Ná kotoyó ná ñaʼá nda̱a̱ táki̱ʼva xíto Jehová náyóʼo

1, 2. ¿Ndáa ki̱ʼva kéʼéna xíʼin ku̱a̱ʼání ná ñaʼá tiempo vitin?

TIEMPO vitin, ku̱a̱ʼání ná ñaʼá va̱ása íxato̱ʼóna náyóʼo. Sava ná ñaʼá tá xáʼnuna kíʼinna kuenta ña̱ kúni̱ka na̱ yivána ña̱ ná kaku ta̱a válí se̱ʼena nu̱úka ná ñaʼá. Sava ná ñaʼá kǒo kúni̱ na̱ yivána xínina miína ta ni va̱ása ndíʼi̱-inina xa̱ʼa̱na, ta savaná íxandi̱va̱ʼa na̱ veʼena xíʼinná.

² Sava ñuu ndáyáʼvika ta̱a nu̱ú ná ñaʼá. Tá kúú, iin ta̱ superintendente ña̱ circuito ta̱ naní Hans ta̱ íyo ñuu Bolivia, káʼa̱nra ña̱yóʼo: “Sava ñuu na̱ íyo se̱ʼe sánáʼa̱na ta̱ va̱lí se̱ʼena ña̱ ndáyáʼvikaraa nu̱ú ná ñaʼá, xa̱ʼa̱ ña̱kán na̱ ta̱a ndákanixi̱nína ña̱ ndáyáʼviníkana nu̱ú ná ñaʼá”. Iin ta̱ anciano ta̱ naní Shengxian ta̱ ñuu Taiwán, káchira: “Nu̱ú íyoi̱, ku̱a̱ʼání ta̱a ndákanixi̱níra ña̱ kǒo xíniñúʼu ka̱ʼa̱n ná ñaʼá xíʼin na̱ ta̱a xa̱ʼa̱ ña̱ ndákanixi̱níná. Tá iin ta̱a káʼa̱nra xa̱ʼa̱ ña̱ ni̱ka̱ʼa̱n iin ñaʼá sana kǒo ixato̱ʼókanara”. Sava ta̱a káʼa̱nra ña̱ ndáyáʼvi ná ñaʼá, soo xíʼin ña̱ kéʼéra náʼa̱ra ña̱ su̱ví saá íyo ña̱ ndákanixi̱níra. Tá kúú, sana kíxáʼara nátúʼunra tu̱ʼun ña̱ kivi sáxo̱ʼvi̱-ininá.

3. ¿Ndáaña xíniñúʼu keʼé iin ta̱ hermano ña̱ va̱ʼa kǒo ndakanixi̱níra ña̱ ndáyáʼvikara nu̱ú ná ñaʼá? (Efesios 4:22-24).

³ Jehová sanáʼa̱ra ta̱a na̱ ndásakáʼnu miíra ña̱ vií ná keʼéna xíʼin ná ñaʼá, ku̱ʼvi̱-inina kunina náyóʼo ta ná ixato̱ʼónaná (1 Tim. 5:1, 2). Sana iin ta̱ hermano kivi ndakanixi̱níra ña̱ ndáyáʼvikara nu̱ú ná ñaʼá chi saá sa̱náʼa̱nara ñuura. Soo kiviva nasamara ña̱ ndákanixi̱níra ta kixáʼara kotora ná ñaʼá nda̱a̱ táki̱ʼva xíto Jehová náyóʼo (kaʼvi Efesios 4:22-24). Nu̱ú artículo yóʼo kotoyó ndáa ki̱ʼva xíto Jehová ná ñaʼá ta ndáa ki̱ʼva kundiku̱n ta̱a yichi̱ra.

¿NDÁA KI̱ʼVA KÉʼÉ JEHOVÁ XÍʼIN NÁ ÑAʼÁ?

4. ¿Ndáa ki̱ʼva kéʼé Jehová xíʼin ná ñaʼá?

⁴ Va̱ʼaní yichi̱ chínúu Jehová nu̱úyó saáchi viíní kéʼéra xíʼin ná ñaʼá. Nda̱a̱ táki̱ʼva íyo yiváyó saá íyora ta kúʼvi̱ní-inira xínira ndiʼiyó (Juan 3:16; 2 Cor. 6:18). Ná ñaʼá ná ndásakáʼnu Jehová ndáyáʼviníná nu̱úra saáchi se̱ʼera kúúná. Ná ka̱ʼa̱nyó xa̱ʼa̱ sava ña̱ náʼa̱ ña̱ íxato̱ʼó Jehová ná ñaʼá ta saátu kúʼvi̱ní-inira xíniraná.

5. ¿Nda̱chun va̱ʼa kúnda̱a̱-iniyó ña̱ kǒo kúndasí Jehová xínira ná ñaʼá? (Gálatas 3:26-29).

⁵ Inkáchi ndáyáʼvi ndiʼiyó nu̱ú Jehová. I̱xava̱ʼara ta̱a xíʼin ná ñaʼá nda̱a̱ táki̱ʼva íyo miíra ta kivi na̱ʼa̱na ña̱ va̱ʼa ña̱ kúúmiíra (Gén. 1:27). Inkáchi ña̱ ndíchi ta̱xira ndaʼa̱ ta̱a xíʼin ná ñaʼá ta u̱vi̱ saána kivi keʼéna ku̱a̱ʼání ña̱ʼa, kivi kunda̱a̱-ini u̱vi̱ saána xíʼin ña̱ va̱xi nu̱ú Biblia. Nu̱ú Jehová inkáchi íyo ta̱a xíʼin ná ñaʼá. Ndiʼi na̱ ndásakáʼnu Jehová kúúna ta̱a á ñaʼá ndáyáʼvinína nu̱úra ta káʼa̱nra ña̱ taxira ña̱ kutakuna ndiʼi tiempo nu̱ú ñuʼú yóʼo á ña̱ kaʼndachíñuna chí ndiví (kaʼvi Gálatas 3:26-29). Jehová kǒo kúndasíra xínira ná ñaʼá (2 Crón. 19:7).

6. ¿Nda̱chun va̱ʼa kúnda̱a̱-iniyó ña̱ ndíʼi̱-ini Jehová xa̱ʼa̱ ña̱ ndóʼo ná ñaʼá?

⁶ Xíniso̱ʼora ña̱ káʼa̱nná. Ndáyáʼviní ña̱ ndákanixi̱ní ná ñaʼá nu̱ú Jehová ta saátu ña̱ ndóʼoná. Tá kúú, nda̱kuiinra oración ña̱ ke̱ʼé ñá Raquel xíʼin ñá Ana (Gén. 30:22; 1 Sam. 1:10, 11, 19, 20). Saátu ta̱xira ña̱ ka̱ʼyi nu̱ú Biblia relato ña̱ káʼa̱n ña̱ xi̱niso̱ʼo na̱ ta̱a ña̱ ni̱ka̱ʼa̱n ná ñaʼá xíʼinna. Ná ka̱ʼa̱nyó xa̱ʼa̱ savana. Jehová ni̱ka̱ʼa̱nra xíʼin ta̱ Abrahán ña̱ ná kuniso̱ʼora ña̱ káʼa̱n ñá síʼira ñá Sara xíʼinra (Gén. 21:12). Ta̱ rey David xi̱niso̱ʼora ña̱ ni̱ka̱ʼa̱n ñá Abigaíl xíʼinra, ta ni̱ka̱ʼa̱nra xíʼinñá ña̱ mií Jehová chi̱ndaʼá miíñá ña̱ ni̱ka̱ʼa̱nñá xíʼinra (1 Sam. 25:32-35). Ta̱ Jesús ke̱ʼéra táki̱ʼva kéʼé yivára, saáchi viíní xi̱niso̱ʼora ña̱ ni̱ka̱ʼa̱n siʼíra ñá María xíʼinra (Juan 2:3-10; 5:19). Nda̱a̱ táki̱ʼva xi̱toyó ejemplo yóʼo Jehová íxato̱ʼóra ná ñaʼá ta xíniso̱ʼora ña̱ káʼa̱nná xíʼinra, tasaá kúni̱ra ña̱ ná keʼé ta̱a xíʼin ná ñaʼá.

7. ¿Ndáaña náʼa̱ nu̱úyó ña̱ ndáa-ini Jehová ná ñaʼá? (Koto na̱ʼná).

⁷ Ndáa-iniraná. Tá kúú, Jehová ta̱xira chiñu ndaʼa̱ ta̱ Adán xíʼin ñá Eva ña̱ sakútuna nu̱ú ñuʼú yóʼo ta kiʼinna kuenta xíʼinña (Gén. 1:28). Kǒo níndakanixi̱ní Jehová ña̱ ndáyáʼvika ta̱ Adán, chi tá ta̱xira ñá Eva ña̱ kooñá ñá síʼira ni̱ka̱ʼa̱nra ña̱ chindeétáʼanñá xíʼinra. Saátu ta̱xira chiñu ndaʼa̱ ñá Débora xíʼin ñá Huldá, náyóʼo profeta xi̱kuuná ta ni̱ka̱ʼa̱nra xíʼinná ña̱ ná taxiná consejo ndaʼa̱ na̱ ñuura ta saátu ndaʼa̱ iin ta̱ juez xíʼin iin ta̱ rey (Juec. 4:4-9; 2 Rey. 22:14-20).b Tiempo vitin, Jehová ndáaní-inira ná ñaʼá ná ndásakáʼnu miíra ta táxira ña̱ keʼéná ku̱a̱ʼá chiñu. Ku̱a̱ʼání náyóʼo kúúná publicadora, precursora á misionera. Chíndeétáʼanná xíʼin na̱ íxava̱ʼa veʼe nu̱ú ndásakáʼnuyó Ndióxi̱, ta saátu ña̱ kundaaná salón nu̱ú ndákutáʼanyó xíʼin Betel. Sava náyóʼo káchíñuná Betel, ta inkaná káchíñuná oficina ña̱ traducción. Ku̱a̱ʼání kúú náyóʼo, ta Jehová xíniñúʼuraná ña̱ va̱ʼa sáxi̱nura ña̱ kúni̱ra keʼéra (Sal. 68:11). Kǒo ndákanixi̱ní Jehová ña̱ kǒo xíni̱ ná ñaʼá keʼéná ni iin chiñu á ña̱ kǒo ndee̱ kúúmiíná.

¿Á XÍTOÚN NÁ ÑAʼÁ NDA̱A̱ TÁKI̱ʼVA XÍTO JEHOVÁ NÁYÓʼO?

8. ¿Ndáa ki̱ʼva kivi kunda̱a̱-ini iin ta̱ hermano á vií íyo ña̱ ndákanixi̱níra xa̱ʼa̱ ná ñaʼá?

⁸ Tá ta̱a kúún, kivi kotoún ndáa ki̱ʼva íyo ña̱ ndákanixi̱níún xa̱ʼa̱ ná hermana. ¿Ndáaña kivi chindeétáʼan xíʼún? Ndakanixi̱ní xa̱ʼa̱ ña̱yóʼo. Nda̱a̱ táki̱ʼva íyo iin máquina tú xíniñúʼuna ña̱ va̱ʼa kunda̱a̱-inina á kúúmií na̱ yiví kue̱ʼe̱ níma̱na. Saá íyo na̱ migoyó chi kivi chindeétáʼanna xíʼinyó ta saátu kivi chindeétáʼan tu̱ʼun Ndióxi̱ xíʼinyó ña̱ kunda̱a̱-iniyó á íyo iin ña̱ va̱ása va̱ʼa kéʼéyó á ña̱ ndákanixi̱níyó xa̱ʼa̱ ná ñaʼá, á ña̱ kéʼéyó va̱ása kítáʼanña xíʼin ña̱ káʼa̱n Biblia.

9. ¿Ndáaña xíniñúʼu keʼé iin ta̱ hermano tá káʼa̱n iinna xíʼinra ña̱ viíka xíniñúʼu keʼéra xíʼin ná ñaʼá?

⁹ Ka̱ʼa̱n xíʼin iin na̱ va̱ʼaní ndásakáʼnu Ndióxi̱ na̱ xíni̱ va̱ʼa ndáa ki̱ʼva íyoún (Prov. 18:17). Ta̱ xa̱a̱ ti̱ndaʼún, ñá síʼún kúú ñá xíni̱va̱ʼa ndáa ki̱ʼva íyoún. Ña̱kán kivi nda̱ka̱tu̱ʼún miíñá, á inkaka na̱ hermano na̱ va̱ʼaní ndásakáʼnu Ndióxi̱, pregunta ña̱ va̱xi yóʼo: “¿Ndáa ki̱ʼva xítoún ña̱ kéʼíi̱ xíʼin ná hermana? ¿Á ndákanixi̱níná ña̱ íxato̱ʼíi̱ná? ¿Á íyo iin ña̱ xíniñúʼu viíka keʼíi̱?”. Tá ta̱ kúa̱an kúún, kivi nda̱ka̱tu̱ʼún pregunta yóʼo iin ta̱ hermano á iin ñá hermana na̱ va̱ʼaní ndásakáʼnu Ndióxi̱. Tá káʼa̱n iin na̱ veʼeyó xíʼinyó á iin na̱ migoyó xíʼinyó, xa̱ʼa̱ iin ña̱ʼa ña̱ viíka xíniñúʼu keʼéyó ná kǒo sa̱a̱yó. Va̱ʼaka ná chikaa̱yó ndee̱ ña̱ nasamayó ña̱ kéʼéyó.

10. ¿Ndáaka ña̱ kivi chindeétáʼan xíʼin iin ta̱ hermano ña̱ viíka ndakanixi̱níra xa̱ʼa̱ ná ñaʼá? (Hebreos 4:12).

¹⁰ Kaʼvi tu̱ʼun Ndióxi̱. Tu̱ʼun Ndióxi̱ chindeétáʼan xíʼún ña̱ kunda̱a̱-iniún á vií íyo ña̱ ndákanixi̱níún xíʼin ña̱ kéʼún xíʼin ná hermana (kaʼvi Hebreos 4:12). Tá ná kaʼviún Biblia sakúaʼún xa̱ʼa̱ ta̱a ta̱ viíní ke̱ʼé xíʼin ná ñaʼá, ta saátu kotoún ndáa ta̱a va̱ása vií níxi̱keʼé xíʼinná ta saá kunda̱a̱-iniún ndáana kúú na̱ ndíku̱ún yichi̱. Iin ña̱ kivi keʼéyó kúú ña̱ nandukú va̱ʼayó xa̱ʼa̱ iin tá iin versículo tasaá kǒo ndakanixi̱níyó ña̱ va̱ása va̱ʼa xa̱ʼa̱ ná ñaʼá. Tá kúú, 1 Pedro 3:7 káʼa̱nña ña̱ xíniñúʼu ixato̱ʼóyó ñá síʼiyó ta keʼéyó xíʼinñá táki̱ʼva keʼéyó xíʼin iin ña̱ʼa ña̱ yi̱i̱ní. ¿Á kúni̱ kachi ña̱yóʼo ña̱ kǒo ndáyáʼviñá nu̱ú yi̱i̱ñá? Va̱ásaví. Ta̱ apóstol Pedro va̱ása níkáʼa̱nra ña̱ va̱ása ndíchi va̱ʼa ná ñaʼá á kǒo ndásakáʼnuná Ndióxi̱ nda̱a̱ táki̱ʼva kéʼé ta̱a, chi ña̱ xi̱kuni̱ kachira kúú ña̱ ndakúka ta̱a nu̱ú ná ñaʼá. Suvi nu̱ú versículo yóʼo sa̱ndákaʼánra ta̱a ta̱ xa̱a̱ ti̱ndaʼa̱ ta̱ ni̱xi̱yo tá siglo nu̱ú, ña̱ miíra ta saátu xíʼin ñá síʼira ni̱ʼína “ña̱ kutakuna”, ta ña̱yóʼo kúni̱ kachiña ña̱ kaʼndachíñuna xíʼin ta̱ Jesús chí ndiví. Ta xíʼin ña̱ ni̱ka̱ʼa̱n ta̱ apóstol yóʼo, ni̱na̱ʼa̱ra nu̱ú ta̱a ña̱ xíniñúʼu ixato̱ʼóna ná ñaʼá nda̱a̱ táki̱ʼva kúni̱ Jehová. Tá ná kaʼviún Biblia ta ndukún consejo nu̱ú iin na̱ migoún, saá kúú ña̱ sakúaʼún ixato̱ʼún ná hermana.

¿NDÁA KI̱ʼVA NÁʼA̱ NA̱ ANCIANO ÑA̱ ÍXATO̱ʼÓNA NÁ HERMANA?

11, 12. ¿Nda̱chun ndáyáʼviní ka̱ʼa̱n na̱ anciano xíʼin ná hermana ña̱ va̱ʼaní chiñu kéʼéna?

¹¹ Na̱ anciano kúúmiína iin chiñu ña̱ ndáyáʼviní ti̱xin congregación, ña̱ xíniñúʼu viíní keʼéna xíʼin ndiʼina, ta saátu xíʼin ná hermana tasaá chinúuna iin yichi̱ va̱ʼa nu̱ú ndiʼina. Ná kotoyó ndáaña kéʼéna ña̱ va̱ʼa na̱ʼa̱na ña̱ íxato̱ʼóna ná hermana ta ndáyáʼvina nu̱úna.

¹² Káʼa̱nna xíʼinná ña̱ va̱ʼaní chiñu kéʼéná. Va̱ʼaní yichi̱ chi̱núu ta̱ apóstol Pablo nu̱ú na̱ anciano, chi ni̱ka̱ʼa̱nra ña̱ va̱ʼaní chiñu kéʼé ná hermana nu̱ú carta ña̱ chi̱ndaʼára ku̱a̱ʼa̱n nu̱ú congregación ña̱ ñuu Roma (Rom. 16:12, 13). Sana ku̱si̱íní-ini ná hermana kán tá ka̱ʼvina carta ña̱ chi̱ndaʼá ta̱ Pablo ti̱xin congregación, saátu íyo tiempo vitin chi na̱ anciano káʼa̱nna xíʼin ná hermana ña̱ va̱ʼaní chiñu kéʼéná ta saátu ña̱ va̱ʼaní káchíñuná nu̱ú Jehová, ta xa̱ʼa̱ ña̱kán náyóʼo kúsi̱í-ininá chi íxato̱ʼónaná. Ña̱ káʼa̱n na̱ anciano xíʼinná kúú ña̱ chindeétáʼan xíʼinná ña̱ va̱ʼa kusi̱íka-ininá ndasakáʼnuná Jehová (Prov. 15:23). Tá káʼa̱n na̱ anciano tu̱ʼun va̱ʼa xíʼin ná hermana xa̱ʼa̱ ña̱ va̱ʼa ña̱ kéʼéná, xíniñúʼu kiʼinna kuenta xíʼin ña̱ káʼa̱nna ña̱ va̱ʼa kǒo na̱ʼa̱ña ña̱ kútóona náyóʼo.

13. ¿Nda̱chun iin ña̱ va̱ʼa kúú ña̱ káxi ná ka̱ʼa̱n na̱ anciano xíʼin ná hermana xa̱ʼa̱ iin chiñu ña̱ va̱ʼa kéʼéná? (Koto na̱ʼná).

¹³ ¿Ndáaña xíniñúʼu keʼé na̱ anciano ña̱ va̱ʼa chikaa̱na ndee̱ xíʼin ná hermana? Iin ñá hermana ñá naní Jessica káʼa̱nñá ña̱yóʼo: “Va̱ʼaníka kúni̱ndi̱ tá káʼa̱nna xíʼinndi̱ ña̱ va̱ʼaní ke̱ʼéndi̱ iin chiñu. Tá kúú, ña̱ sánáʼa̱ndi̱ na̱ va̱lí se̱ʼendi̱ ña̱ koo táxi̱nna reunión á ña̱ ku̱ʼu̱nndi̱ xa̱ʼa̱ na̱ yiví ña̱ va̱ʼa ku̱ʼu̱nna xíʼinndi̱ reunión”. Tá ná hermana kéʼéná iin ña̱ʼa, ta xa̱ʼa̱ ña̱yóʼo káʼa̱n na̱ anciano xíʼinna ña̱ va̱ʼaní chiñu kéʼéná, náyóʼo va̱ʼaní kúniná chi saá túviná ña̱ ndáyáʼviní chiñu kéʼéná.

14. ¿Nda̱chun xíniñúʼu kuniso̱ʼo na̱ anciano ña̱ káʼa̱n ná hermana? (Proverbios 1:5).

¹⁴ Xíniso̱ʼona ña̱ káʼa̱nná. Na̱ anciano na̱ vitá-ini kúnda̱a̱-inina ña̱ su̱ví ña̱ káʼa̱n iinlá mií kuitína kúú ña̱ xíniñúʼu keʼéna, ña̱kán káʼa̱nna xíʼin ná hermana ndáaña ndákanixi̱níná xa̱ʼa̱ sava ña̱ʼa ta viíní xíniso̱ʼona ña̱ káʼa̱nná (kaʼvi Proverbios 1:5).c Va̱ʼaní chíkaa̱ña ndee̱ xíʼin na̱ anciano ta saátu xíʼin ná hermana tá keʼéna saá. Iin ta̱ anciano ta̱ káchíñu Betel ta̱ naní Gerardo, káchira: “Ña̱ káʼa̱n ná hermana chíndeétáʼanña xíʼi̱n ña̱ va̱ʼaníka keʼíi̱ chiñu ña̱ kúúmiíi̱, sava yichi̱ ná hermana kúú ná ku̱a̱ʼáníka tiempo kéʼé iin chiñu, ta xa̱ʼa̱ ña̱yóʼo xíni̱níná keʼénáña”. Ti̱xin congregación íyo ná hermana ná kúú precursora ña̱kán va̱ʼaní xíni̱ná ndáa ki̱ʼva íyo na̱ yiví na̱ íyo territorio. Iin ta̱ anciano ta̱ naní Bryan káchira: “Ku̱a̱ʼání chiñu kéʼé ná hermana ti̱xin ñuu Jehová”. Tá ná kuniso̱ʼo na̱ anciano ña̱ káʼa̱n ná hermana, ku̱a̱ʼání ña̱ʼa sakúaʼana.

15. ¿Ndáaña xíniñúʼu keʼé na̱ anciano tá xíniso̱ʼona ña̱ káʼa̱n ná hermana xíʼinna? (Koto na̱ʼná).

¹⁵ Na̱ anciano kíʼinna kuenta xíʼin ndiʼi ña̱ káʼa̱n ná hermana. Iin ta̱ anciano ta̱ naní Edward, káchira: “Ña̱ káʼa̱n ná hermana ná xa̱a̱ ku̱a̱ʼá tiempo kéʼé iin chiñu kivi chindeétáʼanña xíʼin iin ta̱ hermano ña̱ kotora ndáa ki̱ʼva keʼéra iin ña̱ʼa”. Sava yichi̱, kǒo kéʼévína táki̱ʼva ni̱ka̱ʼa̱n iin ñá hermana, soo na̱ anciano táxina tíxa̱ʼvi ndaʼa̱ñá xa̱ʼa̱ ña̱ ni̱ka̱ʼa̱nñá ta saátu xa̱ʼa̱ ña̱ ndákanixi̱níñá.

16. ¿Ndáa ki̱ʼva náʼa̱ na̱ anciano ña̱ ndáa-inina ná hermana? (Koto na̱ʼná).

¹⁶ Ndáa-inina ná hermana. Iin ki̱ʼva ña̱ náʼa̱ na̱ anciano ña̱ ndáa-inina ná hermana kúú ña̱ táxina chiñu ndaʼa̱ná tasaá va̱ʼa kéʼéná ña̱ xíni̱ná. Tá kúú ku̱a̱ʼání ná hermana kéʼéna chiñu ti̱xin Betel, ndásaviíná sava ña̱ʼa, sátáná ña̱ʼa, kéʼéná programación, contabilidad, traducción, corrección, á kéʼéná inkaka ña̱ʼa. Saátu káchíñuná veʼe nu̱ú ndásakáʼnuyó Ndióxi̱, chíndeétáʼanná xíʼin na̱ yáʼa nu̱ú tu̱ndóʼo ta saátu kávaná maquina. Na̱ anciano ndáa-inina ná hermana xa̱ʼa̱ ña̱kán táxina chiñu ndaʼa̱na saáchi kúnda̱a̱-inina ña̱ va̱ʼaní káchíñuná.

ÑA̱ VA̱ʼA NDÁKIʼINYÓ TÁ XÍTOYÓ NÁ ÑAʼÁ NDA̱A̱ TÁKI̱ʼVA XÍTO JEHOVÁ NÁYÓʼO

17. ¿Ndáa ki̱ʼva kúni ná hermana tá xítoyóná nda̱a̱ táki̱ʼva xíto Jehová náyóʼo?

¹⁷ Nda̱a̱ táki̱ʼva kéʼé Jehová, saátu miíyó kúʼvi̱-iniyó xíniyó ná hermana ta nda̱a̱ táki̱ʼva íyo na̱ veʼeyó saá íyoná ta ndáyáʼviníná nu̱úyó (1 Tim. 5:1, 2). Kúsi̱íní-iniyó ña̱ inkáchi kítáʼanyó ndásakáʼnuyó Jehová xíʼinná ta kúni̱yó ña̱ ná kunda̱a̱-ininá ña̱ íxato̱ʼóyóná. Iin ñá hermana ñá naní Vanessa káchiñá: “Táxiníi̱ tíxa̱ʼvi ndaʼa̱ Jehová saáchi ti̱xin ñuura íyo na̱ ta̱a na̱ íxato̱ʼó yi̱ʼi̱ ta xa̱ʼa̱ ña̱yóʼo va̱ʼaní kúnii̱”. Iin ñá hermana ñá ñuu Taiwán káchiñá: “Táxiníi̱ tíxa̱ʼvi ndaʼa̱ Jehová ta saátu ndaʼa̱ na̱ ñuura saáchi ndáyáʼviní chiñu ña̱ kéʼéndi̱ nu̱úra ta íxato̱ʼóna ndi̱ʼi̱. Xa̱ʼa̱ ña̱yóʼo kúni̱níkai̱ ndasakáʼnui̱ Jehová ta va̱ʼaní kúnii̱ ña̱ ndíka̱i̱ ñuura”.

18. ¿Ndáa ki̱ʼva ndóʼo Jehová tá xítora ña̱ íxato̱ʼó ta̱ hermano ná hermana?

¹⁸ Kúsi̱íní-ini Jehová tá xítora ña̱ ndiʼi miíyó ta̱a na̱ ñúʼu ti̱xin ñuura chíkaa̱yó ndee̱ ña̱ ixato̱ʼóyó ná ñaʼá nda̱a̱ táki̱ʼva kéʼé miíra (Prov. 27:11). Iin ta̱ anciano ta̱ ñuu Escocia ta̱ naní Benjamín káchira: “Ku̱a̱ʼání na̱ ta̱a na̱ kǒo ndásakáʼnu Jehová kǒo íxato̱ʼóna ná ñaʼá, ña̱kán tá iin ñaʼá kíʼviñá ti̱xin salón, xíniñúʼu kotoná ña̱ miíyó ta̱ ndásakáʼnu Jehová síínva íyoyó”. Ná chikaa̱yó ndee̱ ña̱ keʼéyó táki̱ʼva kéʼé Jehová ta kuʼvi̱-iniyó kuniyó ná hermana ta ixato̱ʼóyóná (Rom. 12:10).