¿Ndáaña kivi keʼéyó ña̱ va̱ʼa kǒo sandáʼvi ta̱ Ndi̱va̱ʼa miíyó?
Ña̱ káʼa̱n Biblia xa̱ʼa̱ ña̱yóʼo
Ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra chíkaa̱na ini na̱ yiví ña̱ keʼéna ku̱a̱ʼání ña̱ va̱ása va̱ʼa, ta ña̱yóʼo kúú ña̱ káʼa̱n Biblia xa̱ʼa̱ña: “Iníísaá ñuyǐví ndíka̱a̱ña ndaʼa̱ ta̱ Ndi̱va̱ʼa” (1 Juan 5:19). Ta saátu ña̱ Biblia káʼa̱nña xíʼinyó ndáa ki̱ʼva kéʼé ta̱ Ndi̱va̱ʼa ña̱yóʼo. Ná kotoyó sava ña̱ kéʼéra.
Sándaʼvira na̱ yiví. Ña̱ Biblia káʼa̱nña xíʼinyó ña̱ xíniñúʼu koo tu̱ʼvayó ña̱ ya̱ʼayó “nu̱ú ndiʼi ña̱ʼa ña̱ xíniñúʼu ta̱ Ndi̱va̱ʼa ña̱ kúni̱ra sandáʼvira” miíyó (Efesios 6:11). Ta̱ Ndi̱va̱ʼa xíniñúʼura na̱ yiví na̱ kéʼé ña̱ kútóora ña̱ sandáʼvira miíyó saáchi na̱yóʼo káʼa̱nna ña̱ kúúna na̱ ndásakáʼnu Ndióxi̱, soo su̱ví ña̱ nda̱a̱ví kúúña (2 Corintios 11:13-15).
Ña̱ʼa ña̱ kítáʼan xíʼin na̱ ta̱chí ndi̱va̱ʼa. Ta̱ Ndi̱va̱ʼa xíniñúʼura na̱ ndáku, na̱ tási, na̱ tu̱ʼva xíʼin na̱ kéʼé inkaka ña̱ʼa ña̱ va̱ʼa sakára xi̱ní na̱ yiví (Deuteronomio 18:10-12). Ta saátu na̱ xíniñúʼu droga táxina ña̱ ná ki̱ʼvi na̱ ta̱chí ndi̱va̱ʼa xi̱nína (Lucas 11:24-26).
Na̱ veʼe-ñu̱ʼu vatá. Na̱ veʼe-ñu̱ʼu na̱ kǒo sánáʼa̱ ña̱ nda̱a̱ sásina nu̱ú na̱ yiví ña̱ kandíxana ña̱ káʼa̱n Ndióxi̱ (1 Corintios 10:20). Ña̱ Biblia káʼa̱nña ña̱ ndiʼi ña̱yóʼo kúúña “ña̱ sánáʼa̱ na̱ ta̱chí ndi̱va̱ʼa” (1 Timoteo 4:1).
Na̱ ta̱chí ndi̱va̱ʼa. Ña̱ Biblia káʼa̱nña xa̱ʼa̱ na̱ yiví na̱ xi̱kuumií ta̱chí ndi̱va̱ʼa. Sava yichi̱, na̱ ta̱chí ndi̱va̱ʼa yóʼo xi̱sakúána nu̱ú na̱ yiví, va̱ása níxi̱kivi ka̱ʼa̱nna ta xi̱satúkue̱ʼe̱na miína (Mateo 12:22; Marcos 5:2-5).
¿Ndáaña kivi keʼéyó ña̱ va̱ʼa kundaayó miíyó nu̱ú ta̱ Ndi̱va̱ʼa?
Va̱ása xíniñúʼu yi̱ʼvíyó kuniyó ta̱ Ndi̱va̱ʼa ni na̱ ta̱chí ndi̱va̱ʼa na̱ kítáʼan xíʼinra, saáchi Biblia káʼa̱nña xíʼinyó ndáaña kivi keʼéyó ña̱ va̱ʼa kǒo kuyatinra nu̱úyó. Yóʼo va̱xi sava ña̱ chindeétáʼan xíʼinyó:
Xíniñúʼu kunda̱a̱-iniyó ndáaña kúú ña̱ xíniñúʼu ta̱ Ndi̱va̱ʼa ña̱ sándaʼvira na̱ yiví, ña̱kán va̱ʼa kǒo ndakavayó ndaʼa̱ra (2 Corintios 2:11).
Kaʼviyó Biblia ta keʼéyó ña̱ káʼa̱nña. Tá ndíku̱nyó ña̱ káʼa̱n Biblia va̱ása kuchiñu ta̱ Ndi̱va̱ʼa sandáʼvira miíyó (Efesios 6:11-18).
Xíniñúʼu sandíʼi-xa̱ʼa̱yó ndiʼi ña̱ʼa ña̱ kítáʼan xíʼin na̱ ta̱chí ndi̱va̱ʼa (Hechos 19:19). Tá kúú libro, video, yaa, revista xíʼin inkaka ña̱ʼa ña̱ kítáʼan xíʼin ña̱yóʼo.