Ti̱xin 50 ku̱i̱ya̱ ni̱xi̱ʼi̱ ki̱ʼva 73% ndiʼi nu̱ú kití | ¿Ndáaña káʼa̱n Biblia xa̱ʼa̱ ña̱yóʼo?

9 tí octubre ku̱i̱ya̱ 2024 ña̱ Fondo Mundial para la Naturaleza ka̱ʼyína iin informe ña̱ káʼa̱n xa̱ʼa̱ ña̱ ndóʼo ndiʼi kití xa̱ʼa̱ ña̱ kéʼé na̱ yiví. Informe yóʼo káʼa̱nña ti̱xin 50 ku̱i̱ya̱ (1970-2020), káʼa̱nña xa̱ʼa̱ ndiʼi kití tí yukú ña̱ ndi̱ʼi-xa̱ʼa̱ ku̱a̱ʼárí saáchi nuurí ki̱ʼva 73 %. Ta káchikaña: “Va̱ása ndakanda̱-iniyó tá ná ka̱ʼa̱nna ti̱xin u̱ʼu̱n ku̱i̱ya̱ ña̱ va̱xi ndiʼi-xa̱ʼa̱ ku̱a̱ʼáka ña̱ʼa ña̱ íyo nu̱ú ñuʼú yóʼo”.

Ku̱a̱ʼánína ndákanda̱-inina tá xíniso̱ʼona ña̱yóʼo. Kutóoníyó ndiʼi ña̱ íyo nu̱ú ñuʼú yóʼo ta xóʼvi̱níyó tá kúnda̱a̱-iniyó ña̱ xóʼvi̱ní ndiʼi kití tí íyo nu̱ú ñuʼú yóʼo. Xóʼvi̱yó chi saá ke̱ʼé Ndióxi̱ miíyó ña̱ ná kundaayó ndiʼi kití (Génesis 1:27, 28; Proverbios 12:10).

Ndakatu̱ʼún xíʼin miíún: “¿Á kivi sáka̱kuyó ndiʼi kití? ¿Ndáaña káʼa̱n Biblia xa̱ʼa̱ ña̱yóʼo?

Ña̱ ndátuyó koo chí nu̱únínu

Ni kúni̱níyó ta chíkaa̱níyó ndeé ña̱ kundaayó kití á ña̱ kundaayó ñuʼú nu̱ú íyoyó, soo iinlá Ndióxi̱ kúú ta̱ kivi kundaa ndiʼi ña̱yóʼo. Biblia káchiña nu̱ú Apocalipsis 11:18 Ndióxi̱ sandíʼi-xa̱ʼa̱ra “na̱ sándiʼi-xa̱ʼa̱ ñuʼú”. Ta versículo yóʼo sanáʼa̱ña u̱vi̱ ña̱ʼa miíyó:

1. 1. Va̱ása taxiví Ndióxi̱ ña̱ sandíʼi-xa̱ʼa̱ na̱ yiví ndiʼi nu̱ú ñuʼú yóʼo.

2. 2. Ti̱xin loʼo tiempo Ndióxi̱ sandíʼi-xa̱ʼa̱ra na̱ yiví na̱ kǒo ndáa ñuʼú ta̱ kúndi̱va̱ʼana xíʼin kití.

¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Saáchi na̱ yiví kúndi̱va̱ʼanína xíʼin kití, ¿ndáaña keʼé Ndióxi̱ ña̱ va̱ása kooka ña̱yóʼo? Ti̱xin Reino Ndióxi̱ ndiʼi ña̱ va̱ása va̱ʼa ña̱ kéʼé na̱ yiví nu̱ú ñuʼú yóʼo (Mateo 6:10). Ti̱xin Reino yóʼo sanáʼa̱ña miíyó ña̱ kundaayó ñuʼú nu̱ú ndóoyó xíʼin kití (Isaías 11:9).