Nopa carta tlen kintitlanilijkej hebreos

11 Kema titlaneltokaj tijmatij temachtli moaxitis tlen tijchiaj, senkistok tijmatij nelnelia eltok tlen amo ueli tikitaj. 2 Katli uejkajkia itstoyaj tlaneltokakej uan yeka kimatkej Dios* kuali kinitayaya.

3 Pampa titlaneltokaj, tijmatij nochi nopa tonali* moixtlalijtok kej kinamiki pampa Dios kiampa kiijtok, yeka tlen tikitaj mochijtok ika tlamantli tlen amo ueli tikitaj.

4 Pampa Abel tlaneltokak, kimaktilik Dios se ofrenda* tlen más kuali que tlen Caín temakak. Uan pampa tlaneltokak, kimatki eliyaya xitlauak pampa Dios kiseljuilik* iofrendas. Uan maske ya mijki, itlaneltokilis nojua techmachtia.

5 Pampa Enoc tlaneltokak, kiuikakej sejkanok* para amo ma tlaijiyoui kema mikiskia, uan amo aka uelki kipantia pampa Dios kiuikak sejkanok. Uan kema ayamo kiuikatoyaj, kimatki para kiyolpakiltijtoya Dios. 6 Nojkia, tlaj se akajya amo tlaneltoka amo kema uelis kiyolpakiltis Dios, pampa katli monechkauia kampa Dios, moneki kineltokas ya nelia itstok uan kinteochiua katli kitemouaj ika nochi ininyolo.

7 Pampa Noé tlaneltokak, kema Dios ya kiiljuijtoya kiualikaskia tlen amo kema kiitstoyaj, kinextik kimakasiyaya Dios uan kichijchijki se arca para kinmanauis ichampoyouaj.* Ika itlaneltokilis, kinextik kinamikiyaya ma kintlatsakuiltikaj nopa maseualmej katli itstoyaj ipan Tlaltipaktli, uan Dios kiitak eliyaya xitlauak pampa tlaneltokak.

8 Pampa Abrahán tlaneltokak, kichijki tlen Dios kinauatik kema kinotski, uan yajki ipan nopa tlali tlen kiaxkatiskia. Kistejki maske amo kimatiyaya kanke yauiyaya. 9 Pampa tlaneltokak itstoya kej sejkanok ejketl ipan nopa tlali tlen Dios kitenkauilijtoya, kejuak itstoskia ipan seyok tlali. Itstoya ipan yoyonkali ininuaya Isaac uan Jacob, katli nojkia kiseliskiaj tlen kitenkauilijtoyaj Abrahán. 10 Pampa ya kichiayaya nopa altepetl tlen kipia itsinpeualtil tlen melauak, tlen Dios kiijtok kenijkatsa elis uan kichijchijki.

11 Pampa Sara tlaneltokak, nojkia kiselik tetikayotl para kinpias iteipaixuiuaj maske ya panotoya ixiui para kinpias ikoneuaj, pampa kimatiyaya katli kitenkauilijtoya nopa tlamantli eli temachtli. 12 Yeka, ika se tlakatl katli nesiyaya ayokmo ueliskia kinpias ikoneuaj, tlakatkej miakej konemej, tlauel miakej kej nopa sitlalimej tlen eltok iluikak uan amo ueliyayaj kinpouaj kej nopa xali tlen eltok iteno mar.

13 Nochi inijuantij kuali tlaneltokakej hasta kema mijkej, maske amo kiselijkej nopa tlamantli tlen kintenkauilijkej. Pero kejuak kiuejkaitakej uan kiselijkej ika pakilistli, uan tematiltijkej ininixpa nochi maseualmej para eliyayaj sejkanok euanij uan amo nochipa mokauaskiaj ipan nopa tlali. 14 Uan katli kiampa kamanaltij, xitlauak kinextiaj para kitemouaj se lugar para inijuantij. 15 Pero tlaj inijuantij nojua moseniljuijtoskiaj ipan nopa tlali kampa kistoyaj, ueltoskia sampa tlakuepilisej. 16 Pero nama kichiuaj kampeka kitemosej se lugar tlen más kuali, kiijtosneki se lugar tlen eltok iluikak. Yeka, Dios amo pinaua tlen inijuantij yon pinaua ma kiiljuikaj ininDios, pampa ya kisenkajtok se altepetl para inijuantij.

17 Pampa Abrahán tlaneltokak, temaktilik Isaac kema Dios kiyejyekok, kena, nopa tlakatl katli kiselik ika miak pakilistli tlen kitenkauilijtoyaj, kinejki temaktilis ikone iyojtsi, 18 maske ya kiiljuijtoyaj: “Mokoneuaj ualasej ika Isaac”. 19 Pero Abrahán moiljuik Dios hasta ueliskia kiyolkuis Isaac, uan kena, Dios kimakixtik ikone para amo ma miki, uan nopa kiixnextik se tlamantli tlen panoskia teipa.

20 Pampa Isaac tlaneltokak, nojkia kinteochijki Jacob uan Esaú uan kiniljuik tlen panoskia teipa.

21 Pampa Jacob tlaneltokak, kema nechka mikiskia kinteochijki sejse tlen ikoneuaj José uan motlatskilik ipan ikuatopil para kiueyichiuas Dios.

22 Pampa José tlaneltokak, kiijtok para israeleuanij kisaskiaj tlen Egipto, uan kema nechka mikiskia, tlanauatik tlake monekiyaya kichiuasej ika iomiyo.*

23 Pampa itatauaj Moisés tlaneltokakej, kema tlakatki, eyi metstli kitlatijkej,* pampa kiitakej eliyaya se pilkonetsi tlauel yejyektsi uan amo kimakaskej tlen tlanauatijtoya nopa tlanauatijketl. 24 Pampa Moisés tlaneltokak, kema ya motlakachijtoya amo kinejki ma kiiljuikaj eliyaya ikone iichpoka faraón.* 25 Kinejki ma kitlaijiyouiltikaj iuaya ialtepe Dios uan amo kinejki moyolpakiltis ika tlajtlakoli tlen san kichiuaskia ma moyolpakilti se tlalochtli,* 26 pampa kiitayaya tlaj kipinajtiskiaj kej Cristo, eliskia más ipati que nochi tlamantli tlen pajpatiyo tlen onkayaya ipan Egipto, pampa mosentlalijtoya ipan nopa tlateochiualistli tlen kiseliskia. 27 Pampa tlaneltokak, kistejki Egipto uan amo kimakaski nopa tlanauatijketl maske tlauel kualaniskia, pampa nojua kipixki iyolo kema kiixnamijki tlaouijkayotl kejuak kiitayaya katli amo ueli tikitaj. 28 Pampa Moisés tlaneltokak, kichijki iljuitl tlen Pascua uan ika estli kiatseljuik itejteno puerta,* kiampa katli tetsontlamiltiskia amo tleno kinchiuiliskia ininkoneuaj israeleuanij katli achtouieuanij.

29 Pampa israeleuanij tlaneltokakej, kiixkotonkej mar Rojo kejuak panotoskiaj kampa tlauaktok. Pero kema nopa egipcios nojkia kiampa kinejkej kichiuasej, nopa mar kinisauik.

30 Pampa israeleuanij tlaneltokakej, chikome tonali kiyaualojkej nopa uejueyi tepamitl tlen kiyaualtsakuayaya altepetl Jericó, uan nopa tepamitl uelonki. 31 Pampa tlaneltokak Rahab, nopa siuatl katli monamakayaya,* amo mijki kej katli amo kineltokakej Dios, pampa kuali kinselik katli yajkej tlachiatoj ichtakatsi.

32 ¿Uan tlake más nikijtos? Pampa amo nechaxiliskia tonali para niinmechpouilis tlen Gedeón, Barac, Sansón, Jefté uan David, uan nojkia tlen Samuel uan nopa sekinok teokamanalouanij.* 33 Ika inintlaneltokilis, kintlankej tlanauatianij, kichijkej tlen xitlauak, kintenkauilijkej se keski tlamantli, kitsajkej ininkamak leones, 34 amo tleno kinchiuilik nopa tlitl tlen xauantok, cholojkej kema kinekiyayaj kinmiktisej ika espada,* achtouia amo eliyayaj tetikej uan teipa kipixkej chikaualistli, mochijkej tetikej kema yauiyayaj ipan guerra uan kichijkej ma cholokaj soldados katli kinekiyayaj kinteuisej. 35 Itstoyaj se keskij siuamej katli ininuikaljuaj* ya miktoyaj uan moyolkuikej, pero sekinok tlakamej tlauel kintlaijiyouiltijkej pampa amo kinejkej kitlauelkauasej inintlaneltokilis san para ma kinmajkauakaj,* uan kiampa ueliskiaj kiselisej se nemilistli tlen más kuali kema moyolkuiskiaj. 36 Kena, sekinok tlaijiyouijkej kema kinpinajtijkej uan kinuijuitejkej, uan amo san nopa, nojkia kinilpijkej ika cadenas uan kintsajkej. 37 Kintepachojkej,* kiyejyekojkej inintlaneltokilis, kinuejuelojkej uan kinmiktijkej ika espada, ejeliuis* nentinenkej uan moyoyontiyayaj ika ininkuetlaxo borregojmej uan chivojmej, amo kipixtoyaj tlen ika mopanoltiskiaj, kiixnamikiyayaj tlaouijkayotl uan kintlaijiyouiltiyayaj, 38 uan katli itstoyaj ipan Tlaltipaktli amo kinamikiyaya itstosej ininuaya. Nentinenkej ipan uaktok tlali, ipan tepemej, ipan tekakauako* uan ipan uejueyi tlakoyoktli tlen eltok tlalijtik.

39 Uan maske tlaneltokakej uan nochi inijuantij kimatkej para Dios kuali kinitayaya, amo kiselijkej tlen kintenkauilijtoyaj, 40 pampa Dios ipa moiljuijtoya techmakas se tlamantli tlen más kuali, uan kiampa inijuantij amo ueliskiaj kinkixtilisej inintlajtlakoljuaj más achtoui que tojuantij.