Iníísaá ñuyǐví ndíʼi̱ní-inina xa̱ʼa̱ ki̱ʼva ña̱ xíniñúʼu na̱ va̱lí internet

Ku̱i̱ya̱ 2025, ku̱a̱ʼání ñuu ki̱xáʼa ndíʼi̱-inina xa̱ʼa̱ na̱ va̱lí kúa̱an na̱ xíniñúʼu redes sociales saáchi i̱yoní ndoʼona tu̱ndóʼo. Iin ñuu kán na̱ chíñu ni̱ka̱ʼa̱nna ña̱ na̱ va̱lí na̱ kúúmií 16 ku̱i̱ya̱ á na̱ válíka kǒo kuniñúʼukana redes sociales, ta inkaka na̱ chíñu na̱ inka ñuu kúni̱na keʼéna táki̱ʼva ke̱ʼé na̱yóʼo.

Ta nda̱a̱ sava na̱ va̱lí ndákunina ña̱ i̱yoní kuniñúʼuna redes sociales. Yo̱o̱ abril ku̱i̱ya̱ 2025 ka̱na ña̱ ni̱nda̱ka̱tu̱ʼun na̱ káchíñu ti̱xin centro de investigación Pew Research Center sava na̱ va̱lí xa̱ʼa̱ ña̱ redes sociales, ta ña̱yóʼo kúú ña̱ ni̱ka̱ʼa̱nna “48% na̱ va̱lí kúa̱an na̱ ni̱nda̱ka̱tu̱ʼunndi̱ ni̱ka̱ʼa̱nna ña̱ kǒo chíndeétáʼanví redes sociales xíʼinna ta nda̱a̱ sándakavaña-inina”.

Na̱ doctor xa̱a̱ káʼa̱nna ña̱ kǒo chíndeétáʼanví redes sociales xíʼin na̱ va̱lí kúa̱an saáchi násamaña ki̱ʼva ña̱ ndákanixi̱nína xíʼin ña̱ kéʼéna. Ku̱i̱ya̱ ni̱ya̱ʼa ta̱ doctor Vivek Murthy, ta̱ xi̱kuu director general ña̱ Salud Pública ñuu Estados Unidos, ni̱ka̱ʼa̱nra ña̱yóʼo: “Ku̱a̱ʼání na̱ va̱lí kúa̱an xíniñúʼuna internet soo ña̱yóʼo sándi̱ʼi̱níña-inina á sándakavaña-inina”.

¿Ndáaña kivi keʼé na̱ íyo se̱ʼe ña̱ va̱ʼa chindeétáʼanna xíʼin na̱ va̱lí se̱ʼena tasaá kǒo ña̱ kundoʼona tá xíniñúʼuna internet? Koto consejo ña̱ va̱xi nu̱ú Biblia.

Ña̱ kivi keʼé na̱ íyo se̱ʼe

Koto ndáaña káʼa̱n Biblia.

“Na̱ ndíchi viíní ndákanixi̱nína ndáaña keʼéna” (Proverbios 14:15).

Na̱ íyo se̱ʼe kivi ndaka̱xinna á taxina ña̱ kuniñúʼu na̱ va̱lí se̱ʼena internet á va̱ása, saáchi sava ña̱ va̱xi nu̱ú ña̱yóʼo va̱ása va̱ʼaña. Ña̱kán tá kúma̱níka taxiún ña̱ kuniñúʼuna internet, siʼna xíniñúʼu kiʼún kuenta á kivi ixato̱ʼóna hora ña̱ ni̱ka̱ʼún xíʼinna ña̱ kuniñúʼuna internet, ta saátu xíniñúʼu kiʼún kuenta á vií ndáka̱xinna na̱ kítáʼan xíʼinna ta saátu á vií ndáka̱xinna ña̱ kotona.

• Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní, “¿Deberían mis hijos usar redes sociales?” xíʼin “Enséñele a su hijo adolescente a usar con seguridad las redes sociales”.

“Viíní kuniñúʼundó tiempo ña̱ kúúmiíndó” (Efesios 5:16).

Tá ná taxiún ña̱ kuniñúʼu na̱ va̱lí se̱ʼún internet, ka̱ʼa̱n xíʼinna nda̱saa tiempo kuniñúʼuna ña̱yóʼo ta saátu ka̱ʼa̱n xíʼinna nda̱chun kúú ña̱ ndáyáʼviní keʼéna ña̱ káʼún saáchi ña̱yóʼo kundaaña miína. Kiʼin va̱ʼún kuenta ndáaña ndóʼo na̱ va̱lí se̱ʼún tá xíniñúʼuna internet ta nda̱a̱ kivi ka̱ʼún xíʼinna ña̱ loʼoka tiempo kuniñúʼunaña.

• Kuniñúʼu video ña̱ naní, Tá kíʼviún nu̱ú Internet kuenta koún ña̱ va̱xi nu̱ú “Video ña̱ dibujo” ña̱ va̱ʼa chindeétáʼún xíʼin na̱ va̱lí se̱ʼún ña̱ kunda̱a̱-inina nda̱chun ndáyáʼviní ña̱ loʼo tiempo kuniñúʼuna internet.

¿Ndáakaña kivi keʼé na̱ íyo se̱ʼe? Koto sava consejo ña̱ va̱xi nu̱ú Biblia, ña̱ va̱xi nu̱ú artículo yóʼo “El director general de Salud Pública de Estados Unidos advierte de los peligros de las redes sociales para los jóvenes. ¿Qué dice la Biblia? ”.

Ña̱ va̱ʼa kunda̱a̱ka-iniún xa̱ʼa̱ ña̱yóʼo

Biblia kachiña ña̱ “tiempo ña̱ yo̱ʼvi̱ní” kúú ña̱ ndóoyó vitin (2 Timoteo 3:1-5). Ta saátu táxiña consejo ña̱ kivi chindeétáʼan xíʼinyó tiempo vitin ni xa̱a̱ ku̱a̱ʼání ku̱i̱ya̱ ni̱ka̱ʼyi̱ ña̱yóʼo. Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní “Ku̱a̱ʼáníka na̱ va̱lí xa̱ʼa̱ ña̱ ndóʼona kíʼinna kue̱ʼe̱ ña̱ ndákava-ini | ¿Ndáaña káʼa̱n Biblia xa̱ʼa̱ ña̱yóʼo?”. Nu̱ú ña̱yóʼo ndani̱ʼún iin lista nu̱ú va̱xi ku̱a̱ʼání artículo xíʼin video ña̱ ka̱na nu̱ú Biblia ña̱ kivi chindeétáʼan xíʼin na̱ íyo se̱ʼe ta saátu na̱ va̱lí se̱ʼena.