Ndáa ki̱ʼva chíndeétáʼan chiñu ña̱ kéʼéna Betel xíʼin ña̱ ku̱ʼu̱nyó natúʼunyó xíʼin na̱ yiví

Nu̱ú na̱ Cuerpo Gobernante ndáyáʼviní ña̱ viíní kuniñúʼuna xu̱ʼún ña̱ táxiyó ña̱ va̱ʼa sandáʼana á ixava̱ʼana Betel á veʼe nu̱ú ndátakayó, saáchi ña̱yóʼo chíndeétáʼan xíʼinyó ña̱ natúʼunkayó xíʼin na̱ yiví. Tá ku̱i̱ya̱ 2023, ndiʼi Betel ña̱ kúúmií na̱ testigo Jehová iníísaá ñuyǐví yáʼaka 500 millón ña̱ dólara xi̱niñúʼuna ña̱ va̱ʼa sa̱tána, i̱xava̱ʼana, nda̱saviína ta saátu ña̱ xi̱ndaana veʼe nu̱ú ndátakayó á salón ña̱ asamblea ña̱ íyo iníísaá ñuyǐví. Soo síínva kúú xu̱ʼún ña̱ xíniñúʼu iin tá iin na̱ congregación ña̱ va̱ʼa kundaana salón nu̱ú ndátakana.

Saátu xíniñúʼuna xu̱ʼún ña̱ táxiyó ña̱ va̱ʼa kundaana á ixava̱ʼana Betel, saáchi yóʼo kúú nu̱ú kéʼéna tutu ña̱ xíniñúʼuyó ña̱ va̱ʼa ku̱ʼu̱nyó natúʼunyó xíʼin na̱ yiví. Tiempo vitin si̱lóʼo kúú chiñu ña̱ kéʼéna ti̱xin Betel, saáchi kúni̱na kuniñúʼuna ku̱a̱ʼá xu̱ʼún ña̱ va̱ʼa ixava̱ʼana á ndasaviína veʼe nu̱ú ndátakayó, á Salón ña̱ Asamblea. Soo kúnda̱a̱-iniyó ña̱ xíniñúʼuna ku̱a̱ʼáka xu̱ʼún saáchi íyo Betel ña̱ xíniñúʼuníka ndasaviína, kundaana, ixava̱ʼana á ña̱ nasa̱mana inka xiyo. ¿Nda̱chun ndáyáʼviní keʼéna chiñu yóʼo? ¿Ta ndáa ki̱ʼva chíndeétáʼan chiñu ña̱ kéʼéna ti̱xin Betel xíʼin ña̱ ku̱ʼu̱nyó natúʼunyó xíʼin na̱ yiví? Ná kotoyó.

“Ndásavií tukuyóña”

Ku̱a̱ʼání Betel ña̱ íyo iníísaá ñuyǐví xa̱a̱ ni̱ya̱ʼa 30 á 40 ku̱i̱ya̱ na̱kuva̱ʼaña. Ta̱ Nicholas, ta̱ káchíñu ti̱xin Departamento Mundial ña̱ Construcción, káchira: “Nda̱a̱ veʼe ña̱ viíní ndáana, tá xa̱a̱ yáʼa tiempo loʼo tá loʼo ndíʼi̱-xa̱ʼa̱ña ta xíniñúʼu ndasaviínaña. Tá ndásaviíndi̱ iin veʼe ña̱ xa̱a̱ ku̱a̱ʼání ku̱i̱ya̱ íyo kivi kuniñúʼu tukundi̱ña”.

Tá ndásaviína á ndásaxa̱ána iin Betel kíʼinnína kuenta xíʼin ña̱ xíniñúʼu na̱ ñuu Ndióxi̱. Tá i̱xava̱ʼana sava Betel loʼova na̱ publicador ni̱xi̱yo tiempo saá, soo vitin ku̱a̱ʼáníkana íyo. Xa̱ʼa̱ ña̱yóʼo xíniñúʼuna ku̱a̱ʼáka na̱ hermano ña̱ va̱ʼa kachíñuna ti̱xin Betel. Xíʼin ña̱yóʼo kúnda̱a̱-iniyó ña̱ xíniñúʼu ndukáʼnu sava Betel saáchi xa̱a̱ ku̱a̱ʼánína íyo ti̱xinña.

Ta xíniñúʼu kiʼinnína kuenta xíʼin sava Betel saáchi xa̱a̱ yatáníña. Saáchi tiempo vitin ndeéní táan, ndeéní kúun sa̱vi̱ xa̱ʼa̱ ña̱ ndóoyó tiempo nu̱ú ndíʼi (Lucas 21:11). Tá xa̱a̱ ndásaviína iin Betel xíniñúʼuna ña̱ʼa ña̱ va̱ʼaní, saáchi saá va̱ʼaníka kíndo̱oña. Ta tá xa̱a̱ kúu iin tu̱ndóʼo, tá kúú ña̱ táan á ña̱ ndeéní kúun sa̱vi̱ xíniñúʼuna veʼe yóʼo ña̱ va̱ʼa chindeétáʼanna xíʼin na̱ hermano ta saátu ña̱ chika̱a̱na ndee̱ xíʼinna.

“Jehová ta̱xira bendiciónra xa̱ʼa̱ ña̱ nda̱kaxindi̱ keʼéndi̱”

Tá ku̱i̱ya̱ 2023 na̱ Cuerpo Gobernante ni̱ka̱ʼa̱nna ña̱ kivi nduvií á ndasacheékana 43 Betel ña̱ íyo iníísaá ñuyǐví, ku̱a̱ʼání kúú ña̱yóʼo. Ná ka̱ʼa̱nyó xa̱ʼa̱ sava ña̱ʼa ña̱ náʼa̱ nu̱úyó ña̱ ndáyáʼviní chiñu ña̱ kéʼéna.

Angola. Iin ta̱ chíndeétáʼan xíʼin ña̱ Comité ña̱ Sucursal ña̱ ñuu yóʼo, ta̱ naní Matt, káchira: “Kúnda̱a̱ káxi inindi̱ ña̱ xínu profecía ña̱ ni̱ka̱ʼyi̱ nu̱ú Ageo 2:7, ndákanda̱ní-inindi̱ saáchi ti̱xin 10 loʼo kuití ku̱i̱ya̱ ku̱a̱ʼání ku̱a̱ʼa̱n ndúu na̱ publicador. Xa̱ʼa̱ ña̱yóʼo, Betel ña̱ íyo chí Angola xi̱xiniñúʼukana na̱ hermano ña̱ va̱ʼa kiʼinna kuenta xíʼin na̱ publicador, soo xa̱ʼa̱ ña̱ loʼo ni̱xi̱yo Betel yóʼo va̱ása níkivi kanana ku̱a̱ʼá na̱ hermano ña̱ va̱ʼa kachíñuna yóʼo. Ña̱kán, na̱ xa̱a̱ íyo Betel ku̱a̱ʼáníka chiñu ki̱xáʼana kéʼéna”.

Xa̱ʼa̱ ndiʼi ña̱ ku̱u yóʼo ni̱ka̱ʼa̱nna xíʼin sava na̱ hermano ña̱ ná kiʼinna kuenta á kivi ndasacheékana Betel yóʼo. Tá xa̱ʼa̱, nda̱kanixi̱nína ña̱ va̱ʼa kamaka keʼéna chiñu yóʼo xi̱xiniñúʼu ndasaviína Betel yóʼo, soo tándi̱ʼi ki̱ʼinna kuenta tá ná keʼéna ña̱yóʼo kǒo kuniñúʼu viína xu̱ʼún ña̱ táxina ndaʼa̱na. Soo nda̱kanixi̱nína ña̱ va̱ʼaka keʼéna kúú ña̱ satána ta ndasaviína iin veʼe ña̱ xi̱ndichi yatin kán. Ta̱ Matt káchikara: “Tá ni̱ka̱ʼa̱n na̱ hermano yóʼo xíʼin na̱ Comité ña̱ Sucursal ña̱ kúni̱na satána ta ndasaviína veʼe ña̱ níndichi yatin kán, ki̱xáʼa ndíʼi̱-inindi̱ saáchi nda̱kanixi̱níndi̱ ña̱ kǒo chindeétáʼanví veʼe ña̱ kúni̱na satána yóʼo xíʼinndi̱, saáchi su̱ví miíndi̱ ní ixava̱ʼaña. Soo vitin kúnda̱a̱ káxi inindi̱ ña̱ mií Jehová chi̱ndeétáʼan xíʼinndi̱ ña̱ vií ndaka̱xinndi̱ ña̱yóʼo, saáchi veʼe yóʼo kúú ña̱ xi̱xiniñúʼuvandi̱”.

Sana chí nu̱únínu Betel ña̱ ñuu Angola xíniñúʼu ndukáʼnukavaña. Soo xíʼin veʼe ña̱ sa̱tána, veʼe válí ña̱ i̱xava̱ʼana chí nu̱ú íyo Betel xíʼin veʼe válí ña̱ íxarentana kiviva koo ndiʼi na̱ hermano na̱ chíndeétáʼan xíʼin Betel yóʼo, saáchi ña̱yóʼo chindeétáʼanña ña̱ kuaʼnuka na̱ ñuu Ndióxi̱ ti̱xin ñuu yóʼo.

Japón. Xa̱a̱ yatin 40 ku̱i̱ya̱ kúú ña̱ ni̱kuva̱ʼa sava veʼe ña̱ ndíta ti̱xin Betel ña̱ ñuu Japón yóʼo, ta nda̱a̱ ni iin yichi̱ ta̱ʼán ndasaviínaña ña̱ va̱ʼa nduxa̱áña. Ni ndáavana veʼe yóʼo, soo xa̱ʼa̱ ña̱ ku̱a̱ʼání ku̱i̱ya̱ íyoña xíniñúʼu ndasaxa̱ánaña ña̱ va̱ʼa ku̱a̱ʼá ku̱i̱ya̱ kuniñúʼunaña. Xa̱ʼa̱ ña̱kán, xa̱a̱ ki̱xáʼana ndásaviína veʼe ña̱ íyo Betel yóʼo.

Xa̱a̱ nása̱maní ki̱ʼva ña̱ íyona ti̱xin Betel. Saáchi tá kúma̱níka kixáʼa ku̱i̱ya̱ 2015 ni̱xi̱yo na̱ xi̱ ixava̱ʼa ña̱ xi̱xixi na̱ xi̱ñuʼu Betel iníí ñuyǐví. Xa̱ʼa̱ ña̱kán, tá i̱xava̱ʼana Betel ña̱ íyo chí ñuu Japón loʼoní i̱xava̱ʼana cocina na̱ íyo ti̱xin iin tá iin veʼe yóʼo. Soo vitin iin tá iin na̱ Betelita kúú na̱ i̱xava̱ʼa ña̱ kuxuna. Ña̱ va̱ʼa chindeétáʼanna xíʼin na̱ hermano yóʼo, nda̱sanáʼnukana cocinana. Ñá Kumiko, ñá ka̱chíñu Betel ña̱ Japón káchiñá: “Xa̱ʼa̱ ña̱ náʼnuka cocina yóʼo, va̱ʼaníka íxava̱ʼi̱ ña̱ʼa kuxui̱ nda̱a̱ táki̱ʼva íyo veʼi̱ saá íyoña túvii̱”.

Chiñu ña̱ kéʼéna ti̱xin Betel ña̱ Japón va̱ʼaní chíndeétáʼanña xíʼin ña̱ predicación (Mateo 28:19, 20). Saáchi iníísaá ñuyǐví, u̱vi̱ kuití Betel kúú nu̱ú távána Biblia, ta iin Betel yóʼo kúú ña̱ ndíkaa̱ chí Japón. Xa̱ʼa̱ ña̱kán, tá nda̱saxa̱ána Betel yóʼo sa̱tána iin máquina tú ndákiʼin ndiʼi yáká ta saátu ndiʼi tutu válí ña̱ kóyo nu̱ú ñuʼú. Ki̱ʼva iin millón ña̱ dólar ya̱ʼvi máquina yóʼo, ni yaʼvi túyóʼo soo sa̱tánanú ña̱ va̱ʼa kundaana na̱ hermano ña̱ va̱ʼa kǒo kue̱ʼe̱ kiʼinna tasaá kivi tavákana Biblia ña̱ va̱ʼa xa̱a̱ña ndaʼa̱ ndiʼi na̱ yiví.

Ni nda̱saviína Betel ña̱ ñuu Japón, kǒo nísandákoona tavána Biblia. Ta̱ Trey, tá ndíkaa̱ ti̱xin Comité ña̱ Sucursal ñuu Japón káchira: “Mií tiempo ña̱ ki̱xáʼandi̱ ndásaviíndi̱ Betel ña̱ ñuu Japón, saá kúú ña̱ ki̱xáʼana ndukúna ku̱a̱ʼáka Biblia nu̱úndi̱ saáchi saá kúú ña̱ ki̱xáʼa na̱ ñuu Ndióxi̱ sándaya̱ʼana Biblia nu̱ú ku̱a̱ʼáka tu̱ʼun”. Ku̱a̱ʼání na̱ káchíñu ti̱xin Betel ta saátu na̱ ni̱xi̱kó máquina yóʼo inkáchi ki̱xáʼana káchíñuna ña̱ va̱ʼa chitáʼanna máquina yóʼo tasaá kǒo nísandákoona tavána Biblia. Ni i̱xayo̱ʼvi̱níña xíʼinna, soo yo̱o̱ marzo nda̱a̱ yo̱o̱ agosto ña̱ ku̱i̱ya̱ 2023 ta̱vána 220,000 Biblia yo̱o̱ tá yo̱o̱. Ti̱xin yo̱o̱ yóʼo kúú ña̱ ki̱xáʼana ndásaviína nu̱ú xi̱tavána tutu yóʼo, ta ku̱chiñuna ke̱ʼéna chiñu yóʼo xíʼin xu̱ʼún ña̱ ta̱xina ndaʼa̱na.

Inka ña̱ kúni̱na keʼéna ti̱xin Betel yóʼo kúú ña̱ loʼoka luz kuniñúʼuna. Xa̱ʼa̱ ña̱kán, kúni̱na chinúuna sa̱tá veʼe yóʼo ña̱ káʼa̱nna xíʼin panel solar. Ña̱yóʼo chindeétáʼan xíʼinna ña̱ loʼo xu̱ʼún chaʼvina xa̱ʼa̱ luz. Xíʼin ña̱yóʼo ki̱ʼva 120,000 dólar kǒo chaʼvikana ku̱i̱ya̱ tá ku̱i̱ya̱. Ta saátu taánna ventana ña̱ kúkunní á ña̱ ndeéní ti̱xin iin tá iin veʼe, ña̱yóʼo chindeétáʼan xíʼinna ña̱ va̱ʼa kǒo kuniñúʼuna ku̱a̱ʼáníka luz. Xíʼin ña̱yóʼo ki̱ʼva 10,000 dólar kǒo chaʼvikana ku̱i̱ya̱ tá ku̱i̱ya̱. Yaʼvi kana ndiʼi ña̱ keʼéna yóʼo, soo naʼání kooña. Ta yáʼaka 3 millón ña̱ dólar kǒo chaʼvikana luz, ta kivi kuniñúʼuna xu̱ʼún yóʼo ña̱ keʼéna inkaka chiñu.

“Íyo ku̱a̱ʼáníka ña̱ kúma̱ní keʼéyó”

Ña̱ kéʼéna chí Betel ña̱ Angola xíʼin Japón kúú u̱vi̱ kuití ña̱ ni̱ka̱ʼa̱nyó xa̱ʼa̱. Soo íyo ku̱a̱ʼáka ña̱ xíniñúʼu keʼéyó ti̱xin Betel ña̱ íyo iníísaá ñuyǐví, ña̱ va̱ʼa chindeétáʼanka na̱ ñuu Ndióxi̱ xíʼin na̱ hermano. Ta̱ Aaron, ta̱ káchíñu ti̱xin Departamento ña̱ Diseño xíʼin Construcción káchira: “Ku̱a̱ʼání chiñu kéʼéna, soo íyo ku̱a̱ʼákavaña”. Ta̱yóʼo káʼa̱nra ndáaña chíndeétáʼan xíʼinyó ña̱ va̱ʼa saxínuyó chiñu yóʼo: “Xu̱ʼún ña̱ táxi na̱ hermano kúú ña̱ xíniñúʼundi̱ ña̱ va̱ʼa keʼéndi̱ ndiʼi chiñu yóʼo, soo saátu táxindi̱ tíxa̱ʼvi ndaʼa̱ ndiʼi na̱ kíxi káchíñu yóʼo ta saátu na̱ chíkaa̱ ndee̱ ña̱ kixáʼana keʼéna chiñu yóʼo chí nu̱únínu. Xíʼin ndiʼi xu̱ʼún ña̱ táxi na̱ hermano ta saátu na̱ kíxi káchíñu yóʼo náʼa̱ña ña̱ mií Jehová kúú ta̱ níʼi yichi̱ nu̱ú na̱ ñuura ta táxira bendiciónra ndaʼa̱yó” (Salmo 110:3).

Ndiʼi chiñu ña̱ kéʼé na̱ hermano ña̱ va̱ʼa ndasaviína Betel á ña̱ íxava̱ʼana inka veʼe ña̱ xíniñúʼuyó kéʼénaña xíʼin xu̱ʼún ña̱ táxi na̱ hermano. Ku̱a̱ʼánína táxina donación ti̱xin ña̱ donate.jw.org. Táxiníndi̱ tíxa̱ʼvi ndaʼa̱ndó xa̱ʼa̱ ña̱ va̱ʼaní-inindó.