Tlen kiijkuilok Lucas

6 Ipan se tonali sábado,* Jesús panoyaya kampa tlatojtoktoyaj, uan itokilijkauaj kimatekiyayaj tlen nopaya toktoya,* kimaoyayayaj uan kikuayayaj iyol. 2 Yeka, se keskij fariseos* kiiljuijkej: “¿Kenke motokilijkauaj kichiuaj tlen amo kinamiki mochiuas ipan sábado?”. 3 Pero Jesús kinnankilik: “¿Amo kema inkipojtokej tlen kichijkej David uan nopa tlakamej katli kipaleuiyayaj kema mayankej? 4 Ya kalajki ichaj Dios,* kiselik nopa pantsi tlen kimaktiliaj Dios, kikuajki uan kinmakak katli itstoyaj iuaya. Uan nopa amo aka kinamiki kichiuas, san uelis kikuasej sacerdotes”. 5 Uajka kiniljuik: “Katli eli iKone se Maseuali* kipia tlanauatili ipan sábado”.

6 Seyok sábado, kalajki kampa tlaueyichiuaj judíos uan pejki tlamachtia. Nopaya itstoya se tlakatl katli uipinijtoya* imanejmak. 7 Nopa escribas* uan fariseos san kitlachilijtoyaj pampa kinekiyayaj kiitasej tlaj kichikauaskia nopa tlakatl ipan sábado uan kiampa ueliskiaj kitlateljuisej. 8 Pero Jesús kimatiyaya tlake moyoliljuiyayaj, yeka kiiljuik nopa tlakatl katli mauipinijtoya: “Ximoketsa uan xiuala nikaj tlatlajko”. Ya moketski uan nopaya yajki moketsato. 9 Uajka Jesús kiniljuik: “Niinmechtlatsintokis se tlamantli. ¿Tlake ueli mochiua ipan sábado: tlen kuali o tlen amo kuali? ¿Tijmanauis se akajya o tijmiktis?”. 10 Uan kema kintlachilik katli nopaya itstoyaj, kiiljuik nopa tlakatl: “Ximomaxitlaua”. Kema momaxitlajki, mokualtilik imax. 11 Inijuantij tlauel kualankej uan pejkej mokamanaljuiaj tlake ueliskia kichiuilisej Jesús.

12 Se tlen nopa tonali, yajki momaijtoto* ipan se tepetl, uan seyoual momaijtok ika Dios. 13 Kema tlaneski, kinnotski itokilijkauaj uan kintlapejpenik 12 tlen inijuantij, katli kintokaxtik apóstoles: 14 Simón (katli nojkia kitokaxtik Pedro), iikni Andrés, Santiago, Juan, Felipe, Bartolomé, 15 Mateo, Tomás, Santiago ikone Alfeo, Simón (katli kiiljuiaj tlauel kipaktia tlatekipanos), 16 Judas* ikone Santiago, uan Judas Iscariote (katli teipa kitemaktilik).

17 Teipa ixtemok ininuaya uan mokajki kampa tlamaya. Nopaya itstoyaj miakej itokilijkauaj uan tlauel miakej maseualmej katli euayayaj Judea, Jerusalén uan tlali Tiro uan Sidón, tlen eltok nechka mar. Ualajtoyaj para kitlakakilisej uan para ma kinchikaua. 18 Hasta mochikauayayaj katli tlaijiyouiyayaj pampa kinpixtoyaj amo kuali ajakamej.* 19 Uan nochi maseualmej kinekiyayaj kiitskisej pampa ipan ya kisayaya se chikaualistli tlen nochi kinchikauayaya.

20 Uajka moixtlananki, kinixtlachilik itokilijkauaj uan kiijtok:

“Inyolpakij inmojuantij, katli amo tleno inkipiaj, pampa iTlanauatijkayo Dios eli inmoaxka.

21 ”Inyolpakij inmojuantij, katli nama inmayanaj, pampa inixuisej.

”Inyolpakij inmojuantij, katli nama inchokaj, pampa inuetskasej.

22 ”Inyolpakij inmojuantij kema maseualmej inmechkualankaitasej, inmechuejkamajkauasej, inmechtlaijiljuisej, uan kisokiuisej inmotoka pampa inkineltokaj katli eli iKone se Maseuali.* 23 ”Xiyolpakikaj kema kiampa panos uan xiuitonikaj ika pakilistli, pampa xikitakaj, inkiselisej se ueyi tlateochiualistli ne iluikak, pampa inintatauaj katli uejkajkia itstoyaj ya nopa kinchiuiliyayaj teokamanalouanij.*

24 ”Pero, ¡inteikneltikej inmojuantij, katli intlatominpiaj, pampa tlen ya inkipixtokej san ya nopa inkiselisej!

25 ”¡Inteikneltikej inmojuantij, katli nama inixuitokej, pampa inmayanasej!

”¡Inteikneltikej inmojuantij, katli nama inuetskaj, pampa inmokuesosej uan inchokasej!

26 ”¡Inteikneltikej kema nochi kamanaltisej kuali tlen inmojuantij, pampa ya nopa tlen inintatauaj katli uejkajkia itstoyaj kichijkej ika katli amo nelnelia eliyayaj teokamanalouanij!*

27 ”Pero inmojuantij katli innechtlakakiliaj, na niinmechiljuia xikiniknelijtokaj katli inmechkualankaitaj, xikinchiuilijtokaj tlen kuali katli inmechkokoliaj, 28 xijtlajtlanijtokaj Dios ma kinteochiua katli inmechtelchiuaj uan ximomaijtojtokaj por inijuantij katli inmechtlaijiljuiaj. 29 Katli mitsixtlatsinis* ipan se mokampa, xijnextili ne seyok. Uan katli mitskixtilis moyoyo tlen ika timoajkoluijkoma,* nojkia xijmaka moyoyo tlen ueueyak.* 30 Katli mitstlajtlania se tlenijki, xijmaka. Uan katli mitskixtilia tlen moaxka, amo xijtlajtlani ma mitskuepili.

31 ”Nojkia, xikinchiuilikaj sekinok nochi tlen inmechpaktiskia ma inmechchiuilikaj”.

32 ”Tlaj san inkinikneliaj katli inmechikneliaj, ¿kenijkatsa inmechpaleuia nopa? Pampa hasta tlajtlakolchiuanij kinikneliaj katli nojkia kinikneliaj. 33 Tlaj san inkinchiuiliaj tlen kuali katli inmechchiuiliaj tlen kuali, ¿kenijkatsa inmechpaleuia nopa? Hasta tlajtlakolchiuanij kiampa kichiuaj. 34 Uan tlaj inkintlanejtiaj* se tlenijki katli inmoiljuiaj inmechkuepilisej, ¿kenijkatsa inmechpaleuia nopa? Hasta tlajtlakolchiuanij kintlanejtiaj sekinok tlajtlakolchiuanij para sampa ma kinkuepilikaj. 35 Pero inmojuantij xikiniknelijtokaj katli inmechkualankaitaj, xijchijtokaj tlen kuali, xitetlanejtikaj uan amo xijchiakaj sampa ma inmechkuepilikaj. Uajka inkiselisej ueyi tlateochiualistli uan inelisej ikoneuaj katli Más Ueyi, pampa ya tlauel kuali iyolo hasta ininuaya katli amo tetlaskamatij uan katli amo kuajkualmej. 36 Nochipa xitetlasojtlakaj, sanse kej inmoTata tetlasojtla.

37 ”Nojkia, ayokmo xiteijilnamikikaj, uan kiampa amo kema inmechijilnamikisej. Inmojuantij inkiijtouaj ma kintlatsakuiltikaj sekinok. Ayokmo kiampa xikijtokaj, kiampa Dios amo kiijtos moneki inmechtlatsakuiltisej. Xitetlapojpoljuijtokaj uan inmechtlapojpoljuisej. 38 Ximomatikaj intemakasej se tlenijki uan nojkia inmechmakasej. Inmechtemilisej kampa mokuelpachoua inmoyoyo* se tlatlamachiuali* kuali temitok, tlen kuali kitsojtsonpechijtokej, tlen kitsejtselojtokej* uan kuali kitsontijtokej. Pampa tlen ika inkintlamachiuilisej sekinok, ika ya nopa nojkia inmechtlamachiuilisej”.

39 Uajka kiniljuik ni neskayotl: “Se katli amo tlachia amo uelis kiyakanas seyok katli nojkia amo tlachia, ¿axke? Pampa nochi omej uetsiskiaj ipan se ostotl. 40 Se katli momachtia amo más kitlepanitaj kej itlamachtijka, pero nochi katli kuali momachtijtokej elisej kej inintlamachtijka. 41 ¿Kenke tijtlachilia nopa tejtli tlen moikni kipia ipan iixteyol, uan amo tijtlachilia nopa viga* tlen tijpixtok ipan moixteyol? 42 ¿Kenijkatsa uelis tikiljuis moikni ‘Noikni, xinechkaua ma nimitskixtili nopa tejtli ipan moixteyol’, tlaj ta amo tikita nopa viga tlen tijpia ipan moixteyol? ¡Tijpia ome moxayak! Achtoui ximokixtili nopa viga tlen tijpia, kiampa kuali tikitas kenijkatsa tijkixtilis nopa tejtli tlen moikni kipixtok ipan iixteyol.

43 ”Yon se kuali kuauitl temaka itlajka lochontok, uan yon se kuauitl tlen palantok temaka kuali itlajka. 44 Pampa sejse kuauitl kiixmatij ika itlajka. Amo kitekij higos yon uvas ipan se xiuitl tlen kipia iuitstso. 45 Se akajya katli yolkuali, kiijtoua tlen kuali pampa ya nopa eltok ipan iyolo; pero se akajya katli amo yolkuali, kiijtoua tlen amo kuali pampa ya nopa eltok ipan iyolo. Pampa tlen kiijtoua ya nopa eltok ipan iyolo.

46 ”Uajka, ¿kenke innechiljuiaj ‘¡noTeko! ¡noTeko!’ pero amo inkichiuaj tlen nikijtoua? 47 Niinmechiljuis kej ajkia eli nopa maseuali katli uala kampa na, kikaki tlen nikijtoua uan kichiua. 48 Eli kej se tlakatl katli tlaxajki uejkatla kema kichijchijki se kali, uan kitsinpeualtik ipan tetl. Yeka kema tlatemik, nopa ueyatl chikauak kitsouitejki nopa kali, pero amo uelki kiolinia pampa kuali kichijchijtoyaj. 49 Pero katli kitlakakilia tlen nikijtoua uan amo tleno kichiua, eli kej nopa tlakatl katli kichijchijki se kali tlalixko uan amo kitsinpeualtik. Nopa ueyatl chikauak kitsouitejki nopa kali, uan nimantsi uelonki. Tlamixolejki nopa kali”.