¡Xa̱ íyo yatin Ñuʼú luvi!

Ña̱ kini ña̱ íyo nu̱ú Ñuʼú yóʼo náʼa̱ña nu̱úyó ña̱ xa̱ íyo yatin Ñuʼú luvi. Tíempo xinaʼá ni̱ka̱ʼa̱n Tu̱ʼun Ndióxi̱ chi tá xa̱ yatin kixa̱a̱ Ñuʼú luvi, ndiééní yo̱ʼvi̱ koo tíempo ña̱ kundooyó. Ta vitin ndooyó tíempo ña̱ ni̱ka̱ʼa̱n Tu̱ʼun Ndióxi̱. Ña̱yóʼo kúú sava ña̱ ni̱ka̱ʼa̱n Tu̱ʼun Ndióxi̱ kuniyó:

Kooní kua̱chi nu̱ú xáʼní-táʼana. “Ndakuita iin ñuu kaʼní-táʼaña xíʼin inka ñuu.” (Mateo 24:7.) Ta tu̱ʼun yóʼo xa̱ kua̱ʼa̱n ndáxi̱nuña. Kui̱ya̱ 1914 nani saá ki̱xa̱ání kua̱chi ña̱ xáʼní-táʼana, xiʼna ni̱xi̱yo iin ña, ta saá ni̱xi̱yo inkatuña, ta íyo ku̱a̱ʼáníka ñuu nu̱ú xáʼní-táʼana. Millón na̱ yiví xíʼi̱ nu̱ú xáʼní-táʼana.

Iníí ñuyǐví koo kue̱ʼe̱. “Kooní kue̱ʼe̱ xíkun [...] iníí saá ñuyǐví.” (Lucas 21:11.) ¿Á xa̱ kua̱ʼa̱n ndáxi̱nu ña̱yóʼo? Xa̱ kua̱ʼa̱n ndáxi̱nuvaña. Íyo ku̱a̱ʼání nu̱ú kue̱ʼe̱, tukúú kue̱ʼe̱ naní cáncer, kue̱ʼe̱ ña̱ kúʼvi̱ níma̱, kue̱ʼe̱ naní tuberculosis, kue̱ʼe̱ zúca, kue̱ʼe̱ sida ta íyo ku̱a̱ʼáníka nu̱ú kue̱ʼe̱, ta millón na̱ yiví xíʼi̱ xíʼin ña.

Kuma̱ní ña̱ kuxi na̱ yiví. Iníí saá ñuyǐví kǒó ña̱ kuxi na̱ yiví. Millón na̱ yiví xíʼi̱ xíʼin so̱ko túkúndiʼi kui̱ya̱. Ña̱yóʼo kúú inka ña̱ náʼa̱ nu̱úyó, ndí xa̱ íyo yatin Ñuʼú luvi. Tu̱ʼun Ndióxi̱ káʼa̱n ña: “kooní so̱ko” (Marcos 13:8).

Ta̱an ní nu̱ú Ñuʼú. “Kooní [...] ña̱ ta̱an iníí saá ñuyǐví.” (Mateo 24:7.) Saátu ña̱yóʼo ndáxi̱nuña tíempo vitin. Yâʼa iin millón na̱ yiví xíʼi̱ xa̱ʼá ña̱ táan, ki̱ví ki̱xa̱á kui̱ya̱ 1914.

Kooní na̱ yiví na̱ keʼé chiñu ña̱ va̱ása va̱ʼa. Na̱ yiví ‘kutóoníkana xu̱ʼúnʼ, ta ‘ku̱ʼvi̱níka-inina kunina miínaʼ. ‘Ku̱ni̱níkana kaka si̱ína nu̱ú ña̱ ku̱ʼvi̱-inina kunina Ndióxi̱.’ Na̱ íyo yivásiʼí “va̱ása kandixakana yivásiʼína” (2 Timoteo 3:1-5). ¿Ásu̱ú saá íyo na̱ yiví xíniún vitin? Va̱ása íxatǒʼona Ndióxi̱ ta íxaana ña̱ vǎʼá xíʼin na̱ sákuaʼa xa̱ʼá Ndióxi̱.

Va̱ása asatǒʼona ley. “Nduku̱a̱ʼá na̱ yiví, na̱ kǒé íxatǒʼo ley.” (Mateo 24:12.) Sava xa̱ kúnda̱a̱-iniún, chi kui̱ya̱ tá kui̱ya̱ ña̱ yâʼa, ndúkua̱ʼá na̱ yiví na̱ íxaa ña̱ vǎʼá á ña̱ ni̱kuu. Ndíá ka nu̱ú kua̱ʼa̱nyó, i̱yoní asakuíʼnána ña̱ʼayó, sandáʼvina miíyó á saxúʼvi̱na yóó.

Túkúndiʼi ña̱yóʼo náʼa̱ña nu̱úyó ndí, xa̱ íyo yatin ña̱ kaʼndiachíñu Ndióxi̱ nu̱ú Ñuʼú yóʼo. Tu̱ʼun Ndióxi̱ káʼa̱n ña: “Tá ná kunindó xa̱ yâʼa ndiʼi ña̱yóʼo, kunda̱a̱-inindó xa̱ íyo yatin ña̱ kaʼndiachíñu Ndióxi̱” (Lucas 21:31). Ndióxi̱ chi̱ndúʼura Se̱ʼera ña̱ kaʼndiachíñura, ta ra̱yóʼo íyora nu̱ú ndiví, ta ndasaluvira iníí saá nu̱ú Ñuʼú, ta sakutiaʼara túkúndiʼi na̱ chíñu ñuyǐví yóʼo (Daniel 2:44).