Iin libro ña̱ va̱ʼaní ku̱vaʼa

Tá enero ña̱ ku̱i̱ya̱ 2021, na̱ Cuerpo Gobernante ni̱ka̱ʼa̱nna ña̱ kana iin libro ña̱ kuniñúʼuyó ña̱ sanáʼa̱yó na̱ yiví xa̱ʼa̱ Biblia, ta ña̱yóʼo naníña Kivi koo si̱íún vitin ta saátu chí nu̱únínu.a ¿Ndáaña ndo̱ʼún tá ku̱ndaa̱-iniún xa̱ʼa̱ anuncio yóʼo? Ta̱ Matthew ta̱ íyo chí Canadá, káʼa̱nra xa̱ʼa̱ ña̱ ndo̱ʼora: “Nda̱kanda̱ní-inii̱ xíʼin ña̱yóʼo. Tá xi̱niso̱ʼi̱ discurso ta xi̱toi̱ video ña̱ káʼa̱n ndáa xa̱ʼa̱ kúú ña̱ ku̱vaʼa libro yóʼo ta ndáa ki̱ʼva xi̱niñúʼunaña ña̱ xa̱a̱ ka̱ʼvina xíʼin na̱ yiví, ni̱kusi̱íníka-inii̱. Xa̱a̱ xi̱kuni̱níi̱ kuumiíi̱ libro yóʼo ta kixáʼíi̱ kuniñúʼi̱ña”.

Na̱samava ki̱ʼva ña̱ sánáʼa̱yó na̱ yiví xíʼin libro yóʼo, soo su̱ví iinlá ña̱yóʼo kuití kúú ña̱ nínasa̱ma. Tá xa̱a̱ kúúmiíún iin libro yóʼo sana xa̱a̱ ki̱ʼún kuenta ña̱ íyo inkaka ña̱ na̱sama. ¿Á kúni̱ún kunda̱a̱-iniún ndáaña kúúña? Ña̱ na̱sama kúú ki̱ʼva ña̱ i̱xava̱ʼana libro ña̱ naní Kivi koo si̱íún vitin ta saátu chí nu̱únínu.

Iin libro xa̱á ña̱ síín ku̱vaʼa

Kúkunní tutu xi̱niñúʼuna ña̱ i̱xava̱ʼanaña. Ña̱ va̱ʼa kuva̱ʼa libro ña̱ naní Kivi koo si̱íún vitin ta saátu chí nu̱únínu, xi̱xiniñúʼuna iin tutu ña̱ kúkunka. ¿Nda̱chun? Saáchi ña̱ libro yóʼo kúúmiíña yáʼaka 600 na̱ʼná ña̱ kúúmií ku̱a̱ʼání color, ku̱a̱ʼáníka na̱ʼná kúúmií ña̱yóʼo nu̱úka libro ña̱ naní ¿Ndáaña sánáʼa̱ Biblia miíyó? Saátu íyo sava táʼví libro yóʼo nu̱ú kǒo ku̱a̱ʼá letra ni na̱ʼná va̱xi. Xa̱ʼa̱ ña̱kán tá yásínní ná koo tutu ña̱ kuniñúʼuna xíʼin libro yóʼo kivi kunaʼa̱ na̱ʼná ña̱ va̱xi nu̱ú inka página. Ña̱ va̱ʼa va̱ása kuu ña̱yóʼo, na̱ hermano na̱ káchíñu Departamento Internacional de Impresión ña̱ íyo chí Wallkill (Nueva York) xi̱niñúʼuna ku̱mí nu̱ú tutu ña̱ xa̱a̱ xíniñúʼuna ña̱ távána tutu ña̱ va̱ʼa kotondosóna ndáaña va̱ʼaka kuniñúʼuna. Tá xa̱a̱ ke̱ʼéna ña̱yóʼo, ta̱xinaña ndaʼa̱ na̱ Comité ña̱ Redacción na̱ Cuerpo Gobernante ña̱ va̱ʼa ná kotonaña, ta na̱yóʼo nda̱kaxinna tutu ña̱ kúkunka. Soo ña̱yóʼo 16% yaʼvikaña nu̱ú tutu ña̱ xa̱a̱ xíniñúʼuyó. Ta ni yaʼvika ña̱yóʼo, va̱ʼaníva chíndeétáʼanña xíʼin na̱ káʼvi libro yóʼo saáchi va̱ása túvi na̱ʼná á letra ña̱ va̱xi nu̱ú inka página.

Ña̱ chi̱kaa̱na chí sa̱tá libro yóʼo. Laminado á película ña̱ chi̱kaa̱na sa̱tá libro ña̱ naní Kivi koo si̱íún vitin ta saátu chí nu̱únínu, va̱ʼaníkaña nu̱ú ña̱ xa̱a̱ xíniñúʼuna xíʼin inkaka tutu. Ña̱ chíkaa̱na sa̱tá inkaka libro ña̱ yéʼe̱ kúúña, soo ña̱ chi̱kaa̱na satá libro yóʼo va̱ása yéʼe̱ña tasaá va̱ʼaníka káxi náʼa̱ na̱ʼná ña̱ va̱xi sa̱táña. Ta ña̱ chi̱kaa̱na sa̱tá libro yóʼo chíndeétáʼanña xíʼinña ña̱ va̱ása kamaní ndiʼi-xa̱ʼa̱ña tá ná kuniñúʼunaña. U̱ʼu̱n yichi̱ yaʼvika ña̱yóʼo nu̱ú ña̱ yéʼe̱ ña̱ chíkaa̱na sa̱tá inkaka tutu. Ña̱kán ku̱a̱ʼá na̱ sucursal inkáchi ka̱chíñuna ña̱ va̱ʼa ndukúna iin ña̱ loʼoka ya̱ʼvi.

Tá saá, ¿nda̱chun xi̱niñúʼuna ña̱yóʼo tá yaʼviníña? Iin ta̱ hermano ta̱ káchíñu ti̱xin Departamento Internacional de Impresión, ni̱ka̱ʼa̱nra ña̱yóʼo: “Xa̱ʼa̱ ña̱ kuniñúʼunína libro yóʼo kǒo kúni̱yó ña̱ kamaní ná ndiʼi-xa̱ʼa̱ña chi ña̱ kúni̱yó kúú ña̱ ku̱a̱ʼání tiempo ná kuniñúʼunaña”. Ta̱ Eduardo ta̱ káchíñu ti̱xin Oficina de la Imprenta ña̱ íyo chí sucursal ña̱ Brasil, káʼa̱nra ña̱yóʼo: “Kúsi̱íní-iniyó saáchi va̱ʼaní ña̱ʼa ña̱ xi̱niñúʼu na̱ ñuu Ndióxi̱ ña̱ ta̱vána libro yóʼo, ta tá xa̱a̱ xíniñúʼuyóña kúsi̱íní-iniyó saáchi liviníña ta va̱ása ndíʼi-xa̱ʼa̱ kamaña. Ta saátu va̱ʼaní xíniñúʼuna donación ña̱ táxi na̱ hermano”.

Ña̱ i̱xayo̱ʼvi̱ xíʼinna ña̱ tavána libro yóʼo tá xi̱ndikaa̱ kue̱ʼe̱ ña̱ COVID-19

Ki̱xáʼandi̱ távándi̱ libro ña̱ naní Kivi koo si̱íún vitin ta saátu chí nu̱únínu tá yo̱o̱ marzo ña̱ ku̱i̱ya̱ 2021, tá ndíkaa̱ kue̱ʼe̱ ña̱ COVID-19, ña̱kán ni̱xi̱yo sava ña̱ i̱xayo̱ʼvi̱ní xíʼinndi̱. Xa̱ʼa̱ ña̱ nda̱si Betel, va̱ása níkivika ku̱ʼu̱n na̱ hermano na̱ xi̱kuu voluntario kachíñuna nu̱ú kána tutu yóʼo ta saátu ni kǒo níkivika kanana inkaka na̱ hermano ña̱ ku̱ʼu̱nna kachíñuna Betel. Ña̱kán va̱ása ku̱a̱ʼáka níxi̱kuu na̱ xi̱kachíñu, ta saátu nda̱kundasi sava imprenta xa̱ʼa̱ ña̱ ni̱ka̱ʼa̱n na̱ chíñu ña̱ va̱ása kivi ndakutáʼan ku̱a̱ʼá na̱ yiví.

¿Ndáaña ke̱ʼéna ña̱ va̱ʼa tavána ndiʼi libro yóʼo? Tá xa̱a̱ ni̱ka̱ʼa̱nna xíʼinna ña̱ kivi ndikó tukuna kachíñuna nu̱ú kána tutu yóʼo, ni̱ka̱ʼa̱nna xíʼin na̱ hermano na̱ ñúʼu Betel na̱ káchíñu inkaka departamento ña̱ ná chindeétáʼanna xíʼinna ña̱ tavána libro yóʼo. Ta̱ Joel ta̱ káchíñu ti̱xin Departamento Internacional de Impresión, ni̱ka̱ʼa̱nra ña̱yóʼo. “Xa̱ʼa̱ ña̱ va̱ʼaní-inina ta saátu xa̱ʼa̱ ña̱ xi̱kuni̱na sakúaʼana keʼéna inkaka chiñu va̱ʼaní chi̱ndeétáʼanna xíʼinndi̱ ña̱ ta̱vándi̱ ndiʼi chiñu ña̱ xi̱kuumiíndi̱”.

Ni ni̱ya̱ʼandi̱ nu̱ú ndiʼi tu̱ndóʼo yóʼo, xa̱a̱ ku̱a̱ʼání libro ña̱ naní Kivi koo si̱íún vitin ta saátu chí nu̱únínu távándi̱ ta ku̱a̱ʼání ña̱ʼa xa̱a̱ xíniñúʼundi̱ xíʼin ña̱yóʼo, tá kúú plancha ña̱ impresión, laminado, tutu, tinta xíʼin pegamento. Tá sa̱kán ni̱ya̱ʼa u̱ʼu̱n kuití yo̱o̱ ña̱ ki̱xáʼandi̱ távándi̱ libro yóʼo, xa̱a̱ yáʼaka 2.3 millón ña̱ dólar xi̱niñúʼundi̱ xíʼin ña̱yóʼo. Ta ña̱ va̱ʼa loʼo xu̱ʼún kuniñúʼundi̱, nda̱saa libro ña̱ ndúkú kuití na̱ congregación kúú ña̱ távándi̱.

“Va̱ʼaní libro yóʼo”

¿Ndáa ki̱ʼva kúni na̱ hermano xíʼin na̱ yiví na̱ káʼvi libro yóʼo? Iin ta̱ hermano ta̱ ñuu Australia ta̱ naní Paul káchira: “Kútóoníi̱ kuniñúʼi̱ libro yóʼo ta kúsi̱íní-inii̱ tá xíniñúʼi̱ña ña̱ sánáʼi̱ na̱ yiví xa̱ʼa̱ Biblia. Va̱ʼaní libro yóʼo saáchi chíndeétáʼanña xíʼinyó ña̱ natúʼun-táʼanyó xíʼin na̱ káʼviyó xíʼin, káxiní íyo ña̱ va̱xi nu̱úña, va̱ʼaní pregunta kúúmiíña, saátu video, na̱ʼná, recuadro xíʼin ña̱ káʼa̱n ndáaka ña̱ kivi keʼé na̱ káʼviyó xíʼin. Va̱ʼaní ku̱vaʼa libro yóʼo ta kúni̱i̱ kuniñúʼi̱ña ña̱ viíka sanáʼi̱ na̱ yiví”.

Iin na̱ sákuaʼa xa̱ʼa̱ Biblia na̱ íyo chí Estados Unidos káchina: “Kútóoníi̱ libro ña̱ sa̱kán ka̱na yóʼo. Na̱ʼná ña̱ va̱xi nu̱úña va̱ʼaní chíndeétáʼanña xíʼi̱n ña̱ kunda̱a̱ka-inii̱ xíʼin ña̱ káʼvii̱, ta nda̱a̱ níma̱i̱ xáa̱ video ña̱ va̱xi nu̱ú ña̱yóʼo. Ndiʼi ña̱yóʼo chíndeétáʼanña xíʼi̱n ña̱ keʼíi̱ ndiʼi ña̱ sákuaʼi̱”. Na̱yóʼo xáʼa̱n ni̱ʼina reunión ta u̱vi̱ yichi̱ káʼvina ti̱xin iin semana.

Kúma̱níkava kana libro yóʼo ku̱a̱ʼání nu̱ú tu̱ʼun. Na̱ Cuerpo Gobernante ni̱ka̱ʼa̱nna ña̱ kixáʼaña kanaña 710 nu̱ú tu̱ʼun, ña̱kán ku̱a̱ʼáníka nu̱ú tu̱ʼun kana ña̱yóʼo nu̱úka libro ña̱ naní ¿Ndáaña sánáʼa̱ Biblia miíyó?

¿Ndáa míí kána ndiʼi xu̱ʼún ña̱ xíniñúʼuna ña̱ keʼéna ndiʼi ña̱yóʼo? Va̱ʼa kéʼéna ña̱yóʼo xa̱ʼa̱ donación ña̱ táxiyó xa̱ʼa̱ obra mundial. Savana táxina donación yóʼo nu̱ú donate.jw.org. Táxiníndi̱ tíxa̱ʼvi ndaʼa̱ndó xa̱ʼa̱ ña̱ va̱ʼaní-inindó. Xa̱ʼa̱ ña̱yóʼo va̱ʼa távándi̱ tutu ña̱ kuniñúʼuyó ña̱ sanáʼa̱yó na̱ yiví xa̱ʼa̱ Biblia, ña̱ va̱ʼa xa̱a̱na kunda̱a̱-inina xa̱ʼa̱ Jehová tasaá kivi kutakuna ndiʼi tiempo (Salmo 22:26).