Ndáaña kivi keʼéyó ña̱ va̱ʼa sakúaʼayó ku̱a̱ʼá ña̱ʼa xíʼin video

Kútóoníyó kotoyó video ña̱ va̱xi nu̱ú jw.org chi sákuaʼayó ku̱a̱ʼá ña̱ʼa ña̱ sákuyatin miíyó nu̱ú Jehová. Ku̱a̱ʼáníyó xítoyó video tá xa̱a̱ káʼviyó xíʼin na̱ veʼeyó á tá xa̱a̱ káʼvi mitúʼunyó. ¿Ndáaña kivi keʼéyó ña̱ va̱ʼa sakúaʼayó ku̱a̱ʼá ña̱ʼa xíʼin video? Yóʼo va̱xi sava ña̱ kivi keʼún.

Kanindichi video ta ndakanixi̱ní xa̱ʼa̱ña. Kiviva kanindichiún video tá xa̱a̱ xítoúnña. Kanindichiña tá kúni̱ún ndakanixi̱níún xa̱ʼa̱ iin ña̱ ni̱ka̱ʼa̱nna á xa̱ʼa̱ iin texto. Tá xítoún video xíʼin ku̱a̱ʼána, kivi ka̱ʼa̱nndó xa̱ʼa̱ pregunta yóʼo: “¿Ndáa ki̱ʼva keʼíi̱ ña̱ káʼa̱n ña̱yóʼo á ndáa ki̱ʼva kuniñúʼi̱ña ña̱ va̱ʼa chindeétáʼi̱n xíʼin inkana?”.

Kaʼyi ña̱ sákuaʼún. Kaʼyi ña̱ kúni̱ún ndakaʼún xa̱ʼa̱, sana iin texto, á iin ña̱ ndáyáʼvi ña̱ ni̱ka̱ʼa̱nna ña̱ kúni̱ún keʼún. Tá saá ná keʼún, kama ndakaʼún xa̱ʼa̱ ña̱ sa̱kúaʼún.

Koto tuku video. Kivi kotoúnña ku̱a̱ʼá yichi̱, chi saá kivi sakúaʼún ku̱a̱ʼá ña̱ʼa nu̱úña á ndakaʼún xa̱ʼa̱ ña̱ʼa ña̱ xa̱a̱ na̱ndóso-iniún xa̱ʼa̱.