¿Nda̱saa chíndeétáʼan ley Ndióxi̱ xíʼinyó?

1. ¿Ndachun xíniñúʼuyó konsejo Ndióxi̱?

Yiváyó Jehová ndíchika ta̱yóʼo nu̱ú miíyó. Kúni̱níra miíyó ta ndíʼi̱-inira xa̱ʼayó. Va̱ása níkuva̱ʼayó ña̱ kaʼndayó chiñu nu̱ú miíyó (Jeremías 10:23). Nda̱a̱ tá íyo na̱ válí lée xíniñúʼu kundaana na̱yóʼo, saá íyoyó xíniñúʼu kuniʼi Ndióxi̱ yichi̱ nu̱úyó (Isaías 48:17, 18). Yichi̱ ña̱ táxi Ndióxi̱ nu̱úyó va̱ʼaní ña̱yóʼo. Kaʼvi 2 Timoteo 3:16.

Ña̱ ley Jehová káʼa̱nña xíʼinyó ndáaña keʼéyó ta va̱ʼa kundooyó tíempo vitin ta káʼa̱nña xíʼinyó ndáaña keʼéyó ta va̱ʼa niʼíyó bendición Ndióxi̱ chí nu̱únínu. Chi ta̱kán kúú ta̱ i̱xava̱ʼa miíyó ña̱kán kúú ña̱ xíniñúʼu kuniso̱ʼoyó ña̱ káʼa̱nra. Kaʼvi Salmo 19:7, 11 xíʼin Revelación (Apocalipsis) 4:11.

2. ¿Ndáa yichi̱ táxi ña Tu̱ʼun Ndióxi̱ nu̱úyó?

Nu̱ú Biblia va̱xi ley ta káʼa̱n káxiña xíʼinyó ndáaña va̱ʼa kéʼéyó ta ndáaña va̱ása kivi keʼéyó. Ta íyotu sava ña̱ táxi kuití yichi̱ nu̱úvayó (Deuteronomio 22:8). Xa̱ʼa ña̱kán kúú ña̱ xíniñúʼu ndakanixi̱níyó ndáaña keʼéyó tá iin iin yichi̱ (Proverbios 2:10-12). Ña̱ Biblia káʼa̱nña xíʼinyó Ndióxi̱ kúú ta̱ táxi ña̱ tákuyó. Ta ña̱yóʼo chíndeéña miíyó ña̱ ndakanixi̱níyó xa̱ʼa ndiʼi chiñu kéʼéyó ta kundaayó miíyó tá ku̱a̱ʼa̱nyó kachíñuyó, tá ndooyó veʼeyó á ndáaka nu̱ú xíkayó ná kundaayó miíyó. Kaʼvi Hechos 17:28.

3. ¿Ndáaña kúú u̱vi̱ ley ña̱ ni̱ka̱ʼa̱n Jesús xa̱ʼa ña̱ ndáyáʼviní?

Jesús ni̱ka̱ʼa̱nra xa̱ʼa u̱vi̱ ley. Ña̱ nu̱ú kúú ña̱ káʼa̱n xíʼinyó yukú i̱xava̱ʼa miíyó, sánáʼa̱ña miíyó xa̱ʼa Ndióxi̱, káʼa̱nña xíʼinyó ña̱ ná kuʼvi̱-iniyó kuniyó Ndióxi̱ ta ndasakáʼnuyóra xíʼin ndiʼi níma̱yó. Ta ndáaka chiñu kéʼéyó xíniñúʼu nakaʼányó xa̱ʼa ña̱ káʼa̱n ley yóʼo (Proverbios 3:6). Ta na̱ ndíku̱n ña̱ káʼa̱n tu̱ʼun yóʼo xíʼin ndiʼi níma̱na kivi xa̱a̱na koona mígo Ndióxi̱, si̱íní kundoona ta kutakuna ndiʼi tíempo. Kaʼvi Mateo 22:36-38.

Ña̱ u̱vi̱ kúú ña̱ táxi yichi̱ nu̱úyó ña̱ va̱ʼa kutáʼanyó xíʼin ndiʼina (1 Corintios 13:4-7). Tá ná kéʼéyó ña̱ káʼa̱n tu̱ʼun yóʼo kúni̱ kachiña ndíku̱nyó yichi̱ Ndióxi̱ ña̱ va̱ʼa kutáʼanyó xíʼin ndiʼina. Kaʼvi Mateo 7:12 xíʼin 22:39, 40.

4. ¿Nda̱saa chíndeétáʼan ley Ndióxi̱ xíʼinyó?

Ña̱ ley ña̱ va̱xi nu̱ú ña̱ Biblia sánáʼa̱ña miíyó ña̱ kuʼvi̱-iniyó kunitáʼanyó tasaá va̱ʼaka kundooyó xíʼin na̱ veʼeyó (Colosenses 3:12-14). Ta chíndeétuña na̱ tíndaʼa̱ chi káʼa̱nña xíʼinna ña̱ va̱ása va̱ʼa sandákootáʼanna. Kaʼvi Génesis 2:24.

Ña̱ ná kandíxayó ña̱ káʼa̱n ley Ndióxi̱ ña̱yóʼo chíndeéña miíyó ña̱ va̱ʼa niʼíyó chiñu kachíñuyó. Chi kǒo íxakuiʼnayó ta va̱ʼa káchíñuyó ta ku̱a̱ʼána kútóo ná káchíñu na̱ yiví na̱ íyo saá xíʼinna. Ta chíndeétuña miíyó ña̱ kǒo ña̱ʼa sándi̱ʼi-iniyó chi kúnda̱a̱-iniyó kéʼéyó ña̱ va̱ʼa nu̱ú Ndióxi̱ (Proverbios 10:4, 26; Hebreos 13:18). Tu̱ʼun Ndióxi̱ sánáʼa̱tuña miíyó ña̱ va̱ása kundi̱ʼi-iniyó xa̱ʼa ña̱ koo ku̱a̱ʼá ña̱ʼayó, chi ña̱ xíniñúʼu kundi̱ʼi va̱ʼaka-iniyó xa̱ʼa kúú ña̱ kutáʼan va̱ʼayó xíʼin Ndióxi̱. Kaʼvi Mateo 6:24, 25, 33 xíʼin 1 Timoteo 6:8-10.

Ña̱ ná keʼéyó ña̱ káʼa̱n Ndióxi̱ chindeéña miíyó, tá kúú ley ña̱ káʼa̱n ña̱ va̱ása va̱ʼa koʼo ku̱a̱ʼáyó ndixi, na̱ kándíxa ña̱yóʼo va̱ása kiʼinka kue̱ʼe̱na ni va̱ása kuvi ndiva̱ʼana (Proverbios 14:30; 22:24, 25; 23:20). Táxiva Jehová koʼo loʼoyó ndixi soo va̱ása va̱ʼa koʼo ku̱a̱ʼáyórá nda̱a̱ xi̱niyó xíʼinrá (Salmo 104:15; 1 Corintios 6:10). Ña̱ ley Ndióxi̱ chíndeéña miíyó chi káʼa̱nña xíʼinyó ña̱ kiʼinyó kuenta xíʼin ña̱ íxaayó ta saátu xíʼin ña̱ ndákanixi̱níyó (Salmo 119:97-100). Soo miíyó na̱ sákuaʼa xa̱ʼa Ndióxi̱ kándíxayó ña̱ káʼa̱n tu̱ʼunra, soo su̱ví xa̱ʼa ña̱ kúni̱yó va̱ʼa koo kuitíyó kuuña. Xa̱ʼa ña̱ kúni̱yó ndasakáʼnuyó Yiváyó Jehová kúúña. Kaʼvi Mateo 5:14-16.