Ña̱ sándakaʼán na̱ ndakuchi

Ti̱xin asamblea ña̱ xíkuumií na̱ testigo Jehová, kán kúú nu̱ú ndákuchi na̱ kúni ndakuchi. Tá xa̱a̱ ndíʼi xíniso̱ʼona discurso ña̱ káʼa̱n xíʼin na̱ ndakuchi, saá káʼa̱nna xíʼinna ña̱ ná ndakuditana ta ndeé ná ndakuiinna u̱vi̱ ña̱ pregunta va̱xi yóʼo:

1. ¿Á xa̱a̱ ndi̱kó-iniún xa̱ʼa̱ ku̱a̱chiún, nda̱taxiún ña̱ tákún ndaʼa̱ Jehová ta kándíxaún ña̱ mií ta̱ Jesucristo kúú ta̱ nda̱kaxin Ndióxi̱ ña̱ sakǎkura miíyó?

2. ¿Á kúnda̱a̱-iniún ña̱ tá ná ndakuchiún na̱ʼún nu̱ú ndiʼina ña̱ nduún testigo Jehová ta kítáʼún xíʼin na̱ ñuura?

Tá ná ndakuiinna u̱vi̱ saá pregunta yóʼo, xíʼin ña̱yóʼo náʼa̱na ña̱ kándíxana ña̱ ni̱xi̱ʼi̱ ta̱ Jesús xa̱ʼa̱na ta saátu ndátaxina miína ndaʼa̱ Jehová (Rom. 10:9, 10). Soo xa̱a̱ ya̱chi̱ka ni̱ka̱ʼa̱nna xíʼin Ndióxi̱ ta nda̱kanixi̱nína xa̱ʼa̱ ña̱ pregunta yóʼo ña̱ va̱ʼa ndakuiinnaña.

¿Á xa̱a̱ ni̱ka̱ʼún xíʼin Jehová ña̱ ndataxiún miíún ndaʼa̱ra, ta ni̱ka̱ʼún xíʼinra ña̱ iinlá miíra ndasakáʼnún, ta ña̱ keʼún chiñu nu̱úra kúú mií ña̱ ndáyáʼvi va̱ʼaka?

¿Á kándíxaún ña̱ xa̱a̱ xíniñúʼu ndakuchiún?

¿Ndáa ti̱ko̱to̱ kúú ña̱ va̱ʼa kundixiún tá ná ndakuchiʼún? (1 Tim. 2:9, 10; Juan 15:19; Filip. 1:10).

Xíniñúʼu kundixiyó ti̱ko̱to̱ ña̱ vií náʼa̱, chi saá náʼa̱yó ña̱ kúúyó na̱ ndásakáʼnu Ndióxi̱. Ña̱kán, na̱ ndakuchi va̱ása xíniñúʼu ku̱ʼu̱n ti̱ko̱to̱ kini náʼa̱ xíʼinna ni ti̱ko̱to̱ ña̱ va̱xi letra nu̱ú á ña̱ kúúmií na̱ʼná. Ti̱ko̱to̱ ña̱ ndaka̱xinna kundixina tá ná ndakuchina xíniñúʼu limpio kooña ta ña̱ va̱ʼa náʼa̱ ná kooña.

Ki̱vi̱ ña̱ ndakuchi iinna, ¿ndáaña xíniñúʼu keʼéna? Luc. 3:21, 22).

Iin ejemplo va̱ʼaní kúú ña̱ chi̱ndúʼú ta̱ Jesús nu̱ú na̱ kúni̱ ndakuchi, chi saá nda̱kuchi miíra. Ta̱kán xi̱kunda̱a̱-inira ña̱ iin ña̱ ndáyáʼviní kuuña, ta xa̱ʼa̱ ña̱kán to̱ʼóní ke̱ʼéra tá nda̱kuchira. Ña̱kán, ki̱vi̱ ña̱ ndákuchina su̱ví iin ki̱vi̱ ña̱ kéʼéna si̱ki kúúña, ni ña̱ kusíkína nu̱ú ti̱kui̱í tá ndákuchina, ta saátu viíní ná koo ña̱ keʼéna ki̱vi̱ kán. Ta saátu na̱ sa̱kán ndákuchi va̱ása xíniñúʼu ndasakáʼnuna miína nu̱ú inkana, ña̱ nda̱a̱ iin ki̱vi̱ ña̱ si̱íní kúúña nu̱ú na̱ ndákuchi, soo xíniñúʼu ki̱ʼvaní ná koo ña̱ keʼéna.

¿Ndáa ki̱ʼva chindeétáʼan ña̱ reunión xíʼún ta saátu ña̱ va̱ʼaní kitáʼún xíʼin na̱ hermano?

Tá xa̱a̱ nda̱kuchiún, ¿nda̱chun ndáyáʼviní tavaún tiempo ña̱ kaʼviún ta saátu ña̱ natúʼun xa̱ʼa̱ Ndióxi̱ xíʼin na̱ yiví?

ÑA̱ KÁʼA̱N XÍʼIN NA̱ ANCIANO ÑA̱ CONGREGACIÓN

Tá iin na̱ publicador káʼa̱nna ña̱ kúni̱na ndakuchina, na̱yóʼo xíniñúʼu kaʼvina pregunta ña̱ va̱xi nu̱ú página 12 nda̱a̱ 49 ta saátu ná kaʼvina nu̱ú káʼa̱nña “Tu̱ʼun ña̱ ku̱a̱ʼa̱n nu̱ú na̱ publicador na̱ kúma̱ní ndakuchi” (página 7). Nu̱ú ña̱yóʼo káʼa̱nña xíʼinna ndáa ki̱ʼva sákuaʼana tá ná nda̱ka̱tu̱ʼun na̱ anciano miína. Ta saátu káʼa̱nkaña ña̱ kivi kununá nu̱ú tutuna tá ná keʼé na̱ anciano pregunta xíʼinna, saátu kivi kuniñúʼuna ña̱ ka̱ʼyína nu̱ú tutuna ña̱ va̱ʼa ndakuiinna. Tá kúma̱níka keʼé na̱ anciano pregunta xíʼinna, va̱ása xíniñúʼu ya̱chi̱ka keʼé iinna pregunta ña̱ va̱xi nu̱ú ña̱ tutu yóʼo xíʼinna.

Na̱ kúni̱ ndakuchi, ná ka̱ʼa̱nna xíʼin ta̱ coordinador na̱ anciano. Tándi̱ʼi ka̱ʼvina nu̱ú káʼa̱nña “Ña̱ nda̱ka̱tu̱ʼunna na̱ kúni̱ ndakuchi”, ta̱ coordinador nda̱ka̱tu̱ʼunra na̱yóʼo á xa̱a̱ ke̱ʼéna oración nu̱ú ni̱ka̱ʼa̱nna ña̱ kúni̱na ndataxina miína ndaʼa̱ Jehová ta ni̱ka̱ʼa̱nna xíʼinra ña̱ kúni̱na keʼéna ña̱ kúni̱ miíra. Tá na̱ publicador xa̱a̱ ke̱ʼéna ña̱yóʼo, ta̱ coordinador ka̱ʼa̱nra xíʼin u̱vi̱ na̱ anciano ña̱ keʼéna pregunta xíʼin na̱yóʼo, ta iin tá iin táʼví xa̱a̱ síín xa̱a̱ síín na̱ anciano keʼé pregunta xíʼinna. Va̱ása xíniñúʼu kundatuvina nda̱a̱ ná ka̱ʼa̱nna ama koo iin asamblea ta saáví keʼéna ña̱ pregunta yóʼo xíʼinna.

Iin tá iin táʼví nu̱ú va̱xi ña̱ pregunta yóʼo iin hora kivi keʼéna pregunta xíʼin na̱ ndakuchi, soo kiviva ku̱a̱ʼáka hora keʼénaña. Tá kíxáʼana ta saátu tá sándiʼina, xíniñúʼu keʼéna oración. Ni na̱ anciano ta ni na̱ publicador va̱ása xíniñúʼu kamaní kuni̱na sandíʼina xíʼin ña̱ pregunta yóʼo. Na̱ anciano na̱ nda̱kaxinna keʼé ña̱ pregunta yóʼo xíʼin na̱ nda̱kuchi, xíniñúʼu ndi̱ku̱n kixáʼana keʼénaña.

Va̱ása xíniñúʼu sandátakandó na̱ kúni̱ ndakuchi ña̱ keʼéndó pregunta xíʼinna, iin tá iinvana keʼéndó pregunta xíʼin. Tasaá va̱ʼa kuniso̱ʼondó ña̱ ndakuiinna, ta kunda̱a̱-inindó xíʼinna á kúma̱níka á xa̱a̱ va̱ʼa ndakuchina. Tasaá kusi̱íka-inina ndakuiinna xa̱ʼa̱ ña̱ ndáka̱tu̱ʼunndóna. Ta na̱ xa̱a̱ tindaʼa̱ kiviva keʼéndó pregunta xíʼin u̱vi̱ saá na̱yóʼo.

Tá iin ñá ku̱ʼvayó kúú ñá kúni̱ ndakuchi, kivi nda̱ka̱tu̱ʼunndóñá nu̱ú ndóo yatin na̱ yiví, soo va̱ása xíniñúʼu kuniso̱ʼo inkana ña̱ nda̱ka̱tu̱ʼunndóñá. Kivi ku̱ʼu̱n u̱vi̱ anciano á kivitu ku̱ʼu̱n iin ta̱ siervo ministerial xíʼin iin ta̱ anciano ta̱ keʼé ña̱ pregunta yóʼo.

Sava congregación loʼova kúú na̱ anciano ñúʼu, ta kivi kuniñúʼundó na̱ siervo ministerial na̱ xa̱a̱ kúnda̱a̱ va̱ʼa ini xíʼin Biblia ña̱ nda̱ka̱tu̱ʼunndó na̱ kúni̱ ndakuchi ña̱ va̱xi táʼví iin ña̱ naní “Ña̱ kándíxa na̱ ndásakáʼnu Ndióxi̱”. Soo ña̱ táʼví u̱vi̱ ña̱ naní “Ña̱ kéʼé na̱ ndásakáʼnu Ndióxi̱”, na̱ anciano kúú na̱ xíniñúʼu keʼé ña̱ pregunta yóʼo xíʼin na̱ ndakuchi. Tá iin congregación kǒo na̱ ñaniyó na̱ kivi keʼé ña̱ pregunta yóʼo xíʼin na̱ kúni̱ ndakuchi, kivi ka̱ʼa̱nndó xíʼin ta̱ superintendente ña̱ circuito, ta ta̱yóʼo kivi ndukúra na̱ ñaniyó na̱ inka congregación ña̱ va̱ʼa ku̱ʼu̱nna keʼéna pregunta xíʼin na̱ kúni̱ ndakuchi.

Tá na̱ va̱lí kúú na̱ keʼéndó pregunta xíʼin ña̱ ndakuchina, xíniñúʼu koo yivá na̱ va̱lí yóʼo xíʼinna tá ná keʼéndó pregunta xíʼinna. Soo tá va̱ása ní kivi koo yivá na̱ va̱lí yóʼo, kivi kundoo nda̱saa u̱vi̱ na̱ anciano, á iin siervo ministerial xíʼin iin ta̱ anciano ña̱ keʼéna ña̱ pregunta yóʼo.

Ña̱ nda̱ka̱tu̱ʼunndó na̱ kúni̱ ndakuchi, saá kúú ña̱ va̱ʼa kunda̱a̱-inindó á xa̱a̱ kúnda̱a̱-inina xa̱ʼa̱ ña̱ sánáʼa̱ Biblia. Saátu á xa̱a̱ kandíxana ña̱ ndáyáʼviní tu̱ʼun Ndióxi̱, ta saátu á xa̱a̱ ixato̱ʼóna ña̱ káʼa̱n na̱ ñuu Jehová. Soo tá ta̱ʼán kunda̱a̱ va̱ʼa inina ña̱ sánáʼa̱ Biblia, kivi ndukúndó iin na̱ hermano ná chindeétáʼanna xíʼin na̱yóʼo ña̱ va̱ʼa xa̱a̱na ndakuchina chí nu̱únínu. Kivitu taxindó tiempo ndaʼa̱na ña̱ keena natúʼunna xa̱ʼa̱ Ndióxi̱, ta ná keʼéna ña̱ káʼa̱n na̱ ñuura. Ndóʼó na̱ anciano xíni̱ nda̱saa tiempo kuniñúʼundó ña̱ keʼéndó pregunta xíʼin na̱ ndakuchi tasaá va̱ʼa kunda̱a̱-inindó á xa̱a̱ va̱ʼa ndakuchina. Soo va̱ása nandósóndó ña̱ keʼéndó ndi’i pregunta ña̱ va̱xi nu̱ú tutu yóʼo xíʼinna.

Tá xa̱a̱ ndi̱ʼi ke̱ʼéndó pregunta ña̱ va̱xi táʼví u̱vi̱ xíʼin na̱ kúni̱ ndakuchi, saá ndatakandó ña̱ kotondó á xa̱a̱ va̱ʼa ndakuchi na̱ ke̱ʼéndó pregunta xíʼin. Xíniñúʼu kiʼinndó kuenta xíʼin na̱ kúni̱ ndakuchi yóʼo, ndáa ki̱ʼva íyona, ndáaña xi̱keʼéna xi̱naʼá ta ndáaña kéʼéna vitin ta ndáaka ña̱ʼa kéʼéna. Ña̱ ndíʼi̱-iniyó na̱ anciano xa̱ʼa̱ kúú ña̱ ná kuʼvi̱-inina kunina Jehová ta ná kandíxana ña̱ sánáʼa̱ Biblia. Ña̱ chindeétáʼanndó xíʼinna kúú ña̱ chindeé miína ña̱ va̱ʼa natúʼunna xa̱ʼa̱ Ndióxi̱ xíʼin na̱ yiví.

Tándi̱ʼi, iin á u̱vi̱ na̱ anciano na̱ ke̱ʼé pregunta xíʼinna, ka̱ʼa̱nna xíʼin na̱ publicador yóʼo á va̱ʼa ndakuchina á kúma̱ní loʼoka nu̱úna. Tá xa̱a̱ va̱ʼa ndakuchina, saá ka̱ʼa̱nna xíʼinna ña̱ va̱xi nu̱ú (página 51 nda̱a̱ 53) ña̱ naní “Ña̱ sándakaʼán na̱ ndakuchi”. Tá kúma̱níka sandíʼi na̱ kúni̱ ndakuchi kaʼvina ña̱ libro Kivi koo si̱íún vitin ta saátu chí nu̱únínu, na̱ anciano yóʼo ka̱ʼa̱nna xíʼinna ná sandíʼina kaʼvina ña̱ libro yóʼo tá xa̱a̱ nda̱kuchina. Na̱ anciano ka̱ʼa̱nna xíʼin na̱ ndakuchi ña̱ ka̱ʼyi̱ fecha ña̱ ndakuchina nu̱ú tutu ña̱ naní Registro de publicador de la congregación. Ta ka̱ʼa̱nna xíʼin na̱ ndakuchi ña̱ ndáyáʼviní ka̱ʼyi̱ ki̱vi̱na, fecha ña̱ ndakuchina, fecha ña̱ ka̱kuna xíʼin inkakaña. Ta u̱vi̱ xa̱ʼa̱ ña̱ ndáyáʼviní kúúña, ña̱ nu̱ú: Ña̱ va̱ʼa kiʼin na̱ ñuu Ndióxi̱ kuenta xíʼin ndiʼi chiñu ña̱ kéʼé na̱ testigo Jehová iníísaá ñuyǐví. Ña̱ u̱vi̱: Ña̱ kivi keʼé na̱ publicador chiñu ti̱xin ñuu Ndióxi̱ ta saátu ña̱ kivi chindeétáʼanna xíʼin na̱yóʼo ña̱ sakuaʼakana xa̱ʼa̱ Ndióxi̱. Saátu ka̱ʼa̱nna xíʼin na̱ publicador ña̱ viíní kuniñúʼuna ndiʼi dato na̱yóʼo tá kúú ki̱vi̱na á inkakaña nda̱a̱ táki̱ʼva káchi ña̱ va̱xi nu̱ú “Política global de protección de datos personales de los testigos de Jehová”, ña̱ va̱xi nu̱ú jw.org. Ta u̱xu̱ minuto á loʼoka natúʼunna xa̱ʼa̱ ña̱yóʼo xíʼin na̱ publicador.

Tá xa̱a̱ ni̱xi̱nu iin ku̱i̱ya̱ nda̱kuchina, xíniñúʼu ku̱ʼu̱n u̱vi̱ na̱ anciano kotona na̱yóʼo ta chindeétáʼanna xíʼinna xíʼin consejo ña̱ va̱xi nu̱ú Biblia. Iin na̱ anciano xíniñúʼu koona superintendente ña̱ grupo nu̱ú ndíka̱a̱ na̱ nda̱kuchi yóʼo. Tá iin na̱ loʼo kúú na̱ nda̱kuchi, xíniñúʼu koo na̱ yivána xíʼinna. Viíní ná ka̱ʼa̱n na̱ anciano xíʼinna. Kivi chindeénana ña̱ kunda̱a̱ka-inina xíʼin Biblia, taxituna yichi̱ nu̱úna ndáa ki̱ʼva kaʼvina Biblia ndiʼi ki̱vi̱ xíʼin ña̱ kaʼvina xíʼin na̱ veʼena ndiʼi semana, ka̱ʼa̱ntuna xíʼinna ña̱ ná kǒo sandákoona ku̱ʼu̱nna reunión xíʼin ña̱ keena predicación semana tá semana. (Efes. 5:15, 16) Tá kúma̱níka sandíʼina kaʼvina ña̱ libro Kivi koo si̱íún vitin ta saátu chí nu̱únínu, na̱ anciano ná ndukúna iin na̱ ku̱ʼu̱n kaʼvi xíʼin na̱yóʼo ña̱ va̱ʼa sandíʼina ña̱ libro yóʼo. Kivi loʼova koo ña̱ ka̱ʼa̱nna xíʼinna. Ña̱ ndáyáʼvika kúú ña̱ chika̱a̱na ndee̱ xíʼin na̱yóʼo.