ÑA̱ NDÁKA̱TU̱ʼUN NA̱ VA̱LÍ KÚA̱AN
¿Á va̱ása va̱ʼa kutóo iin ta̱a inka ta̱a á iin ñaʼá inka ñaʼá?
“Tá ku̱a̱ʼa̱n xáʼnukai̱, ña̱ i̱xayo̱ʼvi̱níka xíʼi̱n kúú ña̱ xi̱kutói̱ ta̱ va̱lí táʼan miíi̱. Nda̱kanixi̱níi̱ ña̱ loʼo kuití tiempo kundoʼi̱ ña̱yóʼo soo vitin íxayo̱ʼvi̱níkaña xíʼi̱n ña̱ sandákoi̱ña” (Ta̱ David, 23 ku̱i̱ya̱ kúúmiíra).
Ta̱ David, ndásakáʼnura Ndióxi̱ ta kúni̱ra kuniso̱ʼora ndiʼi ña̱ káʼa̱n Ndióxi̱. Iin na̱ yiví na̱ ndóʼo táki̱ʼva ndóʼora, ¿á kuchiñuna saxínuna ña̱ kúni̱ Ndióxi̱? ¿Ndáaña ndákanixi̱ní Ndióxi̱ xa̱ʼa̱ ta̱a ta̱ kútóo ta̱a xíʼin ná ñaʼá ná kútóo ñaʼá?
¿Ndáaña káʼa̱n Biblia?
Nása̱maní ña̱ ndákanixi̱ní na̱ yiví xa̱ʼa̱ na̱ ta̱a na̱ kútóo ta̱a xíʼin ná ñaʼá ná kútóo ñaʼá. Soo miíyó na̱ ndásakáʼnu Ndióxi̱ va̱ása ndíku̱nyó ña̱ ndákanixi̱ní inkana. Nda̱a̱ táki̱ʼva káʼa̱n Efesios 4:14, miíyó va̱ása kúni̱yó kuniso̱ʼoyó ña̱ káʼa̱n na̱ vatá chi va̱ása kúni̱yó sandáʼvina miíyó. Biblia kúú ña̱ chíndeétáʼan xíʼinyó ña̱ kiʼinyó kuenta ndáa ki̱ʼva kúú ña̱ ndakanixi̱níyó xa̱ʼa̱ na̱ ta̱a na̱ kútóo ta̱a á ná ñaʼá ná kútóo ñaʼá.
Biblia káxiní káʼa̱nña tá xa̱a̱ káʼa̱nña xa̱ʼa̱ na̱ ta̱a na̱ kútóo ta̱a á ná ñaʼá ná kútóo ñaʼá. Ná kotoyó ña̱ káʼa̱nña.
“Va̱ása ku̱su̱ún xíʼin iin ta̱a nda̱a̱ táki̱ʼva kísi̱ún xíʼin iin ñaʼá” (Levítico 18:22).
“Ña̱kán, Ndióxi̱ ta̱xivara ña̱ ná keʼéna ndiʼi ña̱ yaku̱a̱ ña̱ ñúʼu níma̱na, [...] Ndióxi̱ sa̱ndákoondaʼa̱ra miína ña̱ keʼéna ña̱ kini ña̱ kaʼan nu̱ú, saáchi ná ñaʼá sa̱ndákooná ña̱ ku̱su̱nná xíʼin ta̱a ta ki̱xáʼaná kísi̱ná xíʼin ná ñaʼá táʼan miíná, ni kǒo ní ixava̱ʼa Ndióxi̱ miíná ña̱ keʼéná ña̱yóʼo” (Romanos 1:24, 26).
“Va̱ása sandáʼvindó miíndó. Tá kúú na̱ yiví na̱ kéʼé ku̱a̱chi kini, na̱ ndásakáʼnu ndióxi̱ vatá, na̱ kísi̱ xíʼin na̱ kǒo nítindaʼa̱ xíʼinna, ta̱a ta̱ kísi̱ xíʼin inka ta̱a, na̱ kui̱ʼná, na̱ kútóo koo ku̱a̱ʼá ña̱ʼa, na̱ xíʼi nda̱a̱ xíniina, na̱ káʼa̱n-ndi̱va̱ʼa xíʼin inkana, na̱ kéʼé ña̱ va̱ása va̱ʼa xíʼin iinna ña̱ kindaana ña̱ kúúmiína, ndiʼi na̱yóʼo va̱ása ki̱ʼvina ti̱xin Reino Ndióxi̱” (1 Corintios 6:9, 10).
Mií ña̱ nda̱a̱, ña̱ káʼa̱n Ndióxi̱ xíʼinyó keʼéyó, ña̱ va̱ʼa ndiʼi miívayó kúúña. Ni kúúyó ta̱a á ñaʼá ta xíniñúʼu kiʼinníyó kuenta ña̱ va̱ʼa va̱ása xa̱a̱yó keʼéyó ña̱ va̱ása kútóo Ndióxi̱ (Colosenses 3:5).
¿Á ña̱yóʼo kúni̱ kachiña...?
¿Á ña̱yóʼo kúni̱ kachiña ña̱ Biblia káʼa̱nña xíʼinyó ña̱ ná kundasíyó kuniyóna?
Va̱ása. Biblia sánáʼa̱ña miíyó ña̱ va̱ása xíniñúʼu sa̱a̱yó kuniyó nda̱a̱ ni iinna. Chi káʼa̱nña xíʼinyó kúú ña̱ viíní kutáʼanyó xíʼin ndiʼina ni nda̱a̱ ndáaka ki̱ʼva íyona (Hebreos 12:14). Va̱ása va̱ʼa ña̱ ku̱a̱ku̱ndaayó á ña̱ ixandi̱va̱ʼayó xíʼin na̱ ta̱a na̱ kútóo ta̱a á ná ñaʼá ná kútóo ñaʼá.
¿Á ña̱yóʼo kúni̱ kachiña ña̱ miíyó na̱ ndásakáʼnu Ndióxi̱ va̱ása íxato̱ʼóyó ley ña̱ káʼa̱n xa̱ʼa̱ ña̱ tindaʼa̱ na̱ ta̱a xíʼin ta̱a á ná ñaʼá xíʼin ñaʼá?
Biblia káʼa̱nña, Ndióxi̱ táxi kuitíra ña̱ ná tindaʼa̱ ta̱a xíʼin ñaʼá (Mateo 19:4-6). Miíyó na̱ ndíku̱n Ndióxi̱, va̱ása ndíku̱nyó ley ña̱ káʼa̱n xa̱ʼa̱ ña̱ tindaʼa̱ u̱vi̱ ta̱ ta̱a xíʼin táʼanra á ná ñaʼá xíʼin táʼanná ta ni va̱ása káʼa̱nyó contraña. Chi ley ña̱ káʼa̱n xa̱ʼa̱ ta̱a ta̱ tíndaʼa̱ xíʼin inka ta̱a á ñaʼá ñá tíndaʼa̱ xíʼin inka ñaʼá, kuenta na̱ chíñuva kúúña. Ta Biblia káʼa̱nña xíʼinyó ña̱ va̱ása xíniñúʼu ki̱ʼviyó xíʼin ña̱ política (Juan 18:36).
Soo ¿tá...?
Soo, ¿tá iin ta̱a kútóora inka ta̱a á iin ñaʼá kútóoñá iin ñaʼá? ¿Á kivi nasa̱mana?
Kiviva nasa̱mana. Saáchi Biblia káʼa̱nña xa̱ʼa̱ sava na̱ xi̱ndoo tá siglo nu̱ú, ña̱ ni̱xa̱a̱va na̱yóʼo na̱samana. Nu̱ú carta ña̱ ka̱ʼyi ta̱ apóstol Pablo ku̱a̱ʼa̱n ndaʼa̱ na̱ Corintios káxiní ni̱ka̱ʼa̱nra ña̱ na̱ ta̱a na̱ kútóo ta̱a á ná ñaʼá ná kútóo ñaʼá, va̱ása ki̱ʼvina ti̱xin Reino Ndióxi̱, ta ni̱ka̱ʼa̱nkara: “Soo sava ndóʼó xi̱keʼéndó ña̱yóʼo” (1 Corintios 6:11).
¿Á kúni̱ kachi ña̱yóʼo ña̱ ta̱a ta̱ xi̱kutóo ta̱a á ñaʼá ñá xi̱kutóo ñaʼá va̱ása níxi̱kutóokana ndikóna keʼéna ña̱yóʼo? Va̱ása. Tu̱ʼun Ndióxi̱ káʼa̱nña ña̱yóʼo: “Xíniñúʼu kixáʼandó ndasaxa̱ándó ki̱ʼva ña̱ kéʼéndó, ta nani kúnda̱a̱ káxi inindó xa̱ʼa̱ ña̱ nda̱a̱, ki̱ʼva ña̱ íyondó ndúxa̱áña ku̱a̱ʼa̱nña” (Colosenses 3:10). Ña̱ nasa̱mana ki̱ʼva ña̱ íyona xíniñúʼu chika̱a̱nína ndee̱ ña̱ keʼéna ña̱yóʼo.
Soo ¿tá iinna kúni̱na kundiku̱nna ña̱ káʼa̱n Ndióxi̱ soo kúni̱kana ku̱su̱nna xíʼin ta̱a táʼan miína á ñaʼá xíʼin ñaʼá táʼan miíná? ¿Ndáaña xíniñúʼu keʼéna?
Nda̱a̱ táki̱ʼva íyo inka ña̱ kútóona keʼéna, na̱ yiví kivi ndaka̱xinna á keʼéna ña̱ kútóo ku̱ñuna á taxina ña̱ ná kaʼndachíñu ña̱yóʼo nu̱úna. ¿Ndáa ki̱ʼva sandákoona keʼéna ña̱yóʼo? Biblia káchiña: “Taxindó ná chindeétáʼan ña̱ espíritu santo xíʼinndó tasaá kǒo keʼéndó nda̱a̱ ni iin ña̱ʼa ña̱ kúni̱ ku̱ñundó” (Gálatas 5:16).
Nda̱a̱ táki̱ʼva ki̱ʼún kuenta, ña̱ versículo yóʼo va̱ása káʼa̱nña ña̱ na̱ yiví kán va̱ása kuni̱kana keʼéna nda̱a̱ ni iin ña̱ kini ña̱ kúni̱ ku̱ñuna. Ña̱yóʼo káʼa̱nña tá ná chikaa̱níyó ndee̱ ña̱ kaʼviyó Biblia ta keʼéyó oración nu̱ú Jehová, taxiña ndee̱ ndaʼa̱yó ña̱ va̱ása keʼéyó ña̱ kúni̱ ku̱ñuyó.
Ta̱ David, ta̱ xa̱a̱ ni̱ka̱ʼa̱nyó xa̱ʼa̱, ku̱chiñura sa̱ndákoora ña̱yóʼo tá na̱túʼunra xíʼin na̱ yivára ndáaña xi̱ndoʼora. Ta̱yóʼo káchira: “Va̱ʼaní ku̱nii̱, tá ya̱chi̱ka nínatúʼi̱n xíʼinna, kusi̱íkava-inii̱”.
Saáchi kúsi̱íkava-iniyó tá xíniso̱ʼoyó ña̱ káʼa̱n Jehová. Kuchiñu kandíxayó ña̱ ndiʼi ña̱ káʼa̱nra, va̱ʼaní íyoña ta sákusi̱íña níma̱yó ta tá ndíku̱nyó ña̱yóʼo, ku̱a̱ʼání ña̱ va̱ʼa ndakiʼinyó (Salmo 19:8, 11).