Jehová kǒo nándóso-inira xa̱ʼa̱ na̱ káʼa̱n tu̱ʼun seña

Jehová kúni̱ra ña̱ ndiʼi na̱ yiví ná kunda̱a̱-ini xa̱ʼa̱ra ta saátu xa̱ʼa̱ Reinora (1 Timoteo 2:3, 4). Xa̱ʼa̱ ña̱kán, na̱ testigo Jehová távána Biblia xíʼin inkaka tutu ña̱ chíndeétáʼan xíʼin ku̱a̱ʼání na̱ yiví ña̱ kunda̱a̱-inina xa̱ʼa̱ Ndióxi̱ ta nda̱a̱ na̱ kǒo kívi kuniso̱ʼo kivi kuniñúʼu ña̱yóʼo. Ta na̱ ñuu Ndióxi̱ xa̱a̱ távána ku̱a̱ʼání video ña̱ káʼa̱n xa̱ʼa̱ Ndióxi̱ ta xa̱a̱ yáʼaka 100 nu̱ú tu̱ʼun ña̱ seña kánaña.a ¿Ndáa ki̱ʼva távána ta xáxana ndiʼi ña̱yóʼo?

¿Ndáa ki̱ʼva távándi̱ video ña̱ tu̱ʼun seña?

Iníísaá ñuyǐví íyo na̱ sándaya̱ʼa tutu ña̱ tává na̱ ñuu Ndióxi̱ xa̱a̱ síín nu̱ú tu̱ʼun seña. Tá xa̱a̱ kéʼé na̱ equipo yóʼo traducción iin tutu, viíní xítona ndáa ki̱ʼva íyoña tasaá ndáka̱xinna ndáa ki̱ʼva sandáya̱ʼana ña̱ káʼa̱nña tu̱ʼun seña ña̱ káʼa̱n miína. Tá xa̱a̱ ndíʼi, saá távána iin video xíʼin ña̱yóʼo. Vitin, íyo 60 equipo na̱ tává tutu yóʼo ndiʼi yo̱o̱, ña̱ va̱ʼa chindeétáʼanna xíʼin na̱ yiví ña̱ kaʼvina Biblia. Ta saátu íyo 40 equipo na̱ kéʼé chiñu yóʼo sava kuití yichi̱.

Tá ya̱chi̱, ku̱a̱ʼání xu̱ʼún xi̱xiniñúʼundi̱ ña̱ va̱ʼa tavándi̱ video ña̱ tu̱ʼun seña. Saáchi cámara xíʼin inkaka ña̱ʼa ña̱ xi̱xiniñúʼundi̱ yaʼviní ni̱xi̱yoña nu̱úka ña̱ xíniñúʼundi̱ tiempo vitin. Ta saátu ña̱ va̱ʼa keʼéndi̱ grabación video yóʼo, xi̱xiniñúʼundi̱ iin cuarto ña̱ viíní xi̱xiniñúʼu kundasi. Sava yichi̱ xi̱xiniñúʼu keʼé xa̱ándi̱ cuarto yóʼo, ta savatu yichi̱ xi̱xiniñúʼu nasamandi̱ ki̱ʼva ña̱ íyo iin veʼe ña̱ va̱ʼa keʼéndi̱ chiñu yóʼo iniña. Xa̱ʼa̱ ña̱kán, ña̱ va̱ʼa satándi̱ ndiʼi ña̱ʼa ña̱ kuniñúʼu na̱ equipo na̱ káʼa̱n tu̱ʼun seña ta saátu ña̱ va̱ʼa kuva̱ʼa veʼe yóʼo, xi̱xiniñúʼundi̱ yáʼaka 30,000 dólar.b

Ña̱ va̱ʼa viíní kuniñúʼu na̱ ñuu Ndióxi̱ donación ña̱ táxi ndiʼi na̱ hermano, ndúkúndi̱ ki̱ʼva ña̱ nasamandi̱ ki̱ʼva ña̱ kéʼéna chiñu yóʼo. Xa̱ʼa̱ ña̱yóʼo, xíniñúʼundi̱ ña̱ʼa ña̱ núuka ya̱ʼvi ta va̱ʼaní chíndeétáʼanña xíʼin na̱ equipo yóʼo. Tá kúú, va̱ása xíniñúʼukana iin cuarto ña̱ kútu̱ní ndási nu̱ú kivi keʼéna video tu̱ʼun seña. Iin tá iin na̱ equipo yóʼo kivi keʼéna grabación video ini oficinana ta kivi kuniñúʼuna iin nama̱ ña̱ kúii̱ ña̱ keʼénaña. Tá ku̱a̱ʼá na̱ hermano yáʼa nu̱ú iin video, iin tá iinna kivi keʼéna grabación ña̱yóʼo ini oficina nu̱ú káchíñuna á kivitu keʼénaña nda̱a̱ veʼena.

Saátu ke̱ʼéndi̱ programa nu̱ú internet ña̱ kivi chindeétáʼan xíʼin na̱ equipo yóʼo, ña̱ va̱ʼa tavána video tutu ña̱ xíniñúʼuna. Xa̱ʼa̱ ña̱yóʼo loʼoka tiempo xíniñúʼuna ña̱ távána video tu̱ʼun seña. Kúsi̱íní-ini na̱ hermano xa̱ʼa̱ ndiʼi video yóʼo. Iin ta̱ hermano ta̱ naní Alexánder káchira: “Kúsi̱íní-inii̱ saáchi ku̱a̱ʼáníka video ña̱ tu̱ʼun seña ki̱xáʼa kána nu̱úka ña̱ xi̱kana tá ya̱chi̱. Ndiʼi ki̱vi̱ xa̱a̱ síín síín video xítoi̱”.

Tiempo vitin, ña̱ va̱ʼa ixatu̱ʼvandi̱ ndiʼi ña̱ʼa ña̱ va̱ʼa kuniñúʼu na̱ equipo ña̱ traducción, xíniñúʼundi̱ ki̱ʼva 5,000 dólar. Ta xa̱ʼa̱ ña̱yóʼo kivi kana ku̱a̱ʼáka video xa̱a̱ síín síín tu̱ʼun seña.

¿Ndáa ki̱ʼva ndáxaxána video ña̱ kána tu̱ʼun seña?

Tá sándiʼina kéʼéna grabación iin video, xíniñúʼu chindaʼánaña ndaʼa̱ na̱ xíniñúʼuña. Xa̱a̱ íyo ku̱a̱ʼání ku̱i̱ya̱, tá xi̱sandíʼi na̱ equipo ña̱ seña xi̱keʼéna iin video xi̱chindaʼánaña ndaʼa̱ inka na̱ empresa ta na̱kán kúú na̱ xi̱ndasaña iin caset á disco, ta tándi̱ʼi saá kúú ña̱ xi̱chindaʼánaña ndaʼa̱ na̱ congregación. Ta ña̱ va̱ʼa keʼéna ndiʼi ña̱yóʼo, xi̱xiniñúʼuna ku̱a̱ʼání tiempo xíʼin xu̱ʼún. Tá kúú, tá ku̱i̱ya̱ 2013 xi̱niñúʼundi̱ yáʼaka 2,000,000 ña̱ dólar ña̱ va̱ʼa tavándi̱ disco ña̱ tu̱ʼun seña.

Na̱ yiví na̱ va̱ása kívi ka̱ʼa̱n xi̱kusi̱íní-inina xíʼin video yóʼo, soo mií ña̱ nda̱a̱ xi̱ ixayo̱ʼvi̱nívaña xíʼinna ña̱ kuniñúʼuna ña̱yóʼo, kachikaví tá ki̱xáʼa kána ku̱a̱ʼání caset xíʼin disco. Sava yichi̱, ku̱a̱ʼání disco xi̱xiniñúʼuna ña̱ va̱ʼa tavána video iinlá kuití libro ña̱ va̱xi nu̱ú Biblia. Iin ta̱ hermano ta̱ íyo chí Brasil ta̱ naní Gilnei káchira: “Tá xi̱kunindi̱ kaʼvindi̱ iin texto nu̱ú na̱ yiví siʼna xi̱xiniñúʼu nandukúndi̱ caset nu̱ú va̱xi ña̱yóʼo, ta tándi̱ʼi saáví nandukúndi̱ versículo ña̱ kúni̱ndi̱ kaʼvindi̱. Xi̱ ixayo̱ʼvi̱níña xíʼinndi̱”. Iin ñá hermana ñá naní Rafayane ñá xi̱xiniñúʼu disco yóʼo káchiñá: “Xi̱kunaaníi̱ tá xi̱kaʼvii̱ saáchi xi̱xiniñúʼi̱ ku̱a̱ʼání tiempo ña̱ nandukúi̱ texto xíʼin inkaka ña̱ káʼa̱n xa̱ʼa̱ña”. Ta tá xi̱xaʼa̱n na̱ hermano predicación, xi̱xiniñúʼu kuniʼina disco xíʼin caset ña̱ va̱ʼa chikaa̱naña koto na̱ yiví kán nu̱ú tele miína tasaá kunda̱a̱-inina xa̱ʼa̱ ña̱ káʼa̱n Ndióxi̱”. Sava na̱ hermano xi̱xaʼa̱n DVD xíʼinna nu̱ú xi̱chikaa̱na disco ña̱ koto na̱ yiví, soo tá ni̱ya̱ʼa loʼo ka̱na iin DVD ña̱ xi̱kuumií iin pantalla loʼo ta va̱ʼaníka xi̱xiniñúʼu na̱ hermano ña̱yóʼo. Ta̱ Bobby ta̱ íyo chí ñuu Estados Unidos káʼa̱nra: “Tá xa̱a̱ ndi̱ʼi ka̱ʼvindi̱ iin texto nu̱ú na̱ yiví ta xi̱kuni̱ndi̱ kaʼvindi̱ inkaña nu̱úna xi̱xiniñúʼu nasamandi̱ disco, xa̱ʼa̱ ña̱yóʼo xi̱ ixayo̱ʼvi̱níña xíʼinndi̱ ña̱ kuniñúʼundi̱ Biblia tá xi̱natúʼunndi̱ xíʼin na̱ yiví”.

Tá ku̱i̱ya̱ 2013, na̱ ñuu Jehová ta̱vána aplicación JW Library Sign Language ta nu̱ú ña̱yóʼo va̱ʼa sánuu na̱ hermano video ña̱ íyo tu̱ʼun seña nu̱ú teléfono á nu̱ú tabletana. Tá xa̱ʼa̱, iinlá tu̱ʼun seña ña̱ káʼa̱nna chí Estados Unidos xi̱kixi nu̱úña, soo tá ku̱i̱ya̱ 2017 na̱samanaña ta vitin ku̱a̱ʼáníka tu̱ʼun seña kúúmiíña ta ku̱a̱ʼáníkana kivi kuniñúʼuña. Ni̱kusi̱íní-ini na̱ hermano xíʼin ña̱yóʼo. Iin ta̱ hermano ta̱ íyo chí Brasil ta̱ naní Juscelino, káchira: “Nda̱kanda̱ní-inii̱ tá ka̱na ña̱yóʼo. Saáchi ki̱ʼii̱n kuenta ña̱ kúʼvi̱ní-ini na̱ Cuerpo Gobernante xínina na̱ va̱ása kívi káʼa̱n ta kúni̱na ña̱ ná xa̱a̱ndi̱ sakúaʼandi̱ xa̱ʼa̱ Jehová nda̱a̱ táki̱ʼva kéʼé na̱ yiví na̱ va̱ʼa káʼa̱n. Tá ka̱na ña̱ aplicación yóʼo, ni̱kusi̱íní-inii̱ ta xi̱kuni̱níkai̱ kaʼvii̱ Biblia”.

Tiempo vitin, távándi̱ ku̱a̱ʼání video ña̱ íyo tu̱ʼun seña chí nu̱ú sitio ña̱ jw.org xíʼin nu̱ú aplicación JW Library. Xa̱ʼa̱ ña̱yóʼo, ña̱ va̱ʼa sandáya̱ʼa na̱ káʼa̱n tu̱ʼun seña iin tutu ta nduuña iin video, siʼna kéʼéna grabaciónña ta tándi̱ʼi sándaanaña nu̱ú internet, va̱ása xíniñúʼu ya̱ʼa ku̱a̱ʼání yo̱o̱ á ku̱i̱ya̱ chi sava kuití ki̱vi̱ yáʼa ta xa̱a̱ kánaña. Ta ku̱a̱ʼání video yóʼo inkáchi tiempo kánaña xíʼin tutu ña̱ xíniñúʼu na̱ hermano na̱ va̱ʼa káʼa̱n.

Ná kotoyó ña̱ nátúʼun sava na̱ hermano na̱ va̱ása kívi ka̱ʼa̱n. Iin ñá hermana ñá naní Klízia káchiñá: “Iinlá na̱ ñuu Jehová kúú na̱ ndixa ndíʼi̱ní-ini xa̱ʼa̱ na̱ yiví na̱ va̱ása kívi ka̱ʼa̱n, chi táxina ña̱ xíniñúʼundi̱ ña̱ sakúaʼandi̱ xa̱ʼa̱ra. Kǒo nda̱a̱ ni iinka na̱ kéʼé táʼan ña̱yóʼo. Ta ta̱ Vladimir káchira: “Ndiʼi video ña̱ kána náʼa̱ña nu̱úi̱ ña̱ kúʼvi̱ní-ini Jehová xínira na̱ va̱ása kívi ka̱ʼa̱n nda̱a̱ táki̱ʼva kúʼvi̱-inira xínira ndiʼi na̱ va̱ʼa káʼa̱n”.

Nu̱ú ku̱a̱ʼání video ña̱ íyo tu̱ʼun seña va̱xi tu̱ʼun yóʼo: “Tutu yóʼo va̱ása íxi̱kóndi̱ña. Ku̱a̱ʼa̱nña iníísaá ñuyǐví, ña̱kán kunda̱a̱-ini na̱ yiví xa̱ʼa̱ ña̱ sánáʼa̱ Tu̱ʼun Ndióxi̱, ta kúva̱ʼaña xíʼin xu̱ʼún ña̱ táxi na̱ yiví xíʼin ndiʼi níma̱na”. Táxiníndi̱ tíxa̱ʼvi ndaʼa̱ndó xa̱ʼa̱ ndiʼi donación ña̱ táxindó xíʼin ndiʼi níma̱ndó, tá kúú ña̱ táxindó nu̱ú donate.jw.org. Xu̱ʼún yóʼo chíndeétáʼanña xíʼinndi̱ ña̱ tavándi̱ Biblia xíʼin tutu ña̱ kivi chindeétáʼan xíʼin na̱ yiví ña̱ kaʼvina ta saátu ña̱ kana ndiʼika ña̱ xíniñúʼu na̱ káʼa̱n tu̱ʼun seña.