Ña̱ ku̱u xinaʼá káʼa̱ña xíʼinyó ndíá ña̱ va̱ása keʼéyó

Jehová va̱ása taxira sandiʼi na̱ yiví kini xa̱ʼá Ñuʼú luvi. Ndiʼi na̱ ítáʼan va̱ʼa xíʼinra kutiakuna nu̱ú Ñuʼú luvi. ¿Ndíá ña̱ kundoʼo na̱ yiví kini? Kuvi kunda̱a̱-iniyó ña̱yóʼo átu ná kotoyó ña̱ ndo̱ʼo ra̱ Noé. Noé ni̱xi̱yora xa̱ yâʼa ku̱a̱ʼání kui̱ya̱. Iin ta̱a va̱ʼa xi̱kuura, chi̱ka̱a̱ra ndieé i̱xaara ndiʼi ña̱ kûni̱ Ndióxi̱. Ndí túkúndiʼi na̱ xi̱ndoo ikán nina ña̱ kini ke̱ʼéna. Ña̱kán Jehová ni̱ka̱ʼa̱nra xíʼin ra̱ Noé ña̱ ndiééní sakuunra sa̱ví iníí saá nu̱ú Ñuʼú ta sandiʼirá xa̱ʼá na̱ yiví vǎʼá á na̱ ni̱kuu. Saátu ni̱ka̱ʼa̱nra xíʼin ra, ña̱ ná keʼéra iin barco káʼnu ña̱kán va̱ʼa ka̱kura xíʼin na̱ veʼera tá ná kuun sa̱ví (Génesis 6:9-18).

Noé xíʼin na̱ veʼera i̱xava̱ʼana iin barco káʼnu. Ra̱ Noé ni̱ka̱ʼa̱nra xíʼin na̱ yiví ña̱ kuun ndiééní sa̱ví, ndí ndi̱a̱ ni iin na níxiniso̱ʼo. Nda̱kundiééna ke̱ʼéna ña̱ vǎʼá. Tá ndi̱ʼi ke̱ʼé Noé barco káʼnu, sa̱kíʼvi̱ra kití ininú, ta saá ni̱ki̱ʼvira xíʼin na̱ veʼera. Tá ndi̱ʼi, Jehová sa̱kúu̱nra sa̱ví. Ndiééní ku̱unrá u̱vi̱ xiko ki̱ví ta u̱vi̱ xiko ñǔu, ta nda̱kutú ndiʼi nu̱ú Ñuʼú xíʼin ti̱kuíi (Génesis 7:7-12).

Na̱ yiví ke̱ʼé ña̱ kini ni̱xi̱ʼi̱ ndiʼina, ndí Noé xíʼin na̱ veʼera ni̱ka̱kuna. Jehová xi̱ndi̱a̱a̱ra na tá ku̱un ndiééní sa̱ví iníí saá nu̱ú Ñuʼú, ta ta̱xira ndaʼána iin Ñuʼú nu̱ú kǒóka na̱ vǎʼá (Génesis 7:22, 23). Tu̱ʼun Ndióxi̱ káʼa̱n ña, xa̱ va̱xi ki̱ví sandiʼi tuku Jehová xa̱ʼá na̱ yiví na̱ va̱ása xíka nda̱kú. Na̱ yiví va̱ʼa va̱ása ndiʼi-xa̱ʼána. Kutiakuna ndisaá tíempo nu̱ú Ñuʼú luvi (2 Pedro 2:5, 6, 9).

Ki̱ví vitin, ku̱a̱ʼá na̱ yiví kéʼé ña̱ vǎʼá á ña̱ ni̱kuu. Iin chítú ñuyǐví xíʼin kua̱chi. Jehová tíʼvíra na̱ Testigora, tuku ta tuku kua̱ʼa̱na káʼa̱na xíʼin na̱ yiví, ndí ku̱a̱ʼánína va̱ása xíniso̱ʼona tu̱ʼun Jehová. Va̱ása kúni̱na ndasamana ña̱ íxaana, ní kǔni̱na ka̱ʼa̱n Ndióxi̱ xíʼina ndíá ña̱ kúú ña̱ va̱ʼa ta ndíá ña̱ va̱ása va̱ʼa. ¿Ndíá ña̱ ndoʼo na̱ yiví yóʼo? ¿Á kixa̱a̱ iin ki̱ví ndasamana? Ku̱a̱ʼání na̱yóʼo ndi̱a̱ ni iin ki̱ví va̱ása xa̱a̱na ndasamana. Xa̱ kúyatin ki̱ví ndiʼi-xa̱ʼá na̱ yiví vǎʼá á na̱ ni̱kuu (Salmo 92:7).

Va̱ása ndiʼi-xa̱ʼá Ñuʼú yóʼo, nduuña iin Ñuʼú luvi. Na̱ yiví ítáʼan va̱ʼa xíʼin Ndióxi̱ kutiakuna nu̱ú Ñuʼú luvi ndisaá tíempo (Salmo 37:29).