Na̱sama ki̱ʼva ña̱ távándi̱ tutu ña̱ va̱ʼa chindeétáʼanndi̱ xíʼin “ndiʼi na̱ yiví”

Jehová kúni̱ra ña̱ ndiʼi na̱ yiví ná xa̱a̱ sakúaʼa xa̱ʼa̱ ña̱ nda̱a̱ (1 Timoteo 2:3, 4). Soo miíyó na̱ testigo Jehová xa̱a̱ síín síín tu̱ʼun káʼa̱nyó, ta saátu na̱ yiví na̱ ku̱a̱ʼa̱nyó nátúʼunyó xíʼin. Xa̱ʼa̱ ña̱kán ndiʼi ku̱i̱ya̱ táváyó ki̱ʼva u̱vi̱ mil millón tutu ña̱ káʼvi na̱ yiví na̱ káʼa̱n xa̱a̱ síín síín tu̱ʼun. ¿Ndáaña kéʼéndi̱ ña̱ va̱ʼa viíní kuniñúʼundi̱ xu̱ʼún ña̱ táxindó tasaá tavándi̱ ku̱a̱ʼáka tutu nu̱ú ku̱a̱ʼáka tu̱ʼun?

Va̱ʼaníka máquina xíniñúʼundi̱

Tá ku̱i̱ya̱ 1980, yáʼaka 40 país ni̱xi̱yo imprenta nu̱ú xi̱kana revista. Ta nani saá loʼo tá loʼo ki̱xáʼandi̱ viíka kéʼéndi̱ chiñu yóʼo ta vitin ndáa 9 kuití kúú país nu̱ú íyo imprenta. Soo ndiʼi ku̱i̱ya̱ yóʼo xa̱a̱ ku̱a̱ʼáníka nu̱ú tu̱ʼun kúú ña̱ távándi̱ tutu. Vitin ndáa loʼo kuití kúú imprenta kúúmiíndi̱, tá saá ¿ndáa ki̱ʼva kéʼéndi̱ ña̱ va̱ʼa távándi̱ ku̱a̱ʼáníka tutu nu̱ú ku̱a̱ʼáníka tu̱ʼun? Va̱ʼa kéʼéndi̱ chiñu yóʼo saáchi va̱ʼaníka máquina kúúmiíndi̱.

Máquina xa̱á tú kúúmiíndi̱ imprenta vitin, kamaníka távánú tutu. Tá ya̱chi̱, ku̱a̱ʼáníka tiempo xi̱xiniñúʼundi̱ ña̱ va̱ʼa nasamandi̱ ña̱ʼa ña̱ kúúmií tú máquina ña̱ va̱ʼa tavándi̱ xa̱a̱ síín síín tutu. Vitin kamaníka kéʼéndi̱ chiñu yóʼo saáchi va̱ʼaníka máquina kúúmiíndi̱. Vitin loʼoníkava tiempo xíniñúʼundi̱ ña̱ távándi̱ tutu ña̱ íyo inka nu̱ú tu̱ʼun, ni loʼoní kúú na̱ yiví na̱ káʼa̱n tu̱ʼun yóʼo. Ta ña̱ va̱ʼa tavándi̱ xa̱a̱ síín síín tutu, xíniñúʼundi̱ plancha tú xa̱á tú tává tutu. Sa̱kán íyo loʼo tiempo, ti̱xin iin ku̱i̱ya̱ kuití xi̱niñúʼundi̱ ki̱ʼva u̱vi̱ millón ña̱ dólar ña̱ va̱ʼa satándi̱ plancha yóʼo.a Ña̱kán tá xíniñúʼu tavándi̱ loʼo kuití tutu xíniñúʼundi̱ máquina tú válíka, ta sava túyóʼo távánú tutu xíʼin láser. Tú máquina yóʼo va̱ása xíniñúʼunú plancha ña̱ va̱ʼa tavánú tutu, chi loʼova tutu távánú ña̱kán va̱ása ku̱a̱ʼá xu̱ʼún xíniñúʼundi̱ xíʼinnú.

Sa̱kán íyo u̱ni̱ ku̱i̱ya̱, iníísaá ñuyǐví xi̱niñúʼundi̱ yáʼaka u̱xu̱ millón ña̱ dólar ña̱ sa̱tándi̱ máquina tú xa̱á tú tává tutu ta ndáchitáʼannúña. ¿Ndáa ki̱ʼva xíniñúʼundi̱ máquina yóʼo ña̱ távándi̱ Biblia? Tá ya̱chi̱, ña̱ va̱ʼa tavándi̱ iin Biblia yáʼaka 40 ña̱ʼa xi̱keʼéndi̱ xíʼinña ta saáví xi̱kanaña. Sava ña̱ xi̱keʼéndi̱ xi̱kuu ña̱yóʼo: xi̱kukundi̱ña, xi̱xaʼndandi̱ tutu, xi̱xaʼndandi̱ yuʼúña ta xi̱ndasaviíndi̱ña. Xa̱ʼa̱ ña̱ ku̱a̱ʼání ña̱ xi̱keʼéndi̱ xíʼin Biblia yóʼo, na̱ hermano xi̱niʼinaña xi̱xaʼa̱nna nu̱ú ni̱xi̱yo máquina tú xi̱keʼé iin tá iin chiñu yóʼo ta tándi̱ʼi xi̱sandákuisotáʼannaña. Vitin xa̱ʼa̱ ña̱ kúúmiíndi̱ máquina tú xa̱á, ndáa u̱xu̱ kuitíva ña̱ʼa kéʼéndi̱ xíʼin Biblia tasaá kánaña. Soo vitin máquina tú xa̱á kúú tú kéʼé ndiʼi chiñu yóʼo, xa̱ʼa̱ ña̱kán va̱ása xíniñúʼundi̱ ku̱a̱ʼáníka na̱ kachíñu. Tá ya̱chi̱, Betel ña̱ ndíkaa̱ chí Japón u̱vi̱ mil Biblia xi̱tavána ti̱xin u̱na̱ hora, soo vitin 35,000 Biblia távána ti̱xin u̱na̱ hora.

Loʼoka tutu ndátaánva̱ʼandi̱ ta va̱ása xíniñúʼundi̱ ku̱a̱ʼáníka xu̱ʼún

Ndiʼi ña̱yóʼo chíndeétáʼanña xíʼinndi̱ ña̱ vií kuniñúʼundi̱ xu̱ʼún ña̱ táxi na̱ hermano. Vitin va̱ása távándi̱ ku̱a̱ʼáníka tutu, ta saátu xa̱a̱ síín síínña távándi̱ ña̱kán va̱ása ndátaánva̱ʼakandi̱ ku̱a̱ʼáníña. Ta̱ Gary ta̱ káchíñu ti̱xin Betel ña̱ Estados Unidos káchira: “Kivi ndakanixi̱níyó ña̱ va̱ʼaníka tá ku̱a̱ʼáka tutu ná taváyó tasaá kǒo taváyó loʼo tá loʼoña. Ña̱kán tá ki̱xáʼandi̱ távándi̱ loʼo tá loʼo tutu nda̱kanixi̱níndi̱ ña̱ va̱ʼaka xi̱keʼéndi̱ tá xi̱tavándi̱ ku̱a̱ʼáníkaña. Tá ku̱i̱ya̱ nu̱ú ña̱ ki̱xáʼandi̱ kéʼéndi̱ ña̱yóʼo ki̱ʼva 60,000 dólar xi̱niñúʼundi̱ ña̱ satándi̱ plancha xíʼin tutu ña̱ kuniñúʼundi̱. Soo xa̱ʼa̱ ña̱ kǒo ndátaánva̱ʼakandi̱ libro xíʼin inkaka tutu, ku̱i̱ya̱ saá iin millón sava dólar ki̱ndoo”. Xu̱ʼún yóʼo kivi kuniñúʼundi̱ña ña̱ kuva̱ʼa salón á ña̱ chindeétáʼanndi̱ xíʼin inkaka na̱ hermano na̱ yáʼa nu̱ú tu̱ndóʼo.

Va̱ása xíniñúʼukandi̱ ku̱a̱ʼání lugar nu̱ú ndataánva̱ʼandi̱ tutu, ña̱kán íyo ku̱a̱ʼáníka lugar ña̱ kivi kuniñúʼundi̱ ña̱ keʼéndi̱ inkaka ña̱ʼa ti̱xin Betel. Saátu xa̱ʼa̱ ña̱ si̱lóʼo kuití ñuu távándi̱ tutu, va̱ása xíniñúʼu náʼnuníka koo veʼe ña̱ íxava̱ʼa na̱ ñuu Ndióxi̱. Tá kúú, tá ki̱xáʼa ku̱i̱ya̱ 2018 tutu ña̱ xi̱tavándi̱ chí Betel ña̱ ndíkaa̱ Gran Bretaña vitin távándi̱ña Betel ña̱ ndíkaa̱ chí Europa Central. Xa̱ʼa̱ ña̱yóʼo va̱ása ku̱a̱ʼáníka xu̱ʼún níxiniñúʼundi̱ ña̱ ixava̱ʼandi̱ Betel xa̱á ña̱ ndíkaa̱ chí Chelmsford (Inglaterra).

“Nda̱kaʼún xa̱ʼíi̱”

Xa̱ʼa̱ ña̱ loʼoka tutu ki̱xáʼandi̱ távándi̱ vitin chíndeétáʼanndi̱ xíʼin ku̱a̱ʼáníka na̱ yiví ña̱ kuyatinna nu̱ú Jehová. Vitin va̱ʼa távándi̱ ku̱a̱ʼáka tutu nu̱ú ku̱a̱ʼáníka tu̱ʼun, ni loʼo kuití tutu xíniñúʼundi̱ va̱ʼava távándi̱ ña̱yóʼo. Tá kúú, ki̱ʼva 35,000 kuití na̱ yiví káʼa̱n tu̱ʼun wallisiano ta íyona chí Isla Nueva Caledonia, Wallis xíʼin Futuna. Tá yo̱o̱ agosto ña̱ ku̱i̱ya̱ 2024 ka̱na Biblia ña̱ Traducción del Nuevo Mundo tu̱ʼun wallisiano. Iin ñá hermana ñá naní Selafina káchiñá: “Tá xi̱kaʼvii̱ Biblia tu̱ʼun francés ni̱xi̱yo sava tu̱ʼun ña̱ kǒo níxi̱kunda̱a̱-inii̱ xíʼin, ña̱kán tá nda̱kiʼi̱n Biblia ña̱ tu̱ʼun wallisiano, ndaa ki̱xáʼíi̱ xákui̱. Ke̱ʼíi̱ iin oración nu̱ú Jehová ta ni̱ka̱ʼi̱n xíʼinra: ‘Ay Jehová, nda̱kaʼánvaún xa̱ʼíi̱, xíʼin ña̱yóʼo kíʼii̱n kuenta ña̱ va̱ʼa ndiʼiva na̱ yiví nu̱ún’”.

Ña̱ ñuu República Democrática del Congo ki̱ʼva 500,000 na̱ yiví káʼa̱n tu̱ʼun sanga, soo ni saá libro ña̱ naní Kivi koo si̱íún vitin xa̱a̱ íyoña tu̱ʼun yóʼo. Ta̱ Josué ta̱ ndíkaa̱ iin congregación nu̱ú káʼa̱nna tu̱ʼun sanga káchira: “Tá ya̱chi̱ sava tu̱ʼun ña̱ va̱xi nu̱ú tutu yóʼo xi̱ ixayo̱ʼvi̱níña xíʼi̱n ña̱ ndakanii̱ña nu̱ú na̱ yiví na̱ sánáʼi̱. Soo ni xi̱ndakanii̱ña nu̱úna, sava yichi̱ koo níxi̱kunda̱a̱-inina ndáaña káʼa̱n libro yóʼo xa̱ʼa̱. Vitin kúsi̱íní-inii̱ saáchi xa̱a̱ íyoña tu̱ʼun sanga. na̱ sánáʼi̱ kúnda̱a̱-inina ndáaña sánáʼa̱ Biblia miína, ta va̱ása xíniñúʼu tavái̱ ku̱a̱ʼá tiempo ña̱ ka̱ʼi̱n xíʼinna ndáaña kúú ña̱ káʼa̱n libro yóʼo xa̱ʼa̱”.

Tiempo vitin xa̱a̱ síín síín tu̱ʼun kána ku̱a̱ʼání tutu ña̱ káʼa̱n xa̱ʼa̱ ña̱ va̱xi nu̱ú Biblia ta táxindi̱ña ndaʼa̱ ku̱a̱ʼání na̱ yiví. Ñaniyó xíʼin ku̱ʼvayó, tíxa̱ʼvindó xa̱ʼa̱ ndiʼi xu̱ʼún ña̱ táxindó ta saátu ña̱ táxindó nu̱ú donate.jw.org, ña̱yóʼo chíndeétáʼanña xíʼinndi̱ ña̱ va̱ʼa kana ku̱a̱ʼáka tutu. Tíxa̱ʼvindó xa̱ʼa̱ ña̱ va̱ʼaní-inindó.