Ñá María númindaañá ta̱ Jesús tá ni̱xi̱yo loʼora

¿Á siʼí Ndióxi̱ kúú ñá María?

Ña̱ káʼa̱n Biblia xa̱ʼa̱ ña̱yóʼo

Biblia va̱ása sánáʼa̱ña ñá María kúúñá siʼí Ndióxi̱, ta ni va̱ása káʼa̱nña ña̱ xíniñúʼu ndasakáʼnuyó miíñá.a Ndakanixi̱ní xa̱ʼa̱ ña̱yóʼo:

Ñá María kǒo níka̱ʼa̱nñá ña̱ kúúña siʼí Ndióxi̱. Biblia sánáʼa̱ña ñá María sa̱kákuñá “se̱ʼe Ndióxi̱ ta̱ káʼnuní” ta su̱ví mií Ndióxi̱ níxi̱kuura (Lucas 1:32, 35).
Ta̱ Jesús kǒo níka̱ʼa̱nra ñá María xi̱kuu siʼí Ndióxi̱, ta kǒo níka̱ʼa̱nra ña̱ xíniñúʼu ndasakáʼnuyóñá. Iin yichi̱ iin ñaʼá nda̱sakáʼnuñá ñá María xa̱ʼa̱ ña̱ kúúñá siʼí ta̱ Jesús, soo ta̱yóʼo ni̱ka̱ʼa̱nra xíʼinñá: “Na̱ si̱íka íyo kúú na̱ xíniso̱ʼo tu̱ʼun Ndióxi̱ ta kéʼéna ña̱ káʼa̱nña” (Lucas 11:27, 28).
Tu̱ʼun “Siʼí Ndióxi̱” xíʼin Theotokos (ña̱ kúni kachi ñá sa̱káku Ndióxi̱) kǒo ña̱yóʼo va̱xi nu̱ú Biblia.
Tu̱ʼun “reina chí ndiví” va̱xiña nu̱ú Biblia, soo su̱ví xa̱ʼa̱ ñá María káʼa̱nña, ña̱yóʼo káʼa̱nña xa̱ʼa̱ iin ndióxi̱ vatá ña̱ xi̱ndasakáʼnu na̱ ñuu Israel na̱ ndu̱u apóstata (Jeremías 44:15-19). Sana “reina chí ndiví” ñá káʼa̱nña xa̱ʼa̱ xi̱kuu, ñá Istar (Astarté), iin ndióxi̱ na̱ ñuu Babilonia.
Na̱ cristiano na̱ ni̱xi̱yo tá siglo nu̱ú xi̱ ixato̱ʼóna ñá María soo kǒo níndasakáʼnunañá. Iin ta̱ historiador ni̱ka̱ʼa̱nra xa̱ʼa̱ na̱ cristiano na̱ ni̱xi̱yo tá siglo nu̱ú, ña̱ va̱ása níxi̱ndasakáʼnuna inkaka ndióxi̱, xa̱ʼa̱ ña̱kán xi̱kiʼinna kuenta ña̱ kǒo ndasakáʼnuna ñá María, ña̱ va̱ʼa kǒo ndakanixi̱ní inkana ña̱ ndásakáʼnunañá nda̱a̱ táki̱ʼva kéʼéna xíʼin iin ndióxi̱ (In Quest of the Jewish Mary).
Biblia káʼa̱nña, Ndióxi̱ ndiʼi tiempo íyora (Salmo 90:1, 2; 93:2). Xa̱ʼa̱ ña̱ kǒo na̱ ní ixava̱ʼa Ndióxi̱, kǒo kívi koo siʼíra. Ndióxi̱ va̱ása kívi kakura ti̱xin ñá María, saáchi Biblia káʼa̱nña ña̱ kúúra Ndióxi̱ ta̱ káʼnuní ta ni nu̱ú ndiví va̱ása kívi koora (1 Reyes 8:27).

Ñá María xi̱kuu siʼí ta̱ Jesús ta su̱ví siʼí Ndióxi̱

Ñá judía xi̱kuu ñá María ta ki̱xiñá ti̱xin na̱ veʼe ta̱ David (Lucas 3:23-31). Va̱ʼaní xi̱ndasakáʼnuñá Ndióxi̱ ta saátu xi̱kandíxañára ta ta̱yóʼo xi̱kusi̱í-inira xíʼinñá (Lucas 1:28). Ndióxi̱ nda̱kaxinra ñáyóʼo ña̱ va̱ʼa kooñá siʼí ta̱ Jesús (Lucas 1:31, 35). Tá ni̱ya̱ʼa tiempo ni̱xi̱yoka se̱ʼeñá xíʼin ta̱ José (Marcos 6:3).

Biblia káʼa̱nña ña̱ xi̱kuuñá discípula ta̱ Jesús, soo va̱ása káʼa̱n ku̱a̱ʼáña xa̱ʼa̱ ñáyóʼo (Hechos 1:14).

¿Nda̱chun kándíxa savana ñá María kúú siʼí Ndióxi̱?

Tá xa̱a̱ ku̱a̱ʼa̱n ndíʼi siglo ku̱mí tiempo vitin, saá kúú ña̱ ki̱xáʼana ndásakáʼnuna ñá María. Tiempo saá, na̱ ñuu Roma iinlá veʼe-ñu̱ʼu ña̱ católica ki̱xáʼana ndíku̱nna. Ta ku̱a̱ʼání na̱ xi̱keʼé ña̱ va̱ása va̱ʼa ni̱xa̱a̱na ndu̱una kuenta na̱ veʼe-ñu̱ʼu yóʼo. Ta tiempo saá na̱ veʼe-ñu̱ʼu ki̱xáʼana sánáʼa̱na xa̱ʼa̱ ña̱ Trinidad.

Xa̱ʼa̱ ña̱ ki̱xáʼana kándíxana ña̱ Trinidad, ku̱a̱ʼání na̱ ñúʼu ti̱xin religión yóʼo ki̱xáʼana káʼa̱nna ta̱ Jesús kúú Ndióxi̱. Xa̱ʼa̱ ña̱yóʼo ki̱xáʼana káʼa̱nna ñá María kúú siʼí Ndióxi̱. Tá ku̱i̱ya̱ 431, na̱ Concilio ña̱ Éfeso, na̱yóʼo xi̱kuu iin tiʼvi na̱ xi̱niʼi yichi̱ ti̱xin veʼe-ñu̱ʼu, ni̱ka̱ʼa̱nna ñá María kúú Siʼí Ndióxi̱. Tándi̱ʼi, saá kúú ña̱ ki̱xáʼa ndásakáʼnuna ñá María. Ta inka na̱ yiví na̱ xi̱ndasakáʼnu ndióxi̱ vatá tá kúú ñá Ártemis (ñá Diana, nu̱ú romano) xíʼin ñá Isis, nda̱kutáʼanna xíʼin na̱ veʼe-ñu̱ʼu tasaá loʼo tá loʼo ki̱xáʼana ndásakáʼnuna ñá María xíʼin na̱yóʼo nu̱úka ña̱ ndásakáʼnuna ndióxi̱ miína.

Tá ku̱i̱ya̱ 432, ta̱ su̱tu̱ Sixto III xa̱ʼndara chiñu ña̱ ná ixava̱ʼana iin veʼe-ñu̱ʼu ñuu Roma ña̱ va̱ʼa ndasakáʼnuna Siʼí Ndióxi̱. Ixava̱ʼana ña̱yóʼo yatin nu̱ú xi̱ndikaa̱ templo ñá Lucina, ñá xi̱kuu ndióxi̱ na̱ Romano ñá xi̱kaʼa̱nna xíʼin ña̱ chindeétáʼanñá xíʼin na̱ xi̱kaku se̱ʼe. Iin ñá ka̱ʼyi xa̱ʼa̱ ña̱ veʼe-ñu̱ʼu yóʼo ni̱ka̱ʼa̱nñá: “Na̱yóʼo ni̱sa̱kána ña̱ xi̱ndasakáʼnuna ña̱ naní Gran Madre. Ta na̱yóʼo ki̱xáʼana káñuʼuna ñá María nu̱úka ña̱ ndasakáʼnuna ña̱ xi̱ndasakáʼnuna tá ya̱chi̱” (Mary—The Complete Resource).

a Sava religión sánáʼa̱ña ñá María kúú siʼí Ndióxi̱. Káʼa̱nna ña̱ kúúñá “Reina chí ndiví” á Theotokos ta tu̱ʼun griego kúni̱ kachiña ñá sa̱káku Ndióxi̱ á siʼí Ndióxi̱.