Ná kundiku̱nyó yichi̱ na̱ ke̱ʼé ña̱ va̱ʼa

1. ¿Ndáa ki̱ʼva ki̱xáʼayó sákuaʼayó sava ña̱ʼa?

NDIʼIYÓ sákuaʼayó xíʼin ña̱ xítoyó kéʼé inkana. Tá kúú, tá ni̱xi̱yo válíyó sa̱kúaʼayó ka̱ʼa̱nyó nda̱a̱ táki̱ʼva káʼa̱n inkana, ta xi̱kiʼinyó kuenta xíʼin ña̱ xi̱keʼéna ta saátu ki̱xáʼayó kéʼéyó nda̱a̱ táki̱ʼva kéʼé na̱kán. Tá xa̱ʼnuyó sa̱kúaʼayó kéʼéyó chiñu nda̱a̱ táki̱ʼva kéʼé inkana ta su̱ví ña̱ kaʼvi kuitíyó ndáa ki̱ʼva keʼéyóña.

2. ¿Ndáa ki̱ʼva sa̱kúaʼayó kéʼéyó chiñu nu̱ú Jehová?

² Tá ki̱xáʼayó kéʼéyó chiñu nu̱ú Jehová su̱ví nda̱saa ka̱ʼvi kuitíyó Biblia xa̱ʼa̱ra chi saátu ki̱ʼinyó kuenta ña̱ kúʼvi̱ní-ini na̱ hermano xínina inkana, kúee íyo inina ta si̱í íyona. Biblia káʼa̱nña xíʼinyó ña̱ ná sakúaʼayó keʼéyó nda̱a̱ táki̱ʼva kéʼé inkana (Prov. 2:20). ¿Ndáana kivi kundiku̱nyó yichi̱? ¿Ndáaña chindeétáʼan xíʼinyó keʼéyóña? Ta, ¿ndáaña kǒo xíniñúʼu keʼéyó?

¿NDÁANA KIVI KUNDIKU̱NYÓ YICHI̱?

3. ¿Ndáana kivi kundiku̱nyó yichi̱?

³ Biblia káʼa̱nña xa̱ʼa̱ na̱ va̱ʼaní xi̱kandíxa Ndióxi̱, ndakú ni̱xi̱yo inina ta va̱ʼaní sakúaʼayó xíʼin ña̱ ke̱ʼéna. Hebreos 12:1 káʼa̱nña xa̱ʼa̱ ku̱a̱ʼání na̱ yiví na̱ xi̱ndasakáʼnu Ndióxi̱ na̱ ni̱xi̱yo nda̱a̱ táki̱ʼva íyo iin vi̱kó káʼnu. Saátu ku̱a̱ʼání ña̱ kivi sakúaʼayó xíʼin ña̱ kéʼé na̱ ndásakáʼnu Ndióxi̱ tiempo vitin. Tá kúú nu̱ú video yáʼa ku̱a̱ʼá na̱ hermano na̱ íyo iníísaá ñuyǐví na̱ nda̱kú íyo ini ndásakáʼnu Jehová (1 Tes. 2:14).a Ta saátu ti̱xin congregación nu̱ú ñúʼuyó íyo na̱ hermano na̱ nda̱kúní íyo ini xíʼin Jehová, ña̱ kéʼéna va̱ʼaní chíndeétáʼanña xíʼinyó ni loʼo tiempo ki̱xáʼana ndásakáʼnuna Jehová á ni loʼona nu̱ú miíyó (Mat. 18:2-5). Ni ta̱ loʼo xi̱kuu ta̱ Timoteo, soo ta̱ apóstol Pablo ni̱ka̱ʼa̱nra ña̱yóʼo xíʼinra: “Iin yichi̱ va̱ʼaní chinúún nu̱ú na̱ ndásakáʼnu Ndióxi̱” (1 Tim. 4:12). Sava na̱ xi̱ndasakáʼnu Ndióxi̱ chéeka ni̱xi̱yona nu̱ú ta̱ Timoteo xa̱ʼa̱ ña̱kán va̱ása níxi̱kiʼinna kuenta xíʼin ña̱ xi̱keʼéra, saáchi ta̱ loʼo ni̱xi̱yora nu̱úna. Va̱ása va̱ʼa ña̱ xi̱keʼéna chi va̱ása nísakúaʼana xíʼin ña̱ va̱ʼa ña̱ xi̱kuumií ta̱ Timoteo. Jehová kúni̱ra ña̱ ná kotoyó ña̱ va̱ʼa ña̱ kúúmií na̱ hermano na̱ ñúʼu ti̱xin congregaciónyó ta ná sakúaʼayó xíʼin ndiʼi ña̱ va̱ʼa ña̱ kúúmiína.

4. ¿Ndáa ejemplo xi̱niñúʼu ta̱ apóstol Juan ña̱ va̱ʼa sanáʼa̱ra iin ña̱ʼa ña̱ ndáyáʼviní?

⁴ Biblia káʼa̱nña xíʼinyó ña̱ ná sakúaʼayó xíʼin ña̱ va̱ása va̱ʼa ke̱ʼé sava na̱ ni̱xi̱yo tiempo xi̱naʼá. Ná kotoyó ña̱ ni̱ka̱ʼa̱n ta̱ apóstol Juan xíʼin ta̱ migora ta̱ Gayo: “Kǒo keʼún ña̱ va̱ása va̱ʼa ña̱ kéʼé inkana, nu̱úka ña̱yóʼo keʼé ña̱ va̱ʼa” (3 Juan 9-11). Tiempo saá ni̱xi̱yo iin ta̱a ta̱ xi̱naní Diótrefes xi̱kaʼa̱nra ña̱ va̱ása va̱ʼa xa̱ʼa̱ na̱ congregación, va̱ása ní xi̱ ixato̱ʼóra na̱ hermano, xi̱kuni̱ra kuumiíra ku̱a̱ʼání ña̱ʼa ta ni̱nuní xi̱kunira. Ta̱ Juan ni̱ka̱ʼa̱nra xa̱ʼa̱ ña̱ xi̱keʼé ta̱ Diótrefes ña̱ va̱ʼa ka̱ʼa̱nra xíʼin ta̱ Gayo ña̱ kǒo xíniñúʼu keʼéra saá, ña̱ xi̱keʼéra sa̱xóʼvi̱ña na̱ congregación. Xíʼin ña̱ xi̱keʼéra sa̱kúaʼana ña̱ ndáyáʼviní íxato̱ʼóna na̱ níʼi yichi̱ nu̱úna ta saátu ndáaña kivi kundoʼona tá ndákanixi̱nína ña̱ ndáyáʼvikana nu̱ú inkana. Ku̱a̱ʼání ña̱ kivi sakúaʼayó xíʼin ña̱ va̱ʼa ña̱ kéʼé iinna ta saátu xíʼin ña̱ va̱ása va̱ʼa kéʼéna.

¿NDÁAÑA CHINDEÉTÁʼAN XÍʼINYÓ ÑA̱ VA̱ʼA SAKÚAʼAYÓ XÍʼIN ÑA̱ KÉʼÉ INKANA?

5. ¿Ndáaña kivi keʼéyó ña̱ va̱ʼa kundiku̱nyó yichi̱ inkana? (Filipenses 3:17-19).

⁵ Ná kotoyó ña̱ kéʼé inkana. Ña̱ va̱ʼa sakúaʼayó keʼéyó ña̱ kéʼé inkana ná kotoyó ndáa ki̱ʼva íyo ña̱ ndáka̱xinna kéʼéna. Tá ña̱ va̱ʼa kúú ña̱ kéʼéna ná kotoyó ndáa ki̱ʼva kundiku̱nyó yichi̱na, soo tá va̱ása va̱ʼa ña̱ kéʼéna ná kǒo keʼéyó táʼan ña̱ kéʼéna (kaʼvi Filipenses 3:17-19). Soo ná ndakaʼányó, sava yichi̱ va̱ása vií kana ña̱ ndáka̱xinna keʼéna, saáchi ndiʼiyó iin sana kíxaa̱ tu̱ndóʼo nu̱úyó á ndóʼoyó iin ña̱ʼa ña̱ kǒo níndákanixi̱níyó kundoʼoyó (Ecl. 9:11).

6. Tá vií ndákanixi̱níyó, ¿ndáa ki̱ʼva chíndeétáʼanña xíʼinyó kundiku̱nyó yichi̱ inkana? (Koto na̱ʼná).

⁶ Vií ná ndakanixi̱níyó. Ña̱yóʼo chindeétáʼan xíʼinyó ama kúú na̱ kundiku̱nyó yichi̱ inkana. Ná kotoyó ndáaña ke̱ʼé ta̱ Gedeón xíʼin ta̱ Jefté tá ni̱ya̱ʼana nu̱ú tu̱ndóʼo. Tá ni̱xa̱ʼa̱n na̱ ñuu Efraín ni̱ka̱ʼa̱nna xíʼin ta̱ Gedeón, ndeéní ni̱sa̱a̱na ni̱ka̱ʼa̱nna xíʼinra, ta̱yóʼo va̱ása nísa̱a̱ra xíʼinna chi nda̱a̱ ni̱ka̱ʼa̱nra xíʼinna ña̱ va̱ʼaní chiñu kéʼéna chi ndakúní-inina (Juec. 8:1-3). Tá ni̱ya̱ʼa loʼo ku̱i̱ya̱ na̱ ta̱a na̱ ñuu Efraín sáa̱nína ni̱xa̱ʼa̱nna nu̱ú ta̱ Jefté. ¿Ndáaña ke̱ʼé ta̱yóʼo? ¿Á ke̱ʼé ta̱ Jefté nda̱a̱ táki̱ʼva ke̱ʼé ta̱ Gedeón? Va̱ásaví, saáchi ña̱ ke̱ʼéra kúú ña̱ ka̱nitáʼanra xíʼinna (Juec. 12:1-4). ¿Ndáaña sákuaʼayó xíʼin ña̱yóʼo? Sana ndoʼoyó nda̱a̱ táki̱ʼva ndóʼo inka na̱ hermano, soo ¿á inkáchi íyo ña̱ ndaka̱xinyó keʼéyó? Yóʼo kúú ña̱ xíniñúʼu ndakani vií xi̱níyó. Tá xa̱a̱ ki̱ʼinyó kuenta ndáaña kivi kundoʼoyó, kivi ndaka̱xinyó kundiku̱nyó yichi̱ na̱ hermano á kivi ndaka̱xinyó keʼéyó inka ña̱ʼa (Prov. 2:11).

7. ¿Ndáaña kivi keʼéyó ña̱ va̱ʼa kundiku̱nyó yichi̱ na̱ vií kéʼé sava ña̱ʼa? (Koto na̱ʼná).

⁷ Ná kotoyó ndáa ki̱ʼva íyo ña̱ kéʼéyó. Ña̱ va̱ʼa kundiku̱nyó yichi̱ na̱ kéʼé ña̱ va̱ʼa ná nda̱ka̱tu̱ʼunyó miíyó ña̱yóʼo: “¿Á xíniñúʼu nasamai̱ ki̱ʼva ña̱ íyoi̱ ña̱ va̱ʼa sakúsi̱íi̱-ini Jehová? ¿Ndáaña xíniñúʼu chika̱i̱ ndee̱ viíka keʼíi̱?”. Ná kotoyó ndáana viíní kéʼé ña̱yóʼo (2 Cor. 13:5). Soo su̱ví ña̱yóʼo kúni̱ kachiña ña̱ kooyó nda̱a̱ táki̱ʼva íyo na̱kán, saáchi ña̱ kúni̱yó kúú ña̱ kundiku̱nyó yichi̱na ta vií keʼéyó ña̱ʼa.

8. ¿Ndáaña káʼa̱n Biblia xa̱ʼa̱ ta̱ Noé, ta̱ Moisés xíʼin xa̱ʼa̱ ta̱ Job? (Job 2:3).

⁸ Ná kundiku̱nyó yichi̱ na̱ ke̱ʼé ña̱ va̱ʼa nu̱ú Jehová. Sava yichi̱ Biblia chítáʼanña na̱ xi̱ndasakáʼnu Ndióxi̱ xíʼin inka na̱ yiví ña̱ va̱ʼa kundiku̱nyó yichi̱na. Sava na̱ ta̱a na̱ nda̱kúní ni̱xi̱yo ini xíʼin Ndióxi̱ xi̱kuu ta̱ Noé, ta̱ Moisés xíʼin ta̱ Job. Tiempo tá ni̱xi̱yo ta̱ Noé, iinlá ta̱yóʼo kúú ta̱ nda̱kúní ni̱xi̱yo ini xíʼin Ndióxi̱, tiempo tá ni̱xi̱yo ta̱ Moisés iinlá ta̱yóʼo kúú ta̱ vitání ni̱xi̱yo ini nu̱ú ndiʼina, ta tiempo tá ni̱xi̱yo ta̱ Job iin ta̱yóʼo kúú ta̱ kǒo ku̱a̱chi níkíʼvi nu̱ú Ndióxi̱ (Gén. 7:1; Núm. 12:3; kaʼvi Job 2:3). U̱ni̱ saá na̱yóʼo va̱ʼaní ña̱ ke̱ʼéna ta kivi kundiku̱nyó yichi̱na (1 Cor. 11:1).

9. ¿Ndáa ki̱ʼva xíniñúʼu ndakanixi̱níyó xa̱ʼa̱ na̱ káʼa̱n Biblia xa̱ʼa̱?

⁹ Jehová kǒo kúni̱ra ña̱ ná ndakava-iniyó tá xa̱a̱ káʼviyó xa̱ʼa̱ na̱kán, saáchi kivi ndakanixi̱níyó ña̱ va̱ása kuchiñuyó xa̱a̱yó keʼéyó nda̱a̱ táki̱ʼva ke̱ʼé na̱kán. Ná ndakaʼányó chi na̱ yiví ku̱a̱chi xi̱kuutu na̱kánva. Va̱ása níkaʼyira xa̱ʼa̱ na̱yóʼo ña̱ ndatiinyó ku̱a̱chi xíʼin miíyó, chi ña̱ kúni̱ra kúú ña̱ ná sakúaʼayó xíʼin na̱yóʼo. Ña̱ kíʼinra kuenta xíʼin kúú ña̱ chíkaa̱yó ndee̱ ña̱ kuniso̱ʼoyó ña̱ káʼa̱nra xíʼinyó, ña̱ kuʼvi̱-iniyó kuniyóra ta su̱ví ña̱ chitáʼanyó miíyó xíʼin inkana (Sal. 7:11; Mal. 3:16). Tá kíʼinyó kuenta ña̱ kǒo kívi keʼéyó ndiʼi ña̱ xi̱keʼé na̱ xi̱ndasakáʼnu Ndióxi̱ tiempo xi̱naʼá na̱ káʼa̱n Biblia xa̱ʼa̱, ná kǒo ndakava-iniyó xa̱ʼa̱ ña̱yóʼo.

10. ¿Ndáa ki̱ʼva kundiku̱nyó yichi̱ na̱ níʼi yichi̱ nu̱úyó? (Hebreos 13:7).

¹⁰ Ná kundiku̱nyó yichi̱ na̱ níʼi yichi̱ nu̱úyó (kaʼvi Hebreos 13:7). ¿Ndáa ki̱ʼva kundiku̱nyó consejo yóʼo? Ña̱ nu̱ú, ná ndakanixi̱níyó xa̱ʼa̱ ña̱ va̱ʼa ña̱ xa̱a̱ ndákiʼinna xa̱ʼa̱ ña̱ viíní íyo ña̱ nda̱kaxinna ke̱ʼéna. Ña̱ u̱vi̱, nu̱úka ña̱ kuni̱yó kooyó nda̱a̱ táki̱ʼva íyo na̱kán, ná chikaa̱yó ndee̱ ña̱ ndasakáʼnuyó Ndióxi̱ nda̱a̱ táki̱ʼva kéʼéna. ¿Ndáa ki̱ʼva keʼéyó ña̱yóʼo? Ná kiʼinyó kuenta xíʼin ña̱ viíní ndáka̱xinna kéʼéna xa̱ʼa̱ ña̱ nda̱kú íyo inina xíʼin Ndióxi̱. Tá kúú, tá yáʼana nu̱ú tu̱ndóʼo ná kiʼinyó kuenta ndáa ki̱ʼva ndíku̱nna ña̱ káʼa̱n Biblia ña̱ va̱ʼa ya̱ʼana nu̱ú ña̱yóʼo. Saátu ná nda̱ka̱tu̱ʼunyó miína ndáa ki̱ʼva chi̱ndeétáʼan tu̱ʼun Ndióxi̱ xíʼinna ña̱ nda̱kaxinna ke̱ʼéna sava ña̱ʼa. Sana ña̱yóʼo kúú ña̱ ke̱ʼé ta̱ Timoteo xa̱ʼa̱ ña̱kán va̱ʼaní xi̱ndiku̱nra yichi̱ ta̱ Pablo. Ña̱kán ta̱ Pablo ni̱ka̱ʼa̱nra ña̱yóʼo xíʼinra: “Va̱ʼaní ndíku̱ún ndiʼi ña̱ sánáʼi̱, ndiʼi ña̱ kéʼíi̱, ña̱ chi̱kaa̱-inii̱ saxínui̱, ña̱ kándíxai̱ Ndióxi̱” (2 Tim. 3:10).

11. ¿Ndáaña xíniñúʼu kiʼinyó kuenta xíʼin?

¹¹ Ná kundiku̱nyó yichi̱ na̱ níʼi yichi̱ nu̱úyó chi va̱ʼaní ndíku̱nna yichi̱ ta̱ Jesús. Soo ná kiʼinníyó kuenta ña̱ kǒo xa̱a̱yó ndukáʼnuníka na̱yóʼo nu̱úyó nu̱úka ña̱ kundiku̱nyó yichi̱ ta̱ Jesús (Mat. 23:10). Sava na̱ cristiano na̱ va̱ása nda̱kú níxi̱yo ini xíʼin Ndióxi̱, na̱ ni̱xi̱yo ñuu Corinto ke̱ʼéna táʼan ña̱yóʼo, ta xa̱ʼa̱ ña̱yóʼo ka̱nitáʼanna ta nda̱taʼví ña̱ congregación (1 Cor. 3:1-4). Tá ná chikaa̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní ta̱ Cristo va̱ása keʼéyó táʼan ña̱ ke̱ʼé na̱yóʼo (1 Cor. 2:16). Xíniñúʼu sakúaʼayó ndakanixi̱níyó nda̱a̱ táki̱ʼva ndákanixi̱ní ta̱ Jesús ta kundiku̱nyó yichi̱ ña̱ sa̱ndákoora nu̱úyó.

¿NDÁAÑA XÍNIÑÚʼU KIʼINYÓ KUENTA XÍʼIN?

12. Tá chítáʼanyó miíyó xíʼin inkana, ¿ndáaña kǒo xíniñúʼu keʼéyó?

¹² Kúni̱yó sakúaʼayó xíʼin ña̱ va̱ʼa ña̱ kéʼé inkana ta kǒo keʼéyó ña̱ va̱ása va̱ʼa kéʼéna. Soo ná kǒo chitáʼanyó miíyó xíʼin ki̱ʼva ña̱ íyona. Ná kotoyó ña̱ káʼa̱n iin ñá hermana ñá káʼa̱n La Atalaya xa̱ʼa̱, ñáyóʼo káchiñá: “Ndiʼi tiempo xi̱chitáʼi̱n miíi̱ xíʼin inka ná hermana ná livika, ná va̱ʼaní nátúʼun xa̱ʼa̱ Ndióxi̱, ná si̱íní-ini. Xa̱ʼa̱ ña̱ xi̱keʼíi̱ ña̱yóʼo, nda̱kanixi̱níi̱ ña̱ va̱ása ndáyáʼvíi̱”. Ña̱ va̱ʼa kǒo kundoʼoyó nda̱a̱ táki̱ʼva ndo̱ʼo ñá hermana yóʼo, ná kiʼinyó kuenta xíʼin ña̱ ka̱ʼa̱nyó nu̱ú inka párrafo (Ecl. 2:14).

13. ¿Nda̱chun va̱ása xíniñúʼu kotoyó ki̱ʼva ña̱ náʼa̱ inkana?

¹³ Ná kǒo kotoyó ki̱ʼva ña̱ náʼa̱ inkana. Ni va̱ʼaní kándíxayó Ndióxi̱, kamaní kíʼinyó kuenta xíʼin ña̱ xítoyó. Ná kotoyó ña̱ ndo̱ʼo ta̱ profeta Samuel tá chi̱ndaʼá Jehová miíra ña̱ ku̱ʼu̱nra ndaka̱xinra ta̱ koo rey nu̱ú na̱ ñuu Israel. Tá xi̱nira ta̱ Eliab ñani ta̱ David ña̱ súkunra ta va̱ʼaní náʼa̱ra ta̱ Samuel nda̱kanixi̱níra, ta̱yóʼo kúú ta̱ nda̱kaxin Jehová. Soo Jehová ni̱ka̱ʼa̱nra ña̱yóʼo xíʼinra: “Na̱ yiví kíʼinna kuenta xíʼin ña̱ xíto kuitína, soo Jehová xítora ña̱ ndíkaa̱ níma̱na” (1 Sam. 16:6, 7). Ña̱kán ná kǒo kotoyó ki̱ʼva ña̱ náʼa̱ inkana. Ña̱ chindeétáʼan xíʼinyó kúú ña̱ kaʼviyó texto ña̱ káʼa̱n ña̱ kǒo xíto Jehová ni ta̱ Jesús ki̱ʼva ña̱ náʼa̱ na̱ yiví (Juan 7:24).b

14. ¿Ndáaña kivi keʼéyó ña̱ va̱ʼa sakúaʼayó xíʼin ña̱ kéʼé inkana?

¹⁴ Tá viíka kéʼé inkana chiñu nu̱úyó ná kǒo ndakava-iniyó. Ná kachiyó ña̱ iin ñá hermana va̱ʼaníka nátúʼunñá xa̱ʼa̱ Ndióxi̱ nu̱ú miíyó, va̱ʼaní kúnda̱a̱-iniñá xíʼin ña̱ ndóʼo na̱ yiví, ndi̱ku̱n kíxáʼañá káʼviñá xíʼinna ta viíní xíniñúʼuñá Biblia. ¿Á kúni̱ kachi ña̱yóʼo ña̱ ndáyáʼvika ña̱ kéʼé ñáyóʼo nu̱ú Jehová nu̱úka ña̱ kéʼé miíyó? Va̱ásaví. Jehová ta̱xira iin chiñu ña̱ liviní ndaʼa̱ ndiʼiyó ña̱ natúʼunyó xa̱ʼa̱ra (1 Cor. 3:9). Nu̱úka ña̱ ndakava-iniyó saáchi va̱ása kívi keʼéyó nda̱a̱ táki̱ʼva kéʼéñá, ná chikaa̱yó ndee̱ ña̱ keʼéyó nda̱a̱ táki̱ʼva kéʼéñá. Inkáchi ná keeyó natúʼunyó xa̱ʼa̱ Ndióxi̱ xíʼinñá ta ná koto va̱ʼayó ndáa ki̱ʼva nátúʼunñá xíʼin na̱ yiví. Ná nda̱ka̱tu̱ʼunyóñá ndáa ki̱ʼva sa̱kúaʼañá viíní sánáʼa̱ñá na̱ yiví saátu ná ka̱ʼa̱nyó xíʼinñá ndáaña kivi keʼéyó ña̱ va̱ʼa viíka sanáʼa̱yó na̱ yiví. Tá saá ná keʼéyó, ña̱yóʼo chindeétáʼanña xíʼinyó ña̱ va̱ʼa kǒo ndakava-iniyó.

15. ¿Ndáaña xíniñúʼu kiʼinyó kuenta xíʼin tá kúni̱yó keʼéyó nda̱a̱ táki̱ʼva kéʼé inkana?

¹⁵ Tá kúni̱yó xa̱a̱yó keʼéyó táʼan ña̱ kéʼé iinna, ná kǒo kundatuyó ña̱ viíní xa̱a̱yó keʼéyó ña̱ʼa nda̱a̱ táki̱ʼva kéʼé na̱kán. Ná ndakanixi̱níyó ña̱ ki̱xáʼayó sákuaʼayó katayó ta ku̱a̱ʼa̱nyó kotoyó iin na̱ va̱ʼaní xíta. Tá xítoyó ndáa ki̱ʼva kéʼé na̱yóʼo ña̱ va̱ʼa katana, saátu kivi keʼé miíyó. Sana va̱ása katavíyó nda̱a̱ táki̱ʼva xíta na̱yóʼo soo va̱ása sandákoovíyó ña̱ sakúaʼayó katayó. Ña̱ va̱ʼa kusi̱í-iniyó katayó va̱ása xíniñúʼu kuxini̱ va̱ʼavíyó. Tá xítoyó ña̱ va̱ʼaní kéʼé inkana ná sakúaʼayó xíʼin ña̱ kéʼéna ta ná kǒo ndakava-iniyó tá va̱ása kívi keʼéyó nda̱a̱ táki̱ʼva kéʼéna. Jehová va̱ása ndátuvíra ña̱ inkáchi ná keʼé ndiʼiyó, soo Jehová kúni̱ra ña̱ iin tá iinyó nda̱a̱ níma̱yó ná kana ña̱ taxiyó ndaʼa̱ra (Col. 3:23).

16. ¿Nda̱chun kǒo kútóo Jehová ña̱ keetáʼanyó xíʼin na̱ hermanoyó? (Gálatas 6:4).

¹⁶ Ná kǒo keetáʼanyó. Na̱ ñuyǐví yóʼo kéetáʼanna saáchi ña̱yóʼo chíndeétáʼanña xíʼinna ña̱ kuchiñuna keʼéna ku̱a̱ʼáka ña̱ʼa nu̱ú inkana (Ecl. 4:4). Soo miíyó na̱ ndásakáʼnu Ndióxi̱ kǒo kéetáʼanyó, va̱ása kánitáʼanyó, ta ni va̱ása kukúíni̱-iniyó á kuu i̱ni̱-iniyó xíʼin inkana (Gál. 5:19-21). Savana kivi ndakanixi̱nína ña̱ ndáyáʼvinína xa̱ʼa̱ ña̱ xíni̱va̱ʼana á xa̱ʼa̱ ña̱ kúúmiína chiñu ti̱xin ñuu Ndióxi̱. Ta savana kivi ndakanixi̱nína ña̱ kǒo xíni̱na keʼéna ku̱a̱ʼá ña̱ʼa ta kǒo ndáyáʼvina nu̱ú Jehová (1 Cor. 12:14, 15). Sava na̱ cristiano na̱ ni̱xi̱yo chí Galacia xi̱keetáʼanna ta nda̱a̱ xi̱kuni̱na sandíʼi-xa̱ʼa̱ táʼanna, ña̱yóʼo kúni̱ kachiña ña̱ kuxíká nu̱ú táʼanna ta nda̱a̱ kuxíkána nu̱ú Jehová (Gál. 5:15, 26). Ña̱ va̱ʼa kǒo kundoʼoyó nda̱a̱ táki̱ʼva ndo̱ʼo na̱yóʼo ná kundiku̱nyó consejo ña̱ ni̱ka̱ʼa̱n ta̱ Pablo nu̱ú Gálatas 6:4 (kaʼviña). Va̱ʼaka ná kundi̱ʼi-iniyó ña̱ kunda̱a̱ka-iniyó xa̱ʼa̱ Ndióxi̱. Kusi̱íka-iniyó tá chíkaa̱yó ndee̱ ña̱ ndasakáʼnuyó Jehová ta su̱ví ña̱ kuxini̱va̱ʼayó nu̱ú inka na̱ hermano.

17. Tá ndíku̱nyó yichi̱ na̱ kéʼé ña̱ va̱ʼa ta kǒo kéʼéyó ña̱ va̱ása va̱ʼa ña̱ kéʼéna, ¿ndáaña va̱ʼa ndákiʼinyó?

¹⁷ Ndiʼi ki̱vi̱ xítoyó ña̱ va̱ʼa kéʼé inkana xíʼin ña̱ va̱ása va̱ʼa kéʼéna. Soo Jehová kúni̱ra ña̱ ná sakúaʼayó xíʼin ña̱ kéʼéna. Tá vií kéʼéyó iin ña̱ʼa vitá ná koo iniyó, soo tá kíʼinyó kuenta ña̱ xíniñúʼu viíka keʼéyó sava ña̱ʼa, ná chikaa̱yó ndee̱ ña̱ viíka keʼéyóña. Ná kundiku̱nyó yichi̱ na̱ kúʼvi̱-ini xíni Jehová tasaá kusi̱í-inira xíʼinyó (Prov. 3:3, 4).