Kánakava tutu ni ku̱a̱ʼánína xíniñúʼuna celular á tableta

Tá xa̱a̱ káʼviún Biblia á inkaka tutu ña̱ tává na̱ ñuu Ndióxi̱, ¿ndáa míí káʼviúnña: nu̱ú celular á nu̱ú tutu? Ku̱a̱ʼáníyó va̱ása xíniñúʼukayó libro á revista, saáchi ña̱ xíniñúʼukayó kúú celular á iin tableta. Ta sananí nu̱ú iin celular á nu̱ú iin tableta káʼviún artículo yóʼo. Kúsi̱íní-iniyó ña̱ káʼviyó tutu ña̱ tává na̱ ñuu Ndióxi̱ nu̱ú JW Library xíʼin nu̱ú jw.org.

Na̱samaní tiempo ña̱ ndóoyó vitin. Ku̱a̱ʼání na̱ hermano kútóokana kuniñúʼuna celular á tableta ña̱ va̱ʼa kaʼvina, saáchi ku̱a̱ʼáníka ña̱ʼa kivi keʼéna nu̱ú ña̱yóʼo. Ta saátu tá xa̱a̱ ku̱a̱ʼa̱nyó nátúʼunyó xíʼin na̱ yiví, kǒo sándakookayó ku̱a̱ʼání tutu ndaʼa̱na chi na̱ nátúʼun kuitíva kúúyó xíʼinna.

Xa̱ʼa̱ ña̱yóʼo, va̱ása táváka na̱ ñuu Ndióxi̱ ku̱a̱ʼání tutu nda̱a̱ táki̱ʼva xi̱keʼéna u̱xu̱ ku̱i̱ya̱ chí sa̱tá. Tá ku̱i̱ya̱ 2015, xi̱xiniñúʼuníkayó tutu ña̱ xi̱ ixaa imprimirna. Xa̱ʼa̱ ña̱yóʼo, 16 hora xi̱kachíñuna imprenta nu̱ú xi̱tavána tutu yóʼo. Soo ni̱xi̱yo iin tiempo ña̱ xi̱kuni̱na ña̱ kachíñu sava na̱yóʼo 24 hora ña̱ va̱ʼa tavána tutu ña̱ xíniñúʼuyó. Soo vitin xíniñúʼuníkayó JW Library ña̱ va̱ʼa sanúuyó tutu ña̱ káʼviyó. Ña̱kán, ndáa 8 hora kuitíva káchíñuna ti̱xin imprenta iin tá iin ki̱vi̱.

Su̱ví iinlá na̱ testigo Jehová kúú na̱ loʼoka tutu ki̱xáʼa tává, chi sava na̱ nándukú va̱ʼa xa̱ʼa̱ ña̱yóʼo káʼa̱nna ña̱ saátu va̱ása ku̱a̱ʼáka revista á periódico íxaa imprimir inkaka na̱ yiví. Xa̱ʼa̱ ña̱ xíniñúʼuníkana celular á tableta ña̱ káʼvina, ¿á xíniñúʼu ixaa imprimir na̱ testigo Jehová tutu? Xíniñúʼu tavávanaña, ná kotoyó nda̱chun kúú ña̱ xíniñúʼu kanaka tutu yóʼo, ta nda̱chun ndáyáʼviní ña̱ taxiyó donación ña̱ va̱ʼa kanakaña.

¿Nda̱chun íxaa imprimirka na̱ testigo Jehová tutu?

Ku̱a̱ʼání na̱ hermanoyó xíniñúʼukavana tutu ña̱ káʼvina. Ná kotoyó ña̱ káʼa̱n sava na̱yóʼo.

“Yi̱ʼi̱ xíniñúʼi̱ tutu ña̱ káʼvii̱ saáchi kǒo xu̱ʼún kúúmiíi̱ ña̱ satái̱ iin celular á iin tableta. Ta ni ná satái̱ña kǒo kivi kuniñúʼuvíi̱ña saáchi tuku ta tuku xáʼa̱n luz nu̱ú íyoi̱, ta kǒo kivi sandákuisoi̱ña. Ña̱kán, ña̱ va̱ʼaníka nu̱ú yi̱ʼi̱ kúú ña̱ kuniñúʼi̱ tutu” (Odete, Mozambique).

“Kǒo xu̱ʼún kúúmiíi̱ ña̱ satái̱ iin celular á iin tableta. Ta tá ná satái̱ iinña, ña̱ kiʼi̱n kúú iin ña̱ núu ya̱ʼvi, soo ña̱ núu válí yóʼo kamaní ndíʼi-xa̱ʼa̱ña ta tuku ta tuku xíniñúʼu sandáʼayóña, xa̱ʼa̱ ña̱kán nda̱chunví satái̱ iinña tá kǒo kivi kuniñúʼu ni̱ʼii̱ña” (Linley, Malaui).

“Na̱ nda̱ʼvíva kúúndi̱, xa̱ʼa̱ ña̱kán miíi̱ xíʼin u̱vi̱ ná válí se̱ʼi̱ iin kuití celular xíniñúʼundi̱. Tá xáʼa̱ndi̱ reunión, iin kuitíndi̱ xíniñúʼu celular ta u̱vi̱ndi̱ xíniñúʼu tutu” (Sinine, Micronesia).

Íyo sava na̱ hermano na̱ kúúmií celular á tableta soo ni saá kútóokana kaʼvina tutu. Koto ndáaña káʼa̱n sava na̱yóʼo:

“Ku̱a̱ʼání yichi̱ xíniñúʼuvai̱ celular á tableta ña̱ káʼvii̱, soo tá xa̱a̱ káʼvii̱ ña̱ ku̱ʼi̱n reunión kútóokai̱ kuniñúʼi̱ tutu. Kútóoníkai̱ kaʼvii̱ ña̱ tává na̱ ñuu Ndióxi̱ nu̱ú tutu saáchi kútói̱ kaʼyii̱ ña̱ sákuaʼi̱ nu̱ú ña̱yóʼo. Kiviva keʼíi̱ ña̱yóʼo nu̱ú celular á nu̱ú tableta, soo tá kéʼíi̱ña nu̱ú iin tutu túvii̱ ña̱ xáa̱ka ña̱ sákuaʼi̱ nda̱a̱ nímai̱ ta ndákaʼánkai̱ xa̱ʼa̱ña” (Márcia, Brasil).

“Kamaníka kúnaa nduchúnu̱úi̱ tá xíniñúʼi̱ celular á tableta, xa̱ʼa̱ ña̱kán kútóokai̱ kuniñúʼi̱ tutu. Saátu va̱ása xíni̱vaʼi̱ kuniñúʼi̱ celular ña̱kán íxayo̱ʼvi̱níña xíʼi̱n ña̱ kaʼyii̱ ña̱ sákuaʼi̱ nu̱úña, ña̱ sanúui̱ iin ña̱ʼa á ña̱ nandukúkai̱ xa̱ʼa̱ña” (Selina, Mozambique).

“Iníí ki̱vi̱ xíniñúʼi̱ celular xíʼin computadora. Xa̱ʼa̱ ña̱kán, tá xa̱a̱ sákuaʼi̱ xa̱ʼa̱ Jehová kǒo xíniñúʼukai̱ celular. Kútóokai̱ kuniñúʼi̱ tutu chi saá va̱ʼaníka káʼvii̱ ta kǒo inkaka ña̱ʼa sándi̱ʼi̱-inii̱” (Guillaume, Canadá).

“Tá nátúʼunyó xíʼin iin na̱ yiví ña̱ yichi̱ nu̱ú, íxayo̱ʼvi̱ña xíʼinyó ndukúyó número teléfonona á correo electrónico ña̱ va̱ʼa chindaʼáyó iin tutu ndaʼa̱na. Va̱ʼaníka tá níʼiyó iin tutu ku̱a̱ʼa̱n xíʼinyó ta ndi̱ku̱n mií kán táxiyóña ndaʼa̱na. Saátu sava yichi̱ xáʼa̱nndi̱ nátúʼunndi̱ nu̱ú ndóo ku̱a̱ʼání na̱ ku̱i̱ʼna, ña̱kán tá xáʼa̱ndi̱ kán va̱ása kívi kuniñúʼundi̱ teléfono á tableta” (ta̱ superintendente ña̱ circuito ta̱ íyo chí Sudamérica).

Ku̱a̱ʼání na̱ hermano xíniñúʼuna tutu chi kǒo inkaka ña̱ʼa kúúmiína nu̱ú kivi kaʼvina, inkatuna kútóokana kuniñúʼuna ña̱yóʼo. ¿Ndáaña kéʼéndi̱ ña̱ va̱ʼa chindeétáʼanndi̱ xíʼinna?

Íxaa imprimirndi̱ tutu ña̱ xíniñúʼu na̱ hermano

Íyo nueve sucursal nu̱ú íxaa imprimirndi̱ tutu. Tá ku̱i̱ya̱ 2025, yáʼaka 1,500 millón tutu i̱xaa imprimirndi̱. Ka̱na yáʼaka u̱ni̱ millón ña̱ Biblia, yáʼaka 18 millón libro ta saátu ka̱na yáʼaka 941 millón ña̱ tratado xíʼin invitación. Ña̱ va̱ʼa ixaa imprimirndi̱ ña̱yóʼo, yáʼaka 35 millón ña̱ dólara xi̱niñúʼundi̱. Ti̱xin u̱ni̱ saá ku̱i̱ya̱ ña̱ xa̱a̱ ni̱ya̱ʼa xi̱niñúʼundi̱ 10 millón ña̱ dólar ña̱ nda̱saviíndi̱ máquina tú xíniñúʼundi̱ ña̱ távándi̱ tutu.

Ña̱ va̱ʼa viíní kuniñúʼundi̱ xu̱ʼún ña̱ táxi na̱ hermano, nda̱saa tutu ña̱ xíniñúʼu kuitína íxaa imprimirndi̱. Nda̱a̱ táki̱ʼva xa̱a̱ ku̱ndaa̱-iniyó, vitin tá ku̱a̱ʼa̱nyó nátúʼunyó xíʼin na̱ yiví va̱ása sándakookayó revista á libro ndaʼa̱na saáchi ña̱ ndíʼi̱ka-iniyó xa̱ʼa̱ kúú ña̱ natúʼunyó xíʼinna. Ña̱kán, miíyó na̱ testigo Jehová xíniñúʼuyó ña̱ naní tarjeta de contacto. Xa̱ʼa̱ ña̱yóʼo, vitin ku̱a̱ʼáníka tarjeta válí yóʼo íxaa imprimirndi̱ nu̱úka ña̱ xi̱tavándi̱ tá kúma̱níka tu̱ndaa 2020. Xa̱a̱ íyo u̱xu̱ ku̱i̱ya̱ chí sa̱tá, loʼoka revista ¡Despertad! ki̱xáʼandi̱ távándi̱. Nu̱úka ña̱ tavándi̱ 86 tutu ña̱ ndakiʼin iin tá iin na̱ publicador, vitin ndáa 11 kuitíña távándi̱.

“Ndióxi̱ ndíʼi̱ní-inira xa̱ʼa̱ iin tá iinyó”

Kúsi̱íní-ini na̱ hermanoyó xa̱ʼa̱ ña̱ ndákundeé na̱ ñuu Ndióxi̱ íxaa imprimirna tutu. Ta̱ Ricardo ta̱ ñuu Brasil káchira: “Kúsi̱íní-inii̱ xa̱ʼa̱ ña̱ ndíka̱i̱ ti̱xin ñuu Ndióxi̱ saáchi na̱yóʼo va̱ʼaní-inina ta ndíʼi̱ní-inina xa̱ʼa̱ na̱ yiví. Tá kúú, ndíʼi̱-inina xa̱ʼa̱ na̱ kǒo kúúmiíi̱ celular á tableta. Xa̱ʼa̱ ña̱ kéʼéna ña̱yóʼo, ndiʼi na̱ yiví kivi xa̱a̱na kunda̱a̱-inina xa̱ʼa̱ tu̱ʼun Ndióxi̱ (Apocalipsis 22:17). Ta̱ Bernard ta̱ ñuu Tahití káchira: “Táxiníi̱ tíxa̱ʼvi ndaʼa̱ na̱ ñuu Ndióxi̱ xa̱ʼa̱ ña̱ távána tutu ña̱ káʼviyó. Ña̱yóʼo náʼa̱ña ña̱ viíní ndákanixi̱ní na̱ ñuu Ndióxi̱ ta saátu náʼa̱ña ña̱ ndíchinína. Saáchi xíʼin ña̱ kéʼéna náʼa̱na ña̱ kúni̱na ña̱ ndiʼi na̱ yiví ná kunda̱a̱-ini xa̱ʼa̱ tu̱ʼun va̱ʼa ña̱ káʼa̱n xa̱ʼa̱ Reino Ndióxi̱, kúúna na̱ va̱lí, na̱ xa̱a̱ chée, na̱ ku̱i̱ká á na̱ nda̱ʼví. Xíʼin ña̱yóʼo kúnda̱a̱-iniyó ña̱ va̱ʼaníva ndáa Jehová iin tá iinyó”.

Ñá Andréia ñá ñuu Brasil kúnda̱a̱-iniñá ña̱ kivi kuniñúʼuna donación ña̱ táxiñá ña̱ va̱ʼa tavákana tutu. Ñáyóʼo káchiñá: “Na̱ ñuu Ndióxi̱ xíniñúʼuna tiempo, xu̱ʼún, ña̱ xíni̱na keʼéna, ta saátu chíkaa̱nína ndee̱ ña̱ ixaa imprimirna tutu ña̱ kivi kuniñúʼu na̱ kǒo celular á tableta kúúmií. Ña̱yóʼo chíndeétáʼan xíʼi̱n ña̱ va̱ása kaka-inii̱ ña̱ ndíʼi̱va-ini Ndióxi̱ xa̱ʼa̱ iin tá iinyó. Tá ná ka̱ʼa̱nna xíʼi̱n ña̱ kuniñúʼuna xu̱ʼún ña̱ táxii̱ ña̱ ixaa imprimirna tutu, kusi̱íníva-inii̱”.

Ñaniyó xíʼin ku̱ʼvayó, táxiníndi̱ tíxa̱ʼvi ndaʼa̱ndó xa̱ʼa̱ ndiʼi donación ña̱ táxindó, tá kúú ña̱ táxindó chí nu̱ú donate.jw.org. Xíniñúʼundi̱ ña̱yóʼo ña̱ va̱ʼa ixaa imprimirndi̱ tutu ña̱ kuniñúʼu na̱ kǒo celular á tableta kúúmií, á ña̱ kuniñúʼu na̱ kútóoka kuniñúʼu tutu ña̱ kaʼvina.