¿Ndáaña keʼún ña̱ va̱ʼa na̱ʼún ña̱ táxiún tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼún?

1, 2. ¿Ndáaña kuni̱yó keʼéyó tá ndákanixi̱níyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, ta nda̱chun? (2 Corintios 5:14, 15; koto na̱ʼná).

NDAKANIXI̱NÍ ña̱ ta̱vána yóʼó ti̱xin iin veʼe ña̱ ndu̱va. ¿Á su̱ví ña̱ nda̱a̱ taxinívaún tíxa̱ʼvi ndaʼa̱ na̱ yiví na̱ ta̱vá yóʼó? Ni ku̱a̱ʼáva na̱ yiví ta̱vána, soo miíún ndiʼiva tiempo taxiún tíxa̱ʼvi ndaʼa̱na xa̱ʼa̱ ña̱ ke̱ʼéna xa̱ʼún, ta ni kǒo nandóso-iniún xa̱ʼa̱ ña̱yóʼo.

² Nda̱a̱ táki̱ʼva ku̱ndaa̱-iniyó nu̱ú artículo ña̱ ni̱ya̱ʼa, xíniñúʼuyó ña̱ tavá iinna miíyó ndaʼa̱ ku̱a̱chi. Ña̱kán kúú ña̱ ke̱ʼé Jehová ña̱ ta̱xira se̱ʼera ña̱ ni̱xi̱ʼi̱ra xa̱ʼa̱yó. Xa̱ʼa̱ ña̱ ni̱xi̱ʼi̱ ta̱ Jesús 1) kivi koo káʼnu-ini Jehová xa̱ʼa̱ ku̱a̱chiyó, 2) chí nu̱únínu kǒoka ku̱a̱chi kuumiíyó 3) ta kivi ndakutáʼan viíyó xíʼin Ndióxi̱. Xa̱ʼa̱ ña̱yóʼo kivi kutakuyó ndiʼi tiempo nu̱ú ñuyǐví xa̱á ña̱ taxi Jehová ndaʼa̱yó. Ña̱ ni̱xi̱ʼi̱ ta̱ Jesús xa̱ʼa̱yó ni̱na̱ʼa̱ra ña̱ kúʼvi̱ní-inira xínira miíyó, soo ni tá kúma̱níka kixira nu̱ú ñuʼú yóʼo xa̱a̱ kúʼvi̱va-inira xínira miíyó (Prov. 8:30, 31). Ta̱ apóstol Pablo ni̱ka̱ʼa̱nra xa̱ʼa̱ ña̱yóʼo tá ka̱chira: “Xa̱ʼa̱ ña̱ ni̱kuʼvi̱ní-ini ta̱ Cristo xi̱nira miíndi̱ kúú ña̱ kándíxandi̱ra” (kaʼvi 2 Corintios 5:14, 15). ¿Ndáaña xi̱kuni̱ kachira? Ña̱ ndakanixi̱níyó ña̱ kúʼvi̱ní-ini ta̱ Jesús xínira miíyó chindeétáʼanña xíʼinyó ña̱ taxiyó tíxa̱ʼvi ndaʼa̱ra xa̱ʼa̱ ña̱ ni̱xi̱ʼi̱ra xa̱ʼa̱yó ta kǒo nandóso-iniyó xa̱ʼa̱ña.

3. ¿Nda̱chun va̱ása inkáchi kéʼéyó ña̱ táxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó?

³ ¿Ndáa ki̱ʼva na̱ʼa̱ miíún ña̱ táxiún tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼún? Sana síínva koo ña̱ ka̱ʼún nu̱ú ña̱ ka̱ʼa̱n inkana. Ndakanixi̱ní xa̱ʼa̱ ejemplo yóʼo. U̱ni̱ na̱ yiví xa̱a̱ síín síín ñuu íyona ta inkáchi ñuu kúni̱na ku̱ʼu̱nna, soo xa̱a̱ síín síín ki̱ʼva ku̱ʼu̱nna. Ki̱ʼva saá íyo ña̱ kéʼéyó chi xa̱a̱ síín síín ki̱ʼva náʼa̱yó ña̱ táxiyó tíxa̱ʼvi ndaʼa̱ ta̱ Jesús xa̱ʼa̱ ña̱ ni̱xi̱ʼi̱ra xa̱ʼa̱yó ta saátu ña̱ vií kítáʼanyó xíʼin Jehová. Ña̱kán artículo yóʼo ka̱ʼa̱nña xa̱ʼa̱ u̱ni̱ grupo na̱ yiví: 1) na̱ káʼviyó Biblia xíʼin, 2) na̱ xa̱a̱ nda̱kuchi 3) xíʼin na̱ ku̱xíká nu̱ú Jehová.

NA̱ KÁʼVIYÓ BIBLIA XÍʼIN

4. ¿Ndáa ki̱ʼva xíto Jehová ña̱ ndíkaa̱ níma̱ na̱ sákuaʼa xa̱ʼa̱ra?

⁴ ¿Á xa̱a̱ sánáʼa̱na yóʼó xa̱ʼa̱ Biblia? Ña̱yóʼo náʼa̱ña ña̱ kúni̱ Jehová ña̱ ná xa̱ún koún migora ta chíndeétáʼanra xíʼún ña̱ kuyatiún nu̱úra (Juan 6:44; Hech. 13:48). Biblia káʼa̱nña Ndióxi̱ xítora ña̱ ndíkaa̱ níma̱yó. Ña̱yóʼo kúni̱ kachiña ña̱ kíʼinvara kuenta xa̱ʼa̱ ña̱ chíka̱ún ndee̱ ña̱ sákuaʼún xa̱ʼa̱ra ta saátu kúsi̱í-inira ña̱ násamaún ña̱ va̱ása va̱ʼa kéʼún ña̱ va̱ʼa keʼún ña̱ kútóora (Prov. 17:3; 27:11). Xa̱ʼa̱ ña̱ ni̱xi̱ʼi̱ ta̱ Jesús kivi xa̱ún koún migo Jehová (Rom. 5:10, 11). ¿Á su̱ví ña̱ nda̱a̱ kǒo nandóso-iniún xa̱ʼa̱ ña̱yóʼo?

5. Na̱ sa̱kán kíxáʼa káʼvi Biblia, ¿ndáa ki̱ʼva kundiku̱nna consejo ña̱ va̱xi nu̱ú Filipenses 3:16?

⁵ ¿Ndáa ki̱ʼva na̱ʼún ña̱ táxiún tíxa̱ʼvi ndaʼa̱ ta̱ Jesús xa̱ʼa̱ ña̱ ni̱xi̱ʼi̱ra xa̱ʼún? Iin ki̱ʼva ña̱ keʼún ña̱yóʼo kúú ña̱ kundiku̱ún consejo ña̱ ta̱xi ta̱ apóstol Pablo ndaʼa̱ na̱ ñuu Filipos: “Ni nda̱a̱ ndáaka ki̱ʼva kúú ña̱ xu̱xa-iniyó xíʼin tu̱ʼun Ndióxi̱, ná ndakundeéyó viíní kakayó ti̱xin yichi̱ yóʼo” (Filip. 3:16). Ña̱yóʼo kúni̱ kachiña ña̱ ndakundeún sakúaʼún xa̱ʼa̱ Ndióxi̱ nda̱a̱ táki̱ʼva xa̱a̱ kéʼún, kǒo taxiún ña̱ kasi nda̱a̱ ni iin ña̱ʼa nu̱ún ña̱ va̱ʼa keʼún ña̱yóʼo (Mat. 7:14; Luc. 9:62).

6. ¿Ndáaña kivi keʼé na̱ sa̱kán káʼvi Biblia tá íxayo̱ʼvi̱ña xíʼinna ña̱ nasamana ña̱ va̱ása va̱ʼa kéʼéna? (Deuteronomio 30:11-14; koto na̱ʼná).

⁶ ¿Á íxayo̱ʼvi̱ña xíʼún keʼún iin ña̱ sa̱kán sa̱kúaʼún nu̱ú Biblia? Nandukú va̱ʼa xa̱ʼa̱ña ta ka̱ʼa̱n xíʼin Jehová ña̱ ná chindeétáʼanra xíʼún ña̱ kunda̱a̱ va̱ʼa iniún xíʼin ña̱yóʼo (Sal. 86:11). Soo tá íxayo̱ʼvi̱kaña xíʼún kunda̱a̱-iniún xíʼin ña̱yóʼo, kǒo kundi̱ʼi̱-iniún soo kǒo sandákoún ña̱ sakúaʼún xa̱ʼa̱ ña̱ va̱xi nu̱ú Biblia. ¿Á íxayo̱ʼvi̱ña xíʼún sandákoún keʼún iin ña̱ va̱ása va̱ʼa ña̱ káʼa̱n Biblia xa̱ʼa̱? Ndakaʼán chi Jehová kúnda̱a̱va-inira ña̱ kúúyó na̱ yiví ku̱a̱chi ta̱ kǒo káʼa̱nra xíʼinyó keʼéyó ña̱ kǒo kúchiñuyó keʼéyó. Kiviva keʼún ña̱ káʼa̱nra xíʼún (kaʼvi Deuteronomio 30:11-14). Mií Jehová káʼa̱nra ña̱ chindeétáʼanvara xíʼún (Is. 41:10, 13; 1 Cor. 10:13). Kǒo ndakava-iniún. Nu̱úka ña̱ ndakanixi̱níún xa̱ʼa̱ ña̱ íxayo̱ʼvi̱ xíʼún keʼún, va̱ʼaka ndakanixi̱ní xa̱ʼa̱ ña̱ va̱ʼa ña̱ xa̱a̱ kéʼé Jehová xa̱ʼún, tá kúú ña̱ ta̱xira se̱ʼera ni̱xi̱ʼi̱ra xa̱ʼún. Tá kíxáʼún kúʼvi̱ka-iniún xíniún Jehová, kiʼún kuenta ña̱ va̱ása yo̱ʼvi̱ chiñu ña̱ xáʼndara nu̱úyó (1 Juan 5:3).a

7. Na̱ va̱lí na̱ kúúmií yivá na̱ kúú testigo Jehová, ¿ndáaña xíniñúʼu ndakanixi̱nína xa̱ʼa̱?

⁷ ¿Á testigo Jehová kúú na̱ yiváún ta sánáʼa̱na yóʼó xa̱ʼa̱ ña̱ nda̱a̱? Tá saá íyoña, saátu yóʼó kúún na̱ sa̱kán sákuaʼa xa̱ʼa̱ ña̱ va̱xi nu̱ú Biblia. Na̱ íyo se̱ʼe, se̱ʼena kúú na̱ ndáyáʼviníka sanáʼa̱na. Ndóʼó na̱ va̱lí ndakaʼánndó chi Biblia káʼa̱nña ña̱yóʼo: “Kuyatinndó nu̱ú Ndióxi̱ ta ta̱kán kuyatinra nu̱úndó” (Sant. 4:8; 1 Crón. 28:9). Tá miíún chíka̱ún ndee̱ ña̱ kuyatiún nu̱úra saátu miíra kuyatinra nu̱ún. Jehová kúni̱ra ña̱ ná koún migora ta va̱ása kéʼé kuitíraña xa̱ʼa̱ ña̱ kúún se̱ʼe iin na̱ testigo Jehová. ¿Ndáa xa̱ʼa̱ kúú ña̱ kivi xa̱ún vií kutáʼún xíʼin Ndióxi̱? Xa̱ʼa̱ ña̱ ni̱xi̱ʼi̱ ta̱ Jesús, kǒo nandóso-iniún xa̱ʼa̱ ña̱ ke̱ʼéra (Rom. 5:1, 2). Tá kúma̱níka koo Conmemoración, ndakanixi̱ní ndáa ki̱ʼva chíndeétáʼan ña̱ ni̱xi̱ʼi̱ ta̱ Jesús xíʼún. Ña̱ ndakanixi̱níún xa̱ʼa̱ ña̱yóʼo chindeétáʼanña xíʼún ña̱ kuni̱ún keʼékaún ku̱a̱ʼá chiñu nu̱ú Ndióxi̱. Saá kúú ña̱ na̱ʼún ña̱ táxiún tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼún.b

NA̱ XA̱A̱ NDA̱KUCHI

8. ¿Ndáa ki̱ʼva náʼa̱ na̱ xa̱a̱ nda̱kuchi ña̱ kándíxana ña̱ ni̱xi̱ʼi̱ ta̱ Jesús xa̱ʼa̱na?

⁸ Tá xa̱a̱ nda̱kuchiún xa̱a̱ náʼún ña̱ kándíxaún ña̱ ni̱xi̱ʼi̱ ta̱ Jesús xa̱ʼún. Tá kúú, ku̱yatiún nu̱ú Jehová ta xíniso̱ʼún ña̱ káʼa̱nra. Ta saátu kéʼún chiñu ña̱ xa̱ʼnda ta̱ Jesús ña̱ natúʼún xíʼin na̱ yiví ta chíndeétáʼún xíʼinna ña̱ xa̱a̱na koona discípulora ta saátu nda̱taxiún miíún ndaʼa̱ Jehová ta nda̱kuchiún. Sana xa̱a̱ sásina nu̱ún ña̱ ndasakáʼnún Ndióxi̱ (2 Tim. 3:12). Ña̱ ndakú-iniún xíʼin ña̱ kándíxaún Ndióxi̱ náʼa̱ña ña̱ kúʼvi̱-iniún xíniún Jehová ta táxiún tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼún (Heb. 12:2, 3).

9. Miíyó na̱ xa̱a̱ nda̱kuchi, ¿ndáaña xíniñúʼu kiʼinyó kuenta xíʼin?

⁹ Ni xa̱a̱ nda̱kuchiyó xíniñúʼu kiʼinníyó kuenta. ¿Nda̱chun? Saáchi tá yáʼa tiempo kivi nandóso-iniyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Ná ndakanixi̱níyó xa̱ʼa̱ ña̱ ndo̱ʼo na̱ cristiano na̱ ñuu Éfeso. Ta̱ Jesús ni̱ka̱ʼa̱nra tu̱ʼun va̱ʼa xíʼinna xa̱ʼa̱ ña̱ kúndeé-inina soo saátu ni̱ka̱ʼa̱nra xíʼin na̱ congregación ña̱ va̱ása va̱ʼaka íyo ña̱ kéʼéna ta ni va̱ása kúʼvi̱ka-inina xínina Ndióxi̱ nda̱a̱ táki̱ʼva xi̱kuʼvi̱-inina xi̱xininara tá ya̱chi̱ (Apoc. 2:3, 4). Ña̱ ni̱ka̱ʼa̱n ta̱ Jesús náʼa̱ña ña̱ iin na̱ cristiano kivi kixáʼana loʼo tá loʼo na̱ʼa̱na ña̱ va̱ása kúʼvi̱ka-inina xínina Ndióxi̱ xíʼin ki̱ʼva ña̱ kéʼéna chiñu nu̱úra. Sana na̱yóʼo kéʼévana oración, xáʼa̱nna reunión ta kéena nátúʼunna xíʼin na̱ yiví, soo su̱ví xíʼin ndinuʼu-inina kéʼénaña. ¿Ndáaña kivi keʼéyó tá túviyó ña̱ va̱ása kúʼvi̱ka-iniyó xíniyó Jehová nda̱a̱ táki̱ʼva xi̱keʼéyó tá ya̱chi̱?

10. ¿Ndáa ki̱ʼva kundiku̱nyó consejo ña̱ va̱xi nu̱ú 1 Timoteo 4:13, 15?

¹⁰ Ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná ndakanixi̱níra ndáa ki̱ʼva íyo ña̱ ndásakáʼnura Jehová ta ná chikaa̱ra ndee̱ ña̱ kundi̱ʼi̱ka-inira xa̱ʼa̱ chiñu Ndióxi̱ (kaʼvi 1 Timoteo 4:13, 15). ¿Ndáa ki̱ʼva kundiku̱n miíyó consejo yóʼo? Ná ndakanixi̱níyó ndáa ki̱ʼva íyo ña̱ ndásakáʼnuyó Jehová ta ná kusi̱íka-iniyó (Rom. 12:11). Tá kúú, kivi chikaa̱yó ndee̱ ña̱ viíka kuniso̱ʼoyó ña̱ káʼa̱nna ti̱xin reunión ta xa̱a̱ ya̱chi̱ka kaʼviyó ña̱ ka̱ʼa̱nna xa̱ʼa̱. Kivi nandukú va̱ʼayó xa̱ʼa̱ ña̱ kúni̱yó kunda̱a̱ka-iniyó xa̱ʼa̱ tá xa̱a̱ káʼvi iinlá miíyó ta saátu ná ndakanixi̱níyó xa̱ʼa̱ña. Tá saá ná keʼéyó, na̱ʼa̱yó ña̱ táxiníyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta saátu ndiʼi ña̱ xa̱a̱ kéʼé Jehová xa̱ʼa̱yó. Tá kúma̱níka koo ña̱ Conmemoración kivi ndakanixi̱níyó xa̱ʼa̱ ndiʼi ña̱ va̱ʼa ña̱ xa̱a̱ ndákiʼinyó xa̱ʼa̱ ña̱ kúúyó testigo Jehová. Ña̱yóʼo chindeétáʼanña xíʼinyó ña̱ kundayáʼvika ña̱ ni̱xi̱ʼi̱ ta̱ Jesús xa̱ʼa̱yó, saáchi ña̱yóʼo kúú ña̱ chíndeétáʼan xíʼinyó ña̱ kooyó migo Jehová.

11, 12. Tá sava yichi̱ va̱ása kúsi̱íka-iniyó káchíñuyó nu̱ú Jehová, ¿á kúni̱ kachiña ña̱ va̱ása táxikara espíritu santo ndaʼa̱yó? (Koto na̱ʼná).

¹¹ Tá sava yichi̱ kǒo kúsi̱íka-iniyó kéʼéyó chiñu nu̱ú Jehová ná kǒo ndakava-iniyó xa̱ʼa̱ ña̱yóʼo. Saátu ná kǒo ndakanixi̱níyó ña̱ va̱ása táxika Jehová espíritu santo ndaʼa̱yó. Ná ndakaʼányó xa̱ʼa̱ ña̱ ni̱ka̱ʼa̱n ta̱ apóstol Pablo tá ka̱chira: “Ni kǒo kúni̱vai̱ keʼíi̱ña, soo xíniñúʼu keʼíi̱ña chi chiñu ña̱ ta̱xina ndaʼíi̱ kúúña” (1 Cor. 9:17). ¿Ndáaña xi̱kuni̱ kachira xíʼin ña̱yóʼo?

¹² Sava yichi̱ ta̱ Pablo va̱ása níxi̱kusi̱í-inira natúʼunra xíʼin na̱ yiví. Soo, ni xi̱ndoʼora ña̱yóʼo xi̱chikaavara ndee̱ ña̱ natúʼunra xíʼin na̱ yiví. Saá ná keʼé miíyó, ná chikaa̱yó ndee̱ ña̱ natúʼunyó xíʼin na̱ yiví ni sava yichi̱ kǒo kúsi̱í-iniyó. Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ keʼéyó ña̱ kúni̱ra ta saátu ña̱ taxira ndee̱ ndaʼa̱yó (Filip. 2:13). Ná keʼéyó ku̱a̱ʼáka chiñu nu̱ú Jehová. Tá saá ná keʼéyó ña̱yóʼo chindeétáʼanña xíʼinyó ña̱ kuʼvi̱ka-iniyó kuniyó Jehová ta kusi̱íka-iniyó keʼéyó chiñu nu̱úra.

13. ¿Ndáaña kivi keʼéyó ña̱ va̱ʼa kotoyó á ndixa kándíxayó Ndióxi̱?

¹³ Nu̱ú 2 Corintios 13:5 káchiña: “Kiʼin va̱ʼandó kuenta xíʼin ña̱ kéʼéndó ña̱ va̱ʼa kunda̱a̱-inindó á ndixa kándíxandó Ndióxi̱. Na̱ʼa̱kandó xíʼin ña̱ kéʼéndó ndáa na̱ yiví kúúndó”. Ña̱ va̱ʼa kundiku̱nyó consejo yóʼo, ná ndakanixi̱níyó xa̱ʼa̱ pregunta yóʼo: “¿Á siʼnaka chiñu Ndióxi̱ ndíʼi̱-inii̱ xa̱ʼa̱? Ña̱ ndáka̱xii̱n kusíkíi̱ á kotoi̱, ¿á náʼi̱ ña̱ kúndasíi̱ xínii̱ ña̱ va̱ása va̱ʼa? ¿Á chíka̱i̱ ndee̱ ña̱ vií kutáʼi̱n xíʼin na̱ hermano?” (Sal. 97:10; Mat. 6:33; Efes. 4:2, 3). Tá xa̱a̱ ku̱nu̱mí koo ña̱ Conmemoración saá kúú ña̱ ndáyáʼviní ndakanixi̱níyó xa̱ʼa̱ ña̱yóʼo. Tá ndákanixi̱níyó xa̱ʼa̱ ña̱ xa̱a̱ kéʼé Jehová xíʼin ta̱ Jesús xa̱ʼa̱yó, saá kúú ña̱ kuni̱yó na̱ʼa̱yó ña̱ táxiyó tíxa̱ʼvi ndaʼa̱na ta saátu na̱ʼa̱yó ña̱ va̱ása tákukayó xa̱ʼa̱ miíyó chi xa̱ʼa̱ ta̱ Cristo tákuyó.c

NA̱ KU̱XÍKÁ NU̱Ú JEHOVÁ

14. ¿Nda̱chun ku̱xíká sava na̱ hermano nu̱ú na̱ congregación?

¹⁴ Sava na̱ cristiano xa̱a̱ ku̱a̱ʼá yo̱o̱ á ku̱i̱ya̱ nda̱kú ni̱xi̱yo inina xíʼin Jehová soo ku̱xíkána nu̱ú na̱ congregación. ¿Nda̱chun ke̱ʼéna saá? Sana ku̱xíkána xa̱ʼa̱ ña̱ʼa ña̱ sa̱ndíʼi̱-inina (Luc. 21:34). Inkana ku̱xíkána xa̱ʼa̱ ña̱ ni̱ka̱ʼa̱n á xa̱ʼa̱ ña̱ ke̱ʼé iin na̱ hermano xíʼinna (Sant. 3:2). Ta inkana sana ni̱ki̱ʼvina ku̱a̱chi ndeé ta kǒo xíínna káʼa̱nna xíʼin inkana ña̱ va̱ʼa chindeétáʼanna xíʼinna. Tá ku̱xíkaún nu̱ú na̱ ñuu Ndióxi̱, ¿ndáaña kivi keʼún? ¿Ndáa ki̱ʼva chindeétáʼan ña̱ ni̱xi̱ʼi̱ ta̱ Jesús xíʼún?

15. ¿Ndáa ki̱ʼva xíto Jehová na̱ ku̱xíká nu̱úra? (Ezequiel 34:11, 12, 16).

¹⁵ Ndakanixi̱ní ndáa ki̱ʼva xíto Jehová na̱ ku̱xíká nu̱úra. Ta̱ʼán nandóso-inira xa̱ʼa̱na, chi nándukúra na̱yóʼo nda̱a̱ táki̱ʼva kéʼéna xíʼin ndikachi tí nda̱ñúʼu. Táxira ña̱ ná kunda̱a̱ka-inina xa̱ʼa̱ra ta chíndeétáʼanra xíʼinna ña̱ ndikóna nu̱úra (kaʼvi Ezequiel 34:11, 12, 16).d ¿Á saá kéʼéra xíʼin miíún? Saá kéʼévara. Xa̱ʼa̱ ña̱ káʼviún artículo yóʼo náʼún ña̱ kúʼvi̱kava-iniún xíniún Jehová. Ndakaʼán chi Jehová ki̱ʼinra kuenta xíʼin ña̱ va̱ʼa ña̱ ndíkaa̱ níma̱ún ta ka̱nara yóʼó ña̱ kundikaún ti̱xin ñuura. Ta xítokava Jehová ña̱ va̱ʼa ña̱ kúúmiíún xa̱ʼa̱ ña̱kán kúni̱ra ña̱ ná ndikóún ti̱xin ñuura.

16. ¿Ndáaña kivi chindeétáʼan xíʼin na̱ ku̱xíká nu̱ú Jehová ña̱ va̱ʼa ndikó tukuna nu̱úra? (Koto na̱ʼná).

¹⁶ Folleto ña̱ naní Jehová desea que vuelva káʼa̱nña tu̱ʼun ña̱ liviní yóʼo: “Jehová kuniʼira yichi̱ nu̱ún ña̱ ndikóún nu̱úra. Miíra chindeétáʼan xíʼún ña̱ kǒo kundi̱ʼi̱ní-iniún, ña̱ va̱ása xo̱ʼvi̱ún ta saátu chindeétáʼanra xíʼún ña̱ va̱ása sandíʼi̱ka ña̱ xínitúni̱ún miíún. Tá ná kuniún ña̱ chindeétáʼanra xíʼún, saá kúú ña̱ kuni̱ún ndasakáʼnu tukún Jehová xíʼin na̱ congregación”. Ta saátu ndakaʼán chi na̱ anciano kúni̱na chindeétáʼanna xíʼún. Na̱yóʼo íyona “nda̱a̱ táki̱ʼva íyo nu̱ú xíyo sávína tá ndeéní káni ta̱chí, nu̱ú kivi koo sávína tá ndeéní kúun sa̱vi̱” (Is. 32:2). Ndakanixi̱ní ndáaña kivi keʼún ña̱ va̱ʼa ndikó tukún kutáʼan viíún xíʼin Jehová (Is. 1:18; 1 Ped. 2:25). Tú kúú, ¿á kivi ku̱ʼún reunión ña̱ xíyo ti̱xin Salón ña̱ Reino? ¿Á kivi ka̱ʼún xíʼin iin ta̱ anciano ña̱ kúni̱ún ndikóún nu̱ú Jehová? Sana kivi ka̱ʼa̱nra xíʼin iinna ña̱ ná kaʼvina xíʼún xa̱ʼa̱ ña̱ sanáʼa̱ Biblia. Tá ná keʼún ndiʼi ña̱yóʼo, ku̱a̱ʼání bendición taxi Jehová ndaʼún xa̱ʼa̱ ña̱ náʼún ña̱ táxiún tíxa̱ʼvi ndaʼa̱ra xa̱ʼa̱ ña̱ ni̱xi̱ʼi̱ ta̱ Jesús xa̱ʼún.

¿NDÁAÑA KEʼÚN?

17, 18. Tá kúma̱níka koo ña̱ Conmemoración, ¿ndáaña xíniñúʼu keʼéyó?

¹⁷ Ta̱ Jesús ni̱ka̱ʼa̱nra: “Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na, ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16). Ña̱ ni̱xi̱ʼi̱ ta̱ Jesús kúú ña̱ xíniñúʼu Jehová ña̱ sakǎkura na̱ yiví ndaʼa̱ ku̱a̱chi xíʼin ña̱ xíʼi̱na. Ná kǒo nandóso-iniyó xa̱ʼa̱ ña̱yóʼo (Rom. 3:23, 24; 2 Cor. 6:1). Tá kúma̱ní loʼo ki̱vi̱ koo ña̱ Conmemoración saá kúú ña̱ kivi ndakanixi̱níyó xa̱ʼa̱ ña̱ kúʼvi̱ní-ini Jehová xíʼin ta̱ Jesús xínina miíyó, ta ña̱yóʼo chindeétáʼanña xíʼinyó ña̱ taxiyó tíxa̱ʼvi ndaʼa̱na.

¹⁸ ¿Ndáaña chindeétáʼan xíʼún ña̱ taxiún tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼún? Sana xa̱a̱ síínva koo ña̱ ka̱ʼa̱n miíún nu̱ú inkana. Kivi kandíxaún ña̱ taxiva Jehová bendición ndaʼún xa̱ʼa̱ ña̱ chíkaa̱níún ndee̱ ta saátu keʼéra xíʼin ndiʼi na̱ íyo iníísaá ñuyǐví na̱ chíkaa̱ní ndee̱ ña̱ ndasakáʼnunara, saáchi va̱ása tákuna xa̱ʼa̱ miína, chi tákuna xa̱ʼa̱ ta̱ ni̱xi̱ʼi̱ xa̱ʼa̱na ta nda̱takura (2 Cor. 5:15).