‘Ma tijnextikaj melauak titeikneliaj’

 1. ¿Tlake tlaiknelili moneki tijnextisej, uan kenke tlauel ipati? (Xikita nopa achtoui tlaixkopinkayomej).

JEHOVÁ kichijtok nochi ma tijnextikaj tlaiknelili (1 Juan 4:7). Nopa tlaiknelili tlen tijnextiaj moyakana ika tlen Biblia tlanauatia uan kitokaxtiaj agápe. Ni tlaiknelili amo san tijyolmatij, nojkia tijnextiaj ika tlen tijchiuaj kema tikinpaleuiaj sekinok, uan ni tijchiuaj ika nochi toyolo uan amo pampa tijnekij tijselisej se tlenijki. Se diccionario kiijtoua nopa tlajtoli agápe “san nesi kema se akajya kichiua miak tlamantli tlen ika tepaleuia”. Kema tijnextiaj ni tlaiknelili, kichiua tlauel ma tiyolpakikaj uan kuali ma tijyolmatikaj.

2, 3. ¿Kenijkatsa kinextijtok Jehová tlauel kiniknelia maseualmej?

² Jehová kinextik kinikneliyaya maseualmej maske ayamo kinchijchijtoya Adán uan Eva. Ni tijmatij pampa kichijchijki Tlaltipaktli kampa ueliskia nochipa tiitstosej, uan kichijki ma onka miak tlamantli tlen techpaleuiskia ma tiitstokaj uan ma tiyolpakikaj. Tlen kichijki kinextia kinekiyaya kuali ma tiitstokaj tojuantij, uan amo pampa ya kinekiyaya kuali itstos. Uan nojkia kinekiyaya maseualmej ma itstokaj nochipa ipan se xochimili.

³ Kema Adán uan Eva kiixpanokej, Jehová kichijki se tlamantli tlen ika kinextik tlauel teiknelia. Kinejki kinmakixtis maseualmej pampa kimajtoya se keskij kena tlauel kiikneliskiaj (Gén. 3:15; 1 Juan 4:10). Kema kiijtok ualaskia se akajya katli techmakixtiskia, Jehová kiitak kejuak ya temaktilijtoya iKone. Kema panok se 4,000 xiuitl, maske tlauel kiyolkokok, ya temaktilik iyojtsi iKone uan kiampa kinmakixtik maseualmej (Juan 3:16). ¡Tlauel tijtlaskamatiliaj Jehová pampa kinextijtok nelia tlauel techiknelia!

 4. ¿Kenijkatsa tijmatij uelis tijnextisej titeikneliaj kej Jehová kichiua?

⁴ Tojuantij nojkia tiuelij tijnextiaj nopa tlaiknelili pampa toTeotsij techchijchijki kej itlachialis. Maske kemantika ouij tijnextisej pampa titlajtlakolejkej, kena uelis tijchiuasej. Abel kinextik kiikneliyaya toTeotsij kema kimakak tlen kuali katli kipixtoya (Gén. 4:3, 4). Noé nojkia kinextik kinikneliyaya maseualmej kema miak xiuitl kinmatiltik tlen panoskia maske amo kitlakakilijkej (2 Ped. 2:5). Uan Abraham kinextik san Jehová tlauel kiikneliyaya kema kinejki kimaktilis ikone Isaac (Sant. 2:21). Maske kemantika ouij, nojkia uelis tijnextisej titeikneliaj kej kichijkej nopa tlakamej.

 5. ¿Kenijkatsa uelis tijnextisej nelia titeikneliaj?

⁵ Biblia kiijtoua kenijkatsa uelis tijnextisej nelia titeikneliaj. Kiijtoua amo san ‘tikijtosej tikinikneliaj’ sekinok, moneki ‘tijnextisej melauak tikinikneliaj ika tlen tikinchiuiliaj’ (1 Juan 3:18). Ni amo kiijtosneki amo uelis tijnextisej titeikneliaj ika tlen tikijtouaj (1 Tes. 4:18). Kiijtosneki amo nochipa kinamiki san tikiljuisej se akajya kenijkatsa tlauel tikikneliaj, nojkia moneki tijnextilisej ika tlen tijchiuaj. Se toikni katli amo kipia tlen ika mopanoltis, amo san kinamiki tijyolchikauasej ika tlen tikiljuisej (Sant. 2:15, 16). Nojkia, pampa tikikneliaj toTeotsij uan tikinikneliaj maseualmej, amo san tikiljuiaj Jehová ma kintitlani tlajtolmoyauanij, nojkia tojuantij tijchiuaj kampeka tlauel titlajtolmoyauasej (Mat. 9:38).

6, 7. 1) ¿Tlake kiijtosneki “nelia” titeiknelisej uan ‘axsan timochiuasej’? 2) ¿Ajkia inijuantij kinextijkej amo nelia teikneliyayaj?

⁶ Apóstol Juan kiijtok moneki ma tijnextikaj “melauak” titeikneliaj. Uajka, kinamiki “nelia” titeiknelisej uan ‘axsan timochiuasej’ (Rom. 12:9; 2 Cor. 6:6). Ni kinextia amo kinamiki san titlachiuasej titeikneliaj maske amo nelia, kejuak timotlalilijtoskiaj se máscara. Tlaj kiampa tijchiuaskiaj, tijnextiskiaj amo nelia titeikneliaj uan san tlapik tlen tijchiuaskiaj.

⁷ Ma tikitakaj kenijkatsa se keskij kinextijkej amo nelia teikneliyayaj. Kema Satanás kamanaltik iuaya Eva, kinextik kejuak nelia kinekiyaya kuali ma itsto. Maske kiampa kichijki, ya san kikajkayauayaya pampa kinekiyaya kiselis se tlenijki (Gén. 3:4, 5). Uan kema David itstoya, Ahitofel tlachiuayaya kejuak eliyaya iuampo uan teipa kitlauelkajki kema kiitak ueliskia kiselis sekinok tlamantli (2 Sam. 15:31). Ipan ni tonali, apóstatas uan sekinok maseualmej “kamatij yejyektsi” pampa kinekij kinxelosej toikniuaj ipan tlanechikoli uan kinuejkapantlaliaj sekinok toikniuaj pampa kinekij ma moiljuikaj nelia kinikneliaj. Kichiuaj nopa pampa kinekij toikniuaj ma kichiuakaj tlen inijuantij kinekij (Rom. 16:17, 18).

 8. ¿Tlake moneki timotlajtlanisej?

⁸ Tlauel amo kuali kema se akajya kinextia teiknelia san pampa kineki se tlamantli o san pampa kineki tlakajkayauas. Maske se akajya kinkajkayaua sekinok, amo kema uelis kikajkayauas Jehová. Jesús kiijtok toTeotsij “tlauel kitlatsakuiltis” katli kipia ome ixayak (Mat. 24:51). Katli tijtekipanouaj Jehová amo kema tijnekij tijchiuasej nopa. Yeka moneki ma timotlajtlanikaj: “¿Nochipa nijnextia nelia niteiknelia o san nitlachiua pampa nijneki nijselis se tlenijki?”. Ma tikitakaj chiknaui tlamantli kampa uelis tijnextisej nelia titeikneliaj.

 9. ¿Tlake tijchiuasej tlaj nelia tikinikneliaj toikniuaj?

⁹ Ma titlatekipanokaj ika nochi toyolo maske sekinok amo kiitasej. Moneki tijnekisej tijchiuasej se keski tlamantli tlen kinpaleuis toikniuaj maske amo aka kimatis tlen tijchiuaj (xijpoua Mateo 6:1-4). Ananías uan Safira amo kiampa kichijkej. Kinejkej nochi ma kimatikaj inijuantij temakatoyaj tomij uan kinejkej tlakajkayauasej pampa kiijtojkej tlauel miak temakatoyaj. Yeka, toTeotsij kintlatsakuiltik pampa kipixkej ome ininixayak (Hech. 5:1-10). Tlaj nelia tikinikneliaj toikniuaj, ika miak pakilistli tikinpaleuisej uan amo tikiniljuisej sekinok tlake tijchijkej. Uelis tijchiuasej kej katli kinpaleuiaj Katli kinyakanaj Jehová itlajtoltemakauaj, inijuantij amo kiijtouaj tlake kichiuaj o ipan tlake tekitij maske tlapaleuiaj ma mochijchiua tlamachtili.

10. ¿Kenijkatsa uelis tijnextisej tikinpatiitaj sekinok?

¹⁰ Ma tijnextikaj tikinpatiitaj sekinok (xijpoua Romanos 12:10). Jesús kuali kinextik ni kema kinikxipajpajki iapóstoles (Juan 13:3-5, 12-15). Inijuantij kikuamachilijkej tlen Jesús kichijtoya kema kiselijkej toTeotsij itonal (Juan 13:7). Kej Jesús, tojuantij nojkia kinamiki amo timoueyimatisej uan tijnextisej tikinpatiitaj sekinok. Ni uelis tijchiuasej tlaj amo timoiljuisej san tojuantij tlauel topati pampa tlauel tiixtlamatij, pampa tijpiaj miak tlamantli o pampa tlauel techtekimakatokej ipan Jehová itlanechikol (Rom. 12:3). Uan amo kinamiki tikinkokolisej sekinok san pampa inijuantij kena kinuejkapantlaliaj, kinamiki tiyolpakisej maske timoiljuiaj nojkia kinamiki ma techtlaskamatilikaj o ma techpatiitakaj.

11. ¿Kenijkatsa kinamiki tikiniljuisej toikniuaj kuali tlen kichijkej?

¹¹ Ika nochi toyolo ma tikiniljuikaj kuali tlen kichiuaj. Kinamiki nochipa tikiniljuisej toikniuaj tlake tlamantli kuali kichiuaj, tlaj kiampa tijchiuasej tlauel tikinyolchikauasej (Efes. 4:29). Moneki tikiniljuisej ika nochi toyolo uan amo san pampa tijnekij tikinuejkapantlalisej. Nojkia amo kinamiki tikijtosej tlen amo nelia tijyolmatij, uan kema monekis, ma tikintlajtolmakakaj (Prov. 29:5). Tlaj kuali tikamanaltiskiaj tlen se toikni kema tiitstokej iuaya uan san tikijilnamikiskiaj kema amo itstok, tijnextiskiaj tijpiaj ome toixayak. Apóstol Pablo kinextik kenijkatsa uelis titeiknelisej ika nochi toyolo. Se tonali, kiniljuik toikniuaj tlen Corinto tlake kuali tlamantli kichiuayayaj. Nojkia kintlajtolmakak uan ika miak tlaiknelili kiniljuik tlake amo kuali tlamantli kichiuayayaj (1 Cor. 11:2, 20-22).

12. ¿Kenijkatsa uelis tijnextisej nelia titeikneliaj kema tikinpaleuiaj sekinok?

¹² Kuali ma tikinselikaj sekinok. Jehová technauatia ma tijchiuakaj ni ika toikniuaj uan ma tikinmakakaj tlen tijpiaj (xijpoua 1 Juan 3:17). Moneki tijchiuasej ika nochi toyolo uan amo pampa tijnekisej ma techmakakaj se tlenijki. Ma timotlajtlanikaj: “¿Kuali nikinselia san nouampoyouaj uan katli tlauel nikinpatiita ipan tlanechikoli? ¿Nikintlaneui nochaj san katli teipa uelis nechpaleuisej? ¿O nijchiua kampeka nikintlaneuis toikniuaj katli amo kuali nikinixmati o katli amo kipiaj miak tlamantli?” (Luc. 14:12-14). Ximoiljui se toikni moneki ma kipaleuikaj pampa amo kuali kitlapejpenik tlen kichijki o se toikni katli miakpa tijtlaneuij tochaj amo kema techtlaskamatilia. ¿Tlake tijchiuaskia? 1 Pedro 4:9 kiijtoua: “Ximoselikaj se ika seyok kema inmopaxalouaj. Xikintlamakakaj uan xikinmakakaj kampa mokauasej tlaneltokanij tlen asij kampa inmojuantij, uan amo ximokuesijkaitakaj”. Tlaj tijchiuasej tlen techtlajtolmaka ni texto, tlauel tiyolpakisej pampa tikinpaleuijtosej toikniuaj ika nochi toyolo (Hech. 20:35).

13. 1) ¿Kema monekis tijnextisej tijpiaj toyolo? 2) ¿Kenijkatsa uelis tikinpaleuisej katli ayamo kuali tlaneltokaj?

¹³ Ma tikinpaleuikaj katli amo kuali tlaneltokaj. Uelis tikinnextilisej nelia tikinikneliaj tlaj tijchiuasej tlen Biblia techtlajtolmaka: “Xikinpaleuikaj tlen aya nelkuali kineltokaj toTeko. Uan xijpiakaj inmoyolo ika nochi tlakamej” (1 Tes. 5:14). Maske namantsi amo, teipa miakej toikniuaj tlauel kuali tlaneltokasej. Uan ika sekinok toikniuaj moneki tijpiasej toyolo uan nojua tikinpaleuijtosej. ¿Kenijkatsa uelis tijchiuasej? Uelis tikinyolchikauasej ika Biblia, titlajtolmoyauasej ininuaya o tikintlakakilisej kema techiljuisej tlen kiyolmatij. Amo kinamiki tikijtosej se keskij kena tlauel kuali tlaneltokaj uan sekinok amo. Moneki tikilnamikisej nochi techpoloua se keski tlamantli. Pablo nojkia kiijtok monekiyaya ma kipaleuikaj ipan se keski tlamantli (2 Cor. 12:9, 10). Uajka, nochi moneki ma techpaleuikaj uan ma techyolchikauakaj.

14. ¿Tlake moneki tijchiuasej tlaj tijnekij tiitstosej ika tlaseuilistli ininuaya toikniuaj?

¹⁴ Ma tiitstokaj ika tlaseuilistli. Moneki tijchiuasej kampeka tiitstosej ika tlaseuilistli ipan tlanechikoli maske se akajya techijilnamiki o techyolkokoua (xijpoua Romanos 12:17, 18). Tlaj tojuantij tijyolkokouaj se akajya, moneki ika nochi toyolo tikiljuisej ma techtlapojpoljui. Tlaj timoiljuijtoyaj tikiljuisej: “Amo kuali nijyolmati pampa timoyolkokok”, kualtiaskia ma tikiljuikaj: “Amo kuali nijyolmati pampa nimitsyolkokok”. Uan katli mosenkajtokej nojkia tlauel moneki itstosej ika tlaseuilistli. Amo kinamiki kinextisej moikneliaj san kema itstokej ininuaya sekinok uan ipan ininchaj san monajnankiliaj, momakiliaj o amo monojnotsaj.

15. ¿Kenijkatsa uelis tijnextisej titetlapojpoljuiaj ika nochi toyolo?

¹⁵ Ma tijnekikaj titetlapojpoljuisej. Tlaj se akajya techchiuilia se tlamantli, maske uelis amo kiitak tlen kichijki, moneki tijtlapojpoljuisej uan tikilkauasej tlen techchiuilik. Cristo itokilijkauaj kichiuaj tlen kiijtoua ni texto: “Sejse inmojuantij xikijiyouikaj kema seyok inmoikni kichiua o kiijtoua se tlamantli [...,] kej nopa inkinextilisej inkiikneliaj. Ika itlapaleuil itonal toTeko, xijchiuakaj kampeka inkipiasej sanse inmotlalnamikilis. Uan kej nopa inkipiasej tlaseuilistli” (Efes. 4:2, 3). Se akajya katli tetlapojpoljuia ika nochi iyolo, kuali kinauatia itlalnamikilis uan “axkichiuilia cuenta kema seyok kichiuilia tlen axkuali” (1 Cor. 13:4, 5). Tlaj uejkaua tikualantokej, ayokmo kuali timouikasej iuaya toikni yon iuaya Jehová (Mat. 6:14, 15). Nojkia tijnextisej titetlapojpoljuiaj ika nochi toyolo tlaj kema timomaijtosej tikiljuisej toTeotsij ma kinpaleui katli techixpanoj (Luc. 6:27, 28).

16. ¿Kenijkatsa uelis tijnextisej titeikneliaj kema techmakasej se tekitl ipan Jehová itlanechikol?

¹⁶ Ma tijchiuakaj tlen kinpaleuis sekinok maske uelis tojuantij amo techpaleuis. Tlaj ipan Jehová itlanechikol techmakaj se tekitl, ¿kenijkatsa uelis tijnextisej ika nopa tekitl nelia tlauel titeikneliaj? Moneki tijchiuasej tlen kiijtoua 1 Corintios 10:24: “Axaka ma kitemo tlen kuali para ya iselti, [...] ma tijchiuakaj tlen kinpaleuis sekinok”. Ma timoiljuikaj ipan toikniuaj katli teseliaj ipan se ueyi tlanechikolistli. Maske inijuantij achtoui kalakij kampa timosentilisej uan uelis kinekiskiaj kitlapejpenisej moseuisej ininuaya ininchampoyouaj kampa tlauel tlakualka, miakej amo kiampa kichiuaj uan moseuiaj nechka kampa tlapaleuijtokej maske uelis amo tlauel tlakualka. Kiampa kinextiaj nelia teikneliaj uan kichiuaj tlen sekinok kinpaleuia. ¿Kenijkatsa nojkia uelis tijchiuas kej inijuantij?

17. ¿Tlake kichiuas se akajya katli tlajtlakolchijtok tlaj nelia teiknelia?

¹⁷ Ma tikijtokaj totlajtlakoljuaj tlen ichtakatsi tijchijtokej uan ayokmo ma tijchiuakaj. Sekij katli ichtakatsi kichijtokej se ueyi tlajtlakoli amo tleno kiijtouaj pampa amo kinekij mopinaualtisej o kinyolkokosej sekinok (Prov. 28:13). Kema kiampa kichiuaj kinextiaj amo nelia teikneliaj, pampa kichiuaj ma kinpano tlen amo kuali inijuantij uan nojkia sekinok. ToTeotsij itonal ayokmo kuali tekiti ipan tlanechikoli uan nopa kichiua ayokmo ma itstokaj ika tlaseuilistli (Efes. 4:30). Tlaj katli tlajtlakolchijtok nelia teiknelia, uajka kiniljuis ueuejtlakamej tlake kichijtok uan inijuantij uelis kipaleuisej (Sant. 5:14, 15).

18. ¿Kenke tlaiknelili tlauel ipati?

¹⁸ Tlaiknelili eli se kuali tlamantli tlen nelia tlauel ipati (1 Cor. 13:13). Kema titeikneliaj, sekinok kiitaj nelia tielij Jesús itokilijkauaj uan nelia tijchiuaj kej Jehová, katli kichiua ma onka tlaiknelili (Efes. 5:1, 2). Pablo kiijtok: “Intla axniteiknelia, axtleno nopati” (1 Cor. 13:2). Uajka, nochipa ma tijnextikaj titeikneliaj, amo san ma tikijtokaj, ‘moneki ma tijnextikaj melauak tikinikneliaj ika tlen kuali tikinchiuiliaj’.