¿Ndáaña káʼa̱n Biblia xa̱ʼa̱ ñá virgen María?

• Ña̱ káʼa̱n Biblia xa̱ʼa̱ ña̱yóʼo

• ¿Nda̱chun va̱ʼa ka̱ku se̱ʼe iin ñá loʼo kúa̱an ñá ta̱ʼán ku̱su̱n xíʼin ni iin ta̱a?

• ¿Nda̱chun xi̱niñúʼu kaku ta̱ Jesús ti̱xin iin ñá loʼo kúa̱an ñá ta̱ʼán ku̱su̱n xíʼin ni iin ta̱a?

• ¿Á nda̱a̱ ni iin yichi̱ kǒo níki̱si̱ ñá María xíʼin ni iin ta̱a?

• ¿Á ñá ku̱a̱chi xi̱kuu ñá María?

• ¿Ndáa ki̱ʼva xíniñúʼu kotoyó ñá María?

Ña̱ káʼa̱n Biblia xa̱ʼa̱ ña̱yóʼo

Biblia káʼa̱nña ña̱ iinlá ñá María kúú ñá loʼo kúa̱an ñá nda̱kaxin Ndióxi̱ ña̱ va̱ʼa kaku ta̱ Jesús. Profecía ña̱ káʼa̱n xa̱ʼa̱ milagro yóʼo ni̱ka̱ʼyi̱ña nu̱ú Biblia, ta ta̱ profeta Isaías ka̱ʼyiña, ta tá ni̱xi̱nuña ni̱ka̱ʼyi̱ña nu̱ú ña̱ Evangelio ña̱ ka̱ʼyi ta̱ Mateo xíʼin ta̱ Lucas.

Ta̱ Isaías ka̱ʼyira profecía ña̱ káʼa̱n xa̱ʼa̱ ndáa ki̱ʼva kaku ta̱ Mesías, ña̱yóʼo káchiña: “Kotondó, iin ñá loʼo kúa̱an, ke̱e se̱ʼeñá ta kaku iin ta̱ loʼo se̱ʼeñá” (Isaías 7:14). Ndióxi̱ chi̱ndeétáʼanra xíʼin ta̱ Mateo ña̱ va̱ʼa ka̱ʼa̱nra xa̱ʼa̱ profecía ña̱ ka̱ʼyi ta̱ Isaías, ña̱ káʼa̱n xa̱ʼa̱ ña̱ kaku ta̱ Jesús. Tándi̱ʼi ni̱ka̱ʼa̱n ta̱ Mateo ña̱ ku̱u iin milagro chi ni̱ke̱e se̱ʼe ñá María, ni̱ka̱ʼa̱nkara ña̱yóʼo: “Ndiʼi ña̱yóʼo ku̱u ña̱ va̱ʼa xi̱nu tu̱ʼun Jehová ña̱ ni̱ka̱ʼa̱n ta̱ profetara: ‘Kotondó, iin ñá loʼo kúa̱an ke̱e se̱ʼeñá, ta kaku iin ta̱ loʼo se̱ʼeñá, ta kunaníra Emmanuel’, ña̱yóʼo kúni̱ kachiña ‘Ndióxi̱ íyora xíʼinyó’” (Mateo 1:22, 23).

Saátu ta̱ Lucas ka̱ʼyira xa̱ʼa̱ milagro ña̱ ni̱ke̱e se̱ʼe ñá María. Ta̱ Lucas ni̱ka̱ʼa̱nra ña̱ mií Ndióxi̱ chi̱ndaʼá ta̱ ángel Gabriel ni̱xa̱ʼa̱n nu̱ú “iin ñá loʼo kúa̱an ñá xa̱a̱ íyo tu̱ʼun xa̱ʼa̱ ña̱ tindaʼa̱ñá xíʼin iin ta̱a ta̱ naní José, ta ta̱yóʼo ta̱ ke̱e ti̱xin na̱ veʼe ta̱ David xi̱kuura. Ta ñá loʼo kúa̱an yóʼo María xi̱naníñá” (Lucas 1:26, 27). Nda̱a̱ mií ñá María ni̱ka̱ʼa̱n ña̱ xi̱kuuñá ñá loʼo kúa̱an. Tándi̱ʼi xi̱niso̱ʼo ñá María ña̱ ni̱ka̱ʼa̱n ta̱ ángel xíʼinñá ña̱ xa̱a̱ñá kooñá siʼí ta̱ Jesús, ta̱ nda̱kaxin Ndióxi̱, ni̱nda̱ka̱tu̱ʼunñára: “¿Ndáa ki̱ʼva koo ña̱yóʼo, chi kǒo ni iin ta̱a kísi̱ xíʼi̱n?” (Lucas 1:34).

¿Nda̱chun va̱ʼa ka̱ku se̱ʼe iin ñá loʼo kúa̱an ñá ta̱ʼán ku̱su̱n xíʼin ni iin ta̱a?

Ndióxi̱ xíniñúʼura espíritu santora ña̱ va̱ʼa ke̱e se̱ʼe ñá María (Mateo 1:18). Ta̱ ángel Gabriel ni̱ka̱ʼa̱nra ña̱yóʼo xíʼin ñá María: “Espíritu santo kixi sa̱táún, ta ndee̱ Ndióxi̱ ta̱ káʼnuní kundaa yóʼó. Ña̱kán ta̱ kaku kunaníra ta̱ yi̱i̱, se̱ʼe Ndióxi̱” (Lucas 1:35).a Ña̱ va̱ʼa kaku ta̱ Jesús nu̱ú ñuʼú yóʼo Ndióxi̱ ke̱ʼéra iin milagro, sa̱yáʼara ta̱ Jesús ti̱xin ñá María.

¿Nda̱chun xi̱niñúʼu kaku ta̱ Jesús ti̱xin iin ñá loʼo kúa̱an ña̱ ta̱ʼán ku̱su̱n xíʼin ni iin ta̱a?

Ndióxi̱ nda̱kaxinra iin ñá loʼo kúa̱an ña̱ va̱ʼa kaku ta̱ Jesús ta kǒo ku̱a̱chi kuumiíra, tasaá va̱ʼa sakǎkura na̱ yiví nu̱ú ku̱a̱chi xíʼin ña̱ xíʼi̱yó (Juan 3:16; Hebreos 10:5). Ndióxi̱ chi̱kaa̱ra ta̱ Jesús ti̱xin ñá María, ta espíritu santo Ndióxi̱ kúú ña̱ xi̱ndaa ta̱ Jesús tá ni̱ke̱era ti̱xin ñá María ña̱ va̱ʼa kǒo ku̱a̱chi kuumiíra (Lucas 1:35).

Xa̱ʼa̱ ña̱yóʼo, tá ka̱ku ta̱ Jesús kǒo ku̱a̱chi níxikuumiíra, ndáa táki̱ʼva ni̱xi̱yo ta̱ Adán tá kúma̱níka ki̱ʼvira ku̱a̱chi nu̱ú Ndióxi̱. Biblia káʼa̱nña xa̱ʼa̱ ta̱ Jesús ña̱ “va̱ása níki̱ʼvira ku̱a̱chi” (1 Pedro 2:22). Xa̱ʼa̱ ña̱ kǒo ku̱a̱chi níxikuumií ta̱ Jesús va̱ʼa cha̱ʼvira xa̱ʼa̱yó, tasaá sakǎkura miíyó nu̱ú ku̱a̱chi xíʼin ña̱ xíʼi̱yó (1 Corintios 15:21, 22; 1 Timoteo 2:5, 6).

¿Á nda̱a̱ ni iin yichi̱ kǒo níki̱si̱ ñá María xíʼin ni iin ta̱a?

Va̱ásaví, saáchi Biblia káʼa̱nña ña̱ ni̱xi̱yova yii̱ñá ta saátu ña̱ ka̱kuka se̱ʼeñá (Mateo 12:46; Marcos 6:3; Lucas 2:7; Juan 7:5).

¿Á ñá ku̱a̱chi xi̱kuu ñá María?

Ñá ku̱a̱chi xi̱kuuvañá. Soo sava na̱ yiví káʼa̱nna ña̱ su̱ví ñá ku̱a̱chi níxi̱yoñá, tá kúú nu̱ú Enciclopedia de la Religión Católica káʼa̱nña ña̱yóʼo: “Nani tá ni̱ke̱e ñá María ti̱xin siʼíñá kǒoví ku̱a̱chi níxikuumiíñá, ndiʼi na̱ yiví tá kákuna xa̱a̱ kúúna na̱ ku̱a̱chi, soo iinlá ñá María kúú ña̱ kǒo níxikuumií ku̱a̱chi, saáchi Ndióxi̱ nda̱kaxin miíñá”.

Soo Biblia káʼa̱nña ña̱ xi̱kuuva ñá María ñá ku̱a̱chi nda̱a̱ táki̱ʼva íyo ndiʼi na̱ yiví (Salmo 51:5; Romanos 5:12). Nda̱a̱ mií ñá María nda̱kuni ña̱ xi̱kuuñá ñá ku̱a̱chi, saáchi ni̱xa̱ʼa̱nñá ni̱so̱ko̱ñá ña̱ʼa xa̱ʼa̱ ku̱a̱chi nda̱a̱ táki̱ʼva xi̱kaʼa̱n ley ta̱ Moisés xíʼin ndiʼi ná ni̱xi̱yo se̱ʼe (Levítico 12:2-8; Lucas 2:21-24). Tá káʼa̱n na̱ yiví ña̱ su̱ví ñá ku̱a̱chi níxi̱yo ñá María ña̱ Enciclopedia Católica Online ndákuniña ña̱yóʼo: “Nu̱ú Biblia kǒo ndáni̱ʼíyó ni iin prueba á inka ña̱ʼa ña̱ káʼa̱n xa̱ʼa̱ ña̱yóʼo ña̱ kúúña ña̱ nda̱a̱”. Xa̱ʼa̱ ña̱kán iin ña̱ sánáʼa̱ na̱ veʼe-ñu̱ʼu católico kuitíva kúú ña̱yóʼo.

¿Ndáa ki̱ʼva xíniñúʼu kotoyó ñá María?

Va̱ʼaní yichi̱ chi̱nu̱ú ñá María nu̱úyó saáchi va̱ʼaní xi̱kandíxañá Ndióxi̱, xi̱xiniso̱ʼoñára, vitá ni̱xi̱yo iniñá ta saátu xi̱kuʼvi̱ní-iniñá xi̱xiniñá Ndióxi̱. Ñáyóʼo ni̱xi̱yoñá nda̱a̱ táki̱ʼva ni̱xi̱yo inka na̱ va̱ʼaní xi̱ndasakáʼnu Ndióxi̱ na̱ kivi kundiku̱nyó yichi̱ (Hebreos 6:12).

Ni nda̱kaxin Ndióxi̱ ñá María ña̱ kooñá siʼí ta̱ Jesús, soo kǒo káʼa̱n Biblia ña̱ xíniñúʼu ndasakáʼnuyóñá á ña̱ keʼéyó oración nu̱úñá. Ni xi̱kuu ñá María siʼí ta̱ Jesús, soo kǒo níndásakáʼnurañá ta ni kǒo níkáʼa̱nra xíʼin na̱ discípulora ña̱ ndasakáʼnunañá. Loʼova yichi̱ káʼa̱n Biblia xa̱ʼa̱ ñá María tá kúú nu̱ú Evangelio xíʼin nu̱ú tutu ña̱ Hechos, soo nu̱ú inkaka 22 tutu ña̱ va̱xi nu̱ú Nuevo Testamento kǒo káʼa̱nvíña xa̱ʼa̱ñá (Hechos 1:14).

Kǒo káʼa̱nví Biblia ña̱ xi̱ndasakáʼnu na̱ cristiano na̱ ni̱xi̱yo tá siglo nu̱ú ñá María. Biblia sánáʼa̱ña ndiʼi na̱ cristiano ña̱ iinlá Ndióxi̱ xíniñúʼu ndasakáʼnuna (Mateo 4:10).