Tlen kiijkuilok Marcos

13 Kema Jesús kistiauiyaya ipan teokali, se itokilijka kiiljuik: “Tlamachtijketl, ¡xikita, uejueyi uan yejyektsitsij tetl uan kali!”. 2 Uan Jesús kiiljuik: “¿Tikita ni uejueyi kali? Nikaj amo mokauas yon se tetl tekpichijtok. Nochi kiuelonisej”.*

3 Kema moseuijtoya ipan tepetl tlen Olivos kampa nesiyaya nopa teopamitl, Pedro, Santiago, Juan uan Andrés ichtakatsi kitlatsintokijkej: 4 “Xitechiljui, ¿kema panos nopa, uan tlake kinextis nechka tlamis nochi nopa tlamantli?”. 5 Uajka Jesús pejki kiniljuia: “Ximomokuitlauikaj. Amo aka ma inmechkajkayaua.* 6 Ualasej miakej katli kitekiuisej notoka uan kiijtosej ‘Na niCristo’, uan kinkajkayauasej miakej maseualmej. 7 Nojkia, kema inkikakisej guerras uan inkimatisej kanajya onka guerras, amo ximomajmatikaj, pampa moneki panos nopa tlamantli, pero ayamo eli itlamia.

8 ”Pampa se pilaltepetsi moteuis ika seyok pilaltepetsi, uan se ueyi altepetl* ika seyok ueyi altepetl, ejeliuis* mojmolinis* tlali; nojkia onkas mayantli. Ni tlamantli kinextia sanok pejtok* uejueyi tlaijiyouilistli.

9 ”Uan inmojuantij, ximomokuitlauikaj. Inmechtemaktilisej kampa tekichiuanij uan inmechmakilisej kampa tlaueyichiuaj judíos, inmechtlaijiyouiltisej uan inmechmiktisej, uan inmechchiualtisej xiakaj kampa gobernadores uan tlanauatianij pampa inelij notokilijkauaj. Kiampa uelis inkiniljuisej tlen inkineltokaj. 10 Nojkia, achtoui moneki momoyauas nopa kuali tlamachtili ipan nochi altepemej. 11 Pero kema inmechtemaktilisej kampa tekichiuanij, amo ximokuesokaj pampa inmoiljuijtosej tlake inkiijtosej; san xikijtokaj tlen ichikaualis Dios* kichiuas xikilnamikikaj ipan nopa hora, pampa amo inmojuantij inkamanaltisej, kamanaltis ichikaualis Dios. 12 Nojkia, se tlakatl kitemaktilis iikni para ma kimiktikaj, uan se tetaj kitemaktilis ikone, uan konemej kinijixnamikisej inintatauaj uan kichiuasej ma kinmiktikaj. 13 Nochi maseualmej inmechkualankaitasej pampa inelij notokilijkauaj. Pero katli kiijiyouijtos hasta itlamia, momanauis.*

14 ”Uajka, kema inkiitasej nopa tlamantli tlen kiijiaj* uan tlaxoleua,* ijkatok kampa amo kinamiki (katli tlapoua ma kitekiui itlalnamilikis), uajka katli itstokej ipan Judea ma cholokaj ipan tepemej. 15 Katli itstos kalkuitlapa* amo ma temo yon ma kikixti tlen kipixtok kalijtik, 16 uan katli itstos mila, amo ma tlakuepili kampa kikajki nochi tlen kipixtoya para kitemoti tlen ika moajkoluijkoma.* 17 ¡Teikneltikej nopa siuamej katli tlanemiltisej* o tlachichitisej ipan nopa tonali! 18 Miakpa ximomaijtokaj* para amo panos nopa kema tlauel tlaseseyas.* 19 Pampa ipan nopa tonali onkas se tlaijiyouilistli. Desde kema pejki nochi tlen onka, nochi tlen Dios* kichijchijki hasta nama, amo onkatok se tlaijiyouilistli* kej nopa, uan ayokmo kema sampa onkas. 20 Tlaj Jehová* amo kichiuaskia kototsi nopa tonali, amo aka momanauiskia. Pero mochiuas kototsi, kiampa kinpaleuis katli kintlapejpenijtok.

21 ”Nojkia, tlaj se akajya inmechiljuis ‘¡Xikitakaj, nikaj itstok Cristo!’ o ‘¡Xikitakaj, nepa itstok!’, amo xijneltokakaj. 22 Pampa monextisej istlakatikacristos* uan katli amo nelnelia elisej teokamanalouanij,* uan kichiuasej milagros uan uejueyi tlamantli para tlakajkayauasej, uan hasta uelis kinkajkayauasej katli kintlapejpenijtokej. 23 Yeka ximomokuitlauikaj. Niinmechiljuijtok nochi kema ayamo pano.

24 ”Ipan nopa tonali, kema ya panotos nopa tlaijiyouilistli, Tonati amo tlauis, metstli amo tlaminas,* 25 sitlalimej tepeuisej tlen iluikak uan nochi tlamantli tlen eltok iluikak, kitsejtselosej. 26 Uajka kiitasej katli eli iKone se Maseuali* ualajtiuala ipan mixtli tlen iluikak ika tlanauatili uan iueyitilis. 27 Uan ya kintitlanis ángeles uan kinsentilis katli kintlapejpenijtok ipan naui inakastla Tlaltipaktli, kampa peua Tlaltipaktli hasta kampa ontlami iluikak.

28 ”Xikitakaj tlake inmechmachtia nopa higokuauitl. Kema moseliltia imakuayo uan xiuiyokisa,* inkimatij ya nechka tlatotonias.* 29 Inmojuantij nojkia, kema inkiitasej nochi ni tlamantli, xijmatikaj yaya* itstok nechka, puertajteno. 30 Temachtli niinmechiljuia, ni maseualmej amo ixpoliuisej hasta kema panos nochi ni tlamantli. 31 Iluikaktli uan Tlaltipaktli ixpoliuisej, pero notlajtol* amo kema ixpoliuis.

32 ”Nopa tonali o nopa hora amo aka kimati, yon ángeles katli itstokej iluikak, yon iKone Dios; san toTata. 33 Kuali xitlachixtokaj uan xiisatokaj,* pampa amo inkimatij kema asis nopa tonali tlen kiixtlalijtok. 34 Ni eli kej se tlakatl katli yajki seyok altepetl, uan kema kistejki kinkajki itlatekipanojkauaj ma kimokuitlauikaj ichaj, uan sejse kimakak se tekitl, uan kinauatik katli kimokuitlauiyaya puerta nochipa ma tlachixto. 35 Yeka, nochipa kuali xitlachixtokaj, pampa amo inkimatij kema uala iteko nopa kali, tlaj ika tlapoyaui* o tlajkoyoual o neltlayoua o kema tlanestiuala. 36 Kiampa kema sanima* asiki, amo inmechpantiki inkochtokej. 37 Tlen inmojuantij niinmechiljuia, nikiniljuia nochi: nochipa kuali xitlachixtokaj”.