Jehová chi̱ndeétáʼanra xíʼindi̱ ña̱ ni̱ka̱a̱nndi̱ nu̱ú chi̱ndaʼána ndi̱ʼi̱

Ta̱ Mats xíʼin ñá Ann-Catrin ni̱xa̱ʼa̱nna Escuela ña̱ Galaad tá ku̱i̱ya̱ 1979. Ku̱a̱ʼání ñuu chi̱ndaʼána miína tá kúú, ñuu Irán, ñuu Mauricio, ñuu Myanmar, ñuu Tanzania, ñuu Uganda xíʼin ñuu Zaire. Iin ta̱ sa̱náʼa̱ miína ti̱xin ña̱ Galaad xi̱kuu ta̱ Jack Redford, ta̱yóʼo va̱ʼaní chi̱ndeétáʼan xíʼinna tá ni̱xa̱ʼa̱nna xa̱a̱ síín síín ñuu. Ná ka̱ʼa̱nna xíʼinyó xa̱ʼa̱ ña̱ ndo̱ʼona.

¿Á kivi ka̱ʼa̱nndó xíʼinndi̱ ndáa ki̱ʼva ku̱ndaa̱-inindó xa̱ʼa̱ ña̱ nda̱a̱?

Ta̱ Mats: Yivái̱ ni̱xi̱yora chí Polonia tá ni̱xi̱yo Segunda Guerra Mundial ta ku̱a̱ʼání ña̱ vatá xi̱xitora ti̱xin veʼe-ñu̱ʼu. Soo ta̱yóʼo xi̱ka̱ʼa̱nra: “Íyova iin religión ña̱ nda̱a̱”. Tá ni̱ya̱ʼa tiempo ki̱ʼii̱n kuenta ña̱ ndixava kúú ña̱ ni̱ka̱ʼa̱nra. Xi̱kutóoníi̱ satái̱ libro ña̱ xa̱a̱ xi̱niñúʼuna, ta iin ki̱vi̱ sa̱tái̱ iin libro azul ña̱ naní La verdad que lleva a vida eterna. Título ña̱yóʼo nda̱kanda̱ní-inii̱ xíʼinña, ta iin ñuú kaʼvii̱ iníísaáña. Tá xi̱ta̱a̱n ku̱ndaa̱-inii̱ ña̱ nda̱ni̱ʼíi̱ ña̱ nda̱a̱.

Tá yo̱o̱ abril ña̱ ku̱i̱ya̱ 1972 ku̱a̱ʼání tutu ña̱ tává na̱ testigo Jehová ka̱ʼvii̱ ta nda̱ni̱ʼíi̱ ña̱ xi̱kuni̱i̱ kunda̱a̱-inii̱ xa̱ʼa̱ ña̱ va̱xi nu̱ú Biblia. Ndo̱ʼi̱ nda̱a̱ táki̱ʼva ndo̱ʼo ta̱ íxi̱kó ña̱ʼa ta̱ ni̱ka̱ʼa̱n ta̱ Jesús xa̱ʼa̱, tá nda̱ni̱ʼíra iin “perla” ña̱ ndáyáʼviní, ni̱xi̱kóra ndiʼi ña̱ xi̱kumiíra ña̱ va̱ʼa satára ña̱yóʼo. Ña̱ va̱ʼa kuumiíi̱ “perla” ña̱ ndáyáʼviní, va̱ása níkaʼvikai̱ ña̱ universidad ña̱ va̱ʼa xa̱i̱ koi̱ doctor (Mat. 13:​45, 46). Nda̱kuchii̱ tá 10 tí diciembre ku̱i̱ya̱ 1972.

Tá ni̱ya̱ʼa iin ku̱i̱ya̱, na̱ yivái̱ xíʼin ñanii̱ ta̱ loʼoka ka̱ndíxana ña̱ nda̱a̱ ta nda̱kuchina. Tá julio ku̱i̱ya̱ 1973 ni̱xa̱i̱ ku̱i̱ precursor regular. Ti̱xin congregación nu̱ú xi̱ndikai̱, ni̱xi̱yo iin ñá precursora ñá liviní ta va̱ʼaní xi̱keʼéñá chiñu nu̱ú Ndióxi̱ ñá naní Ann-Catrin. Ku̱tóo táʼanndi̱ ta tá ku̱i̱ya̱ 1975 ti̱ndaʼándi̱. Ku̱mí ku̱i̱ya̱ na̱túʼunndi̱ xíʼin na̱ yiví chí Strömsund, iin ñuu loʼo ña̱ liviní ña̱ ndíkaa̱ chí Suecia ta ku̱a̱ʼání na̱ yiví xi̱kuni̱na kunda̱a̱-inina xa̱ʼa̱ Biblia ñuu yóʼo.

Ñá Ann-Catrin: Tá xi̱kunu̱mí sandíʼi yivái̱ ña̱ kaʼvira universidad chí Estocolmo, ku̱ndaa̱-inira xa̱ʼa̱ ña̱ nda̱a̱. Tá xi̱kuumiíi̱ u̱ni̱ yo̱o̱ xi̱niʼira miíi̱ xi̱xa̱ʼa̱nra reunión xíʼin predicación. Siʼíi̱ va̱ása níxi̱kutóoñá ña̱yóʼo, xa̱ʼa̱ ña̱kán xi̱kuni̱ñá na̱ʼa̱ñá nu̱úndi̱ ña̱ su̱ví ña̱ nda̱a̱ kúú ña̱ sanáʼa̱ na̱ testigo Jehová. Soo va̱ása níkuchiñuñá, ta tá ni̱ya̱ʼa tiempo nda̱kuchiñá. Tá xi̱kuumiíi̱ 13 ku̱i̱ya̱ nda̱kuchii̱, ta tá xi̱kuumiíi̱ 16 ndu̱i̱ precursora. Tándi̱ʼi ka̱chíñui̱ nu̱ú Jehová chí ñuu Umeå, nu̱ú xi̱xiniñúʼukana na̱ natúʼun xa̱ʼa̱ tu̱ʼun Ndióxi̱ ta ni̱ka̱ʼa̱nna xíʼi̱n ña̱ koi̱ precursora especial.

Tándi̱ʼi ti̱ndaʼíi̱ xíʼin ta̱ Mats, ka̱ʼvindi̱ xíʼin ku̱a̱ʼání na̱ yiví. Iin ñá xi̱kaʼvindi̱ xíʼin xi̱kuu ñá Maivor, iin ñá loʼo ñá xi̱kutóoní keʼé deporte ta sa̱ndákooñá ña̱yóʼo, ta inkáchi ni̱xa̱a̱ñá ku̱uñá precursora xíʼin ku̱ʼvi̱i̱ ñá loʼoka. U̱vi̱ saána ni̱xa̱ʼa̱nná ña̱ Galaad tá ku̱i̱ya̱ 1984 ta vitin kúúná misionera chí Ecuador.

Ndóʼó xi̱kuundó misionero ta xa̱a̱ síín síín ñuu ni̱xa̱ʼa̱nndó. ¿Ndáaña chi̱ndeétáʼan xíʼinndó ña̱ va̱ʼa ni̱ka̱a̱nndó ta si̱í ni̱xi̱yondó nu̱ú ni̱xa̱ʼa̱nndó?

Ta̱ Mats: Ku̱a̱ʼání yichi̱ xa̱a̱ síín síín ñuu chi̱ndaʼána ndi̱ʼi̱. Iin ña̱ chi̱ndeétáʼan xíʼinndi̱ ña̱ va̱ʼa ka̱a̱nndi̱ xi̱kuu ña̱ xi̱ndiku̱nndi̱ yichi̱ ta̱ Jesús ña̱ vitá koo inindi̱ (Col. 2:​6, 7). Nu̱úka ña̱ ka̱a̱n na̱ hermano miíndi̱ ñuu nu̱ú xi̱xa̱andi̱, xi̱chikaandi̱ ndee̱ ña̱ kunda̱a̱-inindi̱ nda̱chun síín xi̱keʼéna sava ña̱ʼa. Xi̱kunindi̱ kunda̱a̱-inindi̱ xa̱ʼa̱ cultura ña̱ xi̱kuumiína xíʼin ki̱ʼva ña̱ xi̱ndakanixi̱nína. Tá xi̱chikaa̱kandi̱ ndee̱ ña̱ keʼéndi̱ nda̱a̱ táki̱ʼva xi̱keʼé ta̱ Jesús, ni̱xi̱yondi̱ “nda̱a̱ táki̱ʼva íyo iin yitu̱n tú chi̱ʼina nu̱ú yáʼa yatin ti̱kui̱í”, ta saá va̱ʼa ni̱ka̱a̱nndi̱ ndiʼi ñuu nu̱ú xi̱chindaʼána miíndi̱ (Sal. 1:​2, 3).

Ñá Ann-Catrin: Ña̱ va̱ʼa kuaʼnu iin yitu̱n tú ndáchiʼi tukuna, xíniñúʼunú ñu̱ʼu á ña̱ ka̱ndii. Ki̱ʼva saá ni̱xi̱yo Jehová xíʼinndi̱ (Sal. 84:11). Ña̱ xi̱kuʼvi̱-ini na̱ hermano xi̱xinina miíndi̱ kúú iin bendición ña̱ ndáyáʼviní ta̱xira ndaʼa̱ndi̱. Tá kúú, na̱ hermano na̱ xi̱ñuʼu ti̱xin congregación ñuu Teherán (Irán) va̱ʼaní ni̱xi̱yo inina, chi ke̱ʼéna nda̱a̱ táki̱ʼva ke̱ʼé na̱ yiví na̱ káʼa̱n Biblia xa̱ʼa̱. Xi̱kuni̱kandi̱ kindo̱ondi̱ chí ñuu Irán, soo tá julio ku̱i̱ya̱ 1980 na̱ chíñu ñuu kán va̱ása nítaxikana ña̱ natúʼunyó xa̱ʼa̱ Ndióxi̱ ta ta̱xina 48 hora ndaʼa̱ndi̱ ña̱ keendi̱ ñuu kán. Chi̱ndaʼána ndi̱ʼi̱ país ña̱ África iin ñuu ña̱ xi̱naní Zaire ta vitin naníña República Democrática del Congo.

Tá ku̱ndaa̱-inii̱ ña̱ chi̱ndaʼána miíndi̱ ña̱ ku̱ʼu̱nndi̱ chí África, ki̱xáʼíi̱ xákui̱. Xi̱yiʼvíníi̱ saáchi xi̱ka̱ʼa̱nna ña̱ íyoní tí ko̱o̱ ta saátu íyoní kue̱ʼe̱. Soo, u̱vi̱ na̱ migondi̱ na̱ ku̱a̱ʼání tiempo ka̱chíñu ñuu kán ni̱ka̱ʼa̱nna ña̱yóʼo xíʼinndi̱: “Tá nda̱a̱ ni iin yichi̱ ta̱ʼán ku̱ʼu̱nndó ñuu kán, kúáʼanndó ta kotondó chi kutóonívandó ñuu África”. Ta ndixava kúú ña̱ ni̱ka̱ʼa̱nna. Na̱ hermano ñuu África si̱íní-inina. Soo tá ni̱ya̱ʼa i̱ñu̱ ku̱i̱ya̱ va̱ása nítaxikana ña̱ natúʼunndi̱ xa̱ʼa̱ Ndióxi̱ ñuu kán ta xi̱niñúʼu keendi̱, soo ni̱ka̱ʼi̱n xíʼin Jehová ñá ná kindo̱o loʼokandi̱ ñuu África.

¿Á kivi ka̱ʼa̱nndó xíʼinndi̱ xa̱ʼa̱ sava experiencia ña̱ sa̱kúsi̱í-inindó ndiʼi ku̱i̱ya̱ yóʼo?

Ta̱ Mats: Iin ña̱ ndákaʼíi̱n xa̱ʼa̱ kúú ña̱ va̱ʼaní xi̱kitáʼanndi̱ xíʼin sava na̱ misionero na̱ ke̱e inka ñuu. Sava ñuu ki̱ʼva 20 na̱ yiví xi̱kaʼvi iin tá iinndi̱ xíʼin ta ña̱yóʼo sa̱kúsi̱íníña-inindi̱. Saátu ndákaʼíi̱n ña̱ va̱ʼaní ni̱xi̱yo ini na̱ hermano na̱ ñuu África ta saátu xi̱kuʼvi̱-inina xi̱xina miíndi̱. Tá xi̱xa̱ʼa̱nndi̱ xi̱xitondi̱ congregación ña̱ íyo chí Tanzania, yatin si̱ín veʼe na̱ hermano xi̱kanindichindi̱ Kombi tú xi̱xika xíʼinndi̱ ta kán xi̱kisi̱ndi̱ ta na̱ hermano kán va̱ʼaní ni̱xi̱yo inina ta nda̱a̱ ku̱a̱ʼání ña̱ʼa xi̱taxina ndaʼa̱ndi̱ (2 Cor. 8:3). Iin ña̱ xi̱kutóoníndi̱ kúú ña̱ xi̱natúʼunndi̱ xa̱ʼa̱ ña̱ xi̱ndoʼondi̱. Ndiʼi ki̱vi̱, tá kúma̱níka ku̱ʼu̱nndi̱ ku̱su̱nndi̱ ñá Ann-Catrin xíʼin yi̱ʼi̱ xi̱natúʼunndi̱ xa̱ʼa̱ ña̱ xi̱ndoʼondi̱ ki̱vi̱ tá ki̱vi̱ ta xi̱taxindi̱ tíxa̱ʼvi ndaʼa̱ Jehová xa̱ʼa̱ ña̱ xi̱chindeétáʼanra xíʼindi̱.

Ñá Ann-Catrin: Ku̱tóoníi̱ ña̱ xi̱nitáʼi̱n xíʼin xa̱a̱ síín síín na̱ hermano. Sa̱kúaʼandi̱ nu̱ú ku̱a̱ʼá tu̱ʼun, tá kúú tu̱ʼun francés, tu̱ʼun luganda, tu̱ʼun persa xíʼin tu̱ʼun suajili, ta saátu xa̱a̱ síín síín cultura sa̱kúaʼandi̱. Chi̱ndeétáʼanndi̱ xíʼin ku̱a̱ʼání na̱ hermano, ku̱a̱ʼání na̱ migondi̱ ni̱xi̱yo ta inkáchi ka̱chíñundi̱ nu̱ú Jehová xíʼin na̱yóʼo (Sof. 3:9).

Saátu ki̱ʼinndi̱ kuenta ña̱ ku̱a̱ʼání ña̱ʼa ña̱ liviní i̱xava̱ʼa Jehová. Tá xi̱chindaʼána miíndi̱ inka ñuu mií Jehová xi̱niʼi yichi̱ nu̱úndi̱. Ta̱yóʼo kúú ta̱ sa̱náʼa̱ ndiʼi ña̱yóʼo miíndi̱ saáchi miíndi̱ va̱ása kuchiñuvíndi̱ keʼéndi̱ ndiʼi ña̱yóʼo.

¿Ndáa tu̱ndóʼo ña̱ yo̱ʼvi̱ní ni̱ya̱ʼandó nu̱ú ta ndáa ki̱ʼva ni̱ya̱ʼandó nu̱ú ña̱yóʼo?

Ta̱ Mats: Ndiʼi ku̱i̱ya̱ yóʼo ni̱ya̱ʼandi̱ nu̱ú ku̱a̱ʼá kue̱ʼe̱ tá kúú ña̱ malaria (á paludismo). Ta ku̱a̱ʼá yichi̱ nda̱tána ñá Ann-Catrin. Ta xa̱ʼa̱ ña̱ xa̱a̱ ku̱chée na̱ yivándi̱ ña̱yóʼo xi̱sandíʼi̱ña-inindi̱. Táxiníndi̱ tíxa̱ʼvi ndaʼa̱ na̱ veʼendi̱ saáchi na̱yóʼo va̱ʼaní ki̱ʼinna kuenta xíʼinna ta va̱ʼaní xi̱ndaanana (1 Tim. 5:4). Sava yichi̱ va̱ása va̱ʼa níxi̱kunindi̱ saáchi kǒo níxi̱kivi kiʼinndi̱ kuenta xíʼin na̱ yivándi̱ xa̱ʼa̱ ña̱ xíka xi̱ndoondi̱.

Ñá Ann-Catrin: Tá ku̱i̱ya̱ 1983, tá ñuʼúkandi̱ chí ñuu Zaire, ki̱ʼin kue̱ʼe̱ cólera miíi̱. Ta̱ doctor ni̱ka̱ʼa̱nra xíʼin ta̱ Mats: “Ndi̱ku̱n tavándóñá ñuu yóʼo”. Ta inka ki̱vi̱ nda̱kiʼinndi̱ ku̱a̱ʼa̱nndi̱ chí Suecia xíʼin iin tú avión tú xi̱xikó ña̱ʼa.

Ta̱ Mats: Ta̱ doctor ni̱ka̱ʼa̱nra ña̱ va̱ása ndaʼaví ñá Ann-Catrin, soo nda̱ʼavañá. Xa̱kuníndi̱ saáchi nda̱kanixi̱níndi̱ ña̱ va̱ása kookandi̱ misionero. Tá ni̱ya̱ʼa iin ku̱i̱ya̱ ndi̱kóndi̱ ñuu Zaire ta ki̱xáʼandi̱ káchíñundi̱ ti̱xin congregación nu̱ú káʼa̱nna tu̱ʼun suajili chí Lubumbashi.

Ñá Ann-Catrin: Nani tá ni̱xi̱yondi̱ chí Lubumbashi, ni̱ke̱e se̱ʼi̱ soo nu̱uvaña. Kǒo níndakanixi̱níndi̱ ña̱ koo se̱ʼendi̱, soo tá nu̱u ña̱yóʼo nda̱kavaní-inii̱. Tiempo saá, Jehová ta̱xira iin regalo ndaʼa̱ndi̱ ña̱ nda̱kanda̱ní-inindi̱ xíʼin. Ki̱xáʼandi̱ káʼvindi̱ xíʼin ku̱a̱ʼání na̱ yiví. Tá ya̱chi̱ 35 xi̱kuu na̱ publicador ti̱xin congregación ta ni kǒo níyáʼa iin ku̱i̱ya̱ 70 ni̱xa̱a̱na ndu̱una, 40 na̱ yiví xi̱xa̱ʼa̱n reunión soo tándi̱ʼi 220 ni̱xa̱a̱na ndu̱una. Ku̱a̱ʼání tiempo xi̱natúʼunndi̱ xíʼin na̱ yiví ta ku̱a̱ʼání bendición ta̱xi Jehová ndaʼa̱ndi̱ ta ña̱yóʼo sa̱ndíkoníña-inii̱. Soo ndákaʼánkavandi̱ xa̱ʼa̱ se̱ʼe loʼondi̱ ta káʼa̱nkavandi̱ xa̱ʼa̱ ña̱yóʼo. Xa̱a̱ kúni̱níndi̱ kotondi̱ ndáaña keʼé Jehová ña̱ va̱ʼa sandíʼi-xa̱ʼa̱ra ña̱ saxóʼvi̱-inindi̱.

Ta̱ Mats: Tá ni̱ya̱ʼa tiempo, ñá Ann-Catrin kǒoka ndee̱ níxi̱kuumiíñá. Ta míí tiempo kán nda̱ni̱ʼína kue̱ʼe̱ cáncer miíi̱ ta ni̱ka̱ʼa̱nna ña̱ xa̱a̱ ndeéní ki̱ʼinña miíi̱ ta xa̱ʼa̱ ña̱yóʼo ke̱ʼéna operación xíʼi̱n. Soo tiempo vitin íyo va̱ʼavai̱, ta̱ ñá Ann-Catrin kéʼéñá ña̱ kivi keʼévañá.

Kúnda̱a̱-inindi̱ ña̱ su̱ví iin miíndi̱ yáʼa nu̱ú tu̱ndóʼo ña̱ yo̱ʼvi̱ní yóʼo. Tá ku̱i̱ya̱ 1994 xa̱ʼnína ku̱a̱ʼání na̱ yiví chí ñuu Ruanda, tá ni̱ya̱ʼa loʼo ni̱xa̱ʼa̱nndi̱ xi̱tondi̱ ku̱a̱ʼání na̱ hermano lugar nu̱ú xi̱ndakiʼinna na̱ ke̱e inka ñuu. Ki̱ʼinndi̱ kuenta ña̱ ndakúní ni̱xi̱yo inina, va̱ʼaní xi̱kandíxana Ndióxi̱ ta va̱ʼaní ni̱xi̱yo inina, ta ku̱ndaa̱-inindi̱ ña̱ ku̱a̱ʼání ndee̱ kúúmií Jehová ña̱ chindeétáʼanra xíʼin na̱ ndásakáʼnu miíra ni nda̱a̱ ndáaka ña̱ ná ndoʼona (Sal. 55:22).

Ñá Ann-Catrin: Tá ku̱i̱ya̱ 2007 ni̱ya̱ʼandi̱ nu̱ú iin tu̱ndóʼo ña̱ yo̱ʼvi̱ní, tá ni̱xa̱ʼa̱nndi̱ ña̱ dedicación ña̱ Betel chí Uganda. Tá ndi̱ʼi programa, nda̱kiʼinndi̱ ku̱a̱ʼa̱nndi̱ chí Nairobi (Kenia) ta ku̱a̱ʼa̱n 25 na̱ misionero xíʼin na̱ betelita xíʼindi̱. Si̱lóʼo kúma̱ní ña̱ xa̱a̱ndi̱ frontera ña̱ Kenia, iin carro ka̱nitáʼannú xíʼin carro tú ku̱a̱ʼa̱nndi̱. Ta̱ káva tú carro yóʼo xíʼin inka u̱ʼu̱n na̱ hermano ndi̱ku̱n ni̱xi̱ʼi̱na, ta iin ñá hermana ni̱xi̱ʼi̱ñá hospital. Xa̱a̱ kúni̱níndi̱ kunindi̱ na̱ migondi̱ (Job 14:​13-15).

Tá ni̱ya̱ʼa tiempo nu̱ú tu̱kueʼi̱ nda̱ʼavaña. Soo ta̱ Mats xíʼin yi̱ʼi̱ ta saátu xíʼin inkaka na̱ ni̱xa̱ʼa̱n xíʼindi̱, nda̱a̱ ki̱ʼin kue̱ʼe̱ ña̱ ansiedad miíndi̱. Tá ñuú xi̱ndako̱o máʼnai̱ ta xi̱yiʼvíníi̱ xa̱ʼa̱ ña̱ ndo̱ʼondi̱, ta va̱ása níxi̱kivi ndakiʼin ta̱chíi̱. Iin ña̱ chi̱ndeétáʼan xíʼindi̱ ña̱ ni̱ya̱ʼandi̱ nu̱ú ña̱yóʼo kúú ña̱ xi̱ka̱ʼa̱nníndi̱ xíʼin Jehová xi̱kaʼvindi̱ texto ña̱ xi̱kutóoníndi̱ ta xi̱ndakanixi̱níndi̱ xa̱ʼa̱ña. Ta saátu xi̱xa̱ʼa̱nndi̱ nu̱ú na̱ doctor ña̱ xi̱chindeétáʼanna xíʼinndi̱. Vitin xa̱a̱ va̱ʼava kúnindi̱ ta káʼa̱nndi̱ xíʼin Jehová ña̱ ná chindeétáʼanra xíʼinndi̱ ña̱ va̱ʼa sandíkondi̱-ini na̱ yiví na̱ yáʼa nu̱ú táʼan ña̱yóʼo.

Xa̱ʼa̱ ña̱ ni̱ka̱ʼa̱nndó ndáa ki̱ʼva ni̱ya̱ʼandó nu̱ú tu̱ndóʼo, ni̱ka̱ʼa̱nndó ña̱ mií Jehová xi̱niʼira miíndó ni̱xa̱ʼa̱nndó nda̱a̱ tá ki̱ʼva íyo iin “ndi̱vi̱ yíʼí”. ¿Á kivi ka̱ʼa̱nndó ndáaña kúni̱ kachi ña̱yóʼo?

Ta̱ Mats: “Xi̱niʼira miíndi̱ nda̱a̱ tá ki̱ʼva kéʼéna xíʼin iin ndi̱vi̱ yíʼí”. Na̱ yiví kíʼinnína kuenta xíʼin ña̱yóʼo ña̱ va̱ʼa kǒo ta̱ʼvíña, ki̱ʼva saá xi̱ndaa Jehová miíndi̱ ndiʼi lugar nu̱ú ni̱xa̱ʼa̱nndi̱. Ndiʼi tiempo ni̱xi̱yo ña̱ xi̱xiniñúʼundi̱ ta sava yichi̱ ku̱a̱ʼákaña xi̱kuumiíndi̱. Iin ki̱ʼva ña̱ xi̱kuni̱ní Jehová xi̱xinira miíndi̱ kúú ña̱ viíní xi̱keʼé na̱ Cuerpo Gobernante xíʼinndi̱ ta xi̱naʼa̱na ña̱ xi̱kuʼvi̱-inina xi̱xina miíndi̱.

Ñá Ann-Catrin: Ña̱ ni̱ka̱ʼa̱n ta̱ Mats xa̱ʼa̱ ña̱ viíní xi̱ndaa Jehová miíndi̱ ña̱yóʼo sa̱ndákaʼánña yi̱ʼi̱ xa̱ʼa̱ iin ña̱ ku̱u. Iin ki̱vi̱ ka̱nana miíi̱ ña̱ ni̱ka̱ʼa̱nna xíʼi̱n ña̱ hospital ndíkaa̱ yivái̱. Sa̱kán loʼo tiempo ki̱ʼin kue̱ʼe̱ malaria ta̱ Mats ta kǒo xu̱ʼún níxikuumiíndi̱ ña̱ va̱ʼa ku̱ʼu̱nndi̱ chí Suecia. Ña̱kán xi̱kunindi̱ xi̱kóndi̱ carrondi̱, ta ndi̱ku̱n saá u̱vi̱ na̱ hermano ni̱ka̱ʼa̱nna xíʼinndi̱ xíʼin teléfono. Ña̱ nu̱ú, iin na̱ matrimonio ku̱ndaa̱-inina xa̱ʼa̱ ña̱ ndo̱ʼondi̱ ta xi̱kunina chaʼvina iin boleto avión ña̱ va̱ʼa ku̱ʼu̱nndi̱. Iinka na̱ ni̱ka̱ʼa̱n xíʼindi̱ xi̱kuu iin ñá hermana ñá xa̱a̱ chée, ñáyóʼo ta̱án va̱ʼañá xu̱ʼúnñá ini iin caja ta ka̱ʼyíña sa̱tá ña̱yóʼo ña̱ káchi, “na̱ xíniñúʼuña nu̱ú”. Ta̱xiñá ña̱yóʼo ndaʼa̱ndi̱ ta ki̱ʼii̱n kuenta ña̱ kamaní chi̱ndeétáʼan Jehová xíʼindi̱ (Heb. 13:6).

¿Ndáaña sa̱kúaʼandó ti̱xin 50 ku̱i̱ya̱ ña̱ xa̱a̱ káchíñundó nu̱ú Jehová?

Ñá Ann-Catrin: Nda̱a̱ tá ki̱ʼva káʼa̱n Isaías 30:​15, ña̱ va̱ʼa kuumiíyó ndee̱ xíniñúʼu kúee koo iniyó, ta na̱ʼa̱yó ña̱ kándíxayó Ndióxi̱. Tá ná keʼéyó saá na̱ʼa̱yó ña̱ táxiyó ña̱ mií Jehová ná chindeétáʼan xíʼinyó (2 Crón. 20:​15, 17). Xa̱ʼa̱ ña̱ va̱ʼaní xíniñúʼundi̱ tiempondi̱ xíʼin ndee̱ndi̱ ña̱ keʼéndi̱ chiñu ña̱ táxi Jehová ndaʼa̱ndi̱, xa̱a̱ ku̱a̱ʼání bendición táxira ndaʼa̱ndi̱ nu̱ú ña̱ ndakiʼinndi̱ tá ná keʼéndi̱ ña̱ kúni̱ miíndi̱.

Ta̱ Mats: Iin ña̱ ndáyáʼvi sa̱kúaʼi̱ kúú ña̱ kundaa-inii̱ Jehová ni nda̱a̱ ndáaka ña̱ ná ya̱ʼi̱ nu̱ú ta saá kiʼi̱n kuenta ndáa ki̱ʼva chindeétáʼanra xíʼi̱n (Sal. 37:5). Nda̱a̱ táki̱ʼva káʼa̱nra xíʼinyó, ndiʼi tiempo xa̱a̱ chíndeétáʼanra xíʼindi̱. Ta saátu kéʼéra nda̱a̱ tiempo vitin ña̱ íyondi̱ chí Betel ña̱ ndíkaa̱ Myanmar.

Na̱ va̱lí kúa̱an na̱ kúni̱ka kachíñu ku̱a̱ʼáka tiempo nu̱ú Jehová ná ndakiʼinna bendición nda̱a̱ táki̱ʼva kéʼéra xíʼinndi̱ ta saátu ná na̱ʼa̱ra ña̱ kúʼvi̱-inira xínirana. Kándíxandi̱ ña̱ kuchiñuvana keʼéna chiñu nu̱ú Jehová, ta miíra chindeétáʼan xíʼinna ña̱ ka̱a̱nna nda̱a̱ ndáaka nu̱ú ná chindaʼána miína.