¿Á iin ku̱a̱chi kúú ña̱ koʼoyó ndixi?
Ña̱ káʼa̱n Biblia xa̱ʼa̱ ña̱yóʼo
Ña̱ loʼo ndixi koʼoyó su̱ví iin ku̱a̱chi kúúña. Biblia káʼa̱nña tá vino iin regalo tá táxi Ndióxi̱ ndaʼa̱yó kúúrá ta chíndeétáʼanrá xíʼinyó ña̱ kusi̱í-iniyó (Salmo 104:14, 15; Eclesiastés 3:13; 9:7). Ta saátu káʼa̱n tu̱ʼun Ndióxi̱ xíʼinyó, táyóʼo kivi chindeétáʼanrá xíʼinyó tá kúʼvi̱yó (1 Timoteo 5:23).
Tá ki̱xi ta̱ Jesús nu̱ú ñuʼú yóʼo xi̱ʼira vino (Mateo 26:29; Lucas 7:34). Tá ni̱xa̱ʼa̱nra iin vikó ña̱ tíndaʼa̱ nda̱sara ti̱kui̱í vino ta ña̱yóʼo kúú milagro ña̱ nu̱ú ña̱ ke̱ʼéra (Juan 2:1-10).
Ña̱ kivi kundoʼoyó tá ku̱a̱ʼání ndixi xíʼiyó
Ni káʼa̱n Biblia ña̱ va̱ʼava koʼoyó ndixi, soo saátu káʼa̱nña ña̱ va̱ása ku̱a̱ʼání ndixi koʼoyó nda̱a̱ xi̱niyó. Ña̱kán tá iin na̱ cristiano kúni̱na koʼona ndixi xíniñúʼu kiʼinna kuenta ña̱ va̱ása ku̱a̱ʼánírá koʼona (1 Timoteo 3:8; Tito 2:2, 3). Biblia káʼa̱nña xíʼinyó ndáaña kivi kundoʼoyó tá ku̱a̱ʼání ndixi ná koʼoyó:
Na̱ xíʼi ku̱a̱ʼání ndixi va̱ása vií ndákanixi̱nína ta saátu va̱ása vií íyo ña̱ kéʼéna (Proverbios 23:29-35). Iin na̱ yiví na̱ xíʼi ku̱a̱ʼání ndixi ta va̱ása xínina, va̱ása kívi ndataxina miína ndaʼa̱ Ndióxi̱ nda̱a̱ táki̱ʼva íyo na̱ yi̱i̱ ta ni va̱ása vií ndakanixi̱nína ña̱ ndasakáʼnuna Ndióxi̱ (Romanos 12:1).
Kíxáʼana kéʼéna ña̱ kúni̱ miína ta kéʼéna ña̱ va̱ása va̱ʼa (Oseas 4:11; Efesios 5:18).
Kivi xa̱a̱na va̱ása kuumiíkana xu̱ʼún ta nda̱a̱ kivi kiʼin kue̱ʼe̱ ndeé miína (Proverbios 23:21, 31, 32).
Ndióxi̱ kúndasíra xínira na̱ xíʼin ku̱a̱ʼání ndixi nda̱a̱ xínina (Proverbios 23:20; Gálatas 5:19-21).
¿NDÁA KI̱ʼVA KUNDA̱A̱-INIYÓ TÁ XA̱A̱ KU̱A̱ʼÁNÍ NDIXI XÍʼIYÓ?
Iin na̱ yiví na̱ ku̱a̱ʼání ndixi xíʼi kivi kundoʼona iin tu̱ndóʼo á nda̱a̱ kivi taxina iin tu̱ndóʼo ndaʼa̱ inkana. Biblia va̱ása káʼa̱n kuitíña xa̱ʼa̱ na̱ xíʼi nda̱a̱ xínina ta va̱ása ñúʼuka-inina. Chi saátu káʼa̱nña iin na̱ yiví xa̱a̱ xínina tá va̱ása kívika kiʼinna kuenta xíʼin miína, tá íxayo̱ʼvi̱ña xíʼinna ña̱ kakana, kíxáʼana káʼa̱n kúáchina xíʼin inkana á nda̱a̱ va̱ása kívika ka̱ʼa̱n viína (Job 12:25; Salmo 107:27; Proverbios 23:29, 30, 33). Nda̱a̱ na̱ ku̱a̱ʼání ndixi xíʼi ta va̱ása xínina kivi kundoʼona iin tu̱ndóʼo ndeé (Lucas 21:34, 35).
¿AMA KÚÚ ÑA̱ VA̱ÁSA XÍNIÑÚʼU KOʼOYÓ NDIXI?
Biblia káʼa̱nña xíʼin na̱ cristiano ña̱ va̱ása xíniñúʼu koʼona ndixi tá kivi kundoʼona ña̱yóʼo:
Tá ndakava-ini inkana xa̱ʼa̱ ña̱yóʼo (Romanos 14:21).
Tá ñuu nu̱ú íyoún va̱ása táxina koʼún ndixi (Romanos 13:1).
Tá kǒo kivi ka̱ʼnu̱-inina ña̱ loʼo ndixi koʼona, va̱ʼaka ná va̱ása koʼona táyóʼo (Mateo 5:29, 30).