Nopa achtoui carta tlen kintitlanilijkej Cristo itokilijkauaj tlen Tesalónica

5 Uajka noikniuaj, amo moneki ma inmechtlajkuiljuilikaj yon se tlamantli tlen nopa tonali tlen kiixtlalijtokej, 2 pampa inmojuantij kuali inkimatij nopa tonali tlen iaxka Jehová* temachtli ualas kej se tlachtejketl ika tlayoua. 3 Kema kiijtojtosej “¡Onka tlaseuilistli uan ayokmo tleno techtekipachoua!”,* uajka sanima* kintsontlamiltisej, kej kema se siuatl peua itlakuajkualol pampa nechka konepias, uan amo aka uelis mochololtis. 4 Pero inmojuantij noikniuaj, amo initstokej ipan tsintlayouilotl para ma inmechichtakauiki nopa tonali sanse kej kema nopa tlachtekinij kinichtakauia kema tlanestiuetsi. 5 Pampa nochi inmojuantij inelij ikoneuaj tlauili uan ikoneuaj tonaya. Tojuantij amo tielij iaxkauaj youali yon tsintlayouilotl.

6 Yeka, ayokmo kejuak ma tikochikaj kej sekinok kichiuaj. Ma titlachixtokaj uan ma tijnextikaj kuali titlalnamikij. 7 Katli kochij, kochij ika tlayoua uan katli moiuintiaj, iuintij ika tlayoua. 8 Pero tojuantij katli tielij iaxkauaj tonaya, ma tijnextikaj kuali titlalnamikij, kuali ma titlaneltokakaj uan ma titeiknelikaj sanse kej kema timotlaliliskiaj nopa tepostli tlen kitsakua nochi toyolix.* Uan ma timotemachikaj timomakixtisej sanse kej kema timotlaliliaj totepostsontsajka,* 9 pampa Dios* amo techtlapejpenik para titlaijiyouisej kema kiualikas ikualankayo, ya techtlapejpenik para timomanauisej ika toTeko Jesucristo. 10 Ya mijki por tojuantij, kiampa maske tiisatosej* o tikochtosej,* tiitstosej iuaya. 11 Yeka nojua ximoyolchikajtokaj uan ximopaleuijtokaj se ika seyok kej ya inkichijtiualauij.

12 Noikniuaj, nama tiinmechtlajtlaniaj xikintlepanitakaj katli tekitij chikauak kampa inmojuantij, katli inmechyakanaj ipan iteki toTeko uan inmechtlajtolmakaj. 13 Xijnextikaj tlauel inkinpatiitaj uan xikiniknelikaj por nopa tekitl tlen kichiuaj. Nojkia xiitstokaj ika tlaseuilistli se ika seyok. 14 Noikniuaj, nojkia tiinmechtlajtlaniaj xikintlalnamiktikaj katli amo tlakakij, xikinyolchikauakaj katli moyolkuesouaj, xikinpaleuikaj katli amo tetikej uan xijpiakaj inmoyolo ika nochi. 15 Kuali xikitakaj amo aka ma momakuepa, más kuali xijchiuakaj kampeka nochipa inmochiuilisej tlen kuali se ika seyok uan nojkia nochi nopa sekinok.

16 Nochipa xiyolpaktokaj. 17 Ajachika* ximomaijtokaj.* 18 Nochipa xijtlaskamatilikaj Dios ika nochi. Ya ni tlen Dios kineki para itokilijkauaj Cristo Jesús. 19 Amo xijkauakaj ma seui nopa tlitl tlen ichikaualis Dios* kipia. 20 Amo xijuejkamajkauakaj nopa tlajtoli tlen uala tlen Dios. 21 Kuali xikitakaj nochi tlamantli uan ximotlatskilikaj ika tlen kuali. 22 Amo xijchiuakaj yon se tlamantli tlen amo kuali.

23 Dios katli temaka tlaseuilistli senkistok ma inmechiyokatlali* para inkichiuasej iteki. Uan noikniuaj, ma elto tlapajpaktik uan senkistok kuali inmotlalnamikilis, inmonemilis* uan inmotlakayo hasta kema tlakuepilis toTeko Jesucristo. 24 Katli inmechnotsa eli temachtli, uan nelnelia kichiuas.

25 Noikniuaj, nojua ximomaijtojtokaj por tojuantij.

26 Xikintlajpalokaj nochi toikniuaj uan ximotsoponikaj kej iniknimej.

27 Ipan itoka toTeko, xitlauak niinmechnauatia ma kinpouilikaj ni carta nochi toikniuaj.

28 ToTeko Jesucristo ma kinexti ueyi iyolo ika inmojuantij.*