¿Ndáaña kúú profecía?

Ña̱ káʼa̱n Biblia xa̱ʼa̱ ña̱yóʼo

Iin profecía kúú ña̱ káʼa̱n mií Ndióxi̱ ta miíra ndákaniña nu̱ú na̱ yiví. Biblia káʼa̱nña xa̱ʼa̱ na̱ profeta ña̱ “Ndióxi̱ kúú ta̱ xi̱niñúʼu espíritu santora ña̱ va̱ʼa chindeétáʼanra xíʼin na̱ yiví ña̱ va̱ʼa ka̱ʼa̱nna xa̱ʼa̱ña” (2 Pedro 1: 20, 21). Ña̱kán iin profeta kúú na̱ ndákiʼin tu̱ʼun Ndióxi̱ ta káʼa̱nna xa̱ʼa̱ña xíʼi̱n inkana (Hechos 3: 18).

¿Ndáa ki̱ʼva xi̱kaʼa̱n Ndióxi̱ xíʼin na̱ profeta?

Xa̱a̱ síín síín ña̱ʼa xi̱niñúʼu Ndióxi̱ ña̱ va̱ʼa ni̱ka̱ʼa̱nra ña̱ ndákanixi̱níra xíʼin na̱ profeta. Ná kotoyó ndáaña xi̱niñúʼura:

• Xi̱kaʼyira ña̱ xi̱kaʼa̱nra xíʼinna . Ndióxi̱ ke̱ʼéra ña̱yóʼo tá ta̱xira u̱xu̱ ley ña̱ kundiku̱nna ndaʼa̱ ta̱ Moisés ta iin yichi̱ kuitíva ke̱ʼéra ña̱yóʼo (Éxodo 31:18).

• Xi̱niñúʼura na̱ ángel ña̱ ka̱ʼa̱nna xíʼin na̱ profeta. Ndióxi̱ xi̱niñúʼura iin ángel ña̱ va̱ʼa ka̱ʼa̱nra xíʼin ta̱ Moisés ndáa tu̱ʼun kúú ña̱ xíniñúʼu ka̱ʼa̱nra xíʼin ta̱ Faraón ta̱ ñuu Egipto (Éxodo 3:2-4, 10). Saátu tá xi̱niñúʼu Ndióxi̱ tu̱ʼun ña̱ ndáyáʼviní, ni̱ka̱ʼa̱nra xíʼin na̱ ángel ña̱ ná ka̱ʼa̱nna iin tá iin tu̱ʼun ña̱ xíniñúʼu ka̱ʼyi̱. Saá ke̱ʼé Ndióxi̱ ña̱ xi̱niñúʼura iin ángel tá ni̱ka̱ʼa̱nra xíʼin ta̱ Moisés ña̱ ná kaʼyíra tu̱ʼun yóʼo: “Kaʼyi tu̱ʼun yóʼo saáchi chíka̱i̱ iin trato xíʼún ta saátu xíʼin na̱ ñuu Israel nda̱a̱ táki̱ʼva íyo ña̱ ni̱ka̱ʼi̱n xíʼinndó” (Éxodo 34:27).a

• Xi̱taxira ña̱ xi̱xina visión. Sava yichi̱ na̱ profeta xi̱xina nu̱úna iin visión tá ndótona (Isaías 1:1; Habacuc 1:1). Káxiní xi̱xiyo ña̱ visión yóʼo, sava na̱ profeta xi̱ndikaa̱na nu̱ú ku̱u ña̱yóʼo (Lucas 9: 28- 36; Apocalipsis 1: 10- 17). Ta sava na̱ profeta xi̱xinina visión saáchi Jehová chi̱kaa̱raña xi̱nína ña̱ va̱ʼa kotonañá (Hechos 10:10, 11; 22:17- 21). Saátu xi̱niñúʼu Ndióxi̱ xa̱ni ña̱ va̱ʼa ka̱ʼa̱nra xíʼinna (Daniel 7:1; Hechos 16: 9, 10).

• Chi̱ka̱a̱ra xi̱nína ndááña káʼyína. Ña̱ va̱ʼa ka̱ʼa̱n Ndióxi̱ xa̱ʼa̱ profecía, miíra xi̱chikaa̱ xi̱nína ndáaña ka̱ʼyina. Chi ña̱yóʼo kúú ña̱ káʼa̱n Biblia: “Ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña, ta chíndeétáʼanña xíʼinyó ña̱ va̱ʼa sanáʼa̱yó na̱ yiví” (2 Timoteo 3: 16). Ta Ndióxi̱ xi̱niñúʼura espíritu santora ña̱ va̱ʼa ka̱ʼa̱nra ndáaña kúú ña̱ kaʼyi na̱ profetara. Ña̱kán tu̱ʼun mií Ndióxi̱ kúú ña̱ xi̱kaʼyi na̱ profeta ta xi̱ndaka̱xinna ndáa tu̱ʼun kuniñúʼuna ña̱ va̱ʼa kaʼyina (2 Samuel 23: 1, 2).

¿Á ndíʼi profecía káʼa̱nña xa̱ʼa̱ ña̱ kuu chi nu̱únínu?

Su̱ví ndiʼi profecía káʼa̱nña xa̱ʼa̱ ña̱ kuu chi nu̱únínu. Soo ku̱a̱ʼání ña̱yóʼo kítáʼanña xíʼin ña̱ kuu chí nu̱únínu. Tá kúú, na̱ profeta na̱ ni̱xi̱yo xi̱naʼá tuku ta tuku xi̱kaʼa̱nna xíʼin na̱ israelita xa̱ʼa̱ ña̱ va̱ása va̱ʼa xi̱keʼéna. Ña̱ xi̱kaʼa̱nna xíʼin na̱yóʼo, xi̱naʼa̱ña ndáaña va̱ʼa ndakiʼinna ta kuniso̱ʼona consejo ña̱ taxi Ndióxi̱ ndaʼa̱na tá ndáaña kundoʼona ta va̱ása xíínna kuniso̱ʼona miíra (Jeremías 25: 4-6). Miívana na̱ israelita nda̱kaxin ndáaña kundoʼona xa̱ʼa̱ ña̱ nda̱kaxinna keʼéna (Deuteronomio 30:19, 20).

Ña̱yóʼo kúú sava profecía ña̱ va̱ása káʼa̱n xa̱ʼa̱ ña̱ kuu chí nu̱únínu

• Iin yichi̱ na̱ israelita ni̱ka̱ʼa̱nna xíʼin Ndióxi̱ ña̱ ná chindeéra miína. Soo, chi̱ndaʼára iin profeta ña̱ ni̱ka̱ʼa̱nra xíʼinna ña̱ kǒo chindeéra miína, saáchi kǒo níxiinna kuniso̱ʼona ña̱ ni̱ka̱ʼa̱nra (Jueces 6:6-10).

• Tá ni̱ka̱ʼa̱n ta̱ Jesús xíʼin ñá ñaʼá ñá ñuu Samaria, ni̱ka̱ʼa̱nra xíʼinñá xa̱ʼa̱ ña̱ʼa ña̱ ke̱ʼéñá tá ya̱chi̱. Ñákán ku̱ndaa̱-iniñá ña̱ iin profeta kúú ta̱ Jesús ni kǒo níka̱ʼa̱nvíra xíʼinñá xa̱ʼa̱ ña̱ʼa ña̱ kuu chi nu̱únínu (Juan 4:17-19).

• Tá nda̱tiinna ku̱a̱chi xíʼin ta̱ Jesús, na̱ xi̱saa̱-ini xi̱xini miíra nda̱kasina nu̱úra, ka̱ninara ta ni̱ka̱ʼa̱nna xíʼinra: “Ka̱ʼa̱n xíʼinndi̱, ¿ndáana ka̱ni yóʼó?”. Kǒo ni̱ka̱ʼa̱nna xíʼin ta̱ Jesús ná káʼa̱nra ña̱ kuu chí nu̱únínu, ña̱ xi̱kuni̱na kúú ña̱ na̱ kuniñúʼura ndee̱ra ña̱ ka̱ʼa̱nra xíʼinna ndáana ka̱ni miíra (Lucas 22:63, 64).