Nopa carta tlen kintitlanilijkej Cristo itokilijkauaj tlen Filipos

2 Tlaj inuelij inteyolchikauaj ipan Cristo, tlaj inuelij inteyoltlaliaj ika tlaiknelili, tlaj inuelij inmotekipachouaj ika tlen kinpano sekinok, uan tlaj inteikneliaj uan intetlasojtlaj, 2 uajka xijchiuakaj tlauel ma niyolpaki kema inkinextiaj inkipiaj sanse inmotlalnamikilis uan inmoikneliaj, kema inkinextiaj initstokej sansejko uan inmoiljuiaj sanse tlamantli. 3 Amo xijchiuakaj yon se tlamantli san pampa inkinekij ma onka kualantli o pampa inkinekij inmoueyimatisej, más kuali ximoechkapanokaj* uan ximoiljuikaj sekinok más uejueyij que inmojuantij, 4 nojua ximotekipachojtokaj ika sekinok uan amo san ximoiljuijtokaj ipan tlen inmojuantij inmechpaleuis.

5 Nochipa xijpiakaj inmotlalnamikilis sanse kej kipixki Cristo Jesús. 6 Maske eliyaya kej Dios,* yon kentsi panok ipan itsonteko mochiuas sanse kej ya. 7 Amo, ya kikajtejki nochi tlen kipixtoya uan mochijki se tlatekipanojketl uan tlakatiko kej se maseuali. 8 Uan amo san nopa, kema ualajki kej se tlakatl, moechkapanok uan nochipa tlaneltokak hasta kema mijki, kena, kema kimiktijkej ipan se kuauitl kampa kitlaijiyouiltijkej.* 9 Yeka Dios kiuejkapantlalik ika se tekitl tlen más ueyi, uan ika nochi iyolo kimakak se tekiuejkayotl* tlen más pankisa que nochi sekinok, 10 kiampa ipan Jesús itoka, nochi ma motlankuaketsakaj, katli itstokej ipan iluikaktli, ipan Tlaltipaktli uan tlalijtik, 11 uan nochi ma kiijtokaj Jesucristo eli toTeko para ma kiuejkapantlalikaj toTata Dios.

12 Noikniuaj katli niinmechiknelia, inmojuantij nochipa inkichijtokej tlen inmechnauatiaj, uan amo san kema niitstok inmouaya, nojkia nama kema amo niitstok inmouaya nojua más inkichiuaj. Yeka nojua xijchijtokaj kampeka para inmomakixtisej,* pampa tlauel inkimakasij uan inkitlepanitaj Dios. 13 Pampa eli Dios katli inmechmaka tetikayotl, sanse kej ya kipaktia, uan kichiua xijnekikaj inkichiuasej tlen ya kineki uan nojkia inmechmaka fuerza para inkichiuasej. 14 Kema inkichiuasej tlen ueli tlamantli amo xitetlaijiljuikaj* yon xitlanajnankilikaj, 15 para amo ma inmechtlajtlakoltikaj ika yon se tlamantli, para initstosej intlapajpaktikej kej ikoneuaj Dios katli amo kipiaj yon se tlajtlakoli uan inpetlanij kej tlauili tlen kauantok ipan ni Tlaltipaktli, kampa itstokej maseualmej katli amo kuali ininyolo uan kichiuaj tlen tlauel amo kuali, 16 uan nojkia ximotlatskilijtokaj ipan nopa tlajtoli tlen temaka nemilistli. Uajka uelis niyolpakis ipan nopa tonali tlen iaxka Cristo pampa nijmatis amo san tlapik nimotlalok uan amo san tlapik nitekitik chikauak. 17 Pero maske nimotemaktilia kej nopa vino tlen kitoyauaj ipan nopa ofrenda* tlen intemakaj, pampa nitlapaleuia ipan nopa tekitl tlatsejtseloltik tlen ika inkitekipanouaj Dios tlen inkichiuaj pampa intlaneltokaj, niyolpaki uan nijneki nochi inmojuantij xiyolpakikaj nouaya. 18 Uajka inmojuantij nojkia moneki inyolpakisej uan inkichiuasej ma niyolpaki inmouaya.

19 Tlaj toTeko Jesús kinekis, nijnekiskia nima nijtitlanis Timoteo kampa inmojuantij, kiampa nimoyolchikauas kema nijmatis kenijkatsa initstokej. 20 Pampa amo nijpia seyok kej ya, katli nelnelia motekipachoua ika inmojuantij. 21 Pampa nochi nopa sekinok kintekipachoua san tlen inijuantij kinekij uan amo tlen Jesucristo kineki. 22 Pero inmojuantij inkimatij Timoteo kinextijtok amo kiampa eli, pampa tekitik nouaya kej se tlatekipanojketl kema tijmoyajkej nopa kuali tlamachtili, sanse kej kichiua se konetl iuaya itata. 23 Yeka, yaya nimantsi nijtitlanis kema nijmatis tlake nechpanos. 24 Kena, na nojkia nimotemachia ipan toTeko para nechka niitstos inmouaya.

25 Pero nama nikita kinamiki niinmechtitlanilis Epafrodito, noikni katli iuaya nitekititok uan sansejko titlatekipanojtokej kej Cristo isoldados, katli inmojuantij inkititlankej para ma nechpaleuiki ika tlen nechpoloua. 26 Ya tlauel kineki inmechitas, uan tlauel moyolkuesoua* pampa inmojuantij inkimatkej mokokouayaya.* 27 Uan nelia, nechka mikiskia pampa tlauel mokokouayaya. Pero Dios kitlasojtlak; uan amo san ya, nojkia nechtlasojtlak na para amo ma nijpia más tekipacholi ika tlen ya nijpixtoya. 28 Yeka nimantsi nijtitlani kampa inmojuantij, kiampa kema inkiitasej, sampa inyolpakisej uan na nijmatis kejuak nimokixtilia se tlamamali. 29 Uajka xijselikaj ika miak pakilistli, kej inmomajtokej inkinseliaj toTeko itokilijkauaj. Uan nochipa tlauel xikinpatiitakaj toikniuaj kej Epafrodito, 30 pampa yaya nechka mikiskia pampa kitekipanoua Cristo,* uan maske ueliskia kipanos tlen amo kuali, nechpaleuik ika tlen inmojuantij amo inuelkej pampa amo initstoyaj nikaj.