¿Nda̱chun ndáyáʼviní texto ña̱ níʼi yichi̱ nu̱úyó?

1, 2. a) ¿Nda̱saa tiempo kúú ña̱ xa̱a̱ ni̱ka̱ʼyi̱ Biblia? b) ¿Á chíndeétáʼanka Biblia xíʼinyó tiempo vitin?

XA̱A̱ ku̱a̱ʼání ku̱i̱ya̱ ni̱ka̱ʼyi̱ Biblia. Xa̱a̱ íyo ki̱ʼva 3,500 ku̱i̱ya̱ ki̱xáʼana káʼyínaña ta ki̱ʼva 2,000 ku̱i̱ya̱ sa̱ndíʼina ka̱ʼyínaña. Ndiʼi ña̱ va̱xi nu̱ú ña̱yóʼo tu̱ʼun Ndióxi̱ kúúña ta va̱ʼaní chíndeétáʼanña xíʼinyó (Heb. 4:12; 2 Tim. 3:16, 17). Ku̱a̱ʼání na̱ yiví káʼa̱nna ña̱ xa̱a̱ chíndeétáʼan Biblia xíʼinna ña̱ yáʼana nu̱ú tu̱ndóʼo.

² ¿Ndáa ki̱ʼva chíndeétáʼan Biblia xíʼinyó ni xa̱a̱ ku̱a̱ʼání ku̱i̱ya̱ ni̱ka̱ʼyi̱ña? Ña̱ nu̱ú, ña̱ va̱xi nu̱ú Biblia tu̱ʼun Ndióxi̱ ta̱ táku kúúña. Ta̱yóʼo kúú ta̱ i̱xava̱ʼa ndiʼi ña̱ʼa, ndíchiníra ta káʼnuníra (1 Tim. 4:10; Rom. 16:26, 27). Ña̱ u̱vi̱, nu̱ú Biblia va̱xi texto ña̱ níʼi yichi̱ nu̱úyó ta ña̱yóʼo kǒo nása̱maña. Ña̱kán, consejo ña̱ táxira chíndeétáʼanña xíʼin na̱ yiví na̱ íyo tiempo vitin nda̱a̱ táki̱ʼva chi̱ndeétáʼanña xíʼin na̱ xi̱ndoo tiempo xi̱naʼá.

3. ¿Ndáa pregunta ka̱ʼa̱nyó xa̱ʼa̱ nu̱ú artículo yóʼo?

³ Nu̱ú artículo yóʼo ndakuiinyó sava pregunta yóʼo: ¿Ndáaña kúú texto ña̱ níʼi yichi̱ nu̱úyó? ¿Nda̱chun ndáyáʼviní ña̱yóʼo nu̱úyó? ¿Ndáa ki̱ʼva ndakuniyó ña̱yóʼo tá káʼviyó Biblia? Ta saátu kunda̱a̱-iniyó ña̱ sa̱náʼa̱ ta̱ Jesús chíndeétáʼanña xíʼinyó ña̱ kiʼinyó kuenta ndáaña ndákanixi̱ní Jehová xa̱ʼa̱ iin ña̱ʼa.

¿NDÁAÑA KÚÚ TEXTO ÑA̱ NÍʼI YICHI̱ NU̱ÚYÓ?

4. ¿Ndáaña kúú ña̱ texto ña̱ níʼi yichi̱ nu̱úyó?

⁴ Texto ña̱ níʼi yichi̱ nu̱úyó chíndeétáʼanña xíʼinyó kunda̱a̱-iniyó ndáaña kúú ley ña̱ táxi Ndióxi̱. Ta sava ña̱yóʼo íyoña nda̱a̱ táki̱ʼva íyo ley (Mat. 22:37). Ley ña̱ va̱xi nu̱ú Biblia sava yichi̱ káʼa̱n káxiña xa̱ʼa̱ iin ña̱ʼa kuití. Soo Jehová ta̱xira ña̱ ná koo texto ña̱ kuniʼi yichi̱ nu̱úyó ña̱ va̱ʼa kunda̱a̱-iniyó ndáaña ndákanixi̱níra ta ndáaña ndáyáʼvi nu̱úra ta xa̱a̱ síín síín ki̱ʼva kivi chindeétáʼanña xíʼinyó ta kǒo nása̱maña (Sal. 119:111). Ña̱kán sava yichi̱ kiviva nasa̱ma ley. Soo texto ña̱ níʼi yichi̱ nu̱úyó kǒo násamaña (Is. 40:8).

5. ¿Ndáa ejemplo náʼa̱ nu̱úyó ña̱ va̱ása inkáchi íyo ley xíʼin texto ña̱ níʼi yichi̱ nu̱úyó? (Koto na̱ʼná).

⁵ Ña̱ va̱ʼa kunda̱a̱-iniyó ña̱ su̱ví inkáchi íyo ley xíʼin texto ña̱ níʼi yichi̱ nu̱úyó ná ka̱ʼa̱nyó xa̱ʼa̱ iin ejemplo. Iin ñá ñaʼá káʼa̱nñá xíʼi ta̱ loʼo se̱ʼeñá: “Kǒo kuyatiún nu̱ú íyo ñu̱ʼu ña̱ xíxi̱ chi ndi̱ún”. Ña̱yóʼo iin ley kúúña. Xíʼin ña̱yóʼo kúnda̱a̱-iniyó ña̱ kǒo xíniñúʼu tiin ta̱ loʼo yóʼo ña̱ʼa ña̱ niʼní chi ndi̱ira. Ña̱yóʼo kǒo káʼa̱n kuitíña xa̱ʼa̱ ñu̱ʼu ña̱ xíxi̱ chi saátu káʼa̱nña xa̱ʼa̱ ndiʼi ña̱ʼa ña̱ niʼní tá kúú plancha á inkaka ña̱ʼa ña̱ niʼní ña̱ kivi sandíi ta̱ loʼo yóʼo. Ta va̱ása xíniñúʼu kuniso̱ʼo kuitíra ña̱yóʼo tá íyora veʼera chi saátu keʼéra tá ná ku̱ʼu̱nra inka lugar. Tá ná kuaʼnu ta̱ loʼo yóʼo, kuniñúʼuvara ñu̱ʼu yóʼo ña̱ va̱ʼa keʼéra sava ña̱ʼa. Soo nisaá xíniñúʼu kiʼinra kuenta ña̱ va̱ʼa kǒo ndi̱ira. Ley kivi nasa̱maña soo texto ña̱ níʼi yichi̱ nu̱úyó ña̱ káʼa̱n xa̱ʼa̱ ña̱yóʼo kǒo nása̱maña.

¿NDA̱CHUN NDÁYÁʼVINÍ TEXTO ÑA̱ NÍʼI YICHI̱ NU̱ÚYÓ?

6. a) ¿Ndáa ki̱ʼva níʼi Jehová yichi̱ nu̱úyó nu̱ú tu̱ʼunra? b) ¿Ndáa ki̱ʼva náʼa̱ Jehová ña̱ ndáa-inira miíyó?

⁶ Xa̱ʼa̱ ña̱ kúʼvi̱-ini Jehová xínira miíyó táxira ley ndaʼa̱yó, ña̱yóʼo káʼa̱nña xíʼinyó ndáaña kǒo xíniñúʼu keʼéyó ña̱ va̱ʼa kǒo kundoʼoyó ña̱ va̱ása va̱ʼa (Sant. 2:11). Texto ña̱ níʼi yichi̱ nu̱úyó chíndeétáʼanña xíʼinyó ña̱ kunda̱a̱-iniyó ndáa xa̱ʼa̱ kúú ña̱ íyo ley. Ta ña̱yóʼo chíndeétáʼanña xíʼinyó tá kǒo ley ña̱ káʼa̱n káxi xa̱ʼa̱ iin ña̱ʼa. Ta saátu texto yóʼo chíndeétáʼanña xíʼinyó ña̱ vií koo ña̱ ndaka̱xinyó keʼéyó. Ta xa̱ʼa̱ ña̱ ndáa-ini Jehová miíyó, táxira ña̱ ná ndaka̱xin miíyó ndáaña kúni̱yó keʼéyó ta ná na̱ʼa̱ña ña̱ kúni̱yó xíniyóra ta íxato̱ʼóyó ña̱ káʼa̱nra xíʼinyó (Gál. 5:13).

7. Ka̱ʼa̱n xa̱ʼa̱ iin ejemplo ña̱ náʼa̱ nu̱úyó ña̱ ndáyáʼviní texto ña̱ níʼi yichi̱ nu̱úyó (Koto na̱ʼná).

⁷ Ña̱ va̱ʼa kunda̱a̱-iniyó ndáa ki̱ʼva chíndeétáʼan texto ña̱ níʼi yichi̱ nu̱úyó xíʼinyó, ná ndakanixi̱níyó xa̱ʼa̱ señal ña̱ íyo carretera. Ku̱a̱ʼání señal yóʼo káʼa̱nña xíʼin na̱ káva carro ndáa ki̱ʼva xíniñúʼu kavana ña̱ va̱ʼa kǒo tiin na̱ chíñu miína. Ta sava señal yóʼo káʼa̱nña xíʼinna á ndeé xíniñúʼu ku̱ʼu̱nna á kúee á nda̱a̱ xíniñúʼu kundichina. Ta sava ña̱yóʼo káʼa̱nña xíʼinna ña̱ kivi kundoʼona iin tu̱ndóʼo tá kúú, ña̱ kaní yichi̱ á ña̱ iin kama kivi kita iin kití nu̱úna. Tá xíto ta̱ káva carro táʼan señal yóʼo, viíníka kíʼinra kuenta nu̱ú ku̱a̱ʼa̱nra. Ña̱kán tá kúun sa̱vi̱ kíʼinníra kuenta nu̱ú ku̱a̱ʼa̱nra. Ki̱ʼva saá kéʼé na̱ ndásakáʼnu Ndióxi̱ saáchi kíʼinnína kuenta ña̱ kǒo keʼéna ña̱ va̱ása va̱ʼa ña̱ káʼa̱n káxi Biblia xa̱ʼa̱. Saátu kíʼinna kuenta xíʼin ña̱ ndákanixi̱nína ña̱ va̱ʼa kǒo ya̱ʼandosóna ña̱ káʼa̱n ley Ndióxi̱, ta ña̱ va̱ʼa keʼéna ña̱yóʼo xíniñúʼu viíní koo ña̱ ndákanixi̱nína.

8. Nda̱a̱ táki̱ʼva káchi Romanos 12:1, 2, ¿ndáaña va̱ʼa ndákiʼinyó tá nándukúyó texto ña̱ níʼi yichi̱ nu̱úyó?

⁸ Tá chíkaa̱yó ndee̱ ña̱ nandukúyó texto ña̱ níʼi yichi̱ nu̱úyó ta kéʼéyó ña̱ káʼa̱nña, íyo inkaka ña̱ va̱ʼa ndákiʼinyó. Tá kúú, kúnda̱a̱-iniyó ndáaña ndákanixi̱ní Jehová xa̱ʼa̱ sava ña̱ʼa. Tá káʼviyó relato ña̱ va̱xi nu̱ú Biblia, chíkaa̱yó ndee̱ ña̱ kundiku̱nyó ña̱yóʼo. Ndákanixi̱níyó nda̱chun ni̱ka̱ʼyi̱ ña̱yóʼo nu̱ú Biblia ta ndáa ki̱ʼva kundiku̱nyóña. Saá kúú ña̱ sákuaʼayó vií ndakanixi̱níyó ña̱ va̱ʼa ndasakáʼnuyó Jehová. Tasaá kunda̱a̱-iniyó ndáaña kúú ña̱ kúni̱ Ndióxi̱ keʼéyó ta “ndáaña kúú ña̱ va̱ʼa ta ndáaña kúú ña̱ kútóora” (kaʼvi Romanos 12:1, 2).a

9. ¿Ndáa inka ña̱ va̱ʼa ndákiʼinyó tá ndíku̱nyó ña̱ káʼa̱n texto ña̱ níʼi yichi̱ nu̱úyó? (Hebreos 5:13, 14).

⁹ Tá ndíku̱nyó texto ña̱ níʼi yichi̱ nu̱úyó chíndeétáʼanña xíʼinyó ña̱ kuaʼnuyó xíʼin tu̱ʼun Ndióxi̱. Tá kéʼéyó ña̱ káʼa̱nña, viíníka xáa̱yó kítáʼanyó xíʼin Jehová (kaʼvi Hebreos 5:13, 14). Sava yichi̱ xíniñúʼu ka̱ʼa̱n káxiyó xíʼin na̱ va̱lí ndáaña xíniñúʼu keʼéna ta ndáaña kǒo xíniñúʼu keʼéna. Sana xíniso̱ʼona ña̱yóʼo xa̱ʼa̱ ña̱ kǒo kúni̱na ña̱ taxina castigo ndaʼa̱na. Soo Jehová kǒo kéʼéra xíʼinyó nda̱a̱ táki̱ʼva kéʼéna xíʼin na̱ va̱lí, saáchi ndáa-inira miíyó ña̱ viíva koo ña̱ ndaka̱xinyó keʼéyó ta kitáʼanña xíʼin ña̱ kúni̱ra. Tá saá ná keʼéyó sakúsi̱íníyó-inira (Sal. 147:11; Prov. 23:15, 26; 27:11).

¿NDÁA KI̱ʼVA NDAKUNIYÓ TEXTO ÑA̱ NÍʼI YICHI̱ NU̱ÚYÓ?

10. ¿Ndáa ki̱ʼva kunda̱a̱-iniyó ndáaña ndákanixi̱ní Jehová xa̱ʼa̱ iin ña̱ʼa?

¹⁰ Tá káʼviyó Biblia ndáyáʼviní nandukúyó texto ña̱ chindeétáʼan xíʼinyó kunda̱a̱-iniyó ndáaña ndákanixi̱ní Jehová xa̱ʼa̱ sava ña̱ʼa. Saátu kivi ndakanixi̱níyó ndáa xa̱ʼa̱ kúú ña̱ ke̱ʼé Jehová sava ley. Tá kúnda̱a̱-iniyó xa̱ʼa̱ ña̱yóʼo saá kúú ña̱ va̱ʼaníka kúnda̱a̱-iniyó ndáaña ndákanixi̱ní Jehová. Ta ña̱ va̱ʼa kunda̱a̱-iniyó xa̱ʼa̱ ña̱yóʼo, ná ka̱ʼa̱nyó xíʼinra ña̱ ná chindeétáʼanra xíʼinyó tasaá viíka xa̱a̱yó ndakanixi̱níyó (Prov. 2:10-12). Kivi nda̱ka̱tu̱ʼunyó ña̱yóʼo miíyó: “¿Nda̱chun kúú ña̱ ke̱ʼé Jehová ley yóʼo? Tá kǒo kútóo Jehová ña̱ keʼéyó ña̱ va̱ása va̱ʼa, ¿ndáaña ndákanixi̱níra xa̱ʼa̱ sava ña̱ kítáʼan xíʼin ña̱yóʼo? ¿Ndáaña sákuaʼi̱ xíʼin relato yóʼo? ¿Ndáa ki̱ʼva kundiku̱i̱n ña̱yóʼo?”. Tá xa̱a̱ kúnda̱a̱-iniyó ndáa xa̱ʼa̱ kúú ña̱ ke̱ʼé Jehová sava ley ta ndáaña sákuaʼayó xíʼin relato ña̱ va̱xi nu̱ú Biblia, saá kúú ña̱ vií koo ña̱ ndaka̱xinyó keʼéyó ta sakúsi̱íyó-inira.

11. ¿Ndáaña sa̱náʼa̱ ta̱ Jesús tá ni̱ka̱ʼa̱nra chí yuku̱? (Koto na̱ʼná).

¹¹ Tá ni̱ka̱ʼa̱n ta̱ Jesús chí yuku̱, kán sa̱náʼa̱ra ndáa ki̱ʼva ndakuniyó texto ña̱ níʼi yichi̱ nu̱úyó. Yóʼo kunda̱a̱-iniyó xa̱ʼa̱ u̱ni̱ ejemplo. Nu̱ú iin tá iin ña̱yóʼo siʼna ley ni̱ka̱ʼa̱n ta̱ Jesús xa̱ʼa̱ tasaá ni̱ka̱ʼa̱nra xa̱ʼa̱ sava texto ña̱ níʼi yichi̱ nu̱úyó. Tá ná ndakanixi̱níyó xa̱ʼa̱ ña̱ sa̱náʼa̱ra, kunda̱a̱-iniyó ndáa ki̱ʼva kundiku̱nyó ña̱yóʼo tiempo vitin ta ndáaña va̱ʼa ndakiʼinyó.

12. ¿Ndáaña sákuaʼayó xíʼin ña̱ káʼa̱n xa̱ʼa̱ ley ña̱ va̱xi nu̱ú Mateo 5:21, 22? (Koto na̱ʼná).

¹² (Kaʼvi Mateo 5:21, 22). “Va̱ása kaʼníún”. ¿Ndáaña sákuaʼayó xíʼin ña̱ káʼa̱n ley yóʼo? Jehová kǒo kúni̱ra ña̱ sa̱a̱-iniyó kuniyó inkana ta saátu va̱ása na̱ʼa̱yó ña̱yóʼo xíʼin ña̱ kéʼéyó, ña̱ káʼa̱nyó xíʼin ña̱ ndákanixi̱níyó. Ta̱ Jesús ni̱ka̱ʼa̱nra ña̱ sana va̱ása xa̱a̱ví iinna kaʼnína inkana, soo tá sáa̱-inina xínina inkana yáʼandosóna ña̱ ley yóʼo. “Ndiʼi na̱ sáa̱-ini xíni ñanina” á káʼa̱nna tu̱ʼun ña̱ sáxo̱ʼvi̱ ini na̱yóʼo, Ndióxi̱ kúú ta̱ ndatiin ku̱a̱chi xíʼinna. ¿Nda̱chun? Saáchi ña̱yóʼo kúú ña̱ siʼna kíxáʼa ndíkaa̱ níma̱ na̱ yiví tasaá xáa̱na xáʼnína (1 Juan 3:15).

13. ¿Ndáa ki̱ʼva kundiku̱nyó ña̱ káʼa̱n Mateo 5:21, 22 tiempo vitin? (Koto na̱ʼná).

¹³ ¿Ndáa ki̱ʼva kundiku̱nyó ña̱ káʼa̱n Mateo 5:21, 22 tiempo vitin? Ná kǒo sa̱a̱-iniyó kuniyó inkana (Lev. 19:18; Job 36:13). ¿Nda̱chun? Saáchi kivi kixáʼayó sa̱a̱-iniyó kuniyó inkana á nda̱a̱ kivi keʼéyó ña̱ va̱ása va̱ʼa (Prov. 10:12). Ta iin ña̱yóʼo kúú ña̱ ka̱ʼa̱nyó ña̱ vatá á tu̱ʼun síkí xa̱ʼa̱ inkana ta inkana kivi ndakanixi̱nína ña̱ va̱ása va̱ʼa xa̱ʼa̱ na̱yóʼo (Prov. 20:19; 25:23). Tá ni̱ka̱ʼa̱n ta̱ Jesús xa̱ʼa̱ ña̱yóʼo ta̱ʼán kǒoví internet ni teléfono tiempo saá, soo consejo ña̱ ta̱xira sánáʼa̱ña miíyó ña̱ ná kǒo kuniñúʼuyó ña̱yóʼo ña̱ ka̱ʼa̱nyó ña̱ vatá xa̱ʼa̱ inkana. Ni nda̱a̱ ndáaka ña̱ kéʼéyó ná kǒo na̱ʼa̱ña ña̱ sáa̱-iniyó xíniyó inkana. Va̱ása xa̱a̱víyó kaʼníyó iin na̱ yiví soo saátu va̱ása kúni̱yó ka̱ʼa̱nyó á kaʼyíyó ña̱ va̱ása va̱ʼa xa̱ʼa̱ inkana ta xa̱ʼa̱ ña̱kán kǒo ixato̱ʼó inkana na̱yóʼo.

14. ¿Ndáaña sákuaʼayó xíʼin ña̱ káʼa̱n xa̱ʼa̱ ley ña̱ va̱xi nu̱ú Mateo 5:27, 28? (Koto na̱ʼná).

¹⁴ (Kaʼvi Mateo 5:27, 28). “Va̱ása ku̱su̱ún xíʼin na̱ kǒo nítindaʼa̱ xíʼún”. ¿Ndáaña ndákanixi̱ní Jehová xa̱ʼa̱ ña̱ káʼa̱n ley yóʼo? Jehová va̱ása sáa̱ kuití inira xínira tá kéʼéna ku̱a̱chi kini chi saátu sáa̱ra tá ndákanixi̱nína xa̱ʼa̱ ña̱yóʼo. Ta̱ Jesús ni̱ka̱ʼa̱nra, tá iin ta̱a kíxáʼara ndákanixi̱níra ña̱ kúni̱ra ku̱su̱nra xíʼin iin ñaʼá ñá kǒo kúú ñá síʼira xa̱a̱ kíʼvira ku̱a̱chi xa̱ʼa̱ ña̱yóʼo. Ña̱kán va̱ása xíniñúʼu ndakanixi̱níyó xa̱ʼa̱ ña̱ kini ni íxayo̱ʼvi̱ña xíʼinyó (Mat. 5:29, 30). Texto yóʼo nda̱a̱ na̱ kúa̱an káʼa̱nña xa̱ʼa̱.

15. ¿Ndáa ki̱ʼva kundiku̱nyó ña̱ káʼa̱n Mateo 5:27, 28? (Koto na̱ʼná).

¹⁵ ¿Ndáa ki̱ʼva kundiku̱nyó ña̱ káʼa̱n Mateo 5:27, 28 tiempo vitin? Ná kǒo ndakanixi̱níyó xa̱ʼa̱ ku̱a̱chi kini (2 Sam. 11:2-4; Job 31:1-3). Ña̱kán na̱ cristiano na̱ xa̱a̱ xu̱xa-ini xíʼin tu̱ʼun Ndióxi̱ kǒo xítona nda̱a̱ ni iin ña̱ yaku̱a̱ nu̱ú kána na̱ yiví chálá. Kǒo káʼa̱nna ña̱ xíto kuitínaña soo kǒo kéʼéna ña̱ kini. Ta saátu kǒo kéʼéna nda̱a̱ táki̱ʼva kéʼé na̱ yiví na̱ xíto nu̱ú kána sava ña̱ kini ta ndákanixi̱nína ña̱ su̱ví ña̱ ndeéví kúúña chi íyokava inka pornografía nu̱ú ndeéka kána ña̱ kini. Tiempo ta̱ Jesús kǒoví teléfono, película ni na̱ʼná níxi̱yo. Soo ña̱ ni̱ka̱ʼa̱nra sánáʼa̱ña miíyó ndáaña ndákanixi̱ní Jehová xa̱ʼa̱ ña̱ kini ña̱ kána nu̱ú ña̱yóʼo. Xíʼin ña̱yóʼo kúnda̱a̱-iniyó Jehová kúndasíra ña̱ chindaʼáyó na̱ʼná á video nu̱ú kána ña̱ kini ndaʼa̱ inkana á ña̱ ka̱ʼa̱nyó xa̱ʼa̱ ña̱yóʼo. Consejo ña̱ ta̱xi ta̱ Jesús chíndeétáʼanña xíʼin na̱ ti̱ndaʼa̱ ña̱ kǒo sandáʼvina na̱ ti̱ndaʼa̱ xíʼinna (Mal. 2:15). Soo míí ña̱ nda̱a̱, ña̱yóʼo chíndeétáʼanña xíʼin na̱ ti̱ndaʼa̱ ta saátu xíʼin na̱ kúa̱an ña̱ kǒo ku̱su̱nna xíʼin na̱ kǒo nítindaʼa̱ xíʼinna (Prov. 5:3-14).

16. ¿Ndáaña sákuaʼayó xíʼin ña̱ káʼa̱n xa̱ʼa̱ ley ña̱ va̱xi nu̱ú Mateo 5:43, 44? (Koto na̱ʼná).

¹⁶ (Kaʼvi Mateo 5:43, 44). “Kuʼvi̱-iniún kuniún inka na̱ yiví”. ¿Ndáaña sákuaʼayó xíʼin ña̱ káʼa̱n ley yóʼo? Jehová kúni̱ra vií ná keʼéyó xíʼin ndiʼi na̱ yiví ta ná ku̱ʼvi̱-iniyó kuniyóna. Tiempo ta̱ Jesús na̱ judío va̱ása vií níxi̱ndiku̱nna ley yóʼo, chi na̱yóʼo xi̱sanáʼa̱na ña̱ kiviva sa̱a̱-inina kunina na̱ sáa̱-ini xíni miína. Soo ta̱ Jesús xi̱kunda̱a̱-inira ña̱ su̱ví saá sánáʼa̱ ley yóʼo, chi Jehová kúni̱ra ña̱ vií ná keʼéyó xíʼin ndiʼi na̱ yiví ni nda̱a̱ ndáaka ki̱ʼva náʼa̱na á nda̱a̱ ndáaka ñuu ke̱ena (Mat. 5:45-48).

17. ¿Ndáa ki̱ʼva kundiku̱nyó ña̱ káʼa̱n Mateo 5:43, 44? (Koto na̱ʼná).

¹⁷ ¿Ndáa ki̱ʼva kundiku̱nyó ña̱ káʼa̱n Mateo 5:43, 44 tiempo vitin? Xa̱ʼa̱ ña̱ kúʼvi̱-iniyó xíniyó na̱ yiví kǒo xáʼa̱nyó nu̱ú ku̱a̱chi ta ni va̱ása kánitáʼanyó xíʼinna (Is. 2:4; Miq. 4:3). Va̱ʼa-iniyó xíʼin na̱ yiví na̱ ke̱e inka ñuu á na̱ kúúmií inka religión (Hech. 10:34, 35). Ta saátu íxakáʼnu-iniyó xa̱ʼa̱ na̱ ke̱ʼé ña̱ va̱ása va̱ʼa xíʼinyó á xíʼin na̱ veʼeyó (Mat. 18:21, 22; Mar. 11:25; Luc. 17:3, 4).

NÁ KUNDIKU̱NYÓ ÑA̱ KÁʼA̱N JEHOVÁ XÍʼINYÓ NU̱Ú TU̱ʼUNRA

18. a) ¿Ndáaña chikaa̱-iniyó keʼéyó? b) ¿Ndáaña ka̱ʼa̱nyó xa̱ʼa̱ nu̱ú inka artículo?

¹⁸ Táxiníyó tíxa̱ʼvi ndaʼa̱ Jehová xa̱ʼa̱ ña̱ kǒo kéʼéra xíʼinyó nda̱a̱ táki̱ʼva kéʼéna xíʼin na̱ va̱lí. Kúni̱ra ña̱ kundiku̱nyó ña̱ káʼa̱n tu̱ʼunra ña̱ va̱ʼa vií koo ña̱ ndaka̱xinyó keʼéyó ndiʼi ki̱vi̱ (1 Cor. 14:20). Ta tá xa̱a̱ ndáka̱xinyó keʼéyó iin ña̱ʼa, ndáyáʼviní kunda̱a̱-iniyó ndáaña ndákanixi̱ní Jehová xa̱ʼa̱ ña̱yóʼo (Efes. 5:17). Xa̱ʼa̱ ña̱ kúʼvi̱-iniyó xíniyó Jehová, vií íyo ña̱ ndáka̱xinyó keʼéyó ta su̱ví xa̱ʼa̱ ña̱ yíʼviyó ña̱ taxira castigo ndaʼa̱yó kúúña. Ta ña̱ va̱ʼa keʼéyó ña̱yóʼo ta̱xira ña̱ xínitúni̱yó ña̱ va̱ʼa chindeétáʼanña xíʼinyó ta ña̱yóʼo kúú ña̱ ka̱ʼa̱nyó xa̱ʼa̱ nu̱ú inka artículo.