Táʼví u̱vi̱: Ña̱ kéʼé na̱ ndásakáʼnu Ndióxi̱

Ña̱ sa̱kuaʼún nu̱ú Biblia chi̱ndeétáʼanña xíʼún ku̱nda̱a̱-iniún ndáaña kúni̱ Jehová keʼún. Ta xa̱ʼa̱ ña̱yóʼo na̱samaún ki̱ʼva ña̱ tákún, ta ni̱xa̱ún chíndayáʼviún ña̱ tákún. Ta vitin nda̱kaxiún keʼún ña̱ káʼa̱n Ndióxi̱, ta saátu ña̱ kakaún natúʼún xa̱ʼa̱ra.

Pregunta ña̱ va̱xi yóʼo chindeétáʼanña xíʼún ña̱ ndakaʼún xa̱ʼa̱ ña̱ kúni̱ Jehová keʼún, saátu sandákaʼánña yóʼó ndáaña xíniñúʼu keʼún ña̱ va̱ʼa xa̱ún kachíñún nu̱úra. Ta ña̱yóʼo chindeétáʼanña xíʼún ña̱ kunda̱a̱-iniún ña̱ xíniñúʼu limpio koo ña̱ xínitúni̱ún ña̱ va̱ʼa ndasakáʼnún Jehová (2 Cor. 1:12; 1 Tim. 1:19; 1 Ped. 3:16, 21).

Ta xa̱ʼa̱ ña̱ sa̱kuaʼún ña̱ va̱xi nu̱ú Biblia vitin kúni̱ún ndakundiku̱n ña̱ chíñu Jehová ta kúni̱ún kutáʼún xíʼin na̱ ñuura. Pregunta xíʼin texto ña̱ va̱xi yóʼo chindeétáʼanña xíʼún ña̱ kunda̱a̱-iniún á xa̱a̱ íxato̱ʼún ña̱ káʼa̱n Jehová tá kúú ti̱xin congregación, ti̱xin na̱ veʼún xíʼin na̱ chíñu. Ña̱ pregunta yóʼo chindeétáʼanña xíʼún ña̱ chindayáʼvikaún ndiʼi ña̱ xíniñúʼu Jehová ña̱ sánáʼa̱ra na̱ ñuura ta saátu ña̱ xíniñúʼura ña̱ ndasandakúra-inina. Ta chika̱a̱tuña ndee̱ xíʼún ña̱ va̱ása ndakoún ña̱ ku̱ʼún reunión, saátu ña̱ keʼún ku̱a̱ʼá chiñu ti̱xin congregación.

Ña̱ pregunta yóʼo chindeétáʼanña xíʼún ña̱ kunda̱a̱-iniún ña̱ ndáyáʼviní ndiʼi tiempo natúʼún ta sanáʼún na̱ yiví xa̱ʼa̱ ña̱ xa̱a̱ kéʼé Ndióxi̱ xa̱ʼa̱na (Mat. 24:14; 28:​19, 20). Saátu va̱ása nandósóún ndáaña kúni̱ kachi ña̱ ndataxiún miíún ndaʼa̱ Ndióxi̱ ta ndakuchiún. Kúsi̱íní-ini Jehová xa̱ʼa̱ ña̱ ni̱xa̱ún ka̱ndíxaún ndiʼi ña̱ ke̱ʼéra xa̱ʼún ta kúsi̱íní-inira ña̱ kúni̱ún keʼún ña̱ kúni̱ miíra xíʼin ndiʼi níma̱ún.

1. ¿Á kíndo̱o-ini Ndióxi̱ xíʼin ndiʼi ki̱ʼva ña̱ tíndaʼa̱ na̱ yiví? ¿Ndáa xa̱ʼa̱ kúú ña̱ kivi sandákoo táʼan na̱ ti̱ndaʼa̱ káchi Biblia?

   • “¿Á va̱ása níkaʼvindó xa̱ʼa̱ ña̱yóʼo, ta̱ i̱xava̱ʼana tá xa̱ʼa̱ i̱xava̱ʼara iin ta̱a xíʼin iin ñaʼá ta ni̱ka̱ʼa̱nra: ‘Xa̱ʼa̱ ña̱yóʼo, ta̱ ta̱a sandákoora yivára xíʼin siʼíra ta ndakutáʼanra xíʼin ñá síʼira ta si̱ín iinlá xa̱a̱na nduunaʼ? Ña̱kán su̱víka u̱vi̱ kúúna, iinláva kúúna. Xa̱ʼa̱ ña̱yóʼo na̱ sa̱kítáʼan Ndióxi̱ ná kǒo taʼví inka na̱ yivína”. “Ndiʼi ta̱ sándakoo ñá síʼi, tá su̱ví xa̱ʼa̱ ña̱ níkeʼéñá ku̱a̱chi kini kúúña, tá ná tindaʼa̱ra xíʼin inkañá ki̱ʼvira ku̱a̱chi” (Mat. 19:4-6, 9).

2. ¿Nda̱chun xíniñúʼu tindaʼa̱ va̱ʼa na̱ xa̱a̱ ndóo xíʼin táʼan? Tá xa̱a̱ ti̱ndaʼún, ¿á xa̱a̱ íyo vií ndiʼi tutún nu̱ú na̱ chíñu?

   • “Ka̱ʼa̱n xíʼinna ná kǒo sandákoona ña̱ kundiku̱nna ta kuniso̱ʼona ña̱ káʼa̱n na̱ chíñu xíʼinna” (Tito 3:1).

   • “Na̱ ti̱ndaʼa̱ to̱ʼó ná koona xíʼin táʼanna, ta ná kǒo ku̱su̱nna xíʼin inka na̱ yiví, chi Ndióxi̱ tiinra ku̱a̱chi xíʼin na̱ kéʼé ku̱a̱chi kini ta saátu xíʼin na̱ xa̱a̱ tindaʼa̱ ta kísi̱na xíʼin inkana” (Heb. 13:4).

3. ¿Ndáa chiñu ta̱xi Ndióxi̱ ndaʼún ti̱xin veʼún?

   • “Kuniso̱ʼo, se̱ʼe miíi̱, consejo ña̱ káʼa̱n yiváún ta va̱ása sandákoún ña̱ káʼa̱n siʼún xíʼún” (Prov. 1:8).

   • “Saáchi yií ná ñaʼá kúú ta̱ níʼi yichi̱ nu̱úná nda̱a̱ táki̱ʼva níʼi ta̱ Cristo yichi̱ nu̱ú na̱ congregación”. “Ndóʼó na̱ ta̱a kuʼvi̱-inindó kunindó ñá síʼíndó nda̱a̱ táki̱ʼva i̱xaa ta̱ Cristo ña̱ ni̱kuʼvi̱-inira xi̱xinira na̱ congregación” (Efes. 5:23, 25).

   • “Ndóʼó na̱ íyo se̱ʼe, kǒo sásáa̱ndó se̱ʼendó, va̱ʼaka sanáʼa̱ndóna ta taxindó consejo Jehová ndaʼa̱na” (Efes. 6:4).

   • “Na̱ va̱lí, ndiʼi ña̱ káʼa̱n yivándó xíʼinndó kuniso̱ʼondóña, chi ña̱yóʼo kúú míí ña̱ kútóoní tátayó” (Col. 3:20).

   • “Ná xa̱a̱ ti̱ndaʼa̱, kuniso̱ʼondó ña̱ káʼa̱n yiíndó” (1 Ped. 3:1).

4. ¿Nda̱chun xíniñúʼu chindayáʼviyó ña̱ tákuyó?

   • “(Ndióxi̱) kúú ta̱ táxi ña̱ táku na̱ yiví, táxira ta̱chí ndákiʼinna xíʼin ndiʼika ña̱ʼa”. “Saáchi xa̱ʼa̱ ta̱kán kúú ña̱ tákuyó, kánda̱yó ta íyoyó” (Hech. 17:25, 28).

5. ¿Nda̱chun va̱ása va̱ʼa kaʼníyó na̱ yiví ta saátu iin ña̱ loʼo ña̱ ta̱ʼán kaku?

   • “Tá kánitáʼan u̱vi̱ ta̱a ta ni̱ya̱ʼa ndaʼa̱ra ka̱nira iin ñaʼá ñá ñúʼu se̱ʼe [...] soo tá ni̱xi̱ʼi̱ se̱ʼeñá á miíñá xíniñúʼu kuvira ña̱ va̱ʼa chaʼvíra xa̱ʼa̱ ña̱ i̱xaara” (Éx. 21:22, 23).

   • “Xi̱niún yi̱ʼi̱ nda̱a̱ tá ndíka̱i̱ ti̱xin siʼíi̱; ta nda̱a̱ tá ta̱ʼán xa̱i̱ kuva̱ʼi̱ xa̱a̱ ni̱ka̱ʼyi̱ nu̱ú libro miíún ama kúú ña̱ kuva̱ʼa loʼo tá loʼo ku̱ñui̱” (Sal. 139:16).

   • “Sáa̱-ini Jehová xínira [...] na̱ xáʼní na̱ yiví na̱ kǒo ku̱a̱chi” (Prov. 6:16, 17).

6. ¿Ndáaña káʼa̱n Ndióxi̱ xíʼinyó xa̱ʼa̱ ni̱i̱?

   • “Kǒo kuxundó [...] kití tí xíʼi̱ ta kǒo xíta ndiʼi ni̱i̱rí” (Hech. 15:29).

7. ¿Nda̱chun xíniñúʼu kuʼvi̱-iniyó kuniyó na̱ hermanoyó?

   • “Ña̱yóʼo kúú iin ley xa̱á káʼi̱n xíʼinndó: kuʼvi̱ní-inindó kunitáʼanndó nda̱a̱ táki̱ʼva kúʼvi̱-inii̱ xínii̱ ndóʼó saá kuʼvi̱-inindó kunitáʼanndó. Xíʼin ña̱yóʼo ndiʼina kunda̱a̱-ini ña̱ ndóʼó kúúndó discípuloi̱, tá kúʼvi̱-inindó xínitáʼanndó” (Juan 13:34, 35).

8. a) ¿Nda̱chun xíniñúʼu kiʼin na̱ kúúmií kue̱ʼe̱ xíkun kuenta ña̱ va̱ása numina inkana ta ni va̱ása chitúna nu̱ú inkana? b) ¿Nda̱chun va̱ása xíniñúʼu sa̱a̱na tá kǒo níkanana na̱yóʼo ku̱ʼu̱nna veʼena? c) ¿Nda̱chun xíniñúʼu ku̱ʼu̱n iin na̱ ndo̱ʼo kue̱ʼe̱ xíkun ña̱ koto na̱ doctor ni̱i̱na ta saáví ndukúna na̱ koo noviona? d) Tá iin na̱ kúni̱ ndakuchi kúúmiína kue̱ʼe̱ xíkun, ¿nda̱chun xíniñúʼu siʼnaka xíʼin ta̱ cordinador na̱ anciano natúʼunna xa̱ʼa̱ ña̱yóʼo?

   • “Va̱ása kuníkandó nu̱ú ni iinna, chi ña̱ xíniñúʼu keʼéndó kúú ña̱ kuʼvi̱-inindó kunitáʼanndó; [...] ‘Kuʼvi̱-iniún kuniún inka na̱ yiví nda̱a̱ táki̱ʼva kúʼvi̱-iniún xíniún miíúnʼ. Na̱ yiví na̱ kúʼvi̱-ini xíni inkana kǒo kéʼéna ña̱ va̱ása va̱ʼa xíʼin inkana” (Rom. 13:8-10).

   • “Ta su̱ví xa̱ʼa̱ iinlá mií kuitíndó ndi̱ʼi̱-inindó, chi saátu xíniñúʼu ndi̱ʼi̱-inindó xa̱ʼa̱ inkana” (Filip. 2:4).

9. ¿Nda̱chun kúni̱ Jehová ixakáʼnu-iniyó xa̱ʼa̱ inkana?

   • “Kundeé-inindó xíʼin ña̱ kéʼéna xíʼinndó ta xíʼin ndinuʼu-inindó koo káʼnu-inindó xa̱ʼa̱ táʼanndó tá íyo iin xa̱ʼa̱ kúú ña̱ sáa̱ndó xíʼin inkana. Nda̱a̱ táki̱ʼva ke̱ʼé Jehová ña̱ xíʼin ndinuʼu-inira i̱xakáʼnu-inira xa̱ʼa̱ndó, saá xíniñúʼu koo káʼnu-inindó xa̱ʼa̱ táʼanndó” (Col. 3:13).

10. ¿Ndáaña xíniñúʼu keʼún tá iin na̱ hermano ni̱ka̱ʼa̱nna ña̱ vatá xa̱ʼún á sa̱ndáʼvina yóʼó?

    • “Tá iin na̱ ñaniún kéʼéna iin ña̱ va̱ása va̱ʼa xíʼún, kúáʼan ta natúʼun mitúʼún xíʼinna, ta ka̱ʼa̱n xíʼinna xa̱ʼa̱ ña̱ va̱ása va̱ʼa kéʼéna. Tá xíniso̱ʼona ña̱ káʼún, xa̱a̱ chi̱ndeún ñaniún ña̱ keʼé tukuna ña̱ va̱ʼa. Soo tá kǒo xíniso̱ʼona, kúáʼan xíʼin iin á u̱vi̱ na̱ yiví ña̱kán va̱ʼa natúʼún xíʼinna chi ña̱ va̱ʼa kunda̱a̱-iniyó á ña̱ ndixa kúú ña̱ káʼa̱nna á va̱ása, xíniñúʼu koo u̱vi̱ á u̱ni̱ na̱ testigo. Soo tá kǒo xíniso̱ʼona ña̱ káʼa̱nna xíʼinna, natúʼun xa̱ʼa̱na xíʼin na̱ congregación. Soo tá kǒo xíínna kuniso̱ʼona na̱ congregación, ná koona nu̱ún táki̱ʼva íyo na̱ ñuyǐví xíʼin na̱ ndákaya xu̱ʼún ña̱ impuesto” (Mat. 18:15-17).

11. ¿Ndáa ki̱ʼva xíto Jehová ku̱a̱chi ndeé ña̱ va̱xi yóʼo?

    • ▪ Ku̱a̱chi kini

    • ▪ Ña̱ kuniñúʼuyó na̱ʼná ndióxi̱ vatá

    • ▪ Ta̱a ta̱ kísi̱ xíʼin inka ta̱a

    • ▪ Ña̱ íxakuíʼnána

    • ▪ Na̱ sísikí xa̱ʼa̱ xu̱ʼún

    • ▪ Na̱ xíʼiní ndixi nda̱a̱ xínina

    • “Va̱ása sandáʼvindó miíndó. Na̱ yiví na̱ kéʼé ku̱a̱chi kini, na̱ ndásakáʼnu ndióxi̱ vatá, na̱ kísi̱ xíʼin na̱ kǒo nítindaʼa̱ xíʼinna, ta̱a ta̱ kísi̱ xíʼin inka ta̱a, na̱ ku̱i̱ʼná, na̱ kútóo koo ku̱a̱ʼá ña̱ʼa, na̱ xíʼi nda̱a̱ xíniina, na̱ káʼa̱n-ndi̱va̱ʼa xíʼin inkana, na̱ kéʼé ña̱ va̱ása va̱ʼa xíʼin iinna ña̱ kindaana ña̱ kúúmiína va̱ása ki̱ʼvina ti̱xin Reino Ndióxi̱” (1 Cor. 6:9, 10).

12. Tá xa̱a̱ kúni̱ ndakavaún keʼún ku̱a̱chi kini ña̱ ku̱su̱n xíʼin iin na̱ va̱ása nítindaʼa̱ xíʼún, ¿ndáaña chika̱a̱-iniún keʼún?

    • “Kuxíkandó nu̱ú ku̱a̱chi kini” (1 Cor. 6:18).

13. ¿Nda̱chun va̱ása va̱ʼa kuniñúʼuyó ta̱tán ña̱ kúúmií droga á ta̱tán ña̱ sásana xi̱níyó tá su̱ví na̱ médico kúú na̱ káʼa̱n xíʼinyó ña̱ kuniñúʼuyó ña̱yóʼo?

    • “Ndataxindó miíndó ta saátu ña̱ tákundó ndaʼa̱ Ndióxi̱, ta ná kooña nda̱a̱ táki̱ʼva íyo iin ña̱ yi̱i̱ ña̱ ndakiʼinra; chi saá kúú ña̱ kuniñúʼundó ndiʼi ña̱ ndákanixi̱níndó ña̱ ndasakáʼnundó Ndióxi̱. Ta va̱ása taxindó ña̱ nasama ña̱ ñuyǐví yóʼo miíndó; va̱ʼaka taxindó ña̱ ná nasama Ndióxi̱ ña̱ ndákanixi̱níndó, tasaá kunda̱a̱-inindó ndáaña kúú ña̱ kúni̱ Ndióxi̱ keʼéndó ta ndáaña kúú ña̱ va̱ʼa ta ndáaña kúú ña̱ kútóora” (Rom. 12:1, 2).

14. ¿Ndáaña kúú kuenta na̱ ta̱chí ndi̱va̱ʼa ña̱ va̱ása kútóo Ndióxi̱?

    • “Va̱ása xíniñúʼu kundoo na̱ xáʼmi se̱ʼe xíʼinndó, ni na̱ kéʼé ña̱ ndáku, ni na̱ kéʼé magia, ni na̱ xíto tuni̱, ni na̱ kéʼé ña̱ tási, ni na̱ íxatási xíʼin inkana, ni na̱ nándukú na̱ ndáku, ni na̱ ku̱a̱ʼa̱n káʼa̱n xíʼin na̱ tu̱ʼva á na̱ tási, ni na̱ ndáka̱tu̱ʼún na̱ ni̱xi̱ʼi̱ (Deut. 18:10, 11).

15. Tá iin na̱ yiví ni̱ki̱ʼvina iin ku̱a̱chi ña̱ ndeé, ¿ndáaña xíniñúʼu keʼéna ña̱ va̱ʼa kitáʼan tukuna xíʼin Jehová?

    • “Ni̱na̱ʼma̱i̱ ku̱a̱chii̱ nu̱ún; ta kǒo nísasii̱ yuʼíi̱ xa̱ʼa̱ña. Ta ka̱chii̱: ‘Na̱ʼma̱i̱ ku̱a̱chii̱ nu̱ú Jehováʼ” (Sal. 32:5).

    • “¿Á ndáa ndóʼó ndeé ndóʼo? Kanandó na̱ anciano ña̱ congregación, ta ná ka̱ʼa̱nna xa̱ʼa̱ndó, ta ná chika̱a̱na aceite ndóʼó xíʼin ki̱vi̱ Jehová. Ña̱ ka̱ʼa̱n na̱ anciano xíʼin Ndióxi̱ xa̱ʼa̱ndó ndaʼandó, ta Jehová sandáʼara ndóʼó. Saátu tá ke̱ʼéndó ña̱ va̱ása va̱ʼa, koo káʼnuva-inira xa̱ʼa̱ndó” (Sant. 5:14, 15).

16. Tá ku̱nda̱a̱-iniún ña̱ iin na̱ hermano ni̱ki̱ʼvina iin ku̱a̱chi ña̱ ndeéní, ¿ndáaña xíniñúʼu keʼún?

    • “Tá iin na̱ yiví xi̱nina á ku̱nda̱a̱-inina xa̱ʼa̱ iin na̱ ke̱ʼé ña̱ va̱ása va̱ʼa, ta xi̱nina ndiʼi ña̱ ku̱u. Ta ná nda̱ka̱tu̱ʼúnna ndáa na̱ xi̱ni á ndáa na̱ ku̱nda̱a̱-ini xa̱ʼa̱ ndiʼi ña̱ ku̱u, soo na̱ yiví na̱ ku̱nda̱a̱-ini yóʼo kǒo káʼa̱nna xa̱ʼa̱ ña̱ xi̱nina, iin ku̱a̱chi kúú ña̱yóʼo. Na̱yóʼo ndakiʼinna castigo saáchi va̱ása nínatúʼunna xa̱ʼa̱ ña̱ ku̱u” (Lev. 5:1).

17. Tá sa̱yáʼana anuncio ti̱xin congregación ña̱ iin na̱ hermano va̱ása kúúkana testigo Jehová, ¿ndáa ki̱ʼva xíniñúʼu keʼéyó xíʼin na̱yóʼo?

    • “Sandákoondó ña̱ kutáʼanndó xíʼin nda̱a̱ ndáaka na̱ káʼa̱nna hermano xíʼin ta kéʼéna ku̱a̱chi kini, kútóona koo ku̱a̱ʼá ña̱ʼana, ndásakáʼnuna ndióxi̱ vatá, káʼa̱n-ndi̱va̱ʼana xíʼin inkana, xíʼina nda̱a̱ xíniina á íxakuíʼnána. Nda̱a̱ ni loʼo kǒo kuxundó xíʼin na̱ yiví kán” (1 Cor. 5:11).

    • “Tá iin na̱ yiví va̱xina nu̱úndó ta kǒo sánáʼa̱na táʼan ña̱yóʼo ndóʼo, va̱ása ndakiʼinndóna ti̱xin veʼendó ta ní va̱ása chindeéndóna” (2 Juan 10).

18. ¿Nda̱chun xíniñúʼu kuʼvi̱-ini na̱ migoyó kunina Jehová?

    • “Na̱ xíka xíʼin na̱ ndíchi ndíchi koona, soo na̱ xíka xíʼin na̱ kíʼvi kǒo ña̱ va̱ʼa ndakiʼinna” (Prov. 13:20).

    • “Va̱ása taxindó ña̱ sándaʼvi inkana ndóʼó, chi tá kítáʼanndó xíʼin na̱ yiví na̱ kéʼé ña̱ va̱ása va̱ʼa, nandósóndó keʼéndó ña̱ va̱ʼa” (1 Cor. 15:33).

19. ¿Nda̱chun va̱ása kíʼvi miíyó na̱ testigo Jehová, xíʼin ña̱ política?

    • “Na̱yóʼo su̱ví kuenta na̱ ñuyǐví kúúna, nda̱a̱ táki̱ʼva íyo yi̱ʼi̱ su̱ví kuenta na̱ ñuyǐví kúi̱” (Juan 17:16).

20. ¿Nda̱chun xíniñúʼu kuniso̱ʼoyó ña̱ káʼa̱n na̱ chíñu xíʼinyó?

    • “Xíniñúʼu kuniso̱ʼoyó ndiʼi ña̱ káʼa̱n na̱ chíñu na̱ xáʼndachíñu nu̱úyó, saáchi va̱ása koo na̱yóʼo tá su̱ví Ndióxi̱ kúú ta̱ nítaxi koona; na̱ chíñu na̱ íyo xa̱a̱ síín síín chiñu kúúmiína ta mií Ndióxi̱ ta̱xi ña̱ kooña saá” (Rom. 13:1).

21. Tá ná ka̱ʼa̱n na̱ chíñu xíʼún keʼún iin ña̱ va̱ása kútóo Ndióxi̱, ¿ndáaña keʼún?

    • “Xíniñúʼu kuniso̱ʼondi̱ ña̱ káʼa̱n Ndióxi̱ chi ta̱yóʼo kúú ta̱ xáʼndachíñu nu̱úndi̱ nu̱úka ña̱ kuniso̱ʼondi̱ ña̱ káʼa̱n na̱ yiví” (Hech. 5:29).

22. ¿Ndáa texto kúú ña̱ kivi chindeétáʼan xíʼinyó ña̱ va̱ása keʼéyó táʼan ña̱ kéʼé na̱ ñuyǐví yóʼo, tá ndáka̱xinyó ndáa chiñu kúú ña̱ kachíñuyó?

    • “Ta kǒo kuniñúʼukana espada ña̱ kanitáʼanna xíʼin na̱ inka ñuu chi kǒoka guerra koo” (Miq. 4:3).

    • “Ndóʼó na̱ ñuu miíi̱, keendó ti̱xinña tá kǒo kúni̱ndó ki̱ʼvindó ku̱a̱chi xíʼinña, tá kǒo kúni̱ndó ndakiʼinndó tu̱ndóʼo xíʼinña” (Apoc. 18:4).

23. ¿Ndáaña ndaka̱xiún kusíkíún, kotonde̱ʼún, á kuniso̱ʼún?

    • “Jehová [...] sáa̱ra xínira ndiʼi na̱ kéʼé ña̱ kini” (Sal. 11:5).

    • “Kundasíndó kunindó ña̱ va̱ása va̱ʼa; xíniñúʼu kuʼvi̱-inindó kunindó ña̱ va̱ʼa” (Rom. 12:9).

    • “Ndakanixi̱níndó xa̱ʼa̱ ndiʼi ña̱ nda̱a̱, xa̱ʼa̱ ndiʼi ña̱ to̱ʼó, ndiʼi ña̱ va̱ása yaku̱a̱, ndiʼi ña̱ nda̱kú, ndiʼi ña̱ va̱ʼa, nda̱saaka ña̱ va̱ʼa íyo, ndakanixi̱níndó xa̱ʼa̱ña” (Filip. 4:8).

24. ¿Nda̱chun na̱ testigo Jehová va̱ása kéʼéna táʼan ña̱ kéʼé na̱ veʼe-ñu̱ʼu vatá?

    • “Ta ni va̱ása kivi kuxundó nu̱ú “mesa Jehová” ta kuxundó nu̱ú mesa na̱ ta̱chí ndi̱va̱ʼa” (1 Cor. 10:21).

    • “‘Kǒo kutáʼankandó xíʼinna, káchi Jehová, ta kǒo tiinkandó ña̱ yaku̱a̱ʼ, ‘ta yi̱ʼi̱ ndakiʼi̱n ndóʼóʼ” (2 Cor. 6:17).

25. ¿Ndáa consejo va̱xi nu̱ú Biblia kúú ña̱ kivi chindeétáʼan xíʼún á ku̱ʼu̱n iin vikó á va̱ása ku̱ʼún?

    • “Ni̱ki̱ʼvina xíʼin na̱ ñuyǐví, ta ki̱xáʼana kéʼéna costumbre na̱yóʼo. Ta xi̱ndasakáʼnuna ndióxi̱na, ta ña̱yóʼo iin trampa xi̱kuuña nu̱úna” (Sal. 106:35, 36).

    • “Na̱ ni̱xi̱ʼi̱ kǒoka ña̱ xíni̱na xa̱ʼa̱” (Ecl. 9:5).

    • “Na̱yóʼo su̱ví kuenta na̱ ñuyǐví kúúna, nda̱a̱ táki̱ʼva íyo yi̱ʼi̱ su̱ví kuenta na̱ ñuyǐví kúi̱” (Juan 17:16).

    • “Saáchi xa̱a̱ ni̱xi̱nu tiempo ña̱ xi̱keʼéndó ña̱ kúni̱ na̱ yiví chi xi̱keʼéndó ña̱ kini kéʼéna, chi xi̱kutóondó keʼéndó ña̱ kini, ña̱ xi̱xiʼindó ku̱a̱ʼá ndixi, xíʼin ña̱ xi̱xa̱ʼa̱nndó vikó nu̱ú kininí kéʼéna, ta xi̱ndasakáʼnundó inka ndióxi̱” (1 Ped. 4:3).

26. ¿Ndáa ki̱ʼva chindeétáʼan ejemplo ña̱ va̱xi nu̱ú Biblia xíʼún, ña̱ ndaka̱xiún á keʼún cumpleaño a va̱ása keʼúnña?

    • “Tá ki̱vi̱ u̱ni̱, tá ni̱xi̱nu ta̱ faraón ku̱i̱ya̱ra. Ta ke̱ʼéra iin vikó xa̱ʼa̱ na̱ káchíñu nu̱úra ta ta̱vára ta̱ táxi vino xíʼira ta saátu ta̱ íxava̱ʼa si̱táva̱ʼa. Soo nda̱taxira chiñu ndaʼa̱ ta̱ táxi vino xíʼira [...]. Soo ta̱ íxava̱ʼa si̱táva̱ʼa xa̱ʼnínara” (Gén. 40:20-22).

    • “Tá ni̱xi̱yo cumpleaño ta̱ Herodes, ñá loʼo se̱ʼe ñá Herodías ti̱xáʼañá ta ku̱tóoní ta̱ Herodes ña̱ ti̱xáʼañá, ña̱kán ni̱ka̱ʼa̱nra xíʼinñá ña̱ taxira ndaʼa̱ñá nda̱a̱ ndáaka ña̱ kúni̱ñá. Soo xa̱ʼa̱ ña̱ ni̱ka̱ʼa̱nní siʼíñá xíʼinñá, ña̱kán ni̱ka̱ʼa̱nñá: ‘Yóʼo taxiún ndaʼíi̱, ini iin ko̱ʼo̱, xi̱ní ta̱ Juan ta̱ sándakuchi na̱ yivíʼ”. “Ta ni̱ka̱ʼa̱nra ña̱ ná kaʼndana su̱kún ta̱ Juan ini veʼeka̱a” (Mat. 14:6-8, 10).

27. ¿Ndáa xa̱ʼa̱ kúú ña̱ kúni̱ún kundiku̱n consejo ña̱ táxi na̱ anciano?

    • “Kuniso̱ʼondó ta keʼéndó ña̱ káʼa̱n na̱ níʼi yichi̱ nu̱úndó xíʼinndó, chi na̱yóʼo kúú na̱ taxi kuenta xa̱ʼa̱ndó nu̱ú Ndióxi̱, xa̱ʼa̱ ña̱yóʼo ná kusi̱í-inina keʼénaña, chi tá va̱ása kúsi̱í-inina kéʼénaña, ku̱a̱ʼáva tu̱ndóʼo ndoʼondó” (Heb. 13:17).

28. ¿Nda̱chun ndáyáʼviní ña̱ tavándó tiempo ña̱ kaʼvindó Biblia ndiʼi ki̱vi̱ ta ndakanixi̱níndó xa̱ʼa̱ña?

    • “Ña̱ kútóokara kaʼvira kúú ley Jehová, ñuú ta káʼñu káʼvira ley yóʼo ta ndákanixi̱níra xa̱ʼa̱ña. Ta koora nda̱a̱ táki̱ʼva íyo iin yitu̱n tú níndichi yuʼú yu̱ta, chi kíxaa̱ tiempo ta táxinú ku̱i̱ʼi ta yu̱ku̱ ndaʼa̱nú va̱ása yíchi̱ña, tasaá ndiʼi ña̱ keʼéra va̱ʼa kanaña” (Sal. 1:2, 3).

29. ¿Nda̱chun kútóún ku̱ʼún reunión?

    • “Natúʼi̱n xa̱ʼa̱ ki̱vi̱ún xíʼin na̱ ñanii̱; nu̱ú ndátaka ku̱a̱ʼána ndasakáʼnui̱ yóʼó” (Sal. 22:22).

    • “Ná kundi̱ʼi̱-iniyó xa̱ʼa táʼanyó ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó, ta kǒo sandákooyó ña̱ ndatakayó nda̱a̱ táki̱ʼva kéʼé inkana. Va̱ʼaka ná chika̱a̱yó ndee̱ xíʼin táʼanyó, saáchi kúnda̱a̱-iniyó ña̱ xa̱a̱ ku̱yatin kixaa̱ ki̱vi̱” (Heb. 10:24, 25).

30. ¿Ndáa chiñu ña̱ ndáyáʼviní kúú ña̱ sa̱ndákoo ta̱ Jesús keʼéyó?

    • “Ña̱kán kúáʼanndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna ña̱ ná kundiku̱nna yi̱ʼi̱. Ta sandákuchindóna [...]. Sanáʼa̱ndóna ná keʼéna ndiʼi ña̱ʼa ña̱ sa̱náʼi̱ ndóʼó” (Mat. 28:19, 20).

31. Tá taxiyó donación á tá chíndeétáʼanyó xíʼin na̱ hermanoyó, ¿ndáa ki̱ʼva kúni̱ Jehová keʼéyó ña̱yóʼo?

    • “Ndasakáʼnu Jehová xíʼin ndiʼi ña̱ va̱ʼa kúúmiíún” (Prov. 3:9).

    • “Tá iin iinndó keʼéndó nda̱a̱ táki̱ʼva chi̱ka̱a̱-inindó, ta xíʼin níma̱ndó keʼéndóña su̱ví xíʼin ña̱ nduxa̱ saáchi Ndióxi̱ kúʼvi̱-inira xínira na̱ táxiña xíʼin ña̱ si̱í-ini” (2 Cor. 9:7).

32. Miíyó na̱ ndásakáʼnu Ndióxi̱, ¿ndáa tu̱ndóʼo kúú ña̱ ndátuyó kixi nu̱úyó?

    • “Si̱íní íyo ini na̱ íxandi̱va̱ʼana xíʼin xa̱ʼa̱ ña̱ kéʼéna ña̱ va̱ʼa, saáchi ku̱ʼu̱nna ndakutáʼanna xíʼin na̱ kaʼndachíñu chí ndiví. Si̱íní íyo ini ndóʼó tá káʼa̱n-ndi̱va̱ʼana xíʼinndó, ndíku̱nna sa̱tándó ta ku̱a̱ʼání ña̱ vatá káʼa̱nna xa̱ʼa̱ndó xa̱ʼa̱ ña̱ níʼindó ki̱víi̱. Kusi̱íní-inindó ta kanditandó xa̱ʼa̱ ña̱ kúsi̱í-inindó, saáchi káʼnuní ña̱ ndakiʼinndó chí ndiví, chi saátu i̱xaana xíʼin na̱ profeta na̱ xi̱ndoo xi̱naʼá” (Mat. 5:10-12).

33. ¿Nda̱chun iin ña̱ va̱ʼaní kúú ña̱ xa̱ún ndakuchiún, ta koún testigo Jehová?

    • “Tu̱ʼún sa̱kúsi̱íníña níma̱i̱, ta sa̱náʼi̱ ki̱vi̱ún na̱ yiví, Jehová Ndióxi̱” (Jer. 15:16).