¿Á kivi chindeétáʼan Biblia xíʼi̱n ta saátu xíʼin na̱ veʼi̱ ña̱ va̱ʼa kusi̱í-inindi̱?

Ña̱ káʼa̱n Biblia xa̱ʼa̱ ña̱yóʼo

Kiviva chindeétáʼanña xíʼinndó. Yóʼo kunda̱a̱-iniyó xa̱ʼa̱ sava consejo ña̱ va̱xi nu̱ú Biblia ña̱ xa̱a̱ chíndeétáʼan xíʼin ku̱a̱ʼání na̱ familia ña̱ kusi̱í-inina.

1. Ña̱ tindaʼa̱ va̱ʼana. Tá tíndaʼa̱ u̱vi̱ na̱ yiví, kíndo̱ona ña̱ koo xíʼin táʼanna ndiʼi tiempo. Tasaá kixáʼana chíkaa̱na ndee̱ ña̱ si̱í koona (Mateo 19:4-6).

2. Na̱ʼa̱na ña̱ kúʼvi̱-inina xínitáʼanna ta ixato̱ʼó táʼanna. Xíniñúʼu ixato̱ʼóna na̱ ti̱ndaʼa̱ xíʼinna nda̱a̱ táki̱ʼva kúni̱na ña̱ ná ixato̱ʼóna miína (Mateo 7:12; Efesios 5:25, 33).

3. Va̱ása nda̱ʼyi̱ nu̱ú táʼanna. Ndiʼi tiempo vií natúʼun táʼanna ta na̱ʼa̱na ña̱ kúni̱na xínitáʼanna, ni ni̱ka̱ʼa̱nna á ke̱ʼéna iin ña̱ sa̱xóʼvi̱-ini táʼanna (Efesios 4:31, 32). Proverbios 15:1 káʼa̱nña ña̱yóʼo: “Va̱ása sa̱a̱ iin na̱ yiví tá viíní ndákuiinna yuʼúna, soo sa̱a̱vana tá ná ka̱ʼa̱nna tu̱ʼun ña̱ saxóʼvi̱-inina”.

4. Ná kǒo sandáʼvina na̱ ti̱ndaʼa̱ xíʼinna. Kǒo xíniñúʼu na̱ʼa̱na ña̱ kúni̱na xínina inka na̱ yiví, chi xíʼin iinlá na̱ ti̱ndaʼa̱na xíniñúʼu na̱ʼa̱na ña̱yóʼo (Mateo 5:28). Biblia káʼa̱nña ña̱yóʼo: “Ndiʼina xíniñúʼu ixato̱ʼóna na̱ ti̱ndaʼa̱ xíʼinna, ta̱ ta̱a xíʼin ñá ñaʼá xíniñúʼu saxínuna ña̱ ki̱ndoona xíʼin na̱ ti̱ndaʼa̱ xíʼinna” (Hebreos 13:4).

5. Vií ná sakúaʼnuna se̱ʼena. Ná va̱ása taxina ña̱ keʼé se̱ʼena ña̱ kúni̱ miína ta saátu va̱ása kue̱ʼe̱ní koona xíʼinna (Proverbios 29:15; Colosenses 3:21).