Nopa carta tlen kintitlanilijkej Cristo itokilijkauaj tlen Éfeso

2 Nojkia, Dios* inmechmakak nemilistli maske kejuak inmiktoyaj pampa intlaixpanotoyaj uan intlajtlakolchijtoyaj. 2 Nopa inkichiuayayaj kema inmonejnemiltiyayaj kej katli itstokej ipan Tlaltipaktli ipan ni tonali,* kema inkichiuayayaj kej nopa tlayakanketl katli kipia tlanauatili ika ajakatl, katli kiyakana nopa tlalnamikilistli tlen kichiua maseualmej amo ma tlaneltokakaj. 3 Kena, achtouia nochi tojuantij timonejnemiltiyayaj kej inijuantij pampa ya nopa kiyoltilanayaya totlakayo, tijchiuayayaj tlen totlakayo uan totlalnamikilis kinekiyaya. Uan desde kema titlakatkej kinamikiyaya Dios ma kinexti ikualankayo ika tojuantij kej kichiua ika sekinok. 4 Pero Dios, katli tlauel tetlasojtla, techiknelik miak 5 uan yeka techmakak nemilistli iuaya Cristo maske kejuak timiktoyaj pampa titlaixpanotoyaj, kena, ya inmechmakixtijtok pampa kinextia ueyi iyolo ika inmojuantij.* 6 Uan amo san nopa, nojkia techmakak nemilistli iuaya uan techmakatok se lugar kampa timoseuisej ne iluikak pampa tiitstokej iuaya Cristo Jesús, 7 kiampa ipan nopa tonali* tlen ualas, ya kinextis nelia tlauel ueyi iyolo ika tojuantij, kema techmakas miak tlamantli tlen kuali katli tiitstokej iuaya Cristo Jesús.

8 Dios kinextijtok ueyi iyolo ika inmojuantij,* yeka inmechmakixtijtok pampa intlaneltokaj. Pero amo pampa inmoselti inmotlanilijtokej, eli se regalo tlen Dios inmechmakatok. 9 Kena, amo inmechmakixtijkej pampa inkichiuaj tlen kuali, kiampa amo aka moueyimatis ika se tlamantli. 10 Tielij iteki Dios tlen techchijki ika imax uan tiitstokej iuaya Cristo Jesús para tijchiuasej tlamantli tlen kuali, tlen Dios ipa kiijtojtoya ma tijchiuakaj.

11 Uajka, xikilnamikikaj achtouia inmojuantij amo intlakatkej kej judíos, uan katli mochiuiliaj circuncisión inmechitayayaj kej katli amo mochiuiliaj circuncisión, tlen mochiuiliaj ipan inintlakayo uan san maseualmej kichiuaj. 12 Ipan nopa tonali amo inkiixmatiyayaj Cristo, amo initstoyaj ipan altepetl Israel, uan Dios amo kichijtoya se tlajtolsenkauali* inmouaya para inmechmakas tlen kitenkajtoya. Ipan Tlaltipaktli amo tleno inkichiayayaj uan amo inkiixmatiyayaj Dios. 13 Pero nama initstokej iuaya Cristo Jesús, uan maske achtouia amo inkiixmatiyayaj Dios, nama ya inkiixmatij pampa inmechpaleuia ieso Cristo. 14 Pampa ya kichiua ma tijpiakaj tlaseuilistli, kichijki nopa ome grupos ma mosansejkotilikaj uan kejuak kiuelonik* nopa tepamitl tlen eltoya tlatlajkotipa uan kinxelouayaya. 15 Ika itlakayo, kichijki ayokmo ma kipia ipati iTlanauatil Moisés tlen kipia miak piltlanauatiltsitsij uan kichiuayaya nopa ome grupos amo kuali ma mouikakaj. Kiampa kejuak kichijki san setsi tlakatl tlen yankuik ika nopa ome grupos katli itstokej iuaya uan kichijki kuali ma mouikakaj. 16 Uan ika nopa kuauitl kampa kitlaijiyouiltijkej,* kichijki ma moyoltlalikaj iuaya Dios nopa omej altepemej tlen mochijkej kejuak san setsi inintlakayo, pampa ika imikilis kiixpolok tlen kichiuayaya amo kuali ma mouikakaj. 17 Uan Cristo ualajki uan inmechmatiltiko nopa kuali tlamachtili tlen kichiua xijpiakaj tlaseuilistli, inmojuantij katli amo inkiixmatiyayaj Dios uan nojkia katli ipa kiixmatiyayaj, 18 pampa ika ya, nochi katli tiitstokej ipan nopa ome altepemej ayokmo tleno techtsakuilia para ma timonechkauikaj ika toTata pampa tijseliaj san setsi ichikaualis Dios.*

19 Uajka, inmojuantij ya inmechixmatij uan ayokmo inelij sejkanok* euanij, nama initstokej ipan sanse altepetl ininuaya katli Dios kiniyokatlalijtok* uan inelij ichampoyouaj* Dios, 20 inelij kejuak se kali tlen kiketstokej ipan apóstoles uan teokamanalouanij,* uan Cristo Jesús eli nopa ueyi tetl kampa nochi motsintetonia. 21 Initstokej iuaya Cristo, uan yeka nochi nopa kali tlen kuali mosalojtok moskaltijtia hasta mochiuas se templo tlatsejtseloltik* para Jehová.* 22 Initstokej iuaya Cristo, uan yeka inmojuantij uan nopa sekinok, Dios inmechchijtok kejuak se kali kampa ya itstok, pampa ichikaualis* nopaya eltok.