¿Á Ndióxi̱ ndáka̱xin ndiʼi ña̱ kéʼéyó á kivi ndaka̱xin miívayó ña̱ keʼéyó?
Ña̱ káʼa̱n Biblia xa̱ʼa̱ ña̱yóʼo
Va̱ʼaní-ini Ndióxi̱ chi táxira ña̱ ná ndaka̱xin miíyó ña̱ keʼéyó ta su̱ví miíra ndáka̱xin ña̱ keʼéyó. Ná kotoyó ña̱ káʼa̱n Biblia xa̱ʼa̱ ña̱yóʼo.
Ndióxi̱ i̱xava̱ʼara na̱ yiví nda̱a̱ táki̱ʼva íyo miíra (Génesis 1:26). Síín íyo miíyó nu̱ú tí kití saáchi tíyóʼo kǒo kívi ndaka̱xinrí ña̱ keʼérí, soo miíyó íyoyó nda̱a̱ táki̱ʼva íyo Ndióxi̱. ¿Ndáa ki̱ʼva náʼa̱yó ña̱yóʼo? Tá kúú ña̱ kúʼvi̱-iniyó xíniyó inkana nda̱a̱ táki̱ʼva kéʼé miíra ta saátu kivi ndaka̱xinyó ña̱ keʼéyó.
Miívayó kúú na̱ ndáka̱xin ndáaña keʼéyó. Soo Ndióxi̱ káʼa̱nra xíʼinyó ña̱ ná kuniso̱ʼoyó ña̱ káʼa̱nra ña̱ va̱ʼa ni̱ʼíyó ña̱ kutakuyó (Deuteronomio 30:19, 20). Soo tá Ndióxi̱ ná ndaka̱xin ña̱ keʼéyó, ixayo̱ʼvi̱vaña xíʼinyó kuniso̱ʼoyó ña̱ káʼa̱nra. Nu̱úka ña̱ ixandúxara xíʼinyó keʼéyó ña̱ káʼa̱nra, ña̱yóʼo kúú ña̱ káʼa̱nra xíʼinyó: “Tá ná kuniso̱ʼún ta keʼún chiñu ña̱ xáʼndai̱ nu̱ún. Saá va̱ása kundi̱ʼi-iniún ta ña̱yóʼo xa̱a̱ña kooña nda̱a̱ táki̱ʼva íyo iin yu̱ta” (Isaías 48:18).
Nda̱a̱ ni iinyó kǒo kúnda̱a̱-ini ndáaña kundoʼoyó chí nu̱únínu. Tá kúni̱yó vií kana ña̱ keʼéyó, xíniñúʼu chikaa̱níyó ndee̱ ña̱ kachíñuyó nda̱a̱ táki̱ʼva káʼa̱n Biblia: “Ndiʼi ña̱ kivi keʼún, keʼéña xíʼin ndiʼi ndeún” (Eclesiastés 9:10). Ta saátu káʼa̱nña ña̱yóʼo: “Na̱ va̱ʼaní káchíñu viíní kana ña̱ kúni̱na keʼéna” (Proverbios 21:5).
Ña̱ kivi ndaka̱xin miíyó ña̱ keʼéyó iin regalo ña̱ ta̱xi Ndióxi̱ ndaʼa̱yó kúúña ta xa̱ʼa̱ ña̱yóʼo kivi ku̱ʼvi̱-iniyó kuniyóra xíʼin ndiʼi níma̱yó (Mateo 22:37).
¿Á xíniñúʼu Ndióxi̱ ndee̱ra ña̱ va̱ʼa keʼéra ndiʼi ña̱ kúni̱ra?
Biblia káʼa̱nña Ndióxi̱ kúúmiíra ndiʼi ndee̱ ta kǒo na̱ kivi kasi nu̱úra ña̱ keʼéra ña̱ kúni̱ra (Job 37:23; Isaías 40:26). Va̱ása xíniñúʼura ndee̱ra ña̱ va̱ʼa keʼéra ndiʼi ña̱ kúni̱ra. Biblia káʼa̱nña, tiempo xi̱naʼá Ndióxi̱ ku̱ndeé-inira ta su̱ví ndi̱ku̱n nísandíʼi-xa̱ʼa̱ra na̱ ñuu Babilonia xa̱ʼa̱ ña̱ i̱xandi̱va̱ʼana xíʼin na̱ ñuura (Isaías 42:14). Ta saátu kúndeé-inira nu̱ú na̱ kéʼé ña̱ va̱ása va̱ʼa tiempo vitin. Soo kúnda̱a̱-iniyó ña̱ su̱ví ndiʼi tiempo taxira ña̱ keʼéna saá (Salmo 37:10, 11).