ ña̱ nda̱a̱?

Ndióxi̱ kúni̱ra ña̱ ná kutakún ndiʼi tiempo, xa̱ʼa̱ ña̱kán xíniñúʼu kunda̱a̱-iniún ña̱ nda̱a̱ xa̱ʼa̱ra (1 Timoteo 2:4). Tá ná kunda̱a̱-iniún ndáaña kúú ña̱ nda̱a̱ ta ndáaña kúú ña̱ vatá ta kéʼún ña̱ kúni̱ Ndióxi̱, ña̱yóʼo chindeétáʼanña xíʼún ña̱ va̱ʼa kutáʼún xíʼinra (Salmo 15:1, 2). Ndióxi̱ chi̱ndaʼára ta̱ Jesús nu̱ú ñuʼú yóʼo ña̱ va̱ʼa kunda̱a̱-ini na̱ yiví xa̱ʼa̱ ña̱ nda̱a̱. Xa̱ʼa̱ ña̱kán Ndióxi̱ kúni̱ra ña̱ ná kunda̱a̱-iniyó xa̱ʼa̱ ña̱ sa̱náʼa̱ ta̱ Jesús (Mateo 17:5; Juan 18:37).

¿Á kixaa̱ iin ki̱vi̱ ña̱ sandíʼi-xa̱ʼa̱ Ndióxi̱ ña̱ vatá?

Kixaa̱vaña. Ndióxi̱ kǒo kúni̱ra ña̱ ná sandáʼvi-táʼan na̱ yiví ta tavána ña̱ʼa ndaʼa̱na. Miíra káʼa̱nra ña̱ sandíʼi-xa̱ʼa̱ra na̱ yiví na̱ kútóoní ka̱ʼa̱n ña̱ vatá (Salmo 5:6). Tá ná keʼéra ña̱yóʼo saá kúú ña̱ saxínura ña̱ ni̱ka̱ʼa̱nra nu̱ú tu̱ʼunra: “Na̱ káʼa̱n ña̱ nda̱a̱ koona ndiʼi tiempo” (Proverbios 12:19).