Tlen kiijkuilok Lucas

7 Kema ya kiniljuijtoya maseualmej tlen monekiyaya kiniljuis, kalajki Capernaúm. 2 Nopaya itstoya se katli kinyakanayaya soldados.* Ya kipixtoya se itlatekipanojka katli tlauel kiikneliyaya uan tlauel mokokouayaya, uan nechka mikiskia. 3 Kema kikajki kamanaltiyayaj tlen Jesús, kintitlanki se keskij katli kinyakanayayaj judíos ma kiiljuitij ma yaui kichikauati itlatekipanojka. 4 Inijuantij yajkej kampa itstoya Jesús uan pejkej kitlajtlaniaj ika nochi ininyolo: “Ni tlakatl kinamiki tijpaleuis, 5 pampa nelia techiknelia katli tielij judíos uan kichijchijki kampa titlaueyichiuaj”. 6 Uajka Jesús yajki ininuaya. Pero kema nechka asiskiaj ichaj nopa tlayakanketl, ya kintitlanki se keskij iuampoyouaj* ma kiiljuitij: “NoTeko, amo ximokuatotoni para tiualas, pampa amo kinamiki tikalakis nochaj. 7 Nojkia nijmati amo kinamiki nimonextis moixpa. San xikijto ma mochikaua, uan notlatekipanojka mochikauas. 8 Pampa na nojkia nijchiua tlen nechnauatiaj uan nojkia nikinnauatia nosoldados katli nikinyakana. Se nikiljuia ‘¡Xia!’ uan yaui, uan seyok nikiljuia ‘¡Xiuala!’ uan uala, uan katli nechtekipanoua nikiljuia ‘¡Xijchiua ni!’ uan kichiua”. 9 Kema Jesús kikajki nopa, mosentlachilik, moikankuepki* uan kiniljuik katli kitokiliyayaj: “Niinmechiljuia, yon ipan Israel amo nijpantijtok se akajya katli tlauel kuali tlaneltoka”. 10 Kema katli kintitlantoyaj tlakuepilijkej ichaj nopa tlayakanketl, kipantitoj nopa tlatekipanojketl ya mochikajtoya.

11 Teipa, Jesús yajki ipan se altepetl tlen kiiljuiyayaj Naín, itokilijkauaj uan miakej maseualmej yauiyayaj iuaya. 12 Kema monechkauik kampa ipuerta nopa altepetl, kiitak kikixtiyayaj se mijkatsi, iyojtsi ikone se siuatl. Nopa siuatl ya miktoya iueue. Nojkia yauiyayaj iuaya miakej maseualmej katli euayayaj ipan nopa altepetl. 13 Kema toTeko kiitak nopa siuatl, tlauel kiteikneltiitak* uan kiiljuik: “Ayokmo xichoka”. 14 Nimantsi monechkauik uan kiitskik kampa kiuikayayaj nopa mijkatsi, uan katli kiuikayayaj moketskej. Uajka kiijtok: “Telpokatl, na nimitsiljuia: ¡ximeua!”. 15 Nopa telpokatl katli miktoya, moseuik uan pejki kamanalti. Uan Jesús kimaktilik inana. 16 Nochi tlauel mosentlachilijkej* uan pejkej kiueyichiuaj Dios.* Kiijtouayayaj: “Se ueyi teokamanalojketl* monextijtok kampa tojuantij”, uan “Dios kinextijtok kitlasojtla ialtepe”. 17 Uan nochi tlen kichijki, momoyajki ipan nochi Judea uan ipan nochi nopa tlali.

18 Uajka itokilijkauaj Juan kipouilijkej nochi ni tlamantli. 19 Yeka Juan tlanauatik ma kinnotsatij omej itokilijkauaj uan kintitlanki ma kitlatsintokitij toTeko: “¿Ta tieli katli tiualaskia o moneki tijchiasej seyok?”. 20 Kema asitoj kampa itstoya Jesús, nopa tlakamej kiiljuijkej: “Juan katli teAtsonpoliuiltia techtitlanki ma timitstlatsintokikij tlaj tieli ta katli tiualaskia o moneki tijchiasej seyok”. 21 Ipan nopa tlalochtli,* kinchikajki miakej maseualmej katli mokokouayayaj, katli tlauel tlakayokuajkualouayayaj, katli kinpixtoyaj amo kuali ajakamej,* uan kichijki ma tlachiakaj katli amo tlachiayayaj. 22 Uan kinnankilik: “Xiakaj uan xikiljuitij Juan tlen inkiitstokej uan inkikaktokej: nama katli amo tlachiayayaj, tlachiaj; katli metskuachotikej, uelij nejnemij; katli kipixtoyaj lepra,* mochikauaj; katli amo tlakakiyayaj, nama tlakakij; katli miktoyaj, moyolkuij; uan katli amo tleno kipiaj, kinmatiltiaj nopa kuali tlamachtili. 23 Yolpaki katli amo tleno kitsakuilia ma nechneltoka”.

24 Kema itokilijkauaj Juan ya tlakuepilijtoyaj, Jesús pejki kinkamanaljuia nopa miakej maseualmej tlen Juan. Kiniljuik: “¿Tlake inkiitatoj ipan uaktok tlali? ¿Se akatl tlen kiuiuixoua ajakatl? 25 Uajka, ¿tlake inkiitatoj? ¿Se tlakatl katli mokentia yoyomitl tlen patiyo?* ¡Katli kitekiuiaj yoyomitl tlen patiyo uan kipiaj miak tlamantli itstokej ininchaj tlanauatianij! 26 Uajka, ¿tlake inkiitatoj? ¿Se teokamanalojketl? Niinmechiljuia kena, uan ya eli más que se teokamanalojketl. 27 Ya ni tlen moijkuilok tlen Juan: ‘¡Xikita! ¡Achtoui nijtitlanis notlayolmelajka ma tlayakantia, uan yaya mitskualchijchiuilijtias nopa ojtli!’. 28 Niinmechiljuia, amo itstok yon se maseuali más ueyi que Juan. Pero katli amo kipia miak tlanauatili ipan iTlanauatijkayo Dios, eli más ueyi que Juan”. 29 Kema nochi maseualmej uan katli tlainamayayaj impuestos kikajkej nopa, kiijtojkej Dios kichiua tlen kuali, pampa Juan kinatsonpoliuiltijtoya. 30 Pero fariseos* uan katli kuali momachtijtoyaj iTlanauatil Moisés, kiuejkamajkajkej tlen Dios kinekiyaya ma kichiuakaj pampa amo kinejkej Juan ma kinatsonpoliuilti.

31 Jesús nojua kiijtok: “¿Ika ajkia uelis nikinixnextis ni maseualmej katli nama itstokej uan kej ajkia elij? 32 Elij kej konemej katli moseuijtokej kampa mochiua tiankis* uan motsajtsiliaj: ‘Tijpitskej flauta, pero inmojuantij amo inmijtotijkej; tiuikakej se mijkauikatl, pero inmojuantij amo inchokakej’. 33 Pampa Juan katli teAtsonpoliuiltia ualajtok uan amo kikua pantsi yon kii* vino, uan inmojuantij inkiijtouaj: ‘Kipia se amo kuali ajakatl’. 34 Uan ualajtok katli eli iKone se Maseuali,* katli kena tlakua uan kii vino, uan inmojuantij inkiijtouaj: ‘¡Xikitakaj! ¡Se tlakatl katli sentlakuajtok uan sentlaitok, uan eli ininuampox katli tlainamaj impuestos uan katli tlajtlakolchiuaj!’. 35 Ika nochi tlen kichiua se akajya, nesis tlaj nelia tlalnamiki”.

36 Uan se tlen nopa fariseos kiseniljuijtoya ma tlakuati ichaj. Yeka Jesús kalajki ichaj nopa fariseo uan moseuik nechka kampa mesa. 37 Uan se siuatl katli ipan nopa altepetl nochi kiixmatiyayaj kej se katli tlauel tlajtlakolchiuayaya, kimatki Jesús tlakuayaya ichaj nopa fariseo uan kiualikak se piltekontsi* temitok ika aceite tlen ajuiyak mijyotiyaya. 38 Monechkauik ika iika, chokayaya iikxitla uan pejki kixolonilia iikxi ika iixayo uan kiuatsayaya ika itsonkal. Nojkia, kitsoponiliyaya iikxi ika miak tlaiknelili, uan kitekilik nopa aceite tlen ajuiyak mijyotiyaya. 39 Kema nopa fariseo katli kitlanejtoya kiitak nopa, moiljuik: “Tlaj ni tlakatl nelia eliskia se teokamanalojketl, kimatiskia ajkia kiitskia; kimatiskia kenijkatsa eli ni siuatl: se katli tlauel tlajtlakolchiua”. 40 Pero Jesús kimatiyaya tlen moiljuiyaya, yeka kiiljuik: “Simón, nijneki nimitsiljuis se tlamantli”. Ya kinankilik: “¡Xinechiljui Tlamachtijketl!”.

41 “Omej tlakamej kitlauikiliyayaj se katli tetlanejtia tomij; se kitlauikiliyaya 500 denarios,* uan ne seyok 50 denarios. 42 Uan nochi omej amo kipixtoyaj tlen ika kikuepiliskiaj tlen kitlauikiliyayaj, yeka katli tetlanejtiyaya tomij kintlapojpoljuik ika nochi iyolo. Uajka, ¿ajkia timoiljuia más kiiknelis?”. 43 Simón kinankilik: “Nimoiljuia katli más kitlauikiliyaya”. Ya kiiljuik: “Kuali titlanankilik”. 44 Uajka kitlachilik nopa siuatl uan kiiljuik Simón: “¿Tikita ni siuatl? Nikalajki mochaj uan amo tinechmakak atl tlen ika nimoikxipajpakas, pero ya kixolonik noikxi ika iixayo uan kiuatski ika itsonkal. 45 Amo tinechtsoponik, pero ni siuatl san nionkalakiko amo kikajtok nechtsoponilia noikxi ika tlaiknelili. 46 Amo tinechtlalilik aceite ipan notsonteko, pero ni siuatl nechtekilik aceite tlen ajuiyak mijyotia ipan noikxi. 47 Yeka nimitsiljuia maske kichijtok miak* tlajtlakoli, nijtlapojpoljuia pampa tlauel teiknelik. Pero katli amo miak kitlapojpoljuiaj, amo tlauel teiknelia”. 48 Uajka Jesús kiiljuik nopa siuatl: “Nimitstlapojpoljuia motlajtlakoljuaj”. 49 Katli moseuijtoyaj iuaya kampa mesa pejkej moiljuiaj: “¿Ajkia ni tlakatl katli hasta kintlapojpoljuia inintlajtlakoljuaj sekinok?”. 50 Pero Jesús kiiljuik nopa siuatl: “Timomanauijtok pampa kuali titlaneltoka. Xia ika kuali”.