¿Á ndiʼi religión sákuyatin miíyó nu̱ú Ndióxi̱?

Ña̱ káʼa̱n Biblia xa̱ʼa̱ ña̱yóʼo

Va̱ása. Va̱ása inkáchi íyo ndiʼi religión. Nu̱ú Biblia káʼa̱nña xa̱ʼa̱ ku̱a̱ʼá ki̱ʼva ña̱ xi̱ndasakáʼnuna ndióxi̱ vatá ta Ndióxi̱ va̱ása níkutóora ña̱yóʼo ta u̱vi̱ nu̱ú kúú ña̱ káʼa̱nña xa̱ʼa̱.

Ña̱ nu̱ú: Na̱ ndásakáʼnu ndióxi̱ vatá

Biblia káʼa̱nña ña̱ ndasakáʼnuna ndióxi̱ vatá ni loʼo va̱ása ndáyáʼviña (Jeremías 10:3-5; 16:19, 20). Jehová ni̱ka̱ʼa̱nra xíʼin na̱ ñuu Israel na̱ ni̱xi̱yo tá ya̱chi̱: “Va̱ása xíniñúʼu koo inkaka ndióxi̱ nu̱úndó” (Éxodo 20:3, 23; 23:24).a Tá ki̱xáʼa na̱ ñuu Israel ndásakáʼnuna ndióxi̱ vatá ni̱sa̱a̱ní Jehová xa̱ʼa̱ ña̱yóʼo (Números 25:3; Levítico 20:2; Jueces 2:13, 14).

Ta saátu íyo ña̱ ndákanixi̱ní Ndióxi̱ vitin xa̱ʼa̱ na̱ ndásakáʼnu ndióxi̱ vatá (1 Corintios 8:5, 6; Gálatas 4:8). Na̱ kúni̱ kachíñu nu̱úra káʼa̱nra xíʼinna ña̱ ná sandákoona keʼéna ña̱ kéʼé na̱ veʼe-ñu̱ʼu vatá. Biblia káchiña: “Keendó ta kǒo kutáʼankandó xíʼinna” (2 Corintios 6:14-17). Tá religión inkáchi íyoña ta ndiʼiña sákuyatin miíyó nu̱ú Ndióxi̱, ¿nda̱chun ni̱ka̱ʼa̱nra ña̱yóʼo?

Ña̱ u̱vi̱: Na̱ ndásakáʼnu Ndióxi̱ soo va̱ása kútóora ña̱ kéʼéna

Tá ki̱xáʼa na̱ ñuu Israel kéʼéna nda̱a̱ táki̱ʼva kéʼé na̱ xi̱ndasakáʼnu ndióxi̱ vatá kǒo níxiinka Jehová kunirana saáchi ki̱xáʼana ndásakána ña̱ nda̱a̱ xíʼin ña̱ vatá (Éxodo 32:8; Deuteronomio 12:2-4). Ta̱ Jesús ni̱ka̱ʼa̱nra xíʼin na̱ xi̱niʼi yichi̱ nu̱ú na̱ veʼe-ñu̱ʼu tá tiempo ña̱ ni̱xi̱yora ña̱ va̱ása va̱ʼa ndásakáʼnuna Ndióxi̱. Na̱kán xi̱na̱ʼa̱na ña̱ ndásakáʼnuna Ndióxi̱ soo su̱ví ña̱ ndixa níxikuu ña̱yóʼo saáchi ka̱chira ña̱yóʼo “sándakoondaʼa̱ndó ña̱ ndáyáʼvika ña̱ káʼa̱n Ley: ña̱ va̱ʼa koo inindó xíʼin inkana, ña̱ kundáʼvi-inindó kunindó inkana xíʼin ña̱ kandíxandó Ndióxi̱” (Mateo 23:23).

Tiempo vitin iinlá religión ña̱ sákuyatin miíyó nu̱ú Ndióxi̱ kúú ña̱ ndíku̱n ña̱ nda̱a̱ ña̱ va̱xi nu̱ú Biblia (Juan 4:24; 17:17; 2 Timoteo 3:16, 17). Saáchi religión ña̱ sánáʼa̱ ña̱ va̱ása káʼa̱n Biblia xa̱ʼa̱ sákuxíkaña na̱ yiví nu̱ú Ndióxi̱. Ku̱a̱ʼánína kándíxana ta kúú ña̱yóʼo ña̱ Trinidad, ña̱ tákuka níma̱yó tá xa̱a̱ ni̱xi̱ʼi̱yó xíʼin ña̱ xóʼvi̱yó ndiʼi tiempo soo kǒo ña̱yóʼo va̱xi nu̱ú Biblia. Ña̱ kándíxana yóʼo va̱xiña ti̱xin ña̱ xi̱ndasakáʼnuna ndióxi̱ vatá. Ki̱ʼva ña̱ kéʼéna ña̱ ndásakáʼnuna ndióxi̱ vatá va̱ása ndáyáʼviña, saáchi nu̱úka ña̱ keʼéna ña̱ kúni̱ Ndióxi̱ kéʼéna ña̱ kúni̱ na̱ veʼe-ñu̱ʼu vatá (Marcos 7:7, 8).

Ndióxi̱ sáa̱níra xínira ña̱ kéʼé na̱ veʼe-ñu̱ʼu vatá (Tito 1:16). Ña̱ va̱ʼa chindeétáʼan iin religión xíʼinyó va̱ása xíniñúʼu keʼé kuitína vikó á ña̱ ndakuatina, chi xíniñúʼu chindeétáʼanña xíʼinyó ndiʼi ki̱vi̱. Ta kúú, Biblia káchiña: “Tá iin na̱ yiví ndákanixi̱nína ña̱ ndásakáʼnuna Ndióxi̱ soo va̱ása kíʼinna kuenta xíʼin yuʼúna, na̱ sándaʼvi xíʼin mií kúú na̱yóʼo ta va̱ása ndáyáʼviví ña̱ ndásakáʼnuna Ndióxi̱. Ña̱ va̱ʼa viíní koo ña̱ ndasakáʼnuyó yiváyó Ndióxi̱ ta va̱ása kuumiíña ña̱ yaku̱a̱, ña̱yóʼo kúú ña̱ xíniñúʼu keʼéyó ña̱ va̱ʼa kindo̱o-inira xíʼinña: ná kiʼinyó kuenta xíʼin na̱ ni̱xi̱ʼi̱ yivá ta saátu ná ñaʼá ná ni̱xi̱ʼi̱ yií tá yáʼana nu̱ú tu̱ndóʼo, ta ná kǒo taxiyó ña̱ ixayaku̱a̱ nda̱a̱ ni iin ña̱ʼa ña̱ íyo ñuyǐví yóʼo miíyó” (Santiago 1:26, 27). Tá káʼa̱nña xa̱ʼa̱ ña̱ ndasakáʼnuyó Ndióxi̱ ta vií kooña ta xíʼin ña̱ nda̱a̱ kooña, Biblia La Palabra de Dios para Todos xíniñúʼuña tu̱ʼun yóʼo tá káʼa̱nña xa̱ʼa̱ versículo ta káchiña “Religión ña̱ kǒo ña̱ yaku̱a̱ kúúmií”.