Táʼví iin: Ña̱ kándíxa na̱ ndásakáʼnu Ndióxi̱

Ña̱ sa̱kuaʼún nu̱ú Biblia xíʼin na̱ testigo Jehová chi̱ndeétáʼanña xíʼún ña̱ ni̱xa̱ún ku̱nda̱a̱-iniún xa̱ʼa̱ ña̱ nda̱a̱. Saátu chi̱ndeétáʼanña xíʼún ña̱ ni̱xa̱ún ku̱ún migo Ndióxi̱, ta ku̱nda̱a̱-iniún ña̱ kivi xa̱ún koún nu̱ú iin ñuʼú livi ti̱xin ña̱ reino Ndióxi̱. Saátu va̱ʼaníka ni̱xa̱ún ka̱ndíxaún ña̱ va̱xi nu̱ú Biblia. Ta ña̱ xa̱a̱ kítáʼún xíʼin na̱ congregación, xa̱a̱ ku̱a̱ʼání bendición ndákiʼún ta saátu xa̱a̱ ku̱nda̱a̱-iniún ndáa ki̱ʼva ndáa Jehová na̱ ñuura tiempo vitin (Zac. 8:23).

Ta ña̱ va̱ʼa ndakuchiún, na̱ anciano keʼéna pregunta ña̱ va̱xi yóʼo xíʼún ña̱ va̱ʼa kunda̱a̱-iniún xa̱ʼa̱ ña̱ kándíxa na̱ ndasakáʼnu Ndióxi̱ (Heb. 6:1-3). Jehová ná taxi bendición ndaʼún xa̱ʼa̱ ña̱ chíka̱a̱níún ndee̱ ña̱ kunda̱a̱-iniún xa̱ʼa̱ra ta ná taxira ña̱ káʼa̱nra taxira ndaʼa̱yó chí nu̱únínu ndaʼún (Juan 17:3).

1. ¿Nda̱chun kúni̱ún ndakuchiún?

2. ¿Ndáa ta̱ kúú Jehová?

   • “Ña̱kán ki̱vi̱ vitin xíniñúʼu kunda̱a̱-iniún ña̱ iinlá mií Jehová kúú Ndióxi̱ ta̱ nda̱a̱ chí ndiví xíʼin nu̱ú ñuʼú yóʼo. Kǒoka inkara” (Deut. 4:39).

   • “Ná kunda̱a̱-ini na̱ yiví ña̱ ki̱vi̱ yóʼó kúú Jehová, ña̱ iinlá yóʼó kúú ta̱ káʼnu iníísaá ñuyǐví” (Sal. 83:18).

3. ¿Nda̱chun ndáyáʼviní ña̱ kuniñúʼuyó ki̱vi̱ Ndióxi̱?

   • “Siaʼa xíniñúʼu ka̱ʼa̱nndó xíʼinra: ‘Yivándi̱ ta̱ íyo chí ndiví, ná nduyi̱i̱ ki̱vi̱únʼ” (Mat. 6:9).

   • “Ndiʼi na̱ xíniñúʼu ki̱vi̱ Jehová ña̱ káʼa̱nna xíʼinra ña̱ ná chindeétáʼanra xíʼinna, ka̱kuna” (Rom. 10:13).

4. ¿Ndáaña kúú sava tu̱ʼun ña̱ xíniñúʼuna nu̱ú Biblia tá káʼa̱nna xa̱ʼa̱ Jehová?

   • “Jehová kúú ta̱ i̱xava̱ʼa iníísaá ñuyǐví, ta̱ ta̱yóʼo kúú Ndióxi̱ ndiʼi tiempo” (Is. 40:28).

   • “Yivándi̱ ta̱ íyo chí ndiví” (Mat. 6:9).

   • “Ndióxi̱ kúú ta̱ kúʼvi̱-ini xíni miíyó” (1 Juan 4:8).

5. ¿Ndáaña kivi taxiún ndaʼa̱ Jehová?

   • “Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún, xíʼin ndiʼi xi̱níún ta xíʼin ndiʼi ndeún” (Mar. 12:30).

   • “Jehová Ndióxi̱ún ndasakáʼnún, mitúʼun ta̱yóʼo kachíñún nu̱ú” (Luc. 4:8).

6. ¿Nda̱chun kúni̱ún nda̱kú koo-iniún xíʼin Jehová?

   • “Se̱ʼe miíi̱, vií va̱ʼa ndakanixi̱níún, ta sakúsi̱íún-inii̱, ña̱kán va̱ʼa ndakuii̱n yuʼú ta̱ kúsi̱kindaa yi̱ʼi̱” (Prov. 27:11).

7. ¿Ndáa na̱ káʼún xíʼin tá kéʼún oración, ta ndáa na̱ xíniñúʼún ki̱vi̱ tá kéʼúnña?

   • Ta̱ Jesús ka̱chira: “Ña̱ nda̱a̱ káʼi̱n xíʼinndó nda̱a̱ ndáaka ña̱ ná ndukúndó nu̱ú yivái̱ xa̱ʼa̱ ki̱víi̱, taxivaraña ndaʼa̱ndó” (Juan 16:23).

8. ¿Ndáaña kivi ka̱ʼa̱nyó xa̱ʼa̱ tá kéʼéyó oración nu̱ú Ndióxi̱?

   • “Siaʼa xíniñúʼu ka̱ʼa̱nndó xíʼinra: ‘Yivándi̱ ta̱ íyo chí ndiví, ná nduyi̱i̱ ki̱vi̱ún. Ná kixaa̱ ki̱vi̱ ña̱ kaʼndachíñún. Ná koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo. Taxi ña̱ kuxundi̱ ki̱vi̱ vitin, ta koo káʼnu-iniún xa̱ʼa̱ ku̱a̱chindi̱ táki̱ʼva íxakáʼnu-inindi̱ xa̱ʼa̱ ku̱a̱chi na̱ kéʼé ña̱ va̱ása va̱ʼa xíʼinndi̱. Ta kǒo taxiún ndakavandi̱ ndaʼa̱ ku̱a̱chi ta sakǎku ndi̱ʼi̱ ndaʼa̱ ta̱ Ndi̱va̱ʼaʼ” (Mat. 6:9-13).

   • “Ta xa̱ʼa̱ ña̱ kándíxayóra: kivi ndukúyó nda̱a̱ nda̱saaka ña̱ʼa nu̱úra, tá ña̱ kúni̱ miíra kúúña, kuniso̱ʼovara ña̱ ka̱ʼa̱nyó xíʼinra” (1 Juan 5:14).

9. ¿Ndáa xa̱ʼa̱ kúú ña̱ va̱ása kuniso̱ʼo Jehová sava oración ña̱ kéʼéyó nu̱úra?

   • “Kanana Jehová ña̱ chindeétáʼanra xíʼinna, soo va̱ása ndakuiinra yuʼúna [...] xa̱ʼa̱ ña̱ kéʼéna ña̱ va̱ása va̱ʼa” (Miq. 3:4).

   • “Saáchi Jehová ndáara na̱ yiví na̱ kéʼé ña̱ va̱ʼa, ta xíniso̱ʼora ña̱ káʼa̱nna xíʼinra, ta kǒo kútóora xínira na̱ yiví na̱ kéʼé ña̱ va̱ása va̱ʼa” (1 Ped. 3:12).

10. ¿Ndáa ta̱ kúú ta̱ Jesucristo?

    • “Ta̱ Simón Pedro nda̱kuiinra yuʼúra: ‘Yóʼó kúú ta̱ Cristo se̱ʼe Ndióxi̱ ta̱ tákuʼ” (Mat. 16:16).

11. ¿Nda̱chun ki̱xi ta̱ Jesús nu̱ú ñuʼú yóʼo?

    • “Ña̱yóʼo kúú ña̱ ke̱ʼé se̱ʼe ta̱ ta̱a. Ta̱yóʼo kǒo níkixira ña̱ kachíñuna nu̱úra, chi ki̱xira ña̱ kachíñura nu̱ú inkana tasaá kuvira xa̱ʼa̱ na̱ yiví ña̱ ndachaʼvira xa̱ʼa̱na” (Mat. 20:28).

    • “Soo ta̱kán ni̱ka̱ʼa̱nra xíʼinna: ‘Saátu xíniñúʼu natúʼi̱n xa̱ʼa̱ tu̱ʼun va̱ʼa ña̱ Reino Ndióxi̱ chí inka ñuu, saáchi xa̱ʼa̱ ña̱yóʼo chi̱ndaʼá Ndióxi̱ yi̱ʼi̱ʼ” (Luc. 4:43).

12. ¿Nda̱saa kivi na̱ʼún ña̱ táxiún tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼún?

    • “Ta̱kán ni̱xi̱ʼi̱ra xa̱ʼa̱ ndiʼina ña̱ va̱ʼa ná kǒo kutakukana xa̱ʼa̱ miína, va̱ʼaka ná kutakuna xa̱ʼa̱ ta̱ ni̱xi̱ʼi̱ xa̱ʼa̱na ta nda̱takura” (2 Cor. 5:15).

13. ¿Ndáa chiñu kúú ña̱ kúúmií ta̱ Jesús?

    • “Ndióxi̱ ta̱xi chiñu ndaʼíi̱ ña̱ kiʼi̱n kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo” (Mat. 28:18).

    • “Mií Ndióxi̱ ta̱xi iin chiñu káʼnu ndaʼa̱ra ta ki̱vi̱ra káʼnuka ndu̱uña nu̱ú ndiʼika ki̱vi̱na” (Filip. 2:9).

14. ¿Á kándíxaún ña̱ na̱ Cuerpo Gobernante na̱ kíʼin kuenta xíʼin na̱ testigo Jehová kúú ta̱ “esclavo ta̱ nda̱kúní-ini ta̱ ndíchiní” ta̱ nda̱kaxin ta̱ Jesús?

    • “¿Ndáa ta̱ kúú mií ta̱ ndixa kúú esclavo ta̱ nda̱kúní-ini ta̱ ndíchiní, ta̱ ta̱xi ta̱ káchiñura nu̱ú ña̱ kundaara na̱ káchíñu ti̱xin veʼera ta taxira ña̱ kuxuna mií tiempo ña̱ xíniñúʼunaña?” (Mat. 24:45).

15. ¿Á iin na̱ yiví kúú ña̱ espíritu santo?

    • “Ta̱ ángel nda̱kuiinra yuʼúñá: ‘Espíritu santo kixi sa̱táún, ta ndee̱ Ndióxi̱ ta̱ káʼnuní kundaa yóʼó. Ña̱kán ta̱ kaku kunaníra ta̱ yi̱i̱, se̱ʼe Ndióxi̱ʼ” (Luc. 1:35).

    • “Ña̱kán, ni kúúndó na̱ yiví ku̱a̱chi, xíni̱vandó taxindó ña̱ va̱ʼa ndaʼa̱ se̱ʼendó, tasaá yivándó ta̱ íyo chí ndiví taxivara espíritu santo ndaʼa̱ na̱ ndúkúña nu̱úra” (Luc. 11:13).

16. ¿Ndáa xa̱ʼa̱ kúú ña̱ xíniñúʼu Jehová espíritu santora?

    • “Jehová xi̱niñúʼura ndee̱ra ña̱ ixava̱ʼara ndiví, ta xi̱niñúʼura ndee̱ra ña̱ i̱xava̱ʼara ndiʼi ña̱ʼa ña̱ íyo” (Sal. 33:6).

    • “Soo ndakiʼinndó ndee̱ tá ná kixaa̱ espíritu santo sa̱tándó. Ta natúʼunndó xa̱ʼíi̱ [...] iníísaá nu̱ú ñuʼú” (Hech. 1:8).

    • “Ndiʼi tu̱ʼun ña̱ ni̱ka̱ʼyi̱ nu̱ú tu̱ʼun Ndióxi̱, ña̱ ni̱ka̱ʼa̱nna xi̱nu nu̱ú chí nu̱únínu va̱ása níkeeña xi̱ní mií na̱ yiví na̱ ka̱ʼyí ña̱yóʼo. Chi na̱ ta̱a na̱ ka̱ʼyí ña̱yóʼo va̱ása níkaʼyína ña̱ kúni̱ miína, chi espíritu santo Ndióxi̱ chi̱ndaʼá-ñaʼá ña̱ ka̱ʼyína ña̱ ni̱ka̱ʼa̱nra” (2 Ped. 1:20, 21).

17. ¿Ndáaña kúú Reino Ndióxi̱?

    • “Ndióxi̱ ta̱ íyo chí ndiví chindúʼúra iin ta̱ kaʼndachíñu ta va̱ása ndiʼi-xa̱ʼa̱ ña̱ kaʼndachíñura, ta chiñu ña̱ kuumií ta̱yóʼo va̱ása ndakiʼin inkanaña ndaʼa̱ra. Ta ta̱ chíñu yóʼo sandíʼi-xa̱ʼa̱ra ndiʼi na̱ chíñu ñuyǐví yóʼo, ta iinlá miíra koo ndiʼi tiempo” (Dan. 2:44).

18. ¿Ndáa ña̱ va̱ʼa ndakiʼún ixaa Reino Ndióxi̱?

    • “Ta ya̱kúnra ti̱kui̱í nu̱úna, ta kǒo kuvikana, ni va̱ása kooka ña̱ kusuchí-inina ni va̱ása kuakukana, ta ni va̱ása kooka ña̱ xóʼvi̱na. Ndiʼi ña̱ xi̱saxóʼvi̱ na̱yóʼo kǒokaña íyo” (Apoc. 21:4).

19. ¿Nda̱chun va̱ʼa xíni̱ún ña̱ xa̱a̱ ku̱nu̱mí ki̱xaa̱ Reino Ndióxi̱ ta ku̱a̱ʼání ña̱ va̱ʼa ndakiʼún ixaaña?

    • “Na̱ discípulo ku̱yatinna nu̱úra ta ni̱nda̱ka̱tu̱ʼunnara: ‘Ka̱ʼa̱n xíʼinndi̱, ¿ama koo ña̱ʼa yóʼo, ta ndáaña na̱ʼa̱ nu̱úndi̱ ña̱ xa̱a̱ íyoún xíʼinndi̱ ta saátu ña̱ xa̱a̱ ku̱yatin ndiʼi-xa̱ʼa̱ ñuyǐví yóʼo?ʼ. Ta̱ Jesús nda̱kuiinra yuʼúna: ‘[...] kanitáʼan iin ñuu xíʼin inka ñuu, ta iin país xíʼin inka país, ta koo so̱ko ta ndeéní ta̱an. Ta tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ natúʼunna xa̱ʼa̱ña iníísaá nu̱ú ñuʼú yóʼo ña̱ ná kunda̱a̱-ini ndiʼi na̱ yiví tasaá ndiʼi-xa̱ʼa̱ na̱ ñuyǐvíʼ” (Mat. 24:3, 4, 7, 14).

    • “Tiempo nu̱ú ndíʼi, koo ku̱a̱ʼá tu̱ndóʼo. Saáchi na̱ yiví kuʼvi̱ka-inina kunina miína, koo na̱ kutóoní koo xu̱ʼún, koo na̱ ni̱nu-ini, koo na̱ kuta̱a-ini nu̱ú inkana, koo na̱ ka̱ʼa̱n ndi̱va̱ʼa, koo na̱ kǒo kandíxa ña̱ ka̱ʼa̱n yivána, koo na̱ kǒo kuumií ña̱ to̱ʼó, koo na̱ va̱ása nda̱kú koo ini, koo na̱ va̱ása kuʼvi̱ka ini kuni na̱ veʼena, koo na̱ kǒo kandíxa táʼan, koo na̱ chika̱a̱ ku̱a̱chi táʼan, koo na̱ kǒo tavá ki̱ʼva xíʼin mií, koo na̱ ndi̱va̱ʼa-ini, koo na̱ kundasí ña̱ va̱ʼa, koo na̱ sandáʼvi táʼan, koo na̱ kǒo ndakiʼin xi̱ní, koo na̱ kuta̱aka-ini, koo na̱ keʼé ña̱ kúni̱ miína su̱víka ña̱ kúni̱ Ndióxi̱, koo na̱ ka̱ʼa̱n ña̱ ndásakáʼnunara, soo su̱ví ña̱ nda̱a̱ kúú ña̱yóʼo” (2 Tim. 3:1-5).

20. ¿Ndáa ki̱ʼva na̱ʼún ña̱ ndáyáʼviní Reino Ndióxi̱ nu̱ún?

    • “Ña̱kán, siʼnaka Reino Ndióxi̱ kundi̱ʼi̱-inindó xa̱ʼa̱ xíʼin chiñu ña̱ xáʼndara” (Mat. 6:33).

    • “Tasaá ni̱ka̱ʼa̱n ta̱ Jesús xíʼin na̱ discípulora: ‘Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína, ta ná kundisona yitu̱n tú sáxo̱ʼvi̱ miína ta ná ndakundeéna kundiku̱nna yi̱ʼi̱ʼ” (Mat. 16:24).

21. ¿Ndáa ta̱ kúú ta̱ Ndi̱va̱ʼa xíʼin na̱ ta̱chí ndi̱va̱ʼa?

    • “Ndóʼó kúúndó se̱ʼe yivándó ta̱ Ndi̱va̱ʼa [...]. Chi ta̱yóʼo nani tá ki̱xáʼara káʼa̱nra ña̱ vatá xa̱ʼa̱ Ndióxi̱, ndu̱ura ta̱ xáʼní” (Juan 8:44).

    • “Ta chí nu̱ú ñuʼú chi̱ndaʼána tí dragón káʼnu, tí kúú ko̱o̱ nda̱a̱ tá tiempo xi̱naʼáví, ta̱ naní Diablo á Satanás ta̱ sándáʼvi ndiʼi na̱ ndóo nu̱ú ñuʼú. Ta sa̱kánanara nu̱ú ñuʼú xíʼin na̱ ángel na̱ kítáʼan xíʼinra” (Apoc. 12:9).

22. ¿Ndáa tu̱ʼun vatá kúú ña̱ ni̱ka̱ʼa̱n ta̱ Ndi̱va̱ʼa xa̱ʼa̱ Jehová xíʼin xa̱ʼa̱ na̱ ndásakáʼnu-ñaʼá?

    • “Tasaá nda̱kuiin ñá ñaʼá: ‘Va̱ʼava kaxíndi̱ ku̱i̱ʼi ndaʼa̱ yitu̱n tú íyo yóʼo. Soo ku̱i̱ʼi tí íyo ndaʼa̱ yitu̱n tú níndichi ma̱ʼñú ña̱ ñuʼú livi, Ndióxi̱ ni̱ka̱ʼa̱nra: ‘Kǒo kívi kaxíndó ku̱i̱ʼi ndaʼa̱nú ni va̱ása kívi tiinndónú. Chi tásaá ná keʼéndó, kuvivandó”ʼ. Tasaá ni̱ka̱ʼa̱n tí koo yóʼo xíʼin ñá ñaʼá: ‘Va̱ása kuvindó. Chi Ndióxi̱ xíni̱ra míí ki̱vi̱ ná kaxíndó ku̱i̱ʼi ndaʼa̱nú ndanu̱ná nu̱úndó ta xa̱a̱ndó koondó nda̱a̱ táki̱ʼva íyo míí Ndióxi̱, kunda̱a̱-inindó xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼaʼ” (Gén. 3:2-5).

    • “Soo ta̱ Ndi̱va̱ʼa nda̱kuiinra yuʼú Jehová: ‘Ndiʼi ña̱ kúúmií na̱ yiví taxinaña xa̱ʼa̱ ña̱ kúni̱na kutakunaʼ” (Job 2:4).

23. ¿Ndáa ki̱ʼva na̱ʼún nu̱ú ta̱ Ndi̱va̱ʼa ña̱ su̱ví ña̱ nda̱a̱ kúú ña̱ ni̱ka̱ʼa̱nra?

    • “Xíʼin ndiʼi níma̱ún kachíñún nu̱úra (Ndióxi̱)” (1 Crón. 28:9).

    • “Nda̱a̱ ná kuvii̱ nda̱kú koo inii̱ xíʼin Ndióxi̱” (Job 27:5).

24. ¿Nda̱chun xíʼi̱yó?

    • “Xa̱ʼa̱ iin ta̱a kúú ña̱ ni̱ki̱ʼvi ku̱a̱chi ñuyǐví yóʼo ta xa̱ʼa̱ ku̱a̱chi yóʼo kúú ña̱ xíʼi̱yó, tasaá kúú ña̱ ki̱xáʼa xíʼi̱ ndiʼi na̱ yiví, chi ndiʼina ni̱ki̱ʼvi ku̱a̱chi” (Rom. 5:12).

25. ¿Ndáaña ndóʼo na̱ yiví tá xíʼi̱na?

    • “Saáchi na̱ táku kúnda̱a̱-inina ña̱ kixaa̱ iin ki̱vi̱ kuvina, soo na̱ ni̱xi̱ʼi̱ kǒoka ña̱ xíni̱na xa̱ʼa̱” (Ecl. 9:5).

26. ¿Ndáa ña̱ ndátu na̱ ni̱xi̱ʼi̱?

    • “Sandátakura na̱ ke̱ʼé ña̱ va̱ʼa ta saátu na̱ va̱ása níkeʼé ña̱ va̱ʼa” (Hech. 24:15).

27. ¿Nda̱saa na̱ yiví ku̱ʼu̱n chí ndiví ña̱ kaʼndachíñuna xíʼin ta̱ Jesús?

    • “Tasaá xi̱nii̱ ta̱ íyo nda̱a̱ táki̱ʼva íyo ndikachi ña̱ níndichira nu̱ú yuku̱ Sion, ta xíʼin ta̱yóʼo ndíta 144,000 na̱ ni̱ka̱ʼyi̱ chí te̱ʼé xíʼin ki̱vi̱ miíra ta saátu ki̱vi̱ yivára” (Apoc. 14:1).