¿Á íyo iin na̱ xa̱a̱ xíni Ndióxi̱?

Ña̱ káʼa̱n Biblia xa̱ʼa̱ ña̱yóʼo

Nda̱a̱ ni iin na̱ yiví ta̱ʼán kuninu̱úna Ndióxi̱ (Éxodo 33:20; Juan 1:18; 1 Juan 4:12). Biblia káʼa̱nña xa̱ʼa̱ Ndióxi̱ ña̱ kúúra iin espíritu, ta miíyó na̱ yiví va̱ása kívi kuniyóra (Juan 4:24; 1 Timoteo 1:17).

Xa̱ʼa̱ ña̱ kúú na̱ ángel espíritu, va̱ʼava xínina Ndióxi̱ (Mateo 18:10). Ta su̱ví nda̱saa na̱yóʼo kivi kuni-ñaʼá. Sava na̱ yiví ku̱a̱ʼa̱nna chí ndiví tá xa̱a̱ xíʼi̱na ta ndúuna espíritu ta saátu na̱yóʼo va̱ʼa xínina Ndióxi̱ (Filipenses 3:20, 21; 1 Juan 3:2).

¿Á íyo iin ki̱ʼva ña̱ kuniyó Ndióxi̱?

Tá káʼa̱n Biblia ña̱ ná kotoyó iin ña̱ʼa, kúni̱ kachiña ña̱ ná kunda̱a̱-iniyó ndáa ki̱ʼva íyoña (Isaías 6:10; Jeremías 5:21; Juan 9:39-41). Ña̱kán tá iin na̱ yiví kándíxana Ndióxi̱, xáa̱na kúnda̱a̱-inina ndáa ki̱ʼva íyora ta chíndayáʼvina ña̱ va̱ʼa ña̱ kúúmiíra (Efesios 1:18). Ta saátu yóʼó, kivi xa̱ún kandíxaún Ndióxi̱. Ta ña̱yóʼo kúú ña̱ kivi keʼún ña̱ va̱ʼa kandíxaúnra:

Tá ná kotoún ña̱ i̱xava̱ʼa Ndióxi̱, saá xa̱ún kunda̱a̱-iniún ndáa ki̱ʼva íyora. Tá kúú, kunda̱a̱-iniún ña̱ kúʼvi̱ní-inira xínira miíyó, ña̱ va̱ʼaní-inira, ña̱ ndíchiníra ta íyoní ndee̱ra (Romanos 1:20). Chi saá ke̱ʼé ta̱ Job, iin ta̱a ta̱ nda̱kúní ni̱xi̱yo ini xíʼin Ndióxi̱ tá xi̱naʼá. Tá nda̱kanixi̱níra xa̱ʼa̱ sava ña̱ i̱xava̱ʼa Ndióxi̱, nda̱a̱ táki̱ʼva ndo̱ʼo ta̱ xi̱ninu̱ú Ndióxi̱ saá ndo̱ʼora (Job 42:5).
Koto ndáaña káʼa̱n Biblia xa̱ʼa̱ Ndióxi̱. Saáchi Biblia káʼa̱nña xa̱ʼa̱ra: “Tá ná nandukúnra taxivara ña̱ ná ndani̱ʼúnra” (1 Crónicas 28:9; Salmo 119:2; Juan 17:3).
Sakúaʼa ndáaña ke̱ʼé ta̱ Jesús. Ña̱yóʼo kúú ña̱ chindeétáʼan xíʼún kunda̱a̱ va̱ʼa iniún ndáa ki̱ʼva íyo Ndióxi̱. Tá ni̱xi̱yo ta̱ Jesús nu̱ú ñuʼú yóʼo, va̱ʼaní ni̱na̱ʼa̱ra ndáa ki̱ʼva íyo yivára. Xa̱ʼa̱ ña̱kán ni̱ka̱ʼa̱nra ña̱yóʼo: “Na̱ xa̱a̱ xi̱ni yi̱ʼi̱ xa̱a̱ xi̱nituna yivái̱” (Juan 14:9).
Kundiku̱n ley ña̱ táxi Ndióxi̱ ta koto ndáa ki̱ʼva taxira ña̱ va̱ʼa ndaʼún. Ta̱ Jesús ni̱ka̱ʼa̱nra ña̱yóʼo: “Si̱íní íyo na̱ kǒo nda̱a̱ ni iin ña̱ yaku̱a̱ ñúʼu níma̱, saáchi kunina Ndióxi̱”. Nda̱a̱ táki̱ʼva xa̱a̱ ni̱ka̱ʼa̱nyó tá xa̱ʼa̱, sava na̱ yiví ndatakuna chí ndiví ta kuninu̱úna Ndióxi̱ (Mateo 5:8; Salmo 11:7).

¿Nda̱chun káʼa̱n Biblia ña̱ xi̱ninu̱ú ta̱ Moisés, ta̱ Abrahán ta saátu inkaka na̱ yiví Ndióxi̱?

Tá káʼviyó sava versículo ña̱ va̱xi nu̱ú Biblia, kivi ndakanixi̱níyó ña̱ sava na̱ yiví xi̱ninu̱úna Ndióxi̱. Soo tá káʼviyó iníísaá capítulo, kíʼinyó kuenta ña̱ na̱ ángel na̱ chi̱ndaʼá Ndióxi̱ kúú na̱ xi̱nina á iin viciónva kúú ña̱ xi̱nina. Ná kotoyó nda̱chun káʼa̱nyó ña̱yóʼo.

Na̱ ángel.

Tá tiempo xi̱naʼá, Ndióxi̱ xi̱chindaʼára na̱ ángel ña̱ ku̱ʼu̱nna nu̱ú na̱ yiví ta kuniʼina tu̱ʼunra ku̱ʼu̱n xíʼinna (Salmo 103:20). Tá kúú, Biblia káʼa̱nña ña̱ ni̱ka̱ʼa̱n Ndióxi̱ xíʼin ta̱ Moisés ma̱ʼñú iin tú iñú tú xíxi̱ ta “ta̱ Moisés chi̱saʼvira nu̱úra, saáchi ni̱yi̱ʼvíra kotora Ndióxi̱ ta̱ nda̱a̱” (Éxodo 3:4, 6). Versículo yóʼo va̱ása káʼa̱nña ña̱ xi̱ninu̱úra Ndióxi̱, saáchi inkaka versículo káʼa̱nña ña̱ su̱ví Jehová kúú ta̱ níkita nu̱úra chi ta̱ ki̱ta nu̱úra kúú iin ángel ta̱ chi̱ndaʼá Jehová (Éxodo 3:2).

Íyo inka versículo ña̱ káʼa̱n ña̱ xi̱kaʼa̱n Jehová xíʼin ta̱ Moisés “nda̱a̱ táki̱ʼva káʼa̱n iin ta̱a xíʼin inka ta̱a”. Ña̱yóʼo kúni̱ kachiña ña̱ va̱ʼaní na̱túʼun-táʼan Ndióxi̱ xíʼin ta̱ Moisés chi va̱ʼaní xi̱kitáʼanna (Éxodo 4:10, 11; 33:11). Soo va̱ása níxininu̱úví ta̱ Moisés Jehová. Saáchi “Ndióxi̱ xi̱niñúʼura na̱ ángel ña̱ va̱ʼa taxina Ley ndaʼa̱ ta̱ Moisés” (Gálatas 3:19; Hechos 7:53). Ta̱ Moisés xi̱kandíxaníra Ndióxi̱ ta xa̱ʼa̱ ña̱kán Biblia káʼa̱nña xa̱ʼa̱ra ña̱ “nda̱a̱ táki̱ʼva íyo ta̱ xíto Ndióxi̱ ta̱ kǒo kívi kuni nda̱a̱ ni iinna saá ni̱xi̱yora” (Hebreos 11:27).

Xi̱niñúʼutu Ndióxi̱ na̱ ángel ña̱ va̱ʼa ka̱ʼa̱nra xíʼin ta̱ Abrahán. Ña̱ nda̱a̱ kúúña tá káʼviyó sava versículo ña̱ va̱xi nu̱ú Génesis capítulo 18 kivi ndakanixi̱níyó ña̱ xi̱ninu̱ú ta̱ Abrahán Ndióxi̱ (Génesis 18:1, 33). Soo savaka versículo ña̱ va̱xi nu̱ú ña̱yóʼo chíndeétáʼanña xíʼinyó kunda̱a̱-iniyó ña̱ su̱ví saá níxi̱yoña. Saáchi ángelva xi̱kuu u̱ni̱ na̱ ta̱a na̱ ni̱xa̱ʼa̱n nu̱ú ta̱ Abrahán. Xa̱ʼa̱ ña̱ xi̱kunda̱a̱-ini ta̱ Abrahán ña̱ mií Ndióxi̱ kúú ta̱ chi̱ndaʼá na̱ ángel yóʼo, nda̱a̱ táki̱ʼva ka̱ʼa̱nra xíʼin Jehová saá ni̱ka̱ʼa̱nra xíʼinna (Génesis 18:2, 3, 22, 32; 19:1).

Visión.

Sava yichi̱, Ndióxi̱ nde̱tara nu̱ú sava na̱ yiví ti̱xin visión á sa̱túvi kuitíra nu̱úna. Tá kúú, tá káʼa̱n Biblia ña̱ xi̱ni ta̱ Moisés xíʼin na̱ ñuu Israel Ndióxi̱, ña̱ kúni̱ kachiña kúú ña̱ “xi̱nina Ndióxi̱ ta̱ nda̱a̱ ti̱xin iin visión” (Éxodo 24:9-11). Íyo inkaka versículo ña̱ káʼa̱n xa̱ʼa̱ sava na̱ profeta na̱ xi̱ni Jehová (Isaías 6:1; Daniel 7:9; Amós 9:1). Soo iin visiónva kúú ña̱ xi̱nina, va̱ása níxininu̱úna Ndióxi̱ (Isaías 1:1; Daniel 7:2; Amós 1:1).