Ná kusi̱í-iniyó ña̱ xa̱a̱ síín íyoyó

NÁ NDAKANIXI̱NÍYÓ ña̱ nda̱kutáʼanyó ña̱ keeyó predicación. Ta̱ hermano ta̱ tává grupo ni̱ka̱ʼa̱nra xíʼin u̱vi̱ ta̱ hermano ña̱ inkáchi keena. Iin ta̱yóʼo kútóoníra natúʼunra xíʼin na̱ yiví xa̱ʼa̱ Ndióxi̱, ta inkara ndíʼi̱ní-inira xa̱ʼa̱ na̱ hermano. ¿Ndáaña kúu tá xa̱a̱ ndi̱ʼi̱ ke̱ʼéna oración? Ta̱ hermano ta̱ kútóoní natúʼun xíʼin na̱ yiví xítora nu̱ú reloj ta xa̱a̱ ndi̱ku̱n kítara ku̱a̱ʼa̱nra chí yéʼé, ta ta̱ ku̱ʼu̱n xíʼinra kíxáʼara nátúʼunra xíʼin iin ñá hermana ñá xa̱a̱ chée.

¿Ndáaña kúu xíʼin na̱yóʼo? Sana xa̱a̱ síín síín íyo ña̱ ndákanixi̱ní na̱yóʼo. Ta̱ hermano ta̱ kútóoní natúʼun xíʼin na̱ yiví, kivi ndakanixi̱níra xa̱ʼa̱ ta̱ ku̱ʼu̱n xíʼinra ña̱ va̱ása xíniñúʼu viíra tiempora, soo ta̱ ndíʼi̱-ini xa̱ʼa̱ na̱ hermano kivi ndakanixi̱níra xa̱ʼa̱ ta̱ ku̱ʼu̱n xíʼinra ña̱ va̱ása ndíʼi̱ví-inira xa̱ʼa̱ na̱ hermano. Tá saá ná ndakanixi̱nína va̱ása vií ndakutáʼanna ña̱ keena servicio.

Iin tá iinyó síín íyoyó ta síín íyo ña̱ kútóoyó. Ñá Jessica, xa̱a̱ 20 ku̱i̱ya̱ ku̱a̱ʼa̱n nda̱kuchiñá ta káʼa̱nñá ña̱yóʼo: “Sava yichi̱ xa̱a̱ ni̱ka̱anyó kéʼéyó sava ña̱ʼa, ta kivi ndakanixi̱níyó ña̱ iinlá saá kúú ña̱ va̱ʼa kanaña”.

¿Ndáaña kivi chindeétáʼan xíʼinyó ña̱ vií ndakanixi̱níyó ta kotoyó ña̱ va̱ʼa ña̱ kéʼé na̱ hermano? Ña̱ va̱ʼa ka̱ʼa̱nyó xa̱ʼa̱ ña̱yóʼo ná kotoyó ndáaña ndákanixi̱ní Jehová xa̱ʼa̱ ña̱ síín íyoyó.

JEHOVÁ KÚTÓORA ÑA̱ XA̱A̱ SÍÍN ÍYOYÓ

Ña̱ vií kítáʼanyó ndáyáʼviníña nu̱ú Jehová. Ta̱yóʼo kúni̱ra, ña̱ inkáchi ná kutáʼan tu̱ʼunyó xa̱ʼa̱ ña̱ káʼa̱nyó ta kǒo taʼví-táʼanyó, ta inkáchi ná ndakanixi̱níyó (1 Cor. 1:10). Jehová nda̱kaxinra iin ta̱ kuniʼi yichi̱ nu̱úyó ta kúni̱ra ña̱ ná kundiku̱nyóra (Juan 10:16). Saátu ta̱xira Biblia ndaʼa̱yó ña̱ va̱ʼa chindeétáʼanña xíʼin ndiʼiyó.

Jehová kúsi̱í-inira ña̱ xa̱a̱ síín síín íyoyó. Ta xíʼin ña̱ i̱xava̱ʼara náʼa̱ña ña̱ xa̱a̱ síín síín íyoña. Tá kúú sava kití xínurí, inkarí ñúurí miírí, inkarí ndáchírí á ñúʼurí ti̱xin ti̱kui̱í. Saátu íyo planta chi íyo tú náʼnu, tú válí, tú nduʼú, á tú yi̱i̱. Tá xi̱to Jehová ndiʼi ña̱ i̱xava̱ʼara ni̱ka̱ʼa̱nra ña̱ va̱ʼaní íyo ndiʼiña (Gén. 1:30, 31).

Jehová kúsi̱íní-inira ña̱ xa̱a̱ síín síín íyo na̱ yiví na̱ ñúʼu ti̱xin ñuura. Ná ndakanixi̱níyó xa̱ʼa̱ profecía ña̱ ni̱ka̱ʼa̱n ta̱ Isaías, ndiʼi kití ni xa̱a̱ síín íyorí va̱ʼaní kítáʼanrí (Is. 11:6). Tiempo vitin na̱ ndásakáʼnu Ndióxi̱ sáxi̱nuna profecía yóʼo chi va̱ʼaní kítáʼan xíʼin táʼanna ni síín íyona. Síín xa̱ʼnu iin tá iinna ta xa̱a̱ síín síín ndákanixi̱nína. Savana si̱í-inina ta inkana kaʼanní nu̱úna. Soo nisaá va̱ʼaní kítáʼanna chi kúnda̱a̱-inina xa̱ʼa̱ Jehová (Is. 11:9).

Nda̱a̱ táki̱ʼva xa̱a̱ ku̱ndaa̱-iniyó, Jehová táxira ña̱ ñúʼu na̱ xa̱a̱ síín síín íyo ti̱xin ñuura. Xa̱ʼa̱ ña̱ xa̱a̱ síín íyoyó ná kǒo taxiyó ña̱ ndataʼví ña̱yóʼo miíyó. Ña̱ síín i̱xava̱ʼa Jehová miíyó náʼa̱ña ña̱ ndíchiníra, viíní ke̱ʼéra miíyó ta va̱ʼaní inira.

ÑA̱ XA̱A̱ SÍÍN ÍYOYÓ NÁ KUNDAYÁʼVIÑA NU̱ÚYÓ

Kivi ka̱ʼa̱nyó iin ña̱ va̱ʼava kúú ña̱ xa̱a̱ síín síín íyoyó ti̱xin ñuu Ndióxi̱. Soo tá xítoyó ña̱ síín íyo ña̱ kéʼé inkana nu̱ú miíyó, kivi sasáa̱na miíyó ta nda̱a̱ kivi ixayo̱ʼvi̱ña xíʼinyó ña̱ vií ndakanixi̱níyó xa̱ʼa̱ ki̱ʼva ña̱ íyo na̱ yiví kán. ¿Ndáaña kivi chindeétáʼan xíʼinyó ña̱ vií ndakanixi̱níyó xa̱ʼa̱na?

Vií ná ndakanixi̱níyó xa̱ʼa̱ na̱ hermano (1 Cor. 13:4, 7). Iin tá iin na̱yóʼo ndáyáʼvinína nu̱ú Jehová, ña̱kán ka̱narana ti̱xin ñuura (Sal. 15:1, 2). Tá kíʼinyó kuenta ña̱ chíkaa̱ní na̱ hermanoyó ndee̱ ña̱ ndasakáʼnuna Ndióxi̱, saá kúú ña̱ va̱ása ixayo̱ʼvi̱ña xíʼinyó ña̱ kotoyó ña̱ va̱ʼa ña̱ kéʼéna ta ku̱ʼvi̱-iniyó kunitáʼanyó (Efes. 4:32; Col. 3:13).
Ná ndakaʼányó chi íyo ku̱a̱ʼání ki̱ʼva kivi keʼéyó sava ña̱ʼa. Sana kútóonívayó ki̱ʼva ña̱ kéʼéyó iin ña̱ʼa. Soo ña̱yóʼo kǒo kúni̱ kachiña ña̱ iinlá ki̱ʼva saá kivi keʼéyóña. Sana ñuu nu̱ú xa̱ʼnuyó xa̱a̱ síín ndákanixi̱níyó xa̱ʼa̱ sava ña̱ʼa, xa̱a̱ síín kéʼénaña, ta saátu xa̱a̱ síín síín comida kútóoyó kuxuyó. Ña̱kán tá sáa̱yó xa̱ʼa̱ ki̱ʼva ña̱ ndákanixi̱nína xa̱ʼa̱ iin ña̱ʼa á va̱ása kéʼéna iin ña̱ʼa nda̱a̱ táki̱ʼva kéʼé miíyóña, ná nda̱ka̱tu̱ʼúnyó ña̱yóʼo miíyó: “¿Ndáa ki̱ʼva ndakanixi̱níi̱ xa̱ʼa̱ iin ña̱ʼa tá níkákui̱ inka ñuu, tá níkákui̱ inka tiempo á ti̱xin inka familia?”.
Ná kotoyó ña̱ va̱ʼa ña̱ kúúmií inkana. Ná ka̱ʼa̱n tukuyó xa̱ʼa̱ ta̱ hermano ta̱ xa̱a̱ ni̱ka̱ʼa̱nyó xa̱ʼa̱. Ná kachiyó ta̱ hermano ta̱ kútóoní natúʼun xíʼin na̱ yiví xa̱ʼa̱ Ndióxi̱, ndákanixi̱níra ña̱ va̱ʼaníva-ini ta̱ hermano ta̱ ku̱ʼu̱n xíʼinra chi ndíʼi̱-inira xa̱ʼa̱ na̱ hermano, ta ta̱ ndíʼi̱-ini xa̱ʼa̱ na̱ hermano yóʼo, ndákanixi̱níra xa̱ʼa̱ ta̱ ku̱ʼu̱n xíʼinra ña̱ kútóoníva ta̱kán natúʼunra xíʼin na̱ yiví xa̱ʼa̱ Ndióxi̱. Xa̱ʼa̱ ña̱ kíʼinna kuenta xíʼin ña̱ va̱ʼa ña̱ kúúmiína, va̱ása kúni̱na nasamana ki̱ʼva ña̱ íyo iin tá iinna. Tasaá kǒo sáa̱ xíʼin táʼanna ta viíní ndákutáʼanna ku̱a̱ʼa̱nna natúʼunna xíʼin na̱ yiví (Rom. 12:10).

Xa̱ʼa̱ ña̱ xa̱a̱ síín síín íyo na̱ ñúʼu ti̱xin ñuu Jehová ndáyáʼviní ña̱yóʼo nu̱úyó (Filip. 2:2-4). Tá ndáyáʼvi ña̱yóʼo nu̱úyó saá va̱ʼa ndakutáʼanyó xíʼin ndiʼi na̱ hermano ta kǒo ku̱a̱chi koo, ta va̱ʼaka xa̱a̱yó ndakutáʼanyó xíʼin Jehová, chi miíra kúú ta̱ kána miíyó ña̱ kuñuʼuyó ti̱xin ñuura (1 Ped. 2:17; Sal. 119:165).